၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၅၅. ဟေတုဉ္စေဝ သဟေတုကဉ္စ အကုသလံ ဓမ္မံ ပဋိစ္စ ဟေတု စေဝ သဟေတုကော စ အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၅၆. ဟေတုယာ နဝ၊ အာရမ္မဏေ နဝ။ပေ။ ကမ္မေ နဝ၊ အာဟာရေ နဝ။ပေ။ အဝိဂတေ နဝ (သံခိတ္တံ).

နအဓိပတိပစ္စယော

၅၇. ဟေတုဉ္စေဝ သဟေတုကဉ္စ အကုသလံ ဓမ္မံ ပဋိစ္စ ဟေတု စေဝ သဟေတုကော စ အကုသလော ဓမ္မော ဥပ္ပဇ္ဇတိ နအဓိပတိပစ္စယာ။ နဝ (သံခိတ္တံ).

၅၈. နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ).

ဟေတုပစ္စယာ နအဓိပတိယာ နဝ (သံခိတ္တံ).

နအဓိပတိပစ္စယာ ဟေတုယာ နဝ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)