၁. စိတ္တုပ္ပါဒကဏ္ဍံ
ကာမာဝစရကုသလံ
ပဒဘာဇနီ
၁. ကတမေ ဓမ္မာ ကုသလာ? ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဉာဏသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ပီတိ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ သဒ္ဓိန္ဒြိယံ ဟောတိ၊ ဝီရိယိန္ဒြိယံ [ဝိရိယိန္ဒြိယံ (သီ. သျာ.)] ဟောတိ၊ သတိန္ဒြိယံ ဟောတိ၊ သမာဓိန္ဒြိယံ ဟောတိ၊ ပညိန္ဒြိယံ ဟောတိ၊ မနိန္ဒြိယံ ဟောတိ၊ သောမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ သမ္မာဒိဋ္ဌိ ဟောတိ၊ သမ္မာသင်္ကပ္ပေါ ဟောတိ၊ သမ္မာဝါယာမော ဟောတိ၊ သမ္မာသတိ ဟောတိ၊ သမ္မာသမာဓိ ဟောတိ၊ သဒ္ဓါဗလံ ဟောတိ၊ ဝီရိယဗလံ [ဝိရိယဗလံ (သီ. သျာ.)] ဟောတိ၊ သတိဗလံ ဟောတိ၊ သမာဓိဗလံ ဟောတိ၊ ပညာဗလံ ဟောတိ၊ ဟိရိဗလံ ဟောတိ၊ ဩတ္တပ္ပဗလံ ဟောတိ၊ အလောဘော ဟောတိ၊ အဒေါသော ဟောတိ၊ အမောဟော ဟောတိ၊ အနဘိဇ္ဈာ ဟောတိ၊ အဗျာပါဒေါ ဟောတိ၊ သမ္မာဒိဋ္ဌိ ဟောတိ၊ ဟိရီ ဟောတိ၊ ဩတ္တပ္ပံ ဟောတိ၊ ကာယပဿဒ္ဓိ [ကာယပ္ပဿဒ္ဓိ (သျာ.)] ဟောတိ၊ စိတ္တပဿဒ္ဓိ [စိတ္တပ္ပဿဒ္ဓိ (သျာ.)] ဟောတိ၊ ကာယလဟုတာ ဟောတိ၊ စိတ္တလဟုတာ ဟောတိ၊ ကာယမုဒုတာ ဟောတိ၊ စိတ္တမုဒုတာ ဟောတိ၊ ကာယကမ္မညတာ ဟောတိ၊ စိတ္တကမ္မညတာ ဟောတိ၊ ကာယပါဂုညတာ ဟောတိ၊ စိတ္တပါဂုညတာ ဟောတိ၊ ကာယုဇုကတာ [ကာယုဇ္ဇုကတာ (သီ. က.)] ဟောတိ၊ စိတ္တုဇုကတာ [စိတ္တုဇ္ဇုကတာ (သီ. က.)] ဟောတိ၊ သတိ ဟောတိ၊ သမ္ပဇညံ ဟောတိ၊ သမထော ဟောတိ၊ ဝိပဿနာ ဟောတိ၊ ပဂ္ဂါဟော ဟောတိ၊ အဝိက္ခေပေါ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ ကုသလာ.
၂. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ.
၃. ကတမာ တသ္မိံ သမယေ ဝေဒနာ ဟောတိ? ယံ တသ္မိံ သမယေ တဇ္ဇာမနောဝိညာဏဓာတုသမ္ဖဿဇံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဝေဒနာ ဟောတိ.
၄. ကတမာ တသ္မိံ သမယေ သညာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာ ဟောတိ.
၅. ကတမာ တသ္မိံ သမယေ စေတနာ ဟောတိ? ယာ တသ္မိံ သမယေ တဇ္ဇာမနောဝိညာဏဓာတုသမ္ဖဿဇာ စေတနာ သဉ္စေတနာ စေတယိတတ္တံ [သဉ္စေတယိတတ္တံ (သျာ.)] – အယံ တသ္မိံ သမယေ စေတနာ ဟောတိ.
၆. ကတမံ တသ္မိံ သမယေ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ စိတ္တံ ဟောတိ.
၇. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ သမ္မာသင်္ကပ္ပေါ – အယံ တသ္မိံ သမယေ ဝိတက္ကော ဟောတိ.
၈. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.
၉. ကတမာ တသ္မိံ သမယေ ပီတိ ဟောတိ? ယာ တသ္မိံ သမယေ ပီတိ ပါမောဇ္ဇံ အာမောဒနာ ပမောဒနာ ဟာသော ပဟာသော ဝိတ္တိ ဩဒဂျံ အတ္တမနတာ စိတ္တဿ – အယံ တသ္မိံ သမယေ ပီတိ ဟောတိ.
၁၀. ကတမံ တသ္မိံ သမယေ သုခံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခံ ဟောတိ.
၁၁. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ စိတ္တဿေကဂ္ဂတာ ဟောတိ.
၁၂. ကတမံ တသ္မိံ သမယေ သဒ္ဓိန္ဒြိယံ ဟောတိ? ယာ တသ္မိံ သမယေ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒြိယံ သဒ္ဓါဗလံ – ဣဒံ တသ္မိံ သမယေ သဒ္ဓိန္ဒြိယံ ဟောတိ.
၁၃. ကတမံ တသ္မိံ သမယေ ဝီရိယိန္ဒြိယံ ဟောတိ? ယော တသ္မိံ သမယေ စေတသိကော ဝီရိယာရမ္ဘော [ဝိရိယာရမ္ဘော (သီ. သျာ.)] နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ [ဥဿောဠှိ (သီ.)] ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – ဣဒံ တသ္မိံ သမယေ ဝီရိယိန္ဒြိယံ ဟောတိ.
၁၄. ကတမံ တသ္မိံ သမယေ သတိန္ဒြိယံ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – ဣဒံ တသ္မိံ သမယေ သတိန္ဒြိယံ ဟောတိ.
၁၅. ကတမံ တသ္မိံ သမယေ သမာဓိန္ဒြိယံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – ဣဒံ တသ္မိံ သမယေ သမာဓိန္ဒြိယံ ဟောတိ.
၁၆. ကတမံ တသ္မိံ သမယေ ပညိန္ဒြိယံ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ တသ္မိံ သမယေ ပညိန္ဒြိယံ ဟောတိ.
၁၇. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၁၈. ကတမံ တသ္မိံ သမယေ သောမနဿိန္ဒြိယံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သောမနဿိန္ဒြိယံ ဟောတိ.
၁၉. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ [ဣရီယနာ (သီ.)] ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ.
၂၀. ကတမာ တသ္မိံ သမယေ သမ္မာဒိဋ္ဌိ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ တသ္မိံ သမယေ သမ္မာဒိဋ္ဌိ ဟောတိ.
၂၁. ကတမော တသ္မိံ သမယေ သမ္မာသင်္ကပ္ပေါ ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ သမ္မာသင်္ကပ္ပေါ – အယံ တသ္မိံ သမယေ သမ္မာသင်္ကပ္ပေါ ဟောတိ.
၂၂. ကတမော တသ္မိံ သမယေ သမ္မာဝါယာမော ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – အယံ တသ္မိံ သမယေ သမ္မာဝါယာမော ဟောတိ.
၂၃. ကတမာ တသ္မိံ သမယေ သမ္မာသတိ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – အယံ တသ္မိံ သမယေ သမ္မာသတိ ဟောတိ.
၂၄. ကတမော တသ္မိံ သမယေ သမ္မာသမာဓိ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ သမ္မာသမာဓိ ဟောတိ.
၂၅. ကတမံ တသ္မိံ သမယေ သဒ္ဓါဗလံ ဟောတိ? ယာ တသ္မိံ သမယေ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒြိယံ သဒ္ဓါဗလံ – ဣဒံ တသ္မိံ သမယေ သဒ္ဓါဗလံ ဟောတိ.
၂၆. ကတမံ တသ္မိံ သမယေ ဝီရိယဗလံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – ဣဒံ တသ္မိံ သမယေ ဝီရိယဗလံ ဟောတိ.
၂၇. ကတမံ တသ္မိံ သမယေ သတိဗလံ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – ဣဒံ တသ္မိံ သမယေ သတိဗလံ ဟောတိ.
၂၈. ကတမံ တသ္မိံ သမယေ သမာဓိဗလံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – ဣဒံ တသ္မိံ သမယေ သမာဓိဗလံ ဟောတိ.
၂၉. ကတမံ တသ္မိံ သမယေ ပညာဗလံ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ တသ္မိံ သမယေ ပညာဗလံ ဟောတိ.
၃၀. ကတမံ တသ္မိံ သမယေ ဟိရိဗလံ ဟောတိ? ယံ တသ္မိံ သမယေ ဟိရီယတိ ဟိရိယိတဗ္ဗေန ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ ဟိရိဗလံ ဟောတိ.
၃၁. ကတမံ တသ္မိံ သမယေ ဩတ္တပ္ပဗလံ ဟောတိ? ယံ တသ္မိံ သမယေ ဩတ္တပ္ပတိ ဩတ္တပ္ပိတဗ္ဗေန ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ ဩတ္တပ္ပဗလံ ဟောတိ.
၃၂. ကတမော တသ္မိံ သမယေ အလောဘော ဟောတိ? ယော တသ္မိံ သမယေ အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ တသ္မိံ သမယေ အလောဘော ဟောတိ.
၃၃. ကတမော တသ္မိံ သမယေ အဒေါသော ဟောတိ? ယော တသ္မိံ သမယေ အဒေါသော အဒုဿနာ အဒုဿိတတ္တံ [အဒူသနာ အဒူသိတတ္တံ (သျာ.)] အဗျာပါဒေါ အဗျာပဇ္ဇော အဒေါသော ကုသလမူလံ – အယံ တသ္မိံ သမယေ အဒေါသော ဟောတိ?
၃၄. ကတမော တသ္မိံ သမယေ အမောဟော ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ အမောဟော ကုသလမူလံ – အယံ တသ္မိံ သမယေ အမောဟော ဟောတိ.
၃၅. ကတမာ တသ္မိံ သမယေ အနဘိဇ္ဈာ ဟောတိ? ယော တသ္မိံ သမယေ အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ တသ္မိံ သမယေ အနဘိဇ္ဈာ ဟောတိ.
၃၆. ကတမော တသ္မိံ သမယေ အဗျာပါဒေါ ဟောတိ? ယော တသ္မိံ သမယေ အဒေါသော အဒုဿနာ အဒုဿိတတ္တံ အဗျာပါဒေါ အဗျာပဇ္ဇော အဒေါသော ကုသလမူလံ – အယံ တသ္မိံ သမယေ အဗျာပါဒေါ ဟောတိ.
၃၇. ကတမာ တသ္မိံ သမယေ သမ္မာဒိဋ္ဌိ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ တသ္မိံ သမယေ သမ္မာဒိဋ္ဌိ ဟောတိ.
၃၈. ကတမာ တသ္မိံ သမယေ ဟိရီ ဟောတိ? ယံ တသ္မိံ သမယေ ဟိရီယတိ ဟိရိယိတဗ္ဗေန ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – အယံ တသ္မိံ သမယေ ဟိရီ ဟောတိ.
၃၉. ကတမံ တသ္မိံ သမယေ ဩတ္တပ္ပံ ဟောတိ? ယံ တသ္မိံ သမယေ ဩတ္တပ္ပတိ ဩတ္တပ္ပိတဗ္ဗေန ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ ဩတ္တပ္ပံ ဟောတိ.
၄၀. ကတမာ တသ္မိံ သမယေ ကာယပဿဒ္ဓိ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ ပဿဒ္ဓိ ပဋိပဿဒ္ဓိ [ပဋိပ္ပဿဒ္ဓိ (သီ. သျာ.)] ပဿမ္ဘနာ ပဋိပဿမ္ဘနာ [ပဋိပ္ပဿမ္ဘနာ (သီ. သျာ.)] ပဋိပဿမ္ဘိတတ္တံ [ပဋိပ္ပဿမ္ဘိတတ္တံ (သီ. သျာ.)] – အယံ တသ္မိံ သမယေ ကာယပဿဒ္ဓိ ဟောတိ.
၄၁. ကတမာ တသ္မိံ သမယေ စိတ္တပဿဒ္ဓိ ဟောတိ? ယာ တသ္မိံ သမယေ ဝိညာဏက္ခန္ဓဿ ပဿဒ္ဓိ ပဋိပဿဒ္ဓိ ပဿမ္ဘနာ ပဋိပဿမ္ဘနာ ပဋိပဿမ္ဘိတတ္တံ – အယံ တသ္မိံ သမယေ စိတ္တပဿဒ္ဓိ ဟောတိ.
၄၂. ကတမာ တသ္မိံ သမယေ ကာယလဟုတာ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ လဟုတာ လဟုပရိဏာမတာ အဒန္ဓနတာ အဝိတ္ထနတာ – အယံ တသ္မိံ သမယေ ကာယလဟုတာ ဟောတိ.
၄၃. ကတမာ တသ္မိံ သမယေ စိတ္တလဟုတာ ဟောတိ? ယာ တသ္မိံ သမယေ ဝိညာဏက္ခန္ဓဿ လဟုတာ လဟုပရိဏာမတာ အဒန္ဓနတာ အဝိတ္ထနတာ – အယံ တသ္မိံ သမယေ စိတ္တလဟုတာ ဟောတိ.
၄၄. ကတမာ တသ္မိံ သမယေ ကာယမုဒုတာ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ မုဒုတာ မဒ္ဒဝတာ အကက္ခဠတာ အကထိနတာ – အယံ တသ္မိံ သမယေ ကာယမုဒုတာ ဟောတိ.
၄၅. ကတမာ တသ္မိံ သမယေ စိတ္တမုဒုတာ ဟောတိ? ယာ တသ္မိံ သမယေ ဝိညာဏက္ခန္ဓဿ မုဒုတာ မဒ္ဒဝတာ အကက္ခဠတာ အကထိနတာ – အယံ တသ္မိံ သမယေ စိတ္တမုဒုတာ ဟောတိ.
၄၆. ကတမာ တသ္မိံ သမယေ ကာယကမ္မညတာ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ ကမ္မညတာ ကမ္မညတ္တံ ကမ္မညဘာဝေါ – အယံ တသ္မိံ သမယေ ကာယကမ္မညတာ ဟောတိ.
၄၇. ကတမာ တသ္မိံ သမယေ စိတ္တကမ္မညတာ ဟောတိ? ယာ တသ္မိံ သမယေ ဝိညာဏက္ခန္ဓဿ ကမ္မညတာ ကမ္မညတ္တံ ကမ္မညဘာဝေါ – အယံ တသ္မိံ သမယေ စိတ္တကမ္မညတာ ဟောတိ.
၄၈. ကတမာ တသ္မိံ သမယေ ကာယပါဂုညတာ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ ပဂုဏတာ ပဂုဏတ္တံ ပဂုဏဘာဝေါ – အယံ တသ္မိံ သမယေ ကာယပါဂုညတာ ဟောတိ.
၄၉. ကတမာ တသ္မိံ သမယေ စိတ္တပါဂုညတာ ဟောတိ? ယာ တသ္မိံ သမယေ ဝိညာဏက္ခန္ဓဿ ပဂုဏတာ ပဂုဏတ္တံ ပဂုဏဘာဝေါ – အယံ တသ္မိံ သမယေ စိတ္တပါဂုညတာ ဟောတိ.
၅၀. ကတမာ တသ္မိံ သမယေ ကာယုဇုကတာ ဟောတိ? ယာ တသ္မိံ သမယေ ဝေဒနာက္ခန္ဓဿ သညာက္ခန္ဓဿ သင်္ခါရက္ခန္ဓဿ ဥဇုတာ ဥဇုကတာ အဇိမှတာ အဝင်္ကတာ အကုဋိလတာ – အယံ တသ္မိံ သမယေ ကာယုဇုကတာ ဟောတိ.
၅၁. ကတမာ တသ္မိံ သမယေ စိတ္တုဇုကတာ ဟောတိ? ယာ တသ္မိံ သမယေ ဝိညာဏက္ခန္ဓဿ ဥဇုတာ ဥဇုကတာ အဇိမှတာ အဝင်္ကတာ အကုဋိလတာ – အယံ တသ္မိံ သမယေ စိတ္တုဇုကတာ ဟောတိ.
၅၂. ကတမာ တသ္မိံ သမယေ သတိ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – အယံ တသ္မိံ သမယေ သတိ ဟောတိ.
၅၃. ကတမံ တသ္မိံ သမယေ သမ္ပဇညံ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ တသ္မိံ သမယေ သမ္ပဇညံ ဟောတိ.
၅၄. ကတမော တသ္မိံ သမယေ သမထော ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ သမထော ဟောတိ.
၅၅. ကတမာ တသ္မိံ သမယေ ဝိပဿနာ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ တသ္မိံ သမယေ ဝိပဿနာ ဟောတိ.
၅၆. ကတမော တသ္မိံ သမယေ ပဂ္ဂါဟော ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – အယံ တသ္မိံ သမယေ ပဂ္ဂါဟော ဟောတိ.
၅၇. ကတမော တသ္မိံ သမယေ အဝိက္ခေပေါ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ အဝိက္ခေပေါ ဟောတိ.
ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ ကုသလာ.
ပဒဘာဇနီယံ.
ပဌမဘာဏဝါရော.
ကောဋ္ဌာသဝါရော
၅၈. တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ အဋ္ဌိန္ဒြိယာနိ ဟောန္တိ၊ ပဉ္စင်္ဂိကံ ဈာနံ ဟောတိ၊ ပဉ္စင်္ဂိကော မဂ္ဂေါ ဟောတိ၊ သတ္တ ဗလာနိ ဟောန္တိ၊ တယော ဟေတူ ဟောန္တိ၊ ဧကော ဖဿော ဟောတိ၊ ဧကာ ဝေဒနာ ဟောတိ၊ ဧကာ သညာ ဟောတိ၊ ဧကာ စေတနာ ဟောတိ၊ ဧကံ စိတ္တံ ဟောတိ၊ ဧကော ဝေဒနာက္ခန္ဓော ဟောတိ၊ ဧကော သညာက္ခန္ဓော ဟောတိ၊ ဧကော သင်္ခါရက္ခန္ဓော ဟောတိ၊ ဧကော ဝိညာဏက္ခန္ဓော ဟောတိ၊ ဧကံ မနာယတနံ ဟောတိ၊ ဧကံ မနိန္ဒြိယံ ဟောတိ၊ ဧကာ မနောဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ ကုသလာ.
၅၉. ကတမေ တသ္မိံ သမယေ စတ္တာရော ခန္ဓာ ဟောန္တိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော.
၆၀. ကတမော တသ္မိံ သမယေ ဝေဒနာက္ခန္ဓော ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဝေဒနာက္ခန္ဓော ဟောတိ.
၆၁. ကတမော တသ္မိံ သမယေ သညာက္ခန္ဓော ဟောတိ? ယာ တသ္မိံ သမယေ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ သညာက္ခန္ဓော ဟောတိ.
၆၂. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ သဒ္ဓိန္ဒြိယံ ဝီရိယိန္ဒြိယံ သတိန္ဒြိယံ သမာဓိန္ဒြိယံ ပညိန္ဒြိယံ ဇီဝိတိန္ဒြိယံ သမ္မာဒိဋ္ဌိ သမ္မာသင်္ကပ္ပေါ သမ္မာဝါယာမော သမ္မာသတိ သမ္မာသမာဓိ သဒ္ဓါဗလံ ဝီရိယဗလံ သတိဗလံ သမာဓိဗလံ ပညာဗလံ ဟိရိဗလံ ဩတ္တပ္ပဗလံ အလောဘော အဒေါသော အမောဟော အနဘိဇ္ဈာ အဗျာပါဒေါ သမ္မာဒိဋ္ဌိ ဟိရီ ဩတ္တပ္ပံ ကာယပဿဒ္ဓိ စိတ္တပဿဒ္ဓိ ကာယလဟုတာ စိတ္တလဟုတာ ကာယမုဒုတာ စိတ္တမုဒုတာ ကာယကမ္မညတာ စိတ္တကမ္မညတာ ကာယပါဂုညတာ စိတ္တပါဂုညတာ ကာယုဇုကတာ စိတ္တုဇုကတာ သတိ သမ္ပဇညံ သမထော ဝိပဿနာ ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ [ထပေတွာ (က.)] ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ.
၆၃. ကတမော တသ္မိံ သမယေ ဝိညာဏက္ခန္ဓော ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ တသ္မိံ သမယေ ဝိညာဏက္ခန္ဓော ဟောတိ.
ဣမေ တသ္မိံ သမယေ စတ္တာရော ခန္ဓာ ဟောန္တိ.
၆၄. ကတမာနိ တသ္မိံ သမယေ ဒွါယတနာနိ ဟောန္တိ? မနာယတနံ ဓမ္မာယတနံ.
၆၅. ကတမံ တသ္မိံ သမယေ မနာယတနံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနာယတနံ ဟောတိ.
၆၆. ကတမံ တသ္မိံ သမယေ ဓမ္မာယတနံ ဟောတိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ တသ္မိံ သမယေ ဓမ္မာယတနံ ဟောတိ.
ဣမာနိ တသ္မိံ သမယေ ဒွါယတနာနိ ဟောန္တိ.
၆၇. ကတမာ တသ္မိံ သမယေ ဒွေ ဓာတုယော ဟောန္တိ? မနောဝိညာဏဓာတု၊ ဓမ္မဓာတု.
၆၈. ကတမာ တသ္မိံ သမယေ မနောဝိညာဏဓာတု ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ တသ္မိံ သမယေ မနောဝိညာဏဓာတု ဟောတိ.
၆၉. ကတမာ တသ္မိံ သမယေ ဓမ္မဓာတု ဟောတိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – အယံ တသ္မိံ သမယေ ဓမ္မဓာတု ဟောတိ.
ဣမာ တသ္မိံ သမယေ ဒွေ ဓာတုယော ဟောန္တိ.
၇၀. ကတမေ တသ္မိံ သမယေ တယော အာဟာရာ ဟောန္တိ? ဖဿာဟာရော၊ မနောသဉ္စေတနာဟာရော၊ ဝိညာဏာဟာရော.
၇၁. ကတမော တသ္မိံ သမယေ ဖဿာဟာရော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿာဟာရော ဟောတိ.
၇၂. ကတမော တသ္မိံ သမယေ မနောသဉ္စေတနာဟာရော ဟောတိ? ယာ တသ္မိံ သမယေ စေတနာ သဉ္စေတနာ စေတယိတတ္တံ – အယံ တသ္မိံ သမယေ မနောသဉ္စေတနာဟာရော ဟောတိ.
၇၃. ကတမော တသ္မိံ သမယေ ဝိညာဏာဟာရော ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ တသ္မိံ သမယေ ဝိညာဏာဟာရော ဟောတိ.
ဣမေ တသ္မိံ သမယေ တယော အာဟာရာ ဟောန္တိ.
၇၄. ကတမာနိ တသ္မိံ သမယေ အဋ္ဌိန္ဒြိယာနိ ဟောန္တိ? သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ မနိန္ဒြိယံ၊ သောမနဿိန္ဒြိယံ၊ ဇီဝိတိန္ဒြိယံ.
၇၅. ကတမံ တသ္မိံ သမယေ သဒ္ဓိန္ဒြိယံ ဟောတိ? ယာ တသ္မိံ သမယေ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒြိယံ သဒ္ဓါဗလံ – ဣဒံ တသ္မိံ သမယေ သဒ္ဓိန္ဒြိယံ ဟောတိ.
၇၆. ကတမံ တသ္မိံ သမယေ ဝီရိယိန္ဒြိယံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – ဣဒံ တသ္မိံ သမယေ ဝီရိယိန္ဒြိယံ ဟောတိ.
၇၇. ကတမံ တသ္မိံ သမယေ သတိန္ဒြိယံ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – ဣဒံ တသ္မိံ သမယေ သတိန္ဒြိယံ ဟောတိ.
၇၈. ကတမံ တသ္မိံ သမယေ သမာဓိန္ဒြိယံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – ဣဒံ တသ္မိံ သမယေ သမာဓိန္ဒြိယံ ဟောတိ.
၇၉. ကတမံ တသ္မိံ သမယေ ပညိန္ဒြိယံ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ တသ္မိံ သမယေ ပညိန္ဒြိယံ ဟောတိ.
၈၀. ကတမံ တသ္မိံ သမယေ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ မနိန္ဒြိယံ ဟောတိ.
၈၁. ကတမံ တသ္မိံ သမယေ သောမနဿိန္ဒြိယံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သောမနဿိန္ဒြိယံ ဟောတိ.
၈၂. ကတမံ တသ္မိံ သမယေ ဇီဝိတိန္ဒြိယံ ဟောတိ? ယော တေသံ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒြိယံ – ဣဒံ တသ္မိံ သမယေ ဇီဝိတိန္ဒြိယံ ဟောတိ.
ဣမာနိ တသ္မိံ သမယေ အဋ္ဌိန္ဒြိယာနိ ဟောန္တိ.
၈၃. ကတမံ တသ္မိံ သမယေ ပဉ္စင်္ဂိကံ ဈာနံ ဟောတိ? ဝိတက္ကော၊ ဝိစာရော၊ ပီတိ၊ သုခံ၊ စိတ္တဿေကဂ္ဂတာ.
၈၄. ကတမော တသ္မိံ သမယေ ဝိတက္ကော ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ သမ္မာသင်္ကပ္ပေါ – အယံ တသ္မိံ သမယေ ဝိတက္ကော ဟောတိ.
၈၅. ကတမော တသ္မိံ သမယေ ဝိစာရော ဟောတိ? ယော တသ္မိံ သမယေ စာရော ဝိစာရော အနုဝိစာရော ဥပဝိစာရော စိတ္တဿ အနုသန္ဓာနတာ အနုပေက္ခနတာ – အယံ တသ္မိံ သမယေ ဝိစာရော ဟောတိ.
၈၆. ကတမာ တသ္မိံ သမယေ ပီတိ ဟောတိ? ယာ တသ္မိံ သမယေ ပီတိ ပါမောဇ္ဇံ အာမောဒနာ ပမောဒနာ ဟာသော ပဟာသော ဝိတ္တိ ဩဒဂျံ အတ္တမနတာ စိတ္တဿ – အယံ တသ္မိံ သမယေ ပီတိ ဟောတိ.
၈၇. ကတမံ တသ္မိံ သမယေ သုခံ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ တသ္မိံ သမယေ သုခံ ဟောတိ.
၈၈. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ စိတ္တဿေကဂ္ဂတာ ဟောတိ.
ဣဒံ တသ္မိံ သမယေ ပဉ္စင်္ဂိကံ ဈာနံ ဟောတိ.
၈၉. ကတမော တသ္မိံ သမယေ ပဉ္စင်္ဂိကော မဂ္ဂေါ ဟောတိ? သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါယာမော၊ သမ္မာသတိ၊ သမ္မာသမာဓိ.
၉၀. ကတမာ တသ္မိံ သမယေ သမ္မာဒိဋ္ဌိ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ တသ္မိံ သမယေ သမ္မာဒိဋ္ဌိ ဟောတိ.
၉၁. ကတမော တသ္မိံ သမယေ သမ္မာသင်္ကပ္ပေါ ဟောတိ? ယော တသ္မိံ သမယေ တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ သမ္မာသင်္ကပ္ပေါ – အယံ တသ္မိံ သမယေ သမ္မာသင်္ကပ္ပေါ ဟောတိ.
၉၂. ကတမော တသ္မိံ သမယေ သမ္မာဝါယာမော ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – အယံ တသ္မိံ သမယေ သမ္မာဝါယာမော ဟောတိ.
၉၃. ကတမာ တသ္မိံ သမယေ သမ္မာသတိ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – အယံ တသ္မိံ သမယေ သမ္မာသတိ ဟောတိ.
၉၄. ကတမော တသ္မိံ သမယေ သမ္မာသမာဓိ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – အယံ တသ္မိံ သမယေ သမ္မာသမာဓိ ဟောတိ.
အယံ တသ္မိံ သမယေ ပဉ္စင်္ဂိကော မဂ္ဂေါ ဟောတိ.
၉၅. ကတမာနိ တသ္မိံ သမယေ သတ္တ ဗလာနိ ဟောန္တိ? သဒ္ဓါဗလံ၊ ဝီရိယဗလံ၊ သတိဗလံ၊ သမာဓိဗလံ၊ ပညာဗလံ၊ ဟိရိဗလံ၊ ဩတ္တပ္ပဗလံ.
၉၆. ကတမံ တသ္မိံ သမယေ သဒ္ဓါဗလံ ဟောတိ? ယာ တသ္မိံ သမယေ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒြိယံ သဒ္ဓါဗလံ – ဣဒံ တသ္မိံ သမယေ သဒ္ဓါဗလံ ဟောတိ.
၉၇. ကတမံ တသ္မိံ သမယေ ဝီရိယဗလံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော – ဣဒံ တသ္မိံ သမယေ ဝီရိယဗလံ ဟောတိ.
၉၈. ကတမံ တသ္မိံ သမယေ သတိဗလံ ဟောတိ? ယာ တသ္မိံ သမယေ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုဿနတာ သတိ သတိန္ဒြိယံ သတိဗလံ သမ္မာသတိ – ဣဒံ တသ္မိံ သမယေ သတိဗလံ ဟောတိ.
၉၉. ကတမံ တသ္မိံ သမယေ သမာဓိဗလံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ – ဣဒံ တသ္မိံ သမယေ သမာဓိဗလံ ဟောတိ.
၁၀၀. ကတမံ တသ္မိံ သမယေ ပညာဗလံ ဟောတိ? ယာ တသ္မိံ သမယေ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – ဣဒံ တသ္မိံ သမယေ ပညာဗလံ ဟောတိ.
၁၀၁. ကတမံ တသ္မိံ သမယေ ဟိရိဗလံ ဟောတိ? ယံ တသ္မိံ သမယေ ဟိရီယတိ ဟိရိယိတဗ္ဗေန ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ ဟိရိဗလံ ဟောတိ.
၁၀၂. ကတမံ တသ္မိံ သမယေ ဩတ္တပ္ပဗလံ ဟောတိ? ယံ တသ္မိံ သမယေ ဩတ္တပ္ပတိ ဩတ္တပ္ပိတဗ္ဗေန ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ တသ္မိံ သမယေ ဩတ္တပ္ပဗလံ ဟောတိ.
ဣမာနိ တသ္မိံ သမယေ သတ္တ ဗလာနိ ဟောန္တိ.
၁၀၃. ကတမေ တသ္မိံ သမယေ တယော ဟေတူ ဟောန္တိ? အလောဘော၊ အဒေါသော၊ အမောဟော.
၁၀၄. ကတမော တသ္မိံ သမယေ အလောဘော ဟောတိ? ယော တသ္မိံ သမယေ အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ တသ္မိံ သမယေ အလောဘော ဟောတိ.
၁၀၅. ကတမော တသ္မိံ သမယေ အဒေါသော ဟောတိ? ယော တသ္မိံ သမယေ အဒေါသော အဒုဿနာ အဒုဿိတတ္တံ အဗျာပါဒေါ အဗျာပဇ္ဇော အဒေါသော ကုသလမူလံ – အယံ တသ္မိံ သမယေ အဒေါသော ဟောတိ.
၁၀၆. ကတမော တသ္မိံ သမယေ အမောဟော ဟောတိ? ယာ တသ္မိံ သမယေ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ တသ္မိံ သမယေ အမောဟော ဟောတိ.
ဣမေ တသ္မိံ သမယေ တယော ဟေတူ ဟောန္တိ.
၁၀၇. ကတမော တသ္မိံ သမယေ ဧကော ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဧကော ဖဿော ဟောတိ.
၁၀၈. ကတမာ တသ္မိံ သမယေ ဧကာ ဝေဒနာ ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဧကာ ဝေဒနာ ဟောတိ.
၁၀၉. ကတမာ တသ္မိံ သမယေ ဧကာ သညာ ဟောတိ? ယာ တသ္မိံ သမယေ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ ဧကာ သညာ ဟောတိ.
၁၁၀. ကတမာ တသ္မိံ သမယေ ဧကာ စေတနာ ဟောတိ? ယာ တသ္မိံ သမယေ စေတနာ သဉ္စေတနာ စေတယိတတ္တံ – အယံ တသ္မိံ သမယေ ဧကာ စေတနာ ဟောတိ.
၁၁၁. ကတမံ တသ္မိံ သမယေ ဧကံ စိတ္တံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ ဧကံ စိတ္တံ ဟောတိ.
၁၁၂. ကတမော တသ္မိံ သမယေ ဧကော ဝေဒနာက္ခန္ဓော ဟောတိ? ယံ တသ္မိံ သမယေ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ တသ္မိံ သမယေ ဧကော ဝေဒနာက္ခန္ဓော ဟောတိ.
၁၁၃. ကတမော တသ္မိံ သမယေ ဧကော သညာက္ခန္ဓော ဟောတိ? ယာ တသ္မိံ သမယေ သညာ သဉ္ဇာနနာ သဉ္ဇာနိတတ္တံ – အယံ တသ္မိံ သမယေ ဧကော သညာက္ခန္ဓော ဟောတိ.
၁၁၄. ကတမော တသ္မိံ သမယေ ဧကော သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ သဒ္ဓိန္ဒြိယံ ဝီရိယိန္ဒြိယံ သတိန္ဒြိယံ သမာဓိန္ဒြိယံ ပညိန္ဒြိယံ ဇီဝိတိန္ဒြိယံ သမ္မာဒိဋ္ဌိ သမ္မာသင်္ကပ္ပေါ သမ္မာဝါယာမော သမ္မာသတိ သမ္မာသမာဓိ သဒ္ဓါဗလံ ဝီရိယဗလံ သတိဗလံ သမာဓိဗလံ ပညာဗလံ ဟိရိဗလံ ဩတ္တပ္ပဗလံ အလောဘော အဒေါသော အမောဟော အနဘိဇ္ဈာ အဗျာပါဒေါ သမ္မာဒိဋ္ဌိ ဟိရီ ဩတ္တပ္ပံ ကာယပဿဒ္ဓိ စိတ္တပဿဒ္ဓိ ကာယလဟုတာ စိတ္တလဟုတာ ကာယမုဒုတာ စိတ္တမုဒုတာ ကာယကမ္မညတာ စိတ္တကမ္မညတာ ကာယပါဂုညတာ စိတ္တပါဂုညတာ ကာယုဇုကတာ စိတ္တုဇုကတာ သတိ သမ္ပဇညံ သမထော ဝိပဿနာ ပဂ္ဂါဟော အဝိက္ခေပေါ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ ဧကော သင်္ခါရက္ခန္ဓော ဟောတိ.
၁၁၅. ကတမော တသ္မိံ သမယေ ဧကော ဝိညာဏက္ခန္ဓော ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ တသ္မိံ သမယေ ဧကော ဝိညာဏက္ခန္ဓော ဟောတိ.
၁၁၆. ကတမံ တသ္မိံ သမယေ ဧကံ မနာယတနံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ ဧကံ မနာယတနံ ဟောတိ.
၁၁၇. ကတမံ တသ္မိံ သမယေ ဧကံ မနိန္ဒြိယံ ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – ဣဒံ တသ္မိံ သမယေ ဧကံ မနိန္ဒြိယံ ဟောတိ.
၁၁၈. ကတမာ တသ္မိံ သမယေ ဧကာ မနောဝိညာဏဓာတု ဟောတိ? ယံ တသ္မိံ သမယေ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ တသ္မိံ သမယေ ဧကာ မနောဝိညာဏဓာတု ဟောတိ.
၁၁၉. ကတမံ တသ္မိံ သမယေ ဧကံ ဓမ္မာယတနံ ဟောတိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ တသ္မိံ သမယေ ဧကံ ဓမ္မာယတနံ ဟောတိ.
၁၂၀. ကတမာ တသ္မိံ သမယေ ဧကာ ဓမ္မဓာတု ဟောတိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – အယံ တသ္မိံ သမယေ ဧကာ ဓမ္မဓာတု ဟောတိ.
ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ ကုသလာ.
ကောဋ္ဌာသဝါရော.
သုညတဝါရော
၁၂၁. တသ္မိံ ခေါ ပန သမယေ ဓမ္မာ ဟောန္တိ၊ ခန္ဓာ ဟောန္တိ၊ အာယတနာနိ ဟောန္တိ၊ ဓာတုယော ဟောန္တိ၊ အာဟာရာ ဟောန္တိ၊ ဣန္ဒြိယာနိ ဟောန္တိ၊ ဈာနံ ဟောတိ၊ မဂ္ဂေါ ဟောတိ၊ ဗလာနိ ဟောန္တိ၊ ဟေတူ ဟောန္တိ၊ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝေဒနာက္ခန္ဓော ဟောတိ၊ သညာက္ခန္ဓော ဟောတိ၊ သင်္ခါရက္ခန္ဓော ဟောတိ၊ ဝိညာဏက္ခန္ဓော ဟောတိ၊ မနာယတနံ ဟောတိ၊ မနိန္ဒြိယံ ဟောတိ၊ မနောဝိညာဏဓာတု ဟောတိ၊ ဓမ္မာယတနံ ဟောတိ၊ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ ကုသလာ.
၁၂၂. ကတမေ တသ္မိံ သမယေ ဓမ္မာ ဟောန္တိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ တသ္မိံ သမယေ ဓမ္မာ ဟောန္တိ.
၁၂၃. ကတမေ တသ္မိံ သမယေ ခန္ဓာ ဟောန္တိ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ တသ္မိံ သမယေ ခန္ဓာ ဟောန္တိ.
၁၂၄. ကတမာနိ တသ္မိံ သမယေ အာယတနာနိ ဟောန္တိ? မနာယတနံ၊ ဓမ္မာယတနံ – ဣမာနိ တသ္မိံ သမယေ အာယတနာနိ ဟောန္တိ.
၁၂၅. ကတမာ တသ္မိံ သမယေ ဓာတုယော ဟောန္တိ? မနောဝိညာဏဓာတု၊ ဓမ္မဓာတု – ဣမာ တသ္မိံ သမယေ ဓာတုယော ဟောန္တိ.
၁၂၆. ကတမေ တသ္မိံ သမယေ အာဟာရာ ဟောန္တိ? ဖဿာဟာရော၊ မနောသဉ္စေတနာဟာရော၊ ဝိညာဏာဟာရော – ဣမေ တသ္မိံ သမယေ အာဟာရာ ဟောန္တိ.
၁၂၇. ကတမာနိ တသ္မိံ သမယေ ဣန္ဒြိယာနိ ဟောန္တိ? သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ မနိန္ဒြိယံ၊ သောမနဿိန္ဒြိယံ၊ ဇီဝိတိန္ဒြိယံ – ဣမာနိ တသ္မိံ သမယေ ဣန္ဒြိယာနိ ဟောန္တိ.
၁၂၈. ကတမံ တသ္မိံ သမယေ ဈာနံ ဟောတိ? ဝိတက္ကော၊ ဝိစာရော၊ ပီတိ၊ သုခံ၊ စိတ္တဿေကဂ္ဂတာ – ဣဒံ တသ္မိံ သမယေ ဈာနံ ဟောတိ.
၁၂၉. ကတမော တသ္မိံ သမယေ မဂ္ဂေါ ဟောတိ? သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါယာမော၊ သမ္မာသတိ၊ သမ္မာသမာဓိ – အယံ တသ္မိံ သမယေ မဂ္ဂေါ ဟောတိ.
၁၃၀. ကတမာနိ တသ္မိံ သမယေ ဗလာနိ ဟောန္တိ? သဒ္ဓါဗလံ၊ ဝီရိယဗလံ၊ သတိဗလံ၊ သမာဓိဗလံ၊ ပညာဗလံ၊ ဟိရိဗလံ၊ ဩတ္တပ္ပဗလံ – ဣမာနိ တသ္မိံ သမယေ ဗလာနိ ဟောန္တိ.
၁၃၁. ကတမေ တသ္မိံ သမယေ ဟေတူ ဟောန္တိ? အလောဘော၊ အဒေါသော၊ အမောဟော – ဣမေ တသ္မိံ သမယေ ဟေတူ ဟောန္တိ.