၁. ဝိဘင်္ဂဝါရော

ဟေတုပစ္စယော

၂၇၉. အရူပါဝစရော ဓမ္မော အရူပါဝစရဿ ဓမ္မဿ ဟေတုပစ္စယေန ပစ္စယော – အရူပါဝစရာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ.) အရူပါဝစရာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (မူလံ ကာတဗ္ဗံ.) အရူပါဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

နအရူပါဝစရော ဓမ္မော နအရူပါဝစရဿ ဓမ္မဿ ဟေတုပစ္စယေန ပစ္စယော – နအရူပါဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၂၈၀. အရူပါဝစရော ဓမ္မော အရူပါဝစရဿ ဓမ္မဿ အာရမ္မဏပစ္စယေန ပစ္စယော – အာကာသာနဉ္စာယတနံ ဝိညာဏဉ္စာယတနဿ အာရမ္မဏပစ္စယေန ပစ္စယော၊ အာကိဉ္စညာယတနံ နေဝသညာနာသညာယတနဿ အာရမ္မဏပစ္စယေန ပစ္စယော. အရူပါဝစရော ဓမ္မော နအရူပါဝစရဿ ဓမ္မဿ အာရမ္မဏပစ္စယေန ပစ္စယော – အာကာသာနဉ္စာယတနံ ပစ္စဝေက္ခတိ၊ ဝိညာဏဉ္စာယတနံ။ပေ။ အာကိဉ္စညာယတနံ။ပေ။ နေဝသညာနာသညာယတနံ ပစ္စဝေက္ခတိ၊ အရူပါဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ စေတောပရိယဉာဏေန အရူပါဝစရစိတ္တသမင်္ဂိဿ စိတ္တံ ဇာနာတိ၊ အရူပါဝစရာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

နအရူပါဝစရော ဓမ္မော နအရူပါဝစရဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ နအရူပါဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန နအရူပါဝစရစိတ္တသမင်္ဂိဿ စိတ္တံ ဇာနာတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ နအရူပါဝစရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အဓိပတိပစ္စယော

၂၈၁. အရူပါဝစရော ဓမ္မော အရူပါဝစရဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အရူပါဝစရာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. အရူပါဝစရော ဓမ္မော နအရူပါဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အာကာသာနဉ္စာယတနံ ဂရုံ ကတွာ ပစ္စဝေက္ခတိ။ပေ။ နေဝသညာနာသညာယတနံ ဂရုံ ကတွာ ပစ္စဝေက္ခတိ၊ အရူပါဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အရူပါဝစရာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (မူလံ ကာတဗ္ဗံ.) အရူပါဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၂၈၂. နအရူပါဝစရော ဓမ္မော နအရူပါဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ သုစိဏ္ဏာနိ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ နအရူပါဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – နအရူပါဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အနန္တရပစ္စယာဒိ

၂၈၃. အရူပါဝစရော ဓမ္မော အရူပါဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အရူပါဝစရာ ခန္ဓာ ပစ္ဆိမာနံ ပစ္ဆိမာနံ အရူပါဝစရာနံ ခန္ဓာနံ အနန္တရပစ္စယေန ပစ္စယော. အရူပါဝစရော ဓမ္မော နအရူပါဝစရဿ ဓမ္မဿ အနန္တရပစ္စယေန ပစ္စယော – အရူပါဝစရံ စုတိစိတ္တံ နအရူပါဝစရဿ ဥပပတ္တိစိတ္တဿ၊ အရူပါဝစရံ ဘဝင်္ဂံ အာဝဇ္ဇနာယ၊ အရူပါဝစရာ ခန္ဓာ နအရူပါဝစရဿ ဝုဋ္ဌာနဿ၊ နိရောဓာ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. (၂)

၂၈၄. နအရူပါဝစရော ဓမ္မော နအရူပါဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နအရူပါဝစရာ ခန္ဓာ ပစ္ဆိမာနံ ပစ္ဆိမာနံ နအရူပါဝစရာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ အနုလောမံ ဖလသမာပတ္တိယာ အနန္တရပစ္စယေန ပစ္စယော. နအရူပါဝစရော ဓမ္မော အရူပါဝစရဿ ဓမ္မဿ အနန္တရပစ္စယေန ပစ္စယော – နအရူပါဝစရံ စုတိစိတ္တံ အရူပါဝစရဿ ဥပပတ္တိစိတ္တဿ အနန္တရပစ္စယေန ပစ္စယော၊ နအရူပါဝစရာ ခန္ဓာ အရူပါဝစရဿ ဝုဋ္ဌာနဿ အနန္တရပစ္စယေန ပစ္စယော၊ အာကာသာနဉ္စာယတနဿ ပရိကမ္မံ အာကာသာနဉ္စာယတနဿ အနန္တရပစ္စယေန ပစ္စယော၊ ဝိညာဏဉ္စာယတနဿ။ပေ။ အာကိဉ္စညာယတနဿ။ပေ။ နေဝသညာနာသညာယတနဿ ပရိကမ္မံ နေဝသညာနာသညာယတနဿ အနန္တရပစ္စယေန ပစ္စယော. (၂)

သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ ပဉ္စ။ အညမညပစ္စယေန ပစ္စယော။ ဒွေ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၂၈၅. အရူပါဝစရော ဓမ္မော အရူပါဝစရဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အာကာသာနဉ္စာယတနံ ဝိညာဏဉ္စာယတနဿ ဥပနိဿယပစ္စယေန ပစ္စယော၊ ဝိညာဏဉ္စာယတနံ အာကိဉ္စညာယတနဿ။ပေ။ အာကိဉ္စညာယတနံ နေဝသညာနာသညာယတနဿ ဥပနိဿယပစ္စယေန ပစ္စယော. အရူပါဝစရော ဓမ္မော နအရူပါဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အရူပါဝစရံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ ကရောတိ၊ နအရူပါဝစရံ ဈာနံ ဥပ္ပါဒေတိ၊ ဝိပဿနံ။ပေ။ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ အရူပါဝစရံ သီလံ။ပေ။ ပညံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ။ မာနံ ဇပ္ပေတိ။ ဒိဋ္ဌိံ ဂဏှာတိ၊ အရူပါဝစရာ သဒ္ဓါ။ပေ။ ပညာ နအရူပါဝစရာယ သဒ္ဓါယ။ပေ။ ပညာယ။ ရာဂဿ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ။ မဂ္ဂဿ ဖလသမာပတ္တိယာ ဥပနိဿယပစ္စယေန ပစ္စယော. (၂)

၂၈၆. နအရူပါဝစရော ဓမ္မော နအရူပါဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – နအရူပါဝစရံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ ကရောတိ၊ နအရူပါဝစရံ ဈာနံ ဥပ္ပါဒေတိ၊ ဝိပဿနံ။ပေ။ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ။ ဒိဋ္ဌိံ ဂဏှာတိ၊ နအရူပါဝစရံ သီလံ။ပေ။ ပညံ။ပေ။ ရာဂံ။ပေ။ ပတ္ထနံ။ပေ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ။ ပါဏံ ဟနတိ။ပေ။ သံဃံ ဘိန္ဒတိ၊ နအရူပါဝစရာ သဒ္ဓါ။ပေ။ သေနာသနံ နအရူပါဝစရာယ သဒ္ဓါယ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

နအရူပါဝစရော ဓမ္မော အရူပါဝစရဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အာကာသာနဉ္စာယတနဿ ပရိကမ္မံ အာကာသာနဉ္စာယတနဿ ဥပနိဿယပစ္စယေန ပစ္စယော။ပေ။ နေဝသညာနာသညာယတနဿ ပရိကမ္မံ နေဝသညာနာသညာယတနဿ ဥပနိဿယပစ္စယေန ပစ္စယော. (၂)

ပုရေဇာတပစ္စယာဒိ

၂၈၇. နအရူပါဝစရော ဓမ္မော နအရူပါဝစရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု နအရူပါဝစရာနံ ခန္ဓာနံ ပုရေဇာတပစ္စယေန ပစ္စယော. နအရူပါဝစရော ဓမ္မော အရူပါဝစရဿ ဓမ္မဿ ပုရေဇာတပစ္စယေန ပစ္စယော. ဝတ္ထုပုရေဇာတံ – ဝတ္ထု အရူပါဝစရာနံ ခန္ဓာနံ ပုရေဇာတပစ္စယေန ပစ္စယော. (၂)

ပစ္ဆာဇာတပစ္စယေန ပစ္စယော။ ဒွေ။ အာသေဝနပစ္စယေန ပစ္စယော။ တီဏိ.

ကမ္မပစ္စယော

၂၈၈. အရူပါဝစရော ဓမ္မော အရူပါဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ပေ။. အရူပါဝစရော ဓမ္မော နအရူပါဝစရဿ ဓမ္မဿ ကမ္မပစ္စယေန ပစ္စယော – အရူပါဝစရာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. (မူလံ ကာတဗ္ဗံ.) အရူပါဝစရာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

နအရူပါဝစရော ဓမ္မော နအရူပါဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – နအရူပါဝစရာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော (သံခိတ္တံ). (၁)

ဝိပါကပစ္စယာဒိ

၂၈၉. အရူပါဝစရော ဓမ္မော အရူပါဝစရဿ ဓမ္မဿ ဝိပါကပစ္စယေန ပစ္စယော (သံခိတ္တံ).

နအရူပါဝစရော ဓမ္မော နအရူပါဝစရဿ ဓမ္မဿ ဝိပါကပစ္စယေန ပစ္စယော (သံခိတ္တံ)။ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော။ စတ္တာရိ။ သမ္ပယုတ္တပစ္စယေန ပစ္စယော။ ဒွေ.

ဝိပ္ပယုတ္တပစ္စယော

၂၉၀. အရူပါဝစရော ဓမ္မော နအရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

နအရူပါဝစရော ဓမ္မော နအရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). နအရူပါဝစရော ဓမ္မော အရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု အရူပါဝစရာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

အတ္ထိပစ္စယာဒိ

၂၉၁. အရူပါဝစရော ဓမ္မော အရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ။ပေ။. အရူပါဝစရော ဓမ္မော နအရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ။ပေ။. အရူပါဝစရော ဓမ္မော အရူပါဝစရဿ စ နအရူပါဝစရဿ စ ဓမ္မဿ အတ္ထိပစ္စယေန ပစ္စယော – သဟဇာတံ (သံခိတ္တံ). (၃)

နအရူပါဝစရော ဓမ္မော နအရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). နအရူပါဝစရော ဓမ္မော အရူပါဝစရဿ ဓမ္မဿ အတ္ထိပစ္စယေန ပစ္စယော. ပုရေဇာတံ – ဝတ္ထု အရူပါဝစရာနံ ခန္ဓာနံ အတ္ထိပစ္စယေန ပစ္စယော. (၂)

၂၉၂. အရူပါဝစရော စ နအရူပါဝစရော စ ဓမ္မာ အရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – အရူပါဝစရော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. အရူပါဝစရော စ နအရူပါဝစရော စ ဓမ္မာ နအရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – အရူပါဝစရာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပစ္ဆာဇာတာ – အရူပါဝစရာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – အရူပါဝစရာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.