၇. ပဉှာဝါရော

ပစ္စယစတုက္ကံ

ဟေတု-အာရမ္မဏပစ္စယာ

၂၀၆. ဟေတု အသံကိလိဋ္ဌအသံကိလေသိကော ဓမ္မော ဟေတုဿ အသံကိလိဋ္ဌအသံကိလေသိကဿ ဓမ္မဿ ဟေတုပစ္စယေန ပစ္စယော။ တီဏိ.

နဟေတု အသံကိလိဋ္ဌအသံကိလေသိကော ဓမ္မော နဟေတုဿ အသံကိလိဋ္ဌအသံကိလေသိကဿ ဓမ္မဿ အာရမ္မဏပစ္စယေန ပစ္စယော။ တီဏိ (သံခိတ္တံ).

၂၀၇. ဟေတုယာ တီဏိ၊ အာရမ္မဏေ တီဏိ၊ အဓိပတိယာ ဆ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ကမ္မေ တီဏိ၊ ဝိပါကေ နဝ၊ အာဟာရေ တီဏိ၊ ဣန္ဒြိယေ နဝ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ (သံခိတ္တံ).

ပစ္စနီယုဒ္ဓါရော

၂၀၈. ဟေတု အသံကိလိဋ္ဌအသံကိလေသိကော ဓမ္မော ဟေတုဿ အသံကိလိဋ္ဌအသံကိလေသိကဿ ဓမ္မဿ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော (သံခိတ္တံ).

၂၀၉. နဟေတုယာ နဝ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ တီဏိ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)

ဟေတုဒုကသံကိလိဋ္ဌတ္တိကံ နိဋ္ဌိတံ.