ပစ္စနီယံ

အဗျာကတံ အဟေတုကံ ဓမ္မံ ပဋိစ္စ အဗျာကတော အဟေတုကော ဓမ္မော ဥပ္ပဇ္ဇတိ နဟေတုပစ္စယာ. (၁)

အကုသလံ အဟေတုကံ ဓမ္မံ ပဋိစ္စ အဗျာကတော အဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ. (၁)

အဗျာကတံ အဟေတုကံ ဓမ္မံ ပဋိစ္စ အဗျာကတော အဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ. (၁)

အကုသလံ အဟေတုကဉ္စ အဗျာကတံ အဟေတုကဉ္စ ဓမ္မံ ပဋိစ္စ အဗျာကတော အဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ. (၁) (သံခိတ္တံ.)

၂၅၀. နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ တီဏိ။ပေ။ နောဝိဂတေ တီဏိ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ ဧကံ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၂၅၁. အကုသလော အဟေတုကော ဓမ္မော အဗျာကတဿ အဟေတုကဿ ဓမ္မဿ ဟေတုပစ္စယေန ပစ္စယော. (၁)

အကုသလော အဟေတုကော ဓမ္မော အကုသလဿ အဟေတုကဿ ဓမ္မဿ အာရမ္မဏပစ္စယေန ပစ္စယော. အကုသလော အဟေတုကော ဓမ္မော အဗျာကတဿ အဟေတုကဿ ဓမ္မဿ အာရမ္မဏပစ္စယေန ပစ္စယော. (၂)

အဗျာကတော အဟေတုကော ဓမ္မော အဗျာကတဿ အဟေတုကဿ ဓမ္မဿ အာရမ္မဏပစ္စယေန ပစ္စယော. အဗျာကတော အဟေတုကော ဓမ္မော အကုသလဿ အဟေတုကဿ ဓမ္မဿ အာရမ္မဏပစ္စယေန ပစ္စယော. (၂)

အကုသလော အဟေတုကော ဓမ္မော အကုသလဿ အဟေတုကဿ ဓမ္မဿ အနန္တရပစ္စယေန ပစ္စယော. အကုသလော အဟေတုကော ဓမ္မော အဗျာကတဿ အဟေတုကဿ ဓမ္မဿ အနန္တရပစ္စယေန ပစ္စယော. (၂)

အဗျာကတော အဟေတုကော ဓမ္မော အဗျာကတဿ အဟေတုကဿ ဓမ္မဿ အနန္တရပစ္စယေန ပစ္စယော. အဗျာကတော အဟေတုကော ဓမ္မော အကုသလဿ အဟေတုကဿ ဓမ္မဿ အနန္တရပစ္စယေန ပစ္စယော။ပေ။. (၂)

အကုသလော အဟေတုကော ဓမ္မော အကုသလဿ အဟေတုကဿ ဓမ္မဿ ဥပနိဿယပစ္စယေန ပစ္စယော (သံခိတ္တံ).

၂၅၂. ဟေတုယာ ဧကံ၊ အာရမ္မဏေ စတ္တာရိ၊ အနန္တရေ စတ္တာရိ၊ သမနန္တရေ စတ္တာရိ၊ သဟဇာတေ တီဏိ၊ အညမညေ ဧကံ၊ နိဿယေ စတ္တာရိ၊ ဥပနိဿယေ စတ္တာရိ (သံခိတ္တံ).

နဟေတုယာ ပဉ္စ၊ နအာရမ္မဏေ ပဉ္စ၊ နအဓိပတိယာ ပဉ္စ (သံခိတ္တံ).

ဟေတုပစ္စယာ နအာရမ္မဏေ ဧကံ (သံခိတ္တံ).

နဟေတုပစ္စယာ အာရမ္မဏေ စတ္တာရိ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)