၁-၇. ပဋိစ္စဝါရာဒိ

ဟေတု-အာရမ္မဏပစ္စယာ

၁၄. အကုသလံ သံကိလိဋ္ဌံ ဓမ္မံ ပဋိစ္စ အကုသလော သံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၅. ကုသလံ အသံကိလိဋ္ဌံ ဓမ္မံ ပဋိစ္စ ကုသလော အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ. ကုသလံ အသံကိလိဋ္ဌံ ဓမ္မံ ပဋိစ္စ အဗျာကတော အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ. ကုသလံ အသံကိလိဋ္ဌံ ဓမ္မံ ပဋိစ္စ ကုသလော အသံကိလိဋ္ဌော စ အဗျာကတော အသံကိလိဋ္ဌော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အဗျာကတံ အသံကိလိဋ္ဌံ ဓမ္မံ ပဋိစ္စ အဗျာကတော အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ. ကုသလံ အသံကိလိဋ္ဌဉ္စ အဗျာကတံ အသံကိလိဋ္ဌဉ္စ ဓမ္မံ ပဋိစ္စ အဗျာကတော အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ. (၂)

၁၆. ကုသလံ အသံကိလိဋ္ဌံ ဓမ္မံ ပဋိစ္စ ကုသလော အသံကိလိဋ္ဌော ဓမ္မော ဥပ္ပဇ္ဇတိ အာရမ္မဏပစ္စယာ. (၁)

အဗျာကတံ အသံကိလိဋ္ဌံ ဓမ္မံ ပဋိစ္စ အဗျာကတော အသံကိလိဋ္ဌော ဓမ္မော ဥပ္ပဇ္ဇတိ အာရမ္မဏပစ္စယာ. (၁) (သံခိတ္တံ.)

၁၇. ဟေတုယာ ပဉ္စ၊ အာရမ္မဏေ ဒွေ၊ အဓိပတိယာ ပဉ္စ။ပေ။ အဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၁၈. ကုသလော အသံကိလိဋ္ဌော ဓမ္မော ကုသလဿ အသံကိလိဋ္ဌဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော အသံကိလိဋ္ဌော ဓမ္မော အဗျာကတဿ အသံကိလိဋ္ဌဿ ဓမ္မဿ ဟေတုပစ္စယေန ပစ္စယော. (၁)

ကုသလော အသံကိလိဋ္ဌော ဓမ္မော ကုသလဿ အသံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော။ ဒွေ.

အဗျာကတော အသံကိလိဋ္ဌော ဓမ္မော အဗျာကတဿ အသံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော။ ဒွေ (သံခိတ္တံ).

၁၉. ဟေတုယာ စတ္တာရိ၊ အာရမ္မဏေ စတ္တာရိ၊ အဓိပတိယာ ပဉ္စ၊ အနန္တရေ စတ္တာရိ။ပေ။ ဥပနိဿယေ စတ္တာရိ။ပေ။ အဝိဂတေ သတ္တ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).