၇. ပဉှာဝါရော

ပစ္စယစတုက္ကံ

၁၂၂. ဒဿနေန ပဟာတဗ္ဗော နဟေတု ဓမ္မော ဒဿနေန ပဟာတဗ္ဗဿ နဟေတုဿ ဓမ္မဿ အာရမ္မဏပစ္စယေန ပစ္စယော. ဒဿနေန ပဟာတဗ္ဗော နဟေတု ဓမ္မော နေဝဒဿနေန နဘာဝနာယ ပဟာတဗ္ဗဿ နဟေတုဿ ဓမ္မဿ အာရမ္မဏပစ္စယေန ပစ္စယော။ ဒွေ.

ဘာဝနာယ ပဟာတဗ္ဗော နဟေတု ဓမ္မော ဘာဝနာယ ပဟာတဗ္ဗဿ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ.

နေဝဒဿနေန နဘာဝနာယ ပဟာတဗ္ဗော နဟေတု ဓမ္မော နေဝဒဿနေန နဘာဝနာယ ပဟာတဗ္ဗဿ နဟေတုဿ ဓမ္မဿ အာရမ္မဏပစ္စယေန ပစ္စယော။ တီဏိ (သံခိတ္တံ).

၁၂၃. အာရမ္မဏေ အဋ္ဌ၊ အဓိပတိယာ ဒသ။ပေ။ အဝိဂတေ တေရသ (သံခိတ္တံ).

နဟေတုယာ စုဒ္ဒသ၊ နအာရမ္မဏေ စုဒ္ဒသ (သံခိတ္တံ).

အာရမ္မဏပစ္စယာ နဟေတုယာ အဋ္ဌ (သံခိတ္တံ).

နဟေတုပစ္စယာ အာရမ္မဏေ အဋ္ဌ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)