၁-၆. ပဋိစ္စဝါရာဒိ

၃၀. သုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ သုခါယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁)

ဒုက္ခာယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ ဒုက္ခာယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁)

အဒုက္ခမသုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ အဒုက္ခမသုခါယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၁. ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ (သံခိတ္တံ).

နဟေတုယာ တီဏိ၊ နအဓိပတိယာ တီဏိ၊ နပုရေဇာတေ ဒွေ၊ နပစ္ဆာဇာတေ တီဏိ၊ နအာသေဝနေ တီဏိ၊ နကမ္မေ တီဏိ၊ နဝိပါကေ တီဏိ။ပေ။ နဝိပ္ပယုတ္တေ ဒွေ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ဝိတ္ထာရေတဗ္ဗံ.)