၇. ပဉှာဝါရော

ပစ္စယစတုက္ကံ

အာရမ္မဏ-အဓိပတိပစ္စယာ

၇၅. သံကိလိဋ္ဌသံကိလေသိကော နဟေတု ဓမ္မော သံကိလိဋ္ဌသံကိလေသိကဿ နဟေတုဿ ဓမ္မဿ အာရမ္မဏပစ္စယေန ပစ္စယော။ ဒွေ.

အသံကိလိဋ္ဌသံကိလေသိကော နဟေတု ဓမ္မော အသံကိလိဋ္ဌသံကိလေသိကဿ နဟေတုဿ ဓမ္မဿ အာရမ္မဏပစ္စယေန ပစ္စယော။ ဒွေ.

အသံကိလိဋ္ဌအသံကိလေသိကော နဟေတု ဓမ္မော အသံကိလိဋ္ဌအသံကိလေသိကဿ နဟေတုဿ ဓမ္မဿ အာရမ္မဏပစ္စယေန ပစ္စယော။ ဒွေ.

၇၆. သံကိလိဋ္ဌသံကိလေသိကော နဟေတု ဓမ္မော သံကိလိဋ္ဌသံကိလေသိကဿ နဟေတုဿ ဓမ္မဿ အဓိပတိပစ္စယေန ပစ္စယော။ တီဏိ.

အသံကိလိဋ္ဌသံကိလေသိကော နဟေတု ဓမ္မော အသံကိလိဋ္ဌသံကိလေသိကဿ နဟေတုဿ ဓမ္မဿ အဓိပတိပစ္စယေန ပစ္စယော။ ဒွေ.

အသံကိလိဋ္ဌအသံကိလေသိကော နဟေတု ဓမ္မော အသံကိလိဋ္ဌအသံကိလေသိကဿ နဟေတုဿ ဓမ္မဿ အဓိပတိပစ္စယေန ပစ္စယော။ တီဏိ (သံခိတ္တံ).

၇၇. အာရမ္မဏေ ဆ၊ အဓိပတိယာ အဋ္ဌ၊ အနန္တရေ သတ္တ၊ သမနန္တရေ သတ္တ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ အဋ္ဌ၊ အာသေဝနေ တီဏိ၊ ကမ္မေ သတ္တ၊ ဝိပါကေ စတ္တာရိ၊ အာဟာရေ သတ္တ။ပေ။ အဝိဂတေ တေရသ (သံခိတ္တံ).

နဟေတုယာ စုဒ္ဒသ၊ နအာရမ္မဏေ စုဒ္ဒသ (သံခိတ္တံ).

အာရမ္မဏပစ္စယာ နဟေတုယာ ဆ (သံခိတ္တံ).

နဟေတုပစ္စယာ အာရမ္မဏေ ဆ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)