၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၇၄. ဟီနံ ဟေတုံ ဓမ္မံ ပဋိစ္စ ဟီနော ဟေတု ဓမ္မော ဥပ္ပဇ္ဇတိ ဟေတုပစ္စယာ. မဇ္ဈိမံ ဟေတုံ ဓမ္မံ ပဋိစ္စ မဇ္ဈိမော ဟေတု ဓမ္မော ဥပ္ပဇ္ဇတိ ဟေတုပစ္စယာ. ပဏီတံ ဟေတုံ ဓမ္မံ ပဋိစ္စ ပဏီတော ဟေတု ဓမ္မော ဥပ္ပဇ္ဇတိ ဟေတုပစ္စယာ. (၃) (သံခိတ္တံ.)

၁၇၅. ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ (သံခိတ္တံ).

နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ တီဏိ၊ နဝိပါကေ တီဏိ၊ နဝိပ္ပယုတ္တေ တီဏိ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ ဝိတ္ထာရေတဗ္ဗံ.)

ဟေတု-အာရမ္မဏပစ္စယာ

၁၇၆. ဟီနော ဟေတု ဓမ္မော ဟီနဿ ဟေတုဿ ဓမ္မဿ ဟေတုပစ္စယေန ပစ္စယော. (၁)

မဇ္ဈိမော ဟေတု ဓမ္မော မဇ္ဈိမဿ ဟေတုဿ ဓမ္မဿ ဟေတုပစ္စယေန ပစ္စယော. (၁)

ပဏီတော ဟေတု ဓမ္မော ပဏီတဿ ဟေတုဿ ဓမ္မဿ ဟေတုပစ္စယေန ပစ္စယော. (၁)

ဟီနော ဟေတု ဓမ္မော ဟီနဿ ဟေတုဿ ဓမ္မဿ အာရမ္မဏပစ္စယေန ပစ္စယော. ဟီနော ဟေတု ဓမ္မော မဇ္ဈိမဿ ဟေတုဿ ဓမ္မဿ အာရမ္မဏပစ္စယေန ပစ္စယော. (၂)

မဇ္ဈိမော ဟေတု ဓမ္မော မဇ္ဈိမဿ ဟေတုဿ ဓမ္မဿ အာရမ္မဏပစ္စယေန ပစ္စယော. မဇ္ဈိမော ဟေတု ဓမ္မော ဟီနဿ ဟေတုဿ ဓမ္မဿ အာရမ္မဏပစ္စယေန ပစ္စယော. (၂)

ပဏီတော ဟေတု ဓမ္မော မဇ္ဈိမဿ ဟေတုဿ ဓမ္မဿ အာရမ္မဏပစ္စယေန ပစ္စယော. (၁)

၁၇၇. ဟီနော ဟေတု ဓမ္မော ဟီနဿ ဟေတုဿ ဓမ္မဿ အဓိပတိပစ္စယေန ပစ္စယော. (၁)

မဇ္ဈိမော ဟေတု ဓမ္မော မဇ္ဈိမဿ ဟေတုဿ ဓမ္မဿ အဓိပတိပစ္စယေန ပစ္စယော. မဇ္ဈိမော ဟေတု ဓမ္မော ဟီနဿ ဟေတုဿ ဓမ္မဿ အဓိပတိပစ္စယေန ပစ္စယော. (၂)

ပဏီတော ဟေတု ဓမ္မော ပဏီတဿ ဟေတုဿ ဓမ္မဿ အဓိပတိပစ္စယေန ပစ္စယော. ပဏီတော ဟေတု ဓမ္မော မဇ္ဈိမဿ ဟေတုဿ ဓမ္မဿ အဓိပတိပစ္စယေန ပစ္စယော. (၂)

ဟီနော ဟေတု ဓမ္မော ဟီနဿ ဟေတုဿ ဓမ္မဿ အနန္တရပစ္စယေန ပစ္စယော။ ဒွေ.

မဇ္ဈိမော ဟေတု ဓမ္မော မဇ္ဈိမဿ ဟေတုဿ ဓမ္မဿ အနန္တရပစ္စယေန ပစ္စယော။ ဒွေ.

ပဏီတော ဟေတု ဓမ္မော ပဏီတဿ ဟေတုဿ ဓမ္မဿ အနန္တရပစ္စယေန ပစ္စယော။ ဒွေ (သံခိတ္တံ).

၁၇၈. ဟေတုယာ တီဏိ၊ အာရမ္မဏေ ပဉ္စ၊ အဓိပတိယာ ပဉ္စ။ပေ. ။ အဝိဂတေ တီဏိ (သံခိတ္တံ).

နဟေတုယာ အဋ္ဌ၊ နအာရမ္မဏေ အဋ္ဌ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ ပဉ္စ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)

နဟေတုပဒံ

ဟေတုပစ္စယော

၁၇၉. ဟီနံ နဟေတုံ ဓမ္မံ ပဋိစ္စ ဟီနော နဟေတု ဓမ္မော ဥပ္ပဇ္ဇတိ ဟေတုပစ္စယာ.

(ယထာ သံကိလိဋ္ဌတ္တိကဟေတုဒုကံ၊ ဧဝံ ဝိတ္ထာရေတဗ္ဗံ.)