၁. ဝိဘင်္ဂဝါရော

ဟေတုပစ္စယော

၃၁၃. နိယျာနိကော ဓမ္မော နိယျာနိကဿ ဓမ္မဿ ဟေတုပစ္စယေန ပစ္စယော – နိယျာနိကာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (မူလံ ကာတဗ္ဗံ.) နိယျာနိကာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (မူလံ ကာတဗ္ဗံ.) နိယျာနိကာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အနိယျာနိကော ဓမ္မော အနိယျာနိကဿ ဓမ္မဿ ဟေတုပစ္စယေန ပစ္စယော – အနိယျာနိကာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၃၁၄. နိယျာနိကော ဓမ္မော အနိယျာနိကဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ စေတောပရိယဉာဏေန နိယျာနိကစိတ္တသမင်္ဂိဿ စိတ္တံ ဇာနာတိ၊ နိယျာနိကာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အနိယျာနိကော ဓမ္မော အနိယျာနိကဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ပဟီနေ ကိလေသေ။ပေ။ ဝိက္ခမ္ဘိတေ။ပေ။ ပုဗ္ဗေ သမုဒါစိဏ္ဏေ။ပေ။ စက္ခုံ။ပေ။ ဝတ္ထုံ အနိယျာနိကေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန အနိယျာနိကစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အနိယျာနိကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော.

အနိယျာနိကော ဓမ္မော နိယျာနိကဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ မဂ္ဂဿ အာရမ္မဏပစ္စယေန ပစ္စယော. (၂)

အဓိပတိပစ္စယော

၃၁၅. နိယျာနိကော ဓမ္မော နိယျာနိကဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – နိယျာနိကာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. နိယျာနိကော ဓမ္မော အနိယျာနိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ. သဟဇာတာဓိပတိ – နိယျာနိကာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (မူလံ ကာတဗ္ဗံ.) နိယျာနိကာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၃၁၆. အနိယျာနိကော ဓမ္မော အနိယျာနိကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ။ပေ။ အရိယာ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ အနိယျာနိကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အနိယျာနိကာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. အနိယျာနိကော ဓမ္မော နိယျာနိကဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – နိဗ္ဗာနံ မဂ္ဂဿ အဓိပတိပစ္စယေန ပစ္စယော. (၂)

အနန္တရပစ္စယာဒိ

၃၁၇. နိယျာနိကော ဓမ္မော အနိယျာနိကဿ ဓမ္မဿ အနန္တရပစ္စယေန ပစ္စယော – မဂ္ဂေါ ဖလဿ အနန္တရပစ္စယေန ပစ္စယော. (၁)

အနိယျာနိကော ဓမ္မော အနိယျာနိကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနိယျာနိကာ ခန္ဓာ ပစ္ဆိမာနံ ပစ္ဆိမာနံ အနိယျာနိကာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ အနုလောမံ ဝေါဒါနဿ။ ဖလံ ဖလဿ။ အနုလောမံ ဖလသမာပတ္တိယာ ။ နိရောဓာ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. အနိယျာနိကော ဓမ္မော နိယျာနိကဿ ဓမ္မဿ အနန္တရပစ္စယေန ပစ္စယော။ ဂေါတြဘု မဂ္ဂဿ၊ ဝေါဒါနံ မဂ္ဂဿ အနန္တရပစ္စယေန ပစ္စယော. (၂)

သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ ပဉ္စ။ အညမညပစ္စယေန ပစ္စယော။ ဒွေ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၃၁၈. နိယျာနိကော ဓမ္မော နိယျာနိကဿ ဓမ္မဿ ဥပနိဿယပစ္စယေန ပစ္စယော. ပကတူပနိဿယော – ပဌမော မဂ္ဂေါ ဒုတိယဿ မဂ္ဂဿ ဥပနိဿယပစ္စယေန ပစ္စယော။ပေ။ တတိယော မဂ္ဂေါ စတုတ္ထဿ မဂ္ဂဿ ဥပနိဿယပစ္စယေန ပစ္စယော. နိယျာနိကော ဓမ္မော အနိယျာနိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အရိယာ မဂ္ဂံ ဥပနိဿာယ အနုပ္ပန္နံ သမာပတ္တိံ ဥပ္ပါဒေန္တိ၊ ဥပ္ပန္နံ သမာပဇ္ဇန္တိ၊ သင်္ခါရေ အနိစ္စတော။ပေ။ ဝိပဿန္တိ၊ မဂ္ဂေါ အရိယာနံ အတ္ထပဋိသမ္ဘိဒါယ။ပေ။ ပဋိဘာနပဋိသမ္ဘိဒါယ ဌာနာဌာနကောသလ္လဿ ဥပနိဿယပစ္စယေန ပစ္စယော၊ မဂ္ဂေါ ဖလသမာပတ္တိယာ ဥပနိဿယပစ္စယေန ပစ္စယော. (၂)

၃၁၉. အနိယျာနိကော ဓမ္မော အနိယျာနိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အနိယျာနိကံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ ကရောတိ၊ ဈာနံ ဥပ္ပါဒေတိ။ ဝိပဿနံ။ အဘိညံ။ သမာပတ္တိံ ဥပ္ပါဒေတိ။ မာနံ ဇပ္ပေတိ။ ဒိဋ္ဌိံ ဂဏှာတိ၊ အနိယျာနိကံ သီလံ။ပေ။ ပညံ။ ရာဂံ။ပေ။ ပတ္ထနံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ၊ အနိယျာနိကာ သဒ္ဓါ။ပေ။ သေနာသနံ အနိယျာနိကာယ သဒ္ဓါယ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ။ ဖလသမာပတ္တိယာ ဥပနိဿယပစ္စယေန ပစ္စယော. အနိယျာနိကော ဓမ္မော နိယျာနိကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ပဌမဿ မဂ္ဂဿ ပရိကမ္မံ ပဌမဿ မဂ္ဂဿ ဥပနိဿယပစ္စယေန ပစ္စယော။ပေ။ စတုတ္ထဿ မဂ္ဂဿ ပရိကမ္မံ စတုတ္ထဿ မဂ္ဂဿ ဥပနိဿယပစ္စယေန ပစ္စယော. (၂)

ပုရေဇာတပစ္စယာဒိ

၃၂၀. အနိယျာနိကော ဓမ္မော အနိယျာနိကဿ ဓမ္မဿ ပုရေဇာတပစ္စယေန ပစ္စယော။ ဒွေ (အရူပဒုကသဒိသာ ကာတဗ္ဗာ)။ ပစ္ဆာဇာတပစ္စယေန ပစ္စယော။ ဒွေ။ အာသေဝနပစ္စယေန ပစ္စယော။ ဒွေ.

ကမ္မပစ္စယော

၃၂၁. နိယျာနိကော ဓမ္မော နိယျာနိကဿ ဓမ္မဿ ကမ္မပစ္စယေန ပစ္စယော – နိယျာနိကာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. နိယျာနိကော ဓမ္မော အနိယျာနိကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – နိယျာနိကာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. နာနာက္ခဏိကာ – နိယျာနိကာ စေတနာ ဖလဿ ကမ္မပစ္စယေန ပစ္စယော. (မူလံ ကာတဗ္ဗံ) နိယျာနိကာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

၃၂၂. အနိယျာနိကော ဓမ္မော အနိယျာနိကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ (သံခိတ္တံ). နာနာက္ခဏိကာ – အနိယျာနိကာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ ဝိပါကပစ္စယေန ပစ္စယော။ ဧကံယေဝ။ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော။ စတ္တာရိ။ သမ္ပယုတ္တပစ္စယေန ပစ္စယော။ ဒွေ။ ဝိပ္ပယုတ္တပစ္စယေန ပစ္စယော။ တီဏိ (အရူပဒုကသဒိသာ ကာတဗ္ဗာ)။ အတ္ထိပစ္စယေန ပစ္စယော။ သတ္တ (အရူပဒုကသဒိသာ ကာတဗ္ဗာ၊ အာမသနာ နာနာပဒါယေဝ)။ နတ္ထိပစ္စယေန ပစ္စယော။ တီဏိ။ ဝိဂတပစ္စယေန ပစ္စယော။ တီဏိ။ အဝိဂတပစ္စယေန ပစ္စယော။ သတ္တ.