၁-၆. ပဋိစ္စဝါရာဒိ

ပစ္စယစတုက္ကံ

ဟေတု-အာရမ္မဏပစ္စယာ

၃၁. ဟေတုသမ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဟေတုဝိပ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဟေတုသမ္ပယုတ္တံ အကုသလဉ္စ ဟေတုဝိပ္ပယုတ္တံ အကုသလဉ္စ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

ဟေတုသမ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ. (၃)

ဟေတုဝိပ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ အာရမ္မဏပစ္စယာ. (၁)

ဟေတုသမ္ပယုတ္တံ အကုသလဉ္စ ဟေတုဝိပ္ပယုတ္တံ အကုသလဉ္စ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ အာရမ္မဏပစ္စယာ. (၁)

ဟေတုသမ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ အဓိပတိပစ္စယာ (သံခိတ္တံ).

၃၂. ဟေတုယာ တီဏိ၊ အာရမ္မဏေ ပဉ္စ၊ အဓိပတိယာ ဧကံ၊ အနန္တရေ ပဉ္စ၊ သမနန္တရေ ပဉ္စ၊ သဟဇာတေ ပဉ္စ၊ အညမညေ ပဉ္စ၊ နိဿယေ ပဉ္စ၊ ဥပနိဿယေ ပဉ္စ၊ ပုရေဇာတေ ပဉ္စ၊ အာသေဝနေ ပဉ္စ၊ ကမ္မေ ပဉ္စ၊ အာဟာရေ ပဉ္စ၊ ဣန္ဒြိယေ ပဉ္စ၊ ဈာနေ ပဉ္စ၊ မဂ္ဂေ ပဉ္စ၊ သမ္ပယုတ္တေ ပဉ္စ၊ ဝိပ္ပယုတ္တေ ပဉ္စ၊ အတ္ထိယာ ပဉ္စ။ပေ။ အဝိဂတေ ပဉ္စ (သံခိတ္တံ).

နဟေတု-နအဓိပတိပစ္စယာ

၃၃. ဟေတုသမ္ပယုတ္တံ အကုသလံ ဓမ္မံ ပဋိစ္စ ဟေတုဝိပ္ပယုတ္တော အကုသလော ဓမ္မော ဥပ္ပဇ္ဇတိ နဟေတုပစ္စယာ. (၁)

ဟေတုသမ္ပယုတ္တံ အကုသလံ ဓမ္မံ ပဋိစ္စ ဟေတုသမ္ပယုတ္တော အကုသလော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၃၄. နဟေတုယာ ဧကံ၊ နအဓိပတိယာ ပဉ္စ၊ နပုရေဇာတေ ပဉ္စ၊ နပစ္ဆာဇာတေ ပဉ္စ၊ နအာသေဝနေ ပဉ္စ၊ နကမ္မေ တီဏိ၊ နဝိပါကေ ပဉ္စ၊ နဝိပ္ပယုတ္တေ ပဉ္စ (သံခိတ္တံ).

ဟေတုပစ္စယာ နအဓိပတိယာ တီဏိ (သံခိတ္တံ).

နဟေတုပစ္စယာ အာရမ္မဏေ ဧကံ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)