၁-၆. ပဋိစ္စဝါရာဒိ

၁၈၆. ဟေတုံ သံကိလိဋ္ဌသံကိလေသိကံ ဓမ္မံ ပဋိစ္စ ဟေတု သံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နဟေတုံ သံကိလိဋ္ဌသံကိလေသိကံ ဓမ္မံ ပဋိစ္စ နဟေတု သံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဟေတုံ သံကိလိဋ္ဌသံကိလေသိကဉ္စ နဟေတုံ သံကိလိဋ္ဌသံကိလေသိကဉ္စ ဓမ္မံ ပဋိစ္စ ဟေတု သံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၁၈၇. ဟေတုယာ နဝ၊ အာရမ္မဏေ နဝ၊ အဓိပတိယာ နဝ။ပေ။ ကမ္မေ နဝ၊ အာဟာရေ နဝ၊ အဝိဂတေ နဝ (သံခိတ္တံ).

၁၈၈. နဟေတုံ သံကိလိဋ္ဌသံကိလေသိကံ ဓမ္မံ ပဋိစ္စ ဟေတု သံကိလိဋ္ဌသံကိလေသိကော ဓမ္မော ဥပ္ပဇ္ဇတိ နဟေတုပစ္စယာ.

ဟေတုံ သံကိလိဋ္ဌသံကိလေသိကံ ဓမ္မံ ပဋိစ္စ ဟေတု သံကိလိဋ္ဌသံကိလေသိကော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၁၈၉. နဟေတုယာ ဧကံ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ).

ဟေတုပစ္စယာ နအဓိပတိယာ နဝ (သံခိတ္တံ).

နဟေတုပစ္စယာ အာရမ္မဏေ ဧကံ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)