၁-၇. ပဋိစ္စဝါရာဒိ

ဟေတုပစ္စယော

၃၀. ကုသလံ ကိလေသဝိပ္ပယုတ္တံ သံကိလေသိကံ ဓမ္မံ ပဋိစ္စ ကုသလော ကိလေသဝိပ္ပယုတ္တော သံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. ကုသလံ ကိလေသဝိပ္ပယုတ္တံ သံကိလေသိကံ ဓမ္မံ ပဋိစ္စ အဗျာကတော ကိလေသဝိပ္ပယုတ္တော သံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. ကုသလံ ကိလေသဝိပ္ပယုတ္တံ သံကိလေသိကံ ဓမ္မံ ပဋိစ္စ ကုသလော ကိလေသဝိပ္ပယုတ္တော သံကိလေသိကော စ အဗျာကတော ကိလေသဝိပ္ပယုတ္တော သံကိလေသိကော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အဗျာကတံ ကိလေသဝိပ္ပယုတ္တံ သံကိလေသိကံ ဓမ္မံ ပဋိစ္စ အဗျာကတော ကိလေသဝိပ္ပယုတ္တော သံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ ကိလေသဝိပ္ပယုတ္တံ သံကိလေသိကဉ္စ အဗျာကတံ ကိလေသဝိပ္ပယုတ္တံ သံကိလေသိကဉ္စ ဓမ္မံ ပဋိစ္စ အဗျာကတော ကိလေသဝိပ္ပယုတ္တော သံကိလေသိကော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၁. ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၃၂. ကုသလော ကိလေသဝိပ္ပယုတ္တော သံကိလေသိကော ဓမ္မော ကုသလဿ ကိလေသဝိပ္ပယုတ္တဿ သံကိလေသိကဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော ကိလေသဝိပ္ပယုတ္တော သံကိလေသိကော ဓမ္မော အဗျာကတဿ ကိလေသဝိပ္ပယုတ္တဿ သံကိလေသိကဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၃၃. ဟေတုယာ စတ္တာရိ၊ အာရမ္မဏေ စတ္တာရိ။ပေ။ အဝိဂတေ သတ္တ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).

၃၄. ကုသလံ ကိလေသဝိပ္ပယုတ္တံ အသံကိလေသိကံ ဓမ္မံ ပဋိစ္စ ကုသလော ကိလေသဝိပ္ပယုတ္တော အသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ.

အဗျာကတံ ကိလေသဝိပ္ပယုတ္တံ အသံကိလေသိကံ ဓမ္မံ ပဋိစ္စ အဗျာကတော ကိလေသဝိပ္ပယုတ္တော အသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ.

ဟေတုယာ ဒွေ။ပေ။ အဝိဂတေ ဒွေ (သံခိတ္တံ. သဟဇာတဝါရမ္ပိ ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၃၅. ကုသလော ကိလေသဝိပ္ပယုတ္တော အသံကိလေသိကော ဓမ္မော ကုသလဿ ကိလေသဝိပ္ပယုတ္တဿ အသံကိလေသိကဿ ဓမ္မဿ ဟေတုပစ္စယေန ပစ္စယော. (၁)

အဗျာကတော ကိလေသဝိပ္ပယုတ္တော အသံကိလေသိကော ဓမ္မော အဗျာကတဿ ကိလေသဝိပ္ပယုတ္တဿ အသံကိလေသိကဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၃၆. ဟေတုယာ ဒွေ၊ အာရမ္မဏေ ဒွေ၊ အဓိပတိယာ တီဏိ၊ အနန္တရေ ဒွေ။ပေ။ ဥပနိဿယေ စတ္တာရိ။ပေ။ အဝိဂတေ ဒွေ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).

ကုသလတ္တိကကိလေသဂေါစ္ဆကံ နိဋ္ဌိတံ.