၁-၇. ပဋိစ္စဝါရာဒိ

ပစ္စယစတုက္ကံ

၁. အကုသလံ ကိလေသံ ဓမ္မံ ပဋိစ္စ အကုသလော ကိလေသော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၂. ကုသလံ နောကိလေသံ ဓမ္မံ ပဋိစ္စ ကုသလော နောကိလေသော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ နောကိလေသံ ဓမ္မံ ပဋိစ္စ အကုသလော နောကိလေသော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ နောကိလေသံ ဓမ္မံ ပဋိစ္စ အဗျာကတော နောကိလေသော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ နောကိလေသဉ္စ အဗျာကတံ နောကိလေသဉ္စ ဓမ္မံ ပဋိစ္စ အဗျာကတော နောကိလေသော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ နောကိလေသဉ္စ အဗျာကတံ နောကိလေသဉ္စ ဓမ္မံ ပဋိစ္စ အဗျာကတော နောကိလေသော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၄. ကုသလော နောကိလေသော ဓမ္မော ကုသလဿ နောကိလေသဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော နောကိလေသော ဓမ္မော အဗျာကတဿ နောကိလေသဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၅. ဟေတုယာ စတ္တာရိ၊ အာရမ္မဏေ နဝ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).