၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၂၆၃. ကုသလံ ဟေတုဉ္စေဝ သဟေတုကဉ္စ ဓမ္မံ ပဋိစ္စ ကုသလော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. (၁)
အကုသလံ ဟေတုဉ္စေဝ သဟေတုကဉ္စ ဓမ္မံ ပဋိစ္စ အကုသလော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. (၁)
အဗျာကတံ ဟေတုဉ္စေဝ သဟေတုကဉ္စ ဓမ္မံ ပဋိစ္စ အဗျာကတော ဟေတု စေဝ သဟေတုကော စ ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၂၆၄. ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ (သံခိတ္တံ).
နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ တီဏိ၊ နဝိပါကေ တီဏိ၊ နဝိပ္ပယုတ္တေ တီဏိ (သံခိတ္တံ).
(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)
ဟေတု-အာရမ္မဏ-အဓိပတိပစ္စယာ
၂၆၅. ကုသလော ဟေတု စေဝ သဟေတုကော စ ဓမ္မော ကုသလဿ ဟေတုဿ စေဝ သဟေတုကဿ စ ဓမ္မဿ ဟေတုပစ္စယေန ပစ္စယော. (၁)
အကုသလော ဟေတု စေဝ သဟေတုကော စ ဓမ္မော အကုသလဿ ဟေတုဿ စေဝ သဟေတုကဿ စ ဓမ္မဿ ဟေတုပစ္စယေန ပစ္စယော. (၁)
အဗျာကတော ဟေတု စေဝ သဟေတုကော စ ဓမ္မော အဗျာကတဿ ဟေတုဿ စေဝ သဟေတုကဿ စ ဓမ္မဿ ဟေတုပစ္စယေန ပစ္စယော. (၁)
ကုသလော ဟေတု စေဝ သဟေတုကော စ ဓမ္မော ကုသလဿ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော. ကုသလော ဟေတု စေဝ သဟေတုကော စ ဓမ္မော အကုသလဿ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော. ကုသလော ဟေတု စေဝ သဟေတုကော စ ဓမ္မော အဗျာကတဿ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော. (၃)
အကုသလော ဟေတု စေဝ သဟေတုကော စ ဓမ္မော အကုသလဿ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော။ တီဏိ.
အဗျာကတော ဟေတု စေဝ သဟေတုကော စ ဓမ္မော အဗျာကတဿ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော။ တီဏိ.
ကုသလော ဟေတု စေဝ သဟေတုကော စ ဓမ္မော ကုသလဿ ဟေတုဿ စေဝ သဟေတုကဿ စ ဓမ္မဿ အဓိပတိပစ္စယေန ပစ္စယော။ တီဏိ.
အကုသလော ဟေတု စေဝ သဟေတုကော စ ဓမ္မော အကုသလဿ ဟေတုဿ စေဝ သဟေတုကဿ စ ဓမ္မဿ အဓိပတိပစ္စယေန ပစ္စယော. (၁)
အဗျာကတော ဟေတု စေဝ သဟေတုကော စ ဓမ္မော အဗျာကတဿ ဟေတုဿ စေဝ သဟေတုကဿ စ ဓမ္မဿ အဓိပတိပစ္စယေန ပစ္စယော။ တီဏိ (သံခိတ္တံ).
၂၆၆. ဟေတုယာ တီဏိ၊ အာရမ္မဏေ နဝ၊ အဓိပတိယာ သတ္တ၊ အနန္တရေ ပဉ္စ၊ သမနန္တရေ ပဉ္စ၊ သဟဇာတေ တီဏိ။ပေ။ ဥပနိဿယေ နဝ။ပေ။ အဝိဂတေ တီဏိ (သံခိတ္တံ).
နဟေတုယာ နဝ၊ နအာရမ္မဏေ နဝ (သံခိတ္တံ).
ဟေတုပစ္စယာ နအာရမ္မဏေ တီဏိ (သံခိတ္တံ).
နဟေတုပစ္စယာ အာရမ္မဏေ နဝ (သံခိတ္တံ).
(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)