၇. ပဉှာဝါရော

ပစ္စယစတုက္ကံ

အာရမ္မဏပစ္စယော

၉၄. သဝိတက္ကသဝိစာရော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု ဓမ္မော အဝိတက္ကဝိစာရမတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု ဓမ္မော အဝိတက္ကအဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု ဓမ္မော သဝိတက္ကသဝိစာရဿ နဟေတုဿ စ အဝိတက္ကဝိစာရမတ္တဿ နဟေတုဿ စ ဓမ္မဿ အာရမ္မဏပစ္စယေန ပစ္စယော။ စတ္တာရိ.

၉၅. အဝိတက္ကဝိစာရမတ္တော နဟေတု ဓမ္မော အဝိတက္ကဝိစာရမတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု ဓမ္မော အဝိတက္ကအဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု ဓမ္မော သဝိတက္ကသဝိစာရဿ နဟေတုဿ စ အဝိတက္ကဝိစာရမတ္တဿ နဟေတုဿ စ ဓမ္မဿ အာရမ္မဏပစ္စယေန ပစ္စယော။ စတ္တာရိ.

၉၆. အဝိတက္ကအဝိစာရော နဟေတု ဓမ္မော အဝိတက္ကအဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကအဝိစာရော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကအဝိစာရော နဟေတု ဓမ္မော အဝိတက္ကဝိစာရမတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကအဝိစာရော နဟေတု ဓမ္မော အဝိတက္ကဝိစာရမတ္တဿ နဟေတုဿ စ အဝိတက္ကအဝိစာရဿ နဟေတုဿ စ ဓမ္မဿ အာရမ္မဏပစ္စယေန ပစ္စယော. အဝိတက္ကအဝိစာရော နဟေတု ဓမ္မော သဝိတက္ကသဝိစာရဿ နဟေတုဿ စ အဝိတက္ကဝိစာရမတ္တဿ နဟေတုဿ စ ဓမ္မဿ အာရမ္မဏပစ္စယေန ပစ္စယော။ ပဉ္စ.

၉၇. အဝိတက္ကဝိစာရမတ္တော နဟေတု စ အဝိတက္ကအဝိစာရော နဟေတု စ ဓမ္မာ သဝိတက္ကသဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု စ အဝိတက္ကအဝိစာရော နဟေတု စ ဓမ္မာ အဝိတက္ကဝိစာရမတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု စ အဝိတက္ကအဝိစာရော နဟေတု စ ဓမ္မာ အဝိတက္ကအဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. အဝိတက္ကဝိစာရမတ္တော နဟေတု စ အဝိတက္ကအဝိစာရော နဟေတု စ ဓမ္မာ သဝိတက္ကသဝိစာရဿ နဟေတုဿ စ အဝိတက္ကဝိစာရမတ္တဿ နဟေတုဿ စ ဓမ္မဿ အာရမ္မဏပစ္စယေန ပစ္စယော။ စတ္တာရိ.

၉၈. သဝိတက္ကသဝိစာရော နဟေတု စ အဝိတက္ကဝိစာရမတ္တော နဟေတု စ ဓမ္မာ သဝိတက္ကသဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု စ အဝိတက္ကဝိစာရမတ္တော နဟေတု စ ဓမ္မာ အဝိတက္ကဝိစာရမတ္တဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု စ အဝိတက္ကဝိစာရမတ္တော နဟေတု စ ဓမ္မာ အဝိတက္ကအဝိစာရဿ နဟေတုဿ ဓမ္မဿ အာရမ္မဏပစ္စယေန ပစ္စယော. သဝိတက္ကသဝိစာရော နဟေတု စ အဝိတက္ကဝိစာရမတ္တော နဟေတု စ ဓမ္မာ သဝိတက္ကသဝိစာရဿ နဟေတုဿ စ အဝိတက္ကဝိစာရမတ္တဿ နဟေတုဿ စ ဓမ္မဿ အာရမ္မဏပစ္စယေန ပစ္စယော။ စတ္တာရိ.

အဓိပတိပစ္စယော

၉၉. သဝိတက္ကသဝိစာရော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ အဓိပတိပစ္စယေန ပစ္စယော။ သတ္တ.

အဝိတက္ကဝိစာရမတ္တော နဟေတု ဓမ္မော အဝိတက္ကဝိစာရမတ္တဿ နဟေတုဿ ဓမ္မဿ အဓိပတိပစ္စယေန ပစ္စယော။ ပဉ္စ.

အဝိတက္ကအဝိစာရော နဟေတု ဓမ္မော အဝိတက္ကအဝိစာရဿ နဟေတုဿ ဓမ္မဿ အဓိပတိပစ္စယေန ပစ္စယော။ ပဉ္စ.

အဝိတက္ကဝိစာရမတ္တော နဟေတု စ အဝိတက္ကအဝိစာရော နဟေတု စ ဓမ္မာ သဝိတက္ကသဝိစာရဿ နဟေတုဿ ဓမ္မဿ အဓိပတိပစ္စယေန ပစ္စယော။ တီဏိ.

သဝိတက္ကသဝိစာရော နဟေတု စ အဝိတက္ကဝိစာရမတ္တော နဟေတု စ ဓမ္မာ သဝိတက္ကသဝိစာရဿ နဟေတုဿ ဓမ္မဿ အဓိပတိပစ္စယေန ပစ္စယော။ တီဏိ.

အနန္တရပစ္စယာဒိ

၁၀၀. သဝိတက္ကသဝိစာရော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ အနန္တရပစ္စယေန ပစ္စယော။ပေ။ သမနန္တရပစ္စယေန ပစ္စယော.

သဝိတက္ကသဝိစာရော နဟေတု ဓမ္မော သဝိတက္ကသဝိစာရဿ နဟေတုဿ ဓမ္မဿ ဥပနိဿယပစ္စယေန ပစ္စယော (သံခိတ္တံ).

၁၀၁. အာရမ္မဏေ ဧကဝီသ၊ အဓိပတိယာ တေဝီသ၊ အနန္တရေ ပဉ္စဝီသ၊ သမနန္တရေ ပဉ္စဝီသ၊ သဟဇာတေ တိံသ၊ အညမညေ အဋ္ဌဝီသ၊ နိဿယေ တိံသ၊ ဥပနိဿယေ ပဉ္စဝီသ၊ ပုရေဇာတေ ပဉ္စ၊ ပစ္ဆာဇာတေ ပဉ္စ၊ အာသေဝနေ ဧကဝီသ၊ ကမ္မေ ဧကာဒသ၊ ဝိပါကေ ဧကဝီသ၊ အာဟာရေ ဧကာဒသ။ပေ။ အဝိဂတေ တိံသ (သံခိတ္တံ).

နဟေတုယာ ပဉ္စတိံသ၊ နအာရမ္မဏေ ပဉ္စတိံသ၊ နအဓိပတိယာ ပဉ္စတိံသ (သံခိတ္တံ).

အာရမ္မဏပစ္စယာ နဟေတုယာ ဧကဝီသ (သံခိတ္တံ).

နဟေတုပစ္စယာ အာရမ္မဏေ ဧကဝီသ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)