၁-၆. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၈၁. ဟေတုံ ပရိတ္တာရမ္မဏံ ဓမ္မံ ပဋိစ္စ ဟေတု ပရိတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နဟေတုံ ပရိတ္တာရမ္မဏံ ဓမ္မံ ပဋိစ္စ နဟေတု ပရိတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဟေတုံ ပရိတ္တာရမ္မဏဉ္စ နဟေတုံ ပရိတ္တာရမ္မဏဉ္စ ဓမ္မံ ပဋိစ္စ ဟေတု ပရိတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၃၈၂. ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ ပုရေဇာတေ နဝ၊ အာသေဝနေ နဝ၊ ကမ္မေ နဝ၊ ဝိပါကေ နဝ။ပေ။ အဝိဂတေ နဝ (သံခိတ္တံ).

နဟေတု-နအဓိပတိပစ္စယာ

၃၈၃. နဟေတုံ ပရိတ္တာရမ္မဏံ ဓမ္မံ ပဋိစ္စ နဟေတု ပရိတ္တာရမ္မဏော ဓမ္မော ဥပ္ပဇ္ဇတိ နဟေတုပစ္စယာ. နဟေတုံ ပရိတ္တာရမ္မဏံ ဓမ္မံ ပဋိစ္စ ဟေတု ပရိတ္တာရမ္မဏော ဓမ္မော ဥပ္ပဇ္ဇတိ နဟေတုပစ္စယာ. (၂)

ဟေတုံ ပရိတ္တာရမ္မဏံ ဓမ္မံ ပဋိစ္စ ဟေတု ပရိတ္တာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ (သံခိတ္တံ).

၃၈၄. နဟေတုယာ ဒွေ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ နဝ (သံခိတ္တံ).

ဟေတုပစ္စယာ နအဓိပတိယာ နဝ (သံခိတ္တံ).

နဟေတုပစ္စယာ အာရမ္မဏေ ဒွေ (သံခိတ္တံ).

(သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)