အနုလောမဉာဏကထာဝဏ္ဏနာ

၈၀၄. အဓိမောက္ခသဒ္ဓါတိ ပသာဒဘူတော ဝတ္ထုဂတော နိစ္ဆယော အဓိမောက္ခော. တသ္မာ တထာဘူတာ ဘာဝနာဝိသေသေန ကိစ္စတော အဓိမတ္တတာယ ဗလဝတရာ နိဗ္ဗတ္တတိ. သုပဂ္ဂဟိတန္တိ သုဋ္ဌု ပဂ္ဂဟိတံ. အသလ္လီနံ ပဋုတရဘာဝေန ပဋိပက္ခဝိဓမနသမတ္ထံ ဝီရိယံ ဟောတိ. သူပဋ္ဌိတာတိ တိက္ခတရတာယ အာရမ္မဏာဘိမုခဘာဝေန သုဋ္ဌု ဥပဋ္ဌိတာ သတိ ဟောတိ. သုသမာဟိတန္တိ ပဿဒ္ဓိသုခါနံ သာတိသယတာယ သုဋ္ဌု သမာဟိတံ အာရမ္မဏေ သမ္မဒေဝ ဌပိတံ အပ္ပိတံ ဝိယ ဟောတိ. တိက္ခတရာတိ အနုလောမဉာဏုပ္ပတ္တိယာ ပစ္စယော ဘဝိတုံ သမတ္ထဘာဝေန သာတိသယံ တိက္ခာ သူရာ. သင်္ခါရာနံ ဝိစိနနေပိ မဇ္ဈတ္တဘူတသင်္ခါရုပေက္ခာ ပညာ ဥပ္ပဇ္ဇတိ. အနိစ္စာတိ ဝါ။ပေ။ သမ္မသိတွာ ဘဝင်္ဂံ ဩတရတီတိ အနိစ္စာဒီသု ဧကေနာကာရေန သမ္မသန္တီ သတ္တက္ခတ္တုံ ပဝတ္တိတွာ ဘိဇ္ဇန္တီ ဘဝင်္ဂံ ဩတိဏ္ဏာ နာမ ဟောတိ တတော ပရံ ဘဝင်္ဂဿ ဝါရောတိ ကတွာ. သင်္ခါရုပေက္ခာယ ကတနယေနေဝါတိ အနိစ္စာဒိနာ အာလမ္ဗနကရဏနယေနေဝ၊ န သမ္မသိတနယေန. တေနာဟ ‘‘အာရမ္မဏံ ကုရုမာန’’န္တိ. အာဝဋ္ဋေတွာတိ နိဝတ္တေတွာ စိတ္တဿ ဘဝင်္ဂဝသေန ဝတ္တိတုံ အဒတွာ. ဝိသဒိသစိတ္တပဝတ္တိသင်္ခါတာယ ဝီစိယာ အဘာဝေန အဝီစိကာ၊ စိတ္တသန္တတိ. ကိရိယမနောဓာတုယာ ဟိ ဘဝင်္ဂေ အာဝဋ္ဋိတေ ကိရိယမယစိတ္တပဝတ္တိဝိပါကစိတ္တုပ္ပတ္တိယာ သဝီစိကာ သန္တရာ၊ န ဧဝံ မနောဒွါရာဝဇ္ဇနေနာတိ ဝုတ္တံ ‘‘အဝီစိကံ စိတ္တသန္တတိံ အနုပ္ပဗန္ဓမာန’’န္တိ. တထေဝါတိ ယထာ အတီတာသု ဒွတ္တိံသဇဝနဝီထီသု သင်္ခါရုပေက္ခာ ‘‘အနိစ္စာ’’တိ ဝါ ‘‘ဒုက္ခာ’’တိ ဝါ ‘‘အနတ္တာ’’တိ ဝါ သင်္ခါရေ အာရမ္မဏမကာသိ၊ တထေဝ. ပရိကမ္မန္တိ ဝုစ္စတိ မဂ္ဂဿ ပရိကမ္မတ္တာ ပဋိသင်္ခါရကတ္တာ. ဥပစာရန္တိ ဝုစ္စတိ မဂ္ဂဿ အာသန္နတ္တာ၊ သမီပစာရိကတ္တာ ဝါ. အနုလောမတ္တံ သယမေဝ ဝဒတိ.

အယဉ္စ နယော ကာမံ မဂ္ဂဝီထိယံ ပဌမဇဝနဿ ပဋိသင်္ခရဏဋ္ဌော၊ ဒုတိယဿ တတော အာသန္နဋ္ဌော၊ တတိယဿ ဟေဋ္ဌိမုပရိမာနံ အနုလောမဋ္ဌော စ ယုတ္တောတိ ဝုတ္တော၊ တထာပိ သဗ္ဗေသမ္ပိ ဣမာ သမညာ သမ္ဘဝန္တီတိ ဒဿေတုံ ‘‘အဝိသေသေန ပနာ’’တိအာဒိ ဝုတ္တံ. တတ္ထ အာသေဝနန္တိ အာဒရေန သေဝနံ. ပုရိမဘာဂပစ္ဆိမဘာဂါနန္တိ ဟေဋ္ဌိမာနံ၊ ဥပရိမာနဉ္စ ဓမ္မကောဋ္ဌာသာနံ. အဋ္ဌန္နန္တိ ဥဒယဗ္ဗယဉာဏာဒီနံ အဋ္ဌန္နံ. သဗ္ဗာပိ ဝိပဿနာ လက္ခဏတ္တယသမ္မသနကိစ္စာဝ၊ ဣဒမ္ပိ တထေဝါတိ ဝုတ္တံ ‘‘တထကိစ္စတာယာ’’တိ. ဥပရီတိ မဂ္ဂေ. ဗောဓိပက္ခိယဓမ္မာနံ တထကိစ္စတာယ အနုလောမေတိ သမ္မောသာဒိပဋိပက္ခဝိဓမနတော. ဣဒါနိ အနုလောမဉာဏဿ တဒုဘယကိစ္စာနုလောမံ ဝိတ္ထာရတော ဒဿေတုံ ‘‘တဉှီ’’တိအာဒိ ဝုတ္တံ. တတ္ထ အနုလောမဉာဏံ သစ္စပဋိစ္ဆာဒကမောဟက္ခန္ဓာဒီနံ သာတိသယံ ဝိဓမနေန လောကိယဉာဏေသု ဥက္ကံသပရိယန္တဂတံ၊ တတော ဧဝ ဟေဋ္ဌာ နိဗ္ဗတ္တိတဥဒယဗ္ဗယဉာဏာဒီနမ္ပိ ကိစ္စံ ပဋိပက္ခဒူရီဘာဝေန အတ္ထတော သာဓေန္တမေဝ ဟုတွာ ပဝတ္တတိ၊ တထာပဝတ္တမာနဉ္စ တေသံ ကိစ္စံ အနုလောမေန္တံ ဝိယ ဟောတီတိ အာဟ ‘‘ဥဒယဗ္ဗယဝန္တာနံ။ပေ။ တထကိစ္စတာယ အနုလောမေတီ’’တိ. တတ္ထ ‘‘ဘယတော ဥပဋ္ဌိတ’’န္တိ ဣမိနာပိ အာရမ္မဏသီသေန ဉာဏဗျာပါရမေဝ ဝဒတိ သပ္ပဋိဘယာနံ သင်္ခါရာနံ ယထာသဘာဝဒဿနဒီပနတော. သေသေသု ပန သတ္တသုပိ ဌာနေသု ဉာဏဗျာပါရောဝ ဒဿိတော. ယသ္မာ ဧတံ အနုလောမဉာဏံ အနိစ္စာဒီသု အညတရလက္ခဏဝသေနေဝ သင်္ခါရေ အာရဗ္ဘ ပဝတ္တတိ၊ တသ္မာ ဝုတ္တံ ‘‘အနိစ္စလက္ခဏာဒိဝသေန သင်္ခါရေ အာရဗ္ဘ ပဝတ္တတ္တာ’’တိ. တာယ ပဋိပတ္တိယာတိ ယာ သာ အနုလောမဉာဏဿ ထူလထူလသစ္စပဋိစ္ဆာဒကသံကိလေသဝိက္ခမ္ဘနပဋိပတ္တိ၊ တာယ. န ဟိ အနုလောမဉာဏေ တထာ အနုပ္ပန္နေ ဂေါတြဘုဉာဏံ နိဗ္ဗာနံ အာလမ္ဗိတုံ သက္ကောတိ၊ ဂေါတြဘုဉာဏေ ဝါ အနုပ္ပန္နေ မဂ္ဂဉာဏံ ဥပ္ပဇ္ဇတီတိ.

ဝုတ္တမတ္ထံ ဩပမ္မေန ပါကဋတရံ ကာတုံ ‘‘ယထာ ဟီ’’တိအာဒိ ဝုတ္တံ. တတ္ထ အဋ္ဌန္နံ ဝေါဟာရိကမဟာမတ္တာနံ အဂတိဂမနံ ပဟာယ တံတံဝိနိစ္ဆယကရဏံ ဝိယ အဋ္ဌန္နံ ဉာဏာနံ ယထာသကံ ပဋိပက္ခံ ပဟာယ သင်္ခါရေသု ဥဒယဗ္ဗယာဒိပဋိပတ္တိ၊ ရညော မဇ္ဈတ္တဘာဝေါ ဝိယ အနုလောမဉာဏဿ ပုရိမပစ္ဆိမဓမ္မကောဋ္ဌာသဿ အနုကူလတာ. တေနေဝါတိ ဟေဋ္ဌိမဉာဏာနံ အနုလောမနမုခေန ဥပရိဗောဓိပက္ခိယာနံ အနုလောမနတောယေဝ. သစ္စာနုလောမိကန္တိ ဝုစ္စတိ မဂ္ဂသစ္စဿ အနုလောမိကတ္တာ.

အနုလောမဉာဏံ နိဋ္ဌိတံ.