ဒွါဒသ အကုသလာနိ

၃၆၅. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ပီတိ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ သောမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာဒိဋ္ဌိ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ လောဘော ဟောတိ၊ မောဟော ဟောတိ၊ အဘိဇ္ဈာ ဟောတိ၊ မိစ္ဆာဒိဋ္ဌိ ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

၃၆၆. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.

၃၆၇. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဝေဒနာ ဟောတိ.

၃၆၈. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.

၃၆၉. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.

၃၇၀. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ စိတ္တံ ဟောတိ.

၃၇၁. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ မိစ္ဆာသင်္ကပ္ပေါ – အယံ တသ္မိံ သမယေ ဝိတက္ကော ဟောတိ.

၃၇၂. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.

၃၇၃. ကတမာ တသ္မိံ သမယေ ပီတိ ဟောတိ? ယာ တသ္မိံ သမယေ ပီတိ ပါမောဇ္ဇံ အာမောဒနာ ပမောဒနာ ဟာသော ပဟာသော ဝိတ္တိ ဩဒဂျံ အတ္တမနတာ စိတ္တဿ – အယံ တသ္မိံ သမယေ ပီတိ ဟောတိ.

၃၇၄. ကတမံ တသ္မိံ သမယေ သုခံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခံ ဟောတိ.

၃၇၅. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – အယံ တသ္မိံ သမယေ စိတ္တဿေကဂ္ဂတာ ဟောတိ.

၃၇၆. ကတမံ တသ္မိံ သမယေ ဝီရိယိန္ဒြိယံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ မိစ္ဆာဝါယာမော – ဣဒံ တသ္မိံ သမယေ ဝီရိယိန္ဒြိယံ ဟောတိ.

၃၇၇. ကတမံ တသ္မိံ သမယေ သမာဓိန္ဒြိယံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – ဣဒံ တသ္မိံ သမယေ သမာဓိန္ဒြိယံ ဟောတိ?

၃၇၈. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.

၃၇၉. ကတမံ တသ္မိံ သမယေ သောမနဿိန္ဒြိယံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သောမနဿိန္ဒြိယံ ဟောတိ.

၃၈၀. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ.

၃၈၁. ကတမာ တသ္မိံ သမယေ မိစ္ဆာဒိဋ္ဌိ ဟောတိ? ယာ တသ္မိံ သမယေ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော [ပဋိဂ္ဂါဟော (သီ. သျာ.)] အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော [ဝိပရိယေသဂါဟော (က.)] – အယံ တသ္မိံ သမယေ မိစ္ဆာဒိဋ္ဌိ ဟောတိ.

၃၈၂. ကတမော တသ္မိံ သမယေ မိစ္ဆာသင်္ကပ္ပေါ ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ မိစ္ဆာသင်္ကပ္ပေါ – အယံ တသ္မိံ သမယေ မိစ္ဆာသင်္ကပ္ပေါ ဟောတိ.

၃၈၃. ကတမော တသ္မိံ သမယေ မိစ္ဆာဝါယာမော ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ မိစ္ဆာဝါယာမော – အယံ တသ္မိံ သမယေ မိစ္ဆာဝါယာမော ဟောတိ.

၃၈၄. ကတမော တသ္မိံ သမယေ မိစ္ဆာသမာဓိ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – အယံ တသ္မိံ သမယေ မိစ္ဆာသမာဓိ ဟောတိ.

၃၈၅. ကတမံ တသ္မိံ သမယေ ဝီရိယဗလံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ မိစ္ဆာဝါယာမော – ဣဒံ တသ္မိံ သမယေ ဝီရိယဗလံ ဟောတိ.

၃၈၆. ကတမံ တသ္မိံ သမယေ သမာဓိဗလံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – ဣဒံ တသ္မိံ သမယေ သမာဓိဗလံ ဟောတိ.

၃၈၇. ကတမံ တသ္မိံ သမယေ အဟိရိကဗလံ ဟောတိ? ယံ တသ္မိံ သမယေ န ဟိရီယတိ ဟိရိယိတဗ္ဗေန န ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ အဟိရိကဗလံ ဟောတိ.

၃၈၈. ကတမံ တသ္မိံ သမယေ အနောတ္တပ္ပဗလံ ဟောတိ? ယံ တသ္မိံ သမယေ န ဩတ္တပ္ပတိ ဩတ္တပ္ပိတဗ္ဗေန န ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ အနောတ္တပ္ပဗလံ ဟောတိ.

၃၈၉. ကတမော တသ္မိံ သမယေ လောဘော ဟောတိ? ယော တသ္မိံ သမယေ လောဘော လုဗ္ဘနာ လုဗ္ဘိတတ္တံ သာရာဂေါ သာရဇ္ဇနာ သာရဇ္ဇိတတ္တံ အဘိဇ္ဈာ လောဘော အကုသလမူလံ – အယံ တသ္မိံ သမယေ လောဘော ဟောတိ.

၃၉၀. ကတမော တသ္မိံ သမယေ မောဟော ဟောတိ? ယံ တသ္မိံ သမယေ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခနာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – အယံ တသ္မိံ သမယေ မောဟော ဟောတိ.

၃၉၁. ကတမာ တသ္မိံ သမယေ အဘိဇ္ဈာ ဟောတိ? ယော တသ္မိံ သမယေ လောဘော လုဗ္ဘနာ လုဗ္ဘိတတ္တံ သာရာဂေါ သာရဇ္ဇနာ သာရဇ္ဇိတတ္တံ အဘိဇ္ဈာ လောဘော အကုသလမူလံ – အယံ တသ္မိံ သမယေ အဘိဇ္ဈာ ဟောတိ.

၃၉၂. ကတမာ တသ္မိံ သမယေ မိစ္ဆာဒိဋ္ဌိ ဟောတိ? ယာ တသ္မိံ သမယေ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ တသ္မိံ သမယေ မိစ္ဆာဒိဋ္ဌိ ဟောတိ.

၃၉၃. ကတမံ တသ္မိံ သမယေ အဟိရိကံ ဟောတိ? ယံ တသ္မိံ သမယေ န ဟိရီယတိ ဟိရိယိတဗ္ဗေန န ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ အဟိရိကံ ဟောတိ.

၃၉၄. ကတမံ တသ္မိံ သမယေ အနောတ္တပ္ပံ ဟောတိ? ယံ တသ္မိံ သမယေ န ဩတ္တပ္ပတိ ဩတ္တပ္ပိတဗ္ဗေန န ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ အနောတ္တပ္ပံ ဟောတိ.

၃၉၅. ကတမော တသ္မိံ သမယေ သမထော ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – အယံ တသ္မိံ သမယေ သမထော ဟောတိ.

၃၉၆. ကတမော တသ္မိံ သမယေ ပဂ္ဂါဟော ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ မိစ္ဆာဝါယာမော – အယံ တသ္မိံ သမယေ ပဂ္ဂါဟော ဟောတိ.

၃၉၇. ကတမော တသ္မိံ သမယေ အဝိက္ခေပေါ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ မိစ္ဆာသမာဓိ – အယံ တသ္မိံ သမယေ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ ပဉ္စင်္ဂိကံ ဈာနံ ဟောတိ၊ စတုရင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဒွေ ဟေတူ ဟောန္တိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၃၉၈. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာဒိဋ္ဌိ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ လောဘော မောဟော အဘိဇ္ဈာ မိစ္ဆာဒိဋ္ဌိ အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၃၉၉. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတသမ္ပယုတ္တံ သသင်္ခါရေန ရူပါရမ္မဏံ ဝါ။ပေ။ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အကုသလာ.

၄၀၀. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတဝိပ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ပီတိ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ သောမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ လောဘော ဟောတိ၊ မောဟော ဟောတိ၊ အဘိဇ္ဈာ ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ ပဉ္စင်္ဂိကံ ဈာနံ ဟောတိ၊ တိဝင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဒွေ ဟေတူ ဟောန္တိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၀၁. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ လောဘော မောဟော အဘိဇ္ဈာ အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၄၀၂. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတဝိပ္ပယုတ္တံ သသင်္ခါရေန ရူပါရမ္မဏံ ဝါ။ပေ။ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အကုသလာ.

၄၀၃. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဒိဋ္ဌိဂတသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာဒိဋ္ဌိ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ လောဘော ဟောတိ၊ မောဟော ဟောတိ၊ အဘိဇ္ဈာ ဟောတိ၊ မိစ္ဆာဒိဋ္ဌိ ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

၄၀၄. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.

၄၀၅. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဝေဒနာ ဟောတိ။ပေ။.

၄၀၆. ကတမာ တသ္မိံ သမယေ ဥပေက္ခာ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဥပေက္ခာ ဟောတိ။ပေ။.

၄၀၇. ကတမံ တသ္မိံ သမယေ ဥပေက္ခိန္ဒြိယံ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ တသ္မိံ သမယေ ဥပေက္ခိန္ဒြိယံ ဟောတိ။ပေ။ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ စတုရင်္ဂိကံ ဈာနံ ဟောတိ၊ စတုရင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဒွေ ဟေတူ ဟောန္တိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၀၈. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာဒိဋ္ဌိ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ လောဘော မောဟော အဘိဇ္ဈာ မိစ္ဆာဒိဋ္ဌိ အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၄၀၉. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဒိဋ္ဌိဂတသမ္ပယုတ္တံ သသင်္ခါရေန ရူပါရမ္မဏံ ဝါ။ပေ။ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အကုသလာ.

၄၁၀. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဒိဋ္ဌိဂတဝိပ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ လောဘော ဟောတိ၊ မောဟော ဟောတိ၊ အဘိဇ္ဈာ ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ စတုရင်္ဂိကံ ဈာနံ ဟောတိ၊ တိဝင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဒွေ ဟေတူ ဟောန္တိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၁၁. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ လောဘော မောဟော အဘိဇ္ဈာ အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၄၁၂. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဒိဋ္ဌိဂတဝိပ္ပယုတ္တံ သသင်္ခါရေန ရူပါရမ္မဏံ ဝါ။ပေ။ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အကုသလာ.

၄၁၃. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဒေါမနဿသဟဂတံ ပဋိဃသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဒုက္ခံ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ ဒေါမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ ဒေါသော ဟောတိ၊ မောဟော ဟောတိ၊ ဗျာပါဒေါ ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

၄၁၄. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.

၄၁၅. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – အယံ တသ္မိံ သမယေ ဝေဒနာ ဟောတိ။ပေ။.

၄၁၆. ကတမံ တသ္မိံ သမယေ ဒုက္ခံ ဟောတိ? ယံ တသ္မိံ သမယေ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣဒံ တသ္မိံ သမယေ ဒုက္ခံ ဟောတိ။ပေ။.

၄၁၇. ကတမံ တသ္မိံ သမယေ ဒေါမနဿိန္ဒြိယံ ဟောတိ? ယံ တသ္မိံ သမယေ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣဒံ တသ္မိံ သမယေ ဒေါမနဿိန္ဒြိယံ ဟောတိ။ပေ။.

၄၁၈. ကတမော တသ္မိံ သမယေ ဒေါသော ဟောတိ? ယော တသ္မိံ သမယေ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – အယံ တသ္မိံ သမယေ ဒေါသော ဟောတိ။ပေ။.

၄၁၉. ကတမော တသ္မိံ သမယေ ဗျာပါဒေါ ဟောတိ? ယော တသ္မိံ သမယေ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – အယံ တသ္မိံ သမယေ ဗျာပါဒေါ ဟောတိ။ပေ။ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ စတုရင်္ဂိကံ ဈာနံ ဟောတိ၊ တိဝင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဒွေ ဟေတူ ဟောန္တိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၂၀. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ ဒေါသော မောဟော ဗျာပါဒေါ အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၄၂၁. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဒေါမနဿသဟဂတံ ပဋိဃသမ္ပယုတ္တံ သသင်္ခါရေန ရူပါရမ္မဏံ ဝါ။ပေ။ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အကုသလာ.

၄၂၂. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဝိစိကိစ္ဆာသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ ဝီရိယဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ ဝိစိကိစ္ဆာ ဟောတိ၊ မောဟော ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ ပဂ္ဂါဟော ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

၄၂၃. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ။ပေ။.

၄၂၄. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ။ပေ။.

၄၂၅. ကတမာ တသ္မိံ သမယေ ဝိစိကိစ္ဆာ ဟောတိ? ယာ တသ္မိံ သမယေ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓာပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – အယံ တသ္မိံ သမယေ ဝိစိကိစ္ဆာ ဟောတိ။ပေ။ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ စတ္တာရိ ဣန္ဒြိယာနိ ဟောန္တိ၊ စတုရင်္ဂိကံ ဈာနံ ဟောတိ၊ ဒုဝင်္ဂိကော မဂ္ဂေါ ဟောတိ၊ တီဏိ ဗလာနိ ဟောန္တိ၊ ဧကော ဟေတု ဟောတိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၂၆. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ ဇီဝိတိန္ဒြိယံ မိစ္ဆာသင်္ကပ္ပေါ မိစ္ဆာဝါယာမော ဝီရိယဗလံ အဟိရိကဗလံ အနောတ္တပ္ပဗလံ ဝိစိကိစ္ဆာ မောဟော အဟိရိကံ အနောတ္တပ္ပံ ပဂ္ဂါဟော၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

၄၂၇. ကတမေ ဓမ္မာ အကုသလာ? ယသ္မိံ သမယေ အကုသလံ စိတ္တံ ဥပ္ပန္နံ ဟောတိ ဥပေက္ခာသဟဂတံ ဥဒ္ဓစ္စသမ္ပယုတ္တံ ရူပါရမ္မဏံ ဝါ။ပေ။ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါယာမော ဟောတိ၊ မိစ္ဆာသမာဓိ ဟောတိ၊ ဝီရိယဗလံ ဟောတိ၊ သမာဓိဗလံ ဟောတိ၊ အဟိရိကဗလံ ဟောတိ၊ အနောတ္တပ္ပဗလံ ဟောတိ၊ ဥဒ္ဓစ္စံ ဟောတိ၊ မောဟော ဟောတိ၊ အဟိရိကံ ဟောတိ၊ အနောတ္တပ္ပံ ဟောတိ၊ သမထော ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

၄၂၈. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ။ပေ။.

၄၂၉. ကတမံ တသ္မိံ သမယေ ဥဒ္ဓစ္စံ ဟောတိ? ယံ တသ္မိံ သမယေ စိတ္တဿ ဥဒ္ဓစ္စံ အဝူပသမော စေတသော ဝိက္ခေပေါ ဘန္တတ္တံ စိတ္တဿ – ဣဒံ တသ္မိံ သမယေ ဥဒ္ဓစ္စံ ဟောတိ ။ပေ။ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ စတုရင်္ဂိကံ ဈာနံ ဟောတိ၊ တိဝင်္ဂိကော မဂ္ဂေါ ဟောတိ၊ စတ္တာရိ ဗလာနိ ဟောန္တိ၊ ဧကော ဟေတု ဟောတိ၊ ဧကော ဖဿော ဟောတိ။ပေ။ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အကုသလာ။ပေ။.

၄၃၀. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ မိစ္ဆာသင်္ကပ္ပေါ မိစ္ဆာဝါယာမော မိစ္ဆာသမာဓိ ဝီရိယဗလံ သမာဓိဗလံ အဟိရိကဗလံ အနောတ္တပ္ပဗလံ ဥဒ္ဓစ္စံ မောဟော အဟိရိကံ အနောတ္တပ္ပံ သမထော ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အကုသလာ.

ဒွါဒသ အကုသလစိတ္တာနိ.