၁. ပစ္စယာနုလောမံ

၂. သင်္ချာဝါရော

၂၉၃. ဟေတုယာ စတ္တာရိ၊ အာရမ္မဏေ တီဏိ၊ အဓိပတိယာ စတ္တာရိ၊ အနန္တရေ စတ္တာရိ၊ သမနန္တရေ စတ္တာရိ၊ သဟဇာတေ ပဉ္စ၊ အညမညေ ဒွေ၊ နိဿယေ သတ္တ၊ ဥပနိဿယေ စတ္တာရိ၊ ပုရေဇာတေ ဒွေ၊ ပစ္ဆာဇာတေ ဒွေ၊ အာသေဝနေ တီဏိ၊ ကမ္မေ စတ္တာရိ၊ ဝိပါကေ ဒွေ၊ အာဟာရေ စတ္တာရိ၊ ဣန္ဒြိယေ စတ္တာရိ၊ ဈာနေ စတ္တာရိ၊ မဂ္ဂေ စတ္တာရိ၊ သမ္ပယုတ္တေ ဒွေ၊ ဝိပ္ပယုတ္တေ တီဏိ၊ အတ္ထိယာ သတ္တ၊ နတ္ထိယာ စတ္တာရိ၊ ဝိဂတေ စတ္တာရိ၊ အဝိဂတေ သတ္တ.

ပစ္စနီယုဒ္ဓါရော

၂၉၄. အရူပါဝစရော ဓမ္မော အရူပါဝစရဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. အရူပါဝစရော ဓမ္မော နအရူပါဝစရဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပစ္ဆာဇာတပစ္စယေန ပစ္စယော. အရူပါဝစရော ဓမ္မော အရူပါဝစရဿ စ နအရူပါဝစရဿ စ ဓမ္မဿ သဟဇာတပစ္စယေန ပစ္စယော. (၃)

၂၉၅. နအရူပါဝစရော ဓမ္မော နအရူပါဝစရဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော. နအရူပါဝစရော ဓမ္မော အရူပါဝစရဿ ဓမ္မဿ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော. (၂)

အရူပါဝစရော စ နအရူပါဝစရော စ ဓမ္မာ အရူပါဝစရဿ ဓမ္မဿ သဟဇာတံ၊ ပုရေဇာတံ. အရူပါဝစရော စ နအရူပါဝစရော စ ဓမ္မာ နအရူပါဝစရဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. (၂)