၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၇. ကုသလံ လောကုတ္တရံ ဓမ္မံ ပဋိစ္စ ကုသလော လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ လောကုတ္တရံ ဓမ္မံ ပဋိစ္စ အဗျာကတော လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၈. ဟေတုယာ ဒွေ၊ အာရမ္မဏေ ဒွေ၊ အဓိပတိယာ ဒွေ။ပေ။ အဝိဂတေ ဒွေ (သံခိတ္တံ).

နအဓိပတိယာ ဒွေ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

ဟေတုအာရမ္မဏပစ္စယာဒိ

၃၉. ကုသလော လောကုတ္တရော ဓမ္မော ကုသလဿ လောကုတ္တရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော လောကုတ္တရော ဓမ္မော အဗျာကတဿ လောကုတ္တရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော လောကုတ္တရော ဓမ္မော အဗျာကတဿ လောကုတ္တရဿ ဓမ္မဿ အာရမ္မဏပစ္စယေန ပစ္စယော. အဗျာကတော လောကုတ္တရော ဓမ္မော ကုသလဿ လောကုတ္တရဿ ဓမ္မဿ အာရမ္မဏပစ္စယေန ပစ္စယော. (၂)

ကုသလော လောကုတ္တရော ဓမ္မော ကုသလဿ လောကုတ္တရဿ ဓမ္မဿ အဓိပတိပစ္စယေန ပစ္စယော. (၁)

အဗျာကတော လောကုတ္တရော ဓမ္မော အဗျာကတဿ လောကုတ္တရဿ ဓမ္မဿ အဓိပတိပစ္စယေန ပစ္စယော. အဗျာကတော လောကုတ္တရော ဓမ္မော ကုသလဿ လောကုတ္တရဿ ဓမ္မဿ အဓိပတိပစ္စယေန ပစ္စယော. (၂)

ကုသလော လောကုတ္တရော ဓမ္မော အဗျာကတဿ လောကုတ္တရဿ ဓမ္မဿ အနန္တရပစ္စယေန ပစ္စယော. (၁)

အဗျာကတော လောကုတ္တရော ဓမ္မော အဗျာကတဿ လောကုတ္တရဿ ဓမ္မဿ အနန္တရပစ္စယေန ပစ္စယော. (၁) (သံခိတ္တံ.)

၄၀. ဟေတုယာ ဒွေ၊ အာရမ္မဏေ ဒွေ၊ အဓိပတိယာ တီဏိ၊ အနန္တရေ ဒွေ၊ သမနန္တရေ ဒွေ၊ သဟဇာတေ ဒွေ၊ အညမညေ ဒွေ၊ နိဿယေ ဒွေ၊ ဥပနိဿယေ စတ္တာရိ။ပေ။ အဝိဂတေ ဒွေ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)