၇. ပဉှာဝါရော
ပစ္စယစတုက္ကံ
ဟေတုပစ္စယော
၅၉. ဟေတု စေဝ သဟေတုကော စ အကုသလော ဓမ္မော ဟေတုဿ စေဝ သဟေတုကဿ စ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).
၆၀. ဟေတုယာ တီဏိ၊ အာရမ္မဏေ နဝ။ပေ။ အာသေဝနေ နဝ၊ ကမ္မေ တီဏိ၊ အာဟာရေ တီဏိ၊ ဣန္ဒြိယေ ဈာနေ မဂ္ဂေ တီဏိ၊ သမ္ပယုတ္တေ နဝ။ပေ။ အဝိဂတေ နဝ (သံခိတ္တံ).
ပစ္စနီယုဒ္ဓါရော
၆၁. ဟေတု စေဝ သဟေတုကော စ အကုသလော ဓမ္မော ဟေတုဿ စေဝ သဟေတုကဿ စ အကုသလဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော.
၆၂. နဟေတုယာ နဝ၊ နအာရမ္မဏေ နဝ။ပေ။ နောအဝိဂတေ နဝ (သံခိတ္တံ).
ဟေတုပစ္စယာ နအာရမ္မဏေ တီဏိ (သံခိတ္တံ).
နဟေတုပစ္စယာ အာရမ္မဏေ နဝ (သံခိတ္တံ).
(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)