၁-၇. ပဋိစ္စဝါရာဒိ
ပစ္စယစတုက္ကံ
၆၉. အရဏံ အနိဒဿနသပ္ပဋိဃံ ဓမ္မံ ပဋိစ္စ အရဏော အနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
ဟေတုယာ ဧကံ၊ အဓိပတိယာ ဧကံ။ပေ။ အဝိဂတေ ဧကံ. (သံခိတ္တံ.) (သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)
၇၀. သရဏံ အနိဒဿနအပ္ပဋိဃံ ဓမ္မံ ပဋိစ္စ သရဏော အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အရဏံ အနိဒဿနအပ္ပဋိဃံ ဓမ္မံ ပဋိစ္စ အရဏော အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၁)
သရဏံ အနိဒဿနအပ္ပဋိဃဉ္စ အရဏံ အနိဒဿနအပ္ပဋိဃဉ္စ ဓမ္မံ ပဋိစ္စ အရဏော အနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ. (သံခိတ္တံ.) (သဟဇာတဝါရောပိ။ပေ။ သမ္ပယုတ္တဝါရောပိ ဝိတ္ထာရေတဗ္ဗာ.)
၇၁. အရဏော အနိဒဿနသပ္ပဋိဃော ဓမ္မော အရဏဿ အနိဒဿနသပ္ပဋိဃဿ ဓမ္မဿ သဟဇာတပစ္စယေန ပစ္စယော။ ဧကံ (အညမညေ ဧကံ၊ နိဿယေ ဧကံ၊ အတ္ထိယာ ဧကံ၊ အဝိဂတေ ဧကံ. သံခိတ္တံ).
၇၂. သရဏော အနိဒဿနအပ္ပဋိဃော ဓမ္မော သရဏဿ အနိဒဿနအပ္ပဋိဃဿ ဓမ္မဿ ဟေတုပစ္စယေန ပစ္စယော။ တီဏိ. အရဏော အနိဒဿနအပ္ပဋိဃော ဓမ္မော အရဏဿ အနိဒဿနအပ္ပဋိဃဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)
၇၃. ဟေတုယာ စတ္တာရိ၊ အာရမ္မဏေ စတ္တာရိ။ပေ။ အဝိဂတေ သတ္တ (သံခိတ္တံ).
နဟေတုယာ သတ္တ၊ နအာရမ္မဏေ သတ္တ (သံခိတ္တံ).
ဟေတုပစ္စယာ နအာရမ္မဏေ စတ္တာရိ (သံခိတ္တံ).
နဟေတုပစ္စယာ အာရမ္မဏေ စတ္တာရိ (သံခိတ္တံ).
(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)
ဓမ္မာနုလောမေ ဒုကတိကပဋ္ဌာနံ နိဋ္ဌိတံ.