၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၂၁၈. အတီတာရမ္မဏံ နဟေတုံ ဓမ္မံ ပဋိစ္စ အတီတာရမ္မဏော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁)

အနာဂတာရမ္မဏံ နဟေတုံ ဓမ္မံ ပဋိစ္စ အနာဂတာရမ္မဏော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁)

ပစ္စုပ္ပန္နာရမ္မဏံ နဟေတုံ ဓမ္မံ ပဋိစ္စ ပစ္စုပ္ပန္နာရမ္မဏော နဟေတု ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂၁၉. ဟေတုယာ တီဏိ၊ အာရမ္မဏေ တီဏိ၊ အဓိပတိယာ တီဏိ။ပေ။ အဝိဂတေ တီဏိ (သံခိတ္တံ).

နဟေတုယာ တီဏိ၊ နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ တီဏိ၊ နကမ္မေ တီဏိ၊ နဝိပါကေ တီဏိ၊ နဈာနေ ဧကံ၊ နမဂ္ဂေ တီဏိ၊ နဝိပ္ပယုတ္တေ ဒွေ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ ဝိတ္ထာရေတဗ္ဗံ.)

အာရမ္မဏပစ္စယော

၂၂၀. အတီတာရမ္မဏော နဟေတု ဓမ္မော အတီတာရမ္မဏဿ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ.

အနာဂတာရမ္မဏော နဟေတု ဓမ္မော အနာဂတာရမ္မဏဿ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ.

ပစ္စုပ္ပန္နာရမ္မဏော နဟေတု ဓမ္မော ပစ္စုပ္ပန္နာရမ္မဏဿ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ (သံခိတ္တံ).

၂၂၁. အာရမ္မဏေ နဝ၊ အဓိပတိယာ သတ္တ။ပေ။ အဝိဂတေ တီဏိ (သံခိတ္တံ).

နဟေတုယာ နဝ၊ နအာရမ္မဏေ နဝ (သံခိတ္တံ).

အာရမ္မဏပစ္စယာ နဟေတုယာ နဝ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)