၁-၁၂. ကုသလတ္တိက-လောကိယဒုကံ
၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၃၀. ကုသလံ လောကိယံ ဓမ္မံ ပဋိစ္စ ကုသလော လောကိယော ဓမ္မော ဥပ္ပဇ္ဇတိ ဟေတုပစ္စယာ. ကုသလံ လောကိယံ ဓမ္မံ ပဋိစ္စ အဗျာကတော လောကိယော ဓမ္မော ဥပ္ပဇ္ဇတိ ဟေတုပစ္စယာ. ကုသလံ လောကိယံ ဓမ္မံ ပဋိစ္စ ကုသလော လောကိယော စ အဗျာကတော လောကိယော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)
အကုသလံ လောကိယံ ဓမ္မံ ပဋိစ္စ အကုသလော လောကိယော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အဗျာကတံ လောကိယံ ဓမ္မံ ပဋိစ္စ အဗျာကတော လောကိယော ဓမ္မော ဥပ္ပဇ္ဇတိ ဟေတုပစ္စယာ. (၁)
ကုသလံ လောကိယဉ္စ အဗျာကတံ လောကိယဉ္စ ဓမ္မံ ပဋိစ္စ အဗျာကတော လောကိယော ဓမ္မော ဥပ္ပဇ္ဇတိ ဟေတုပစ္စယာ. (၁)
အကုသလံ လောကိယဉ္စ အဗျာကတံ လောကိယဉ္စ ဓမ္မံ ပဋိစ္စ အဗျာကတော လောကိယော ဓမ္မော ဥပ္ပဇ္ဇတိ ဟေတုပစ္စယာ (၁) (သံခိတ္တံ.)
၃၁. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ).
ပစ္စနီယံ
နဟေတုပစ္စယော
၃၂. အကုသလံ လောကိယံ ဓမ္မံ ပဋိစ္စ အကုသလော လောကိယော ဓမ္မော ဥပ္ပဇ္ဇတိ နဟေတုပစ္စယာ. (၁)
အဗျာကတံ လောကိယံ ဓမ္မံ ပဋိစ္စ အဗျာကတော လောကိယော ဓမ္မော ဥပ္ပဇ္ဇတိ နဟေတုပစ္စယာ. (၁) (သံခိတ္တံ.)
၃၃. နဟေတုယာ ဒွေ၊ နအာရမ္မဏေ ပဉ္စ၊ နအဓိပတိယာ နဝ။ပေ။ နောဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).
ဟေတု-အာရမ္မဏပစ္စယာ
၃၄. ကုသလော လောကိယော ဓမ္မော ကုသလဿ လောကိယဿ ဓမ္မဿ ဟေတုပစ္စယေန ပစ္စယော။ တီဏိ.
အကုသလော လောကိယော ဓမ္မော အကုသလဿ လောကိယဿ ဓမ္မဿ ဟေတုပစ္စယေန ပစ္စယော။ တီဏိ.
အဗျာကတော လောကိယော ဓမ္မော အဗျာကတဿ လောကိယဿ ဓမ္မဿ ဟေတုပစ္စယေန ပစ္စယော. (၁)
၃၅. ကုသလော လောကိယော ဓမ္မော ကုသလဿ လောကိယဿ ဓမ္မဿ အာရမ္မဏပစ္စယေန ပစ္စယော။ တီဏိ.
အကုသလော လောကိယော ဓမ္မော အကုသလဿ လောကိယဿ ဓမ္မဿ အာရမ္မဏပစ္စယေန ပစ္စယော။ တီဏိ.
အဗျာကတော လောကိယော ဓမ္မော အဗျာကတဿ လောကိယဿ ဓမ္မဿ အာရမ္မဏပစ္စယေန ပစ္စယော။ တီဏိ (သံခိတ္တံ).
၃၆. ဟေတုယာ သတ္တ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).