အဗျာကတဝိပါကော
ကုသလဝိပါကပဉ္စဝိညာဏာနိ
၄၃၁. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ စက္ခုဝိညာဏံ ဥပ္ပန္နံ ဟောတိ ဥပေက္ခာသဟဂတံ ရူပါရမ္မဏံ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
၄၃၂. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၄၃၃. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာစက္ခုဝိညာဏဓာတုသမ္ဖဿဇံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄၃၄. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာစက္ခုဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၄၃၅. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာစက္ခုဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.
၄၃၆. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာစက္ခုဝိညာဏဓာတု – ဣဒံ တသ္မိံ သမယေ စိတ္တံ ဟောတိ.
၄၃၇. ကတမာ တသ္မိံ သမယေ ဥပေက္ခာ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဥပေက္ခာ ဟောတိ.
၄၃၈. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၄၃၉. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာစက္ခုဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၄၄၀. ကတမံ တသ္မိံ သမယေ ဥပေက္ခိန္ဒြိယံ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ တသ္မိံ သမယေ ဥပေက္ခိန္ဒြိယံ ဟောတိ.
၄၄၁. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ စက္ခုဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.
၄၄၂. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.
၄၄၃. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သောတဝိညာဏံ ဥပ္ပန္နံ ဟောတိ ဥပေက္ခာသဟဂတံ သဒ္ဒါရမ္မဏံ။ပေ။ ဃာနဝိညာဏံ ဥပ္ပန္နံ ဟောတိ ဥပေက္ခာသဟဂတံ ဂန္ဓာရမ္မဏံ။ပေ။ ဇိဝှါဝိညာဏံ ဥပ္ပန္နံ ဟောတိ ဥပေက္ခာသဟဂတံ ရသာရမ္မဏံ။ပေ။ ကာယဝိညာဏံ ဥပ္ပန္နံ ဟောတိ သုခသဟဂတံ ဖောဋ္ဌဗ္ဗာရမ္မဏံ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ သုခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
၄၄၄. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၄၄၅. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာကာယဝိညာဏဓာတုသမ္ဖဿဇံ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄၄၆. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာကာယဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၄၄၇. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာကာယဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.
၄၄၈. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာကာယဝိညာဏဓာတု – ဣဒံ တသ္မိံ သမယေ စိတ္တံ ဟောတိ.
၄၄၉. ကတမံ တသ္မိံ သမယေ သုခံ ဟောတိ? ယံ တသ္မိံ သမယေ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခံ ဟောတိ.
၄၅၀. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၄၅၁. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာကာယဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၄၅၂. ကတမံ တသ္မိံ သမယေ သုခိန္ဒြိယံ ဟောတိ? ယံ တသ္မိံ သမယေ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခိန္ဒြိယံ ဟောတိ.
၄၅၃. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ ကာယဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.
၄၅၄. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.
ကုသလဝိပါကာနိ ပဉ္စဝိညာဏာနိ.
ကုသလဝိပါကမနောဓာတု
၄၅၅. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကာ မနောဓာတု ဥပ္ပန္နာ ဟောတိ ဥပေက္ခာသဟဂတာ ရူပါရမ္မဏာ ဝါ။ပေ။ ဖောဋ္ဌဗ္ဗာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
၄၅၆. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၄၅၇. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဓာတုသမ္ဖဿဇံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄၅၈. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာမနောဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၄၅၉. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာမနောဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.
၄၆၀. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဓာတု – ဣဒံ တသ္မိံ သမယေ စိတ္တံ ဟောတိ.
၄၆၁. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ – အယံ တသ္မိံ သမယေ ဝိတက္ကော ဟောတိ.
၄၆၂. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.
၄၆၃. ကတမာ တသ္မိံ သမယေ ဥပေက္ခာ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဥပေက္ခာ ဟောတိ.
၄၆၄. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၄၆၅. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဓာတု – ဣဒံ တသ္မိံ သမယေ မနိန္ဒြိယံ ဟောတိ.
၄၆၆. ကတမံ တသ္မိံ သမယေ ဥပေက္ခိန္ဒြိယံ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ တသ္မိံ သမယေ ဥပေက္ခိန္ဒြိယံ ဟောတိ.
၄၆၇. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.
၄၆၈. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.
ကုသလဝိပါကာ မနောဓာတု.
ကုသလဝိပါကမနောဝိညာဏဓာတုသောမနဿသဟဂတာ
၄၆၉. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကာ မနောဝိညာဏဓာတု ဥပ္ပန္နာ ဟောတိ သောမနဿသဟဂတာ ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ပီတိ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ သောမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
၄၇၀. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၄၇၁. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄၇၂. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၄၇၃. ကတမာ တသ္မိံ သမယေ စေတနာ ဟောတိ. ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.
၄၇၄. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ စိတ္တံ ဟောတိ.
၄၇၅. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ – အယံ တသ္မိံ သမယေ ဝိတက္ကော ဟောတိ.
၄၇၆. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.
၄၇၇. ကတမာ တသ္မိံ သမယေ ပီတိ ဟောတိ? ယာ တသ္မိံ သမယေ ပီတိ ပါမောဇ္ဇံ အာမောဒနာ ပမောဒနာ ဟာသော ပဟာသော ဝိတ္တိ ဩဒဂျံ အတ္တမနတာ စိတ္တဿ – အယံ တသ္မိံ သမယေ ပီတိ ဟောတိ.
၄၇၈. ကတမံ တသ္မိံ သမယေ သုခံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခံ ဟောတိ.
၄၇၉. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၄၈၀. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၄၈၁. ကတမံ တသ္မိံ သမယေ သောမနဿိန္ဒြိယံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သောမနဿိန္ဒြိယံ ဟောတိ.
၄၈၂. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.
၄၈၃. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.
ကုသလဝိပါကာ မနောဝိညာဏဓာတု သောမနဿသဟဂတာ.
ကုသလဝိပါကမနောဝိညာဏဓာတုဥပေက္ခာသဟဂတာ
၄၈၄. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကာ မနောဝိညာဏဓာတု ဥပ္ပန္နာ ဟောတိ ဥပေက္ခာသဟဂတာ ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
၄၈၅. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၄၈၆. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄၈၇. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၄၈၈. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ – အယံ တသ္မိံ သမယေ စေတနာ ဟောတိ.
၄၈၉. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ စိတ္တံ ဟောတိ.
၄၉၀. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ – အယံ တသ္မိံ သမယေ ဝိတက္ကော ဟောတိ.
၄၉၁. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.
၄၉၂. ကတမာ တသ္မိံ သမယေ ဥပေက္ခာ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ တသ္မိံ သမယေ ဥပေက္ခာ ဟောတိ.
၄၉၃. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၄၉၄. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၄၉၅. ကတမံ တသ္မိံ သမယေ ဥပေက္ခိန္ဒြိယံ ဟောတိ? ယံ တသ္မိံ သမယေ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ တသ္မိံ သမယေ ဥပေက္ခိန္ဒြိယံ ဟောတိ.
၄၉၆. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.
တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.
၄၉၇. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.
ကုသလဝိပါကာ ဥပေက္ခာသဟဂတာ မနောဝိညာဏဓာတု.
အဋ္ဌမဟာဝိပါကာ
၄၉၈. ကတမေ ဓမ္မာ အဗျာကတာ? ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကာ မနောဝိညာဏဓာတု ဥပ္ပန္နာ ဟောတိ သောမနဿသဟဂတာ ဉာဏသမ္ပယုတ္တာ။ပေ။ သောမနဿသဟဂတာ ဉာဏသမ္ပယုတ္တာ သသင်္ခါရေန။ပေ။ သောမနဿသဟဂတာ ဉာဏဝိပ္ပယုတ္တာ။ပေ။ သောမနဿသဟဂတာ ဉာဏဝိပ္ပယုတ္တာ သသင်္ခါရေန။ပေ။ ဥပေက္ခာသဟဂတာ ဉာဏသမ္ပယုတ္တာ။ပေ။ ဥပေက္ခာသဟဂတာ ဉာဏသမ္ပယုတ္တာ သသင်္ခါရေန။ပေ။ ဥပေက္ခာသဟဂတာ ဉာဏဝိပ္ပယုတ္တာ။ပေ။ ဥပေက္ခာသဟဂတာ ဉာဏဝိပ္ပယုတ္တာ သသင်္ခါရေန ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ ။ပေ။ ဣမေ ဓမ္မာ အဗျာကတာ။ပေ။ အလောဘော အဗျာကတမူလံ။ပေ။ အဒေါသော အဗျာကတမူလံ။ပေ။ ဣမေ ဓမ္မာ အဗျာကတာ.
အဋ္ဌမဟာဝိပါကာ.
ရူပါဝစရဝိပါကာ
၄၉၉. ကတမေ ဓမ္မာ အဗျာကတာ? ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
၅၀၀. ကတမေ ဓမ္မာ အဗျာကတာ? ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ။ ဒုတိယံ ဈာနံ။ပေ။ တတိယံ ဈာနံ။ပေ။ စတုတ္ထံ ဈာနံ။ပေ။ ပဌမံ ဈာနံ။ပေ။ ပဉ္စမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သုခဿ စ ပဟာနာ။ပေ။ ပဉ္စမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
ရူပါဝစရဝိပါကာ.
အရူပါဝစရဝိပါကာ
၅၀၁. ကတမေ ဓမ္မာ အဗျာကတာ? ယသ္မိံ သမယေ အရူပူပပတ္တိယာ မဂ္ဂံ ဘာဝေတိ သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အာကာသာနဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ အရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အာကာသာနဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
၅၀၂. ကတမေ ဓမ္မာ အဗျာကတာ? ယသ္မိံ သမယေ အရူပူပပတ္တိယာ မဂ္ဂံ ဘာဝေတိ သဗ္ဗသော အာကာသာနဉ္စာယတနံ သမတိက္ကမ္မ ဝိညာဏဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ အရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သဗ္ဗသော အာကာသာနဉ္စာယတနံ သမတိက္ကမ္မ ဝိညာဏဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
၅၀၃. ကတမေ ဓမ္မာ အဗျာကတာ? ယသ္မိံ သမယေ အရူပူပပတ္တိယာ မဂ္ဂံ ဘာဝေတိ သဗ္ဗသော ဝိညာဏဉ္စာယတနံ သမတိက္ကမ္မ အာကိဉ္စညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ အရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သဗ္ဗသော ဝိညာဏဉ္စာယတနံ သမတိက္ကမ္မ အာကိဉ္စညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
၅၀၄. ကတမေ ဓမ္မာ အဗျာကတာ? ယသ္မိံ သမယေ အရူပူပပတ္တိယာ မဂ္ဂံ ဘာဝေတိ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ ကုသလာ. တဿေဝ အရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.
အရူပါဝစရဝိပါကာ.