ဝိညာဏပစ္စယာနာမရူပပဒဝိတ္ထာရကထာဝဏ္ဏနာ

၆၃၈. ဝိဘာဂါ နာမရူပါနန္တိ နာမဿ၊ ရူပဿ စ ပဘေဒတော.

တတ္ထ နာမဿ တာဝ ပဘေဒံ ဒဿေန္တေန ကာမံ ဝိညာဏမ္ပိ နာမမေဝ၊ ပစ္စယပစ္စယုပ္ပန္နေ ပန အသင်္ကရတော ဒဿေတုံ ‘‘အာရမ္မဏာဘိမုခံ နမနတော ဝေဒနာဒယော တယော ခန္ဓာ’’တိ ဝုတ္တံ. နိဗ္ဗာနဿ ပနေတ္ထ ပဝတ္တိကထာယံ အပ္ပစ္စယတ္တာ၊ နမနဋ္ဌာဘာဝတော စ ပသင်္ဂေါ ဧဝ နတ္ထိ. နာမနဋ္ဌေန ဟိ တံ နာမံ၊ န နမနဋ္ဌေန. တေသံ နာမရူပါနံ သုခါဒိဝသေန၊ ပထဝီအာဒိဝသေန စ ဝိဘာဂေါ.

ဧကံ သတ္တာဝါသန္တိ အသညသတ္တာဝါသံ. ပုရိမေသု စတူသု၊ အသညသတ္တာဝါသေ စာတိ ပဉ္စသု.

ဂဗ္ဘသေယျဂ္ဂဟဏေန ဇလာဗုဇာ ဂဟိတာတိ ‘‘အဏ္ဍဇာနဉ္စာ’’တိ ဝုတ္တံ. အဏ္ဍဇာနဉ္စ အဘာဝကာနန္တိ ယောဇေတဗ္ဗံ. သန္တတိသီသာနီတိ ကလာပသန္တာနမူလာနိ. ယဒိပိ ဝိကာရရူပါနိ ပဋိသန္ဓိက္ခဏေ န သန္တိ၊ လက္ခဏပရိစ္ဆေဒရူပါနိ ပန သန္တီတိ တာနိ ပရမတ္ထတော အပရိနိပ္ဖန္နာနီတိ ဝဇ္ဇေန္တော အာဟ ‘‘ရူပရူပတော’’တိ. ဖဿာဒိကေ သင်္ခါရက္ခန္ဓဘာဝေန ဧကတ္တံ နေတွာ ‘‘တေဝီသတိ ဓမ္မာ’’တိ ဝုတ္တံ. အပနေတွာတိ ကလာပန္တရဂတေ ပထဝီအာဒိကေ သမာနလက္ခဏတာယ အဂ္ဂဟေတွာ.

တေသန္တိ ဗြဟ္မကာယိကာဒီနံ. ဝိတ္ထာရေနာတိ စတူသုပိ သန္တတိသီသေသု ရူပါနံ အသင်္ခိပနေန.

ကာမဘဝေ ပန ယသ္မာ သေသဩပပါတိကာနန္တိ ဧတ္ထ ကိဉ္စာပိ ကာမဘဝေ ဩပပါတိကာ ဝုတ္တာ န သန္တိ၊ ယေန သေသဂ္ဂဟဏံ သာတ္ထကံ ဘဝေယျ၊ အဏ္ဍဇဂဗ္ဘသေယျကေဟိ ပန ဩပပါတိကသံသေဒဇာ သေသာ ဟောန္တီတိ သေသဂ္ဂဟဏံ ကတန္တိ ဝေဒိတဗ္ဗံ. အထ ဝါ ဗြဟ္မကာယိကာဒိကေဟိ ဩပပါတိကေဟိ ဝုတ္တေဟိ သေသေ သန္ဓာယ ‘‘သေသဩပပါတိကာန’’န္တိ အာဟ. တေ ပန အရူပိနောပိ သန္တီတိ ‘‘ကာမဘဝေ’’တိ ဝုတ္တံ. အပရိပုဏ္ဏာယတနာနံ ပန နာမရူပံ ယထာသမ္ဘဝံ ရူပမိဿကဝိညာဏနိဒ္ဒေသေ ဝုတ္တနယေန သက္ကာ ဓမ္မဂဏနတော ဝိညာတုန္တိ န ဝုတ္တန္တိ ဒဋ္ဌဗ္ဗံ.

ပဋိသန္ဓိစိတ္တေန သဟ ပဝတ္တဥတုတောတိ ပဋိသန္ဓိစိတ္တေန သဟ ဥပ္ပန္နရူပေသု တေဇောဓာတုတော. ဟဒယဝတ္ထုနော တင်္ခဏုပ္ပန္နတ္တာ ပဋိသန္ဓိစိတ္တဿ ဝတ္ထုဒုဗ္ဗလတာ. တေသံ အဇ္ဈောဟရိတာဟာရေန အနုဂတေ သရီရေ အာဟာရသမုဋ္ဌာနံ သုဋ္ဌဒ္ဓကန္တိ သမ္ဗန္ဓော. နရောတိ တေနေဝ မာတုကုစ္ဆိဂတဘာဝေန တိရောက္ခော. အဝကံသတော ဒွေ အဋ္ဌကာနေဝ ဥတုစိတ္တသမုဋ္ဌာနာနိ ဟောန္တီတိ သသဒ္ဒကာလံ သန္ဓာယ ‘‘ဥက္ကံသတော ဒွိန္နံ နဝကာန’’န္တိ ဝုတ္တံ. ပုဗ္ဗေတိ ယံ ပုဗ္ဗေ သန္တတိဒွယာဒိကံ သတ္တကပရိယောသာနံ ရူပံ ဣဓ ဝုတ္တံ၊ တံ ဧကေကဿ စိတ္တဿ တီသု တီသု ခဏေသု ဥပ္ပဇ္ဇမာနမေဝ ဝုတ္တန္တိ ကတွာ အာဟ ‘‘ပုဗ္ဗေ။ပေ။ သတ္တတိဝိဓ’’န္တိ. ဒုဝိဓမ္ပိ တန္တိ ဥတုသမုဋ္ဌာနံ၊ စိတ္တသမုဋ္ဌာနဉ္စာတိ ဒုဝိဓမ္ပိ တံ သဒ္ဒံ.

သဏ္ဌာတုန္တိ အဒ္ဓနိယဘာဝေန ဌာတုံ၊ အတ္တနော ပန ခဏမတ္တံ တိဋ္ဌတေဝ. စတုဒ္ဒိသာ ဝဝတ္ထာပိတာတိ အညမညံ သံသဋ္ဌသီသာ မူလေန စတူသု ဒိသာသု ဝဝတ္ထာပိတာ. အညမညံ အာလိင်္ဂေတွာ ဌိတာ ဘိန္နဝါဟနိကာ ဝိယ စ.

၆၃၉. ပဉ္စဝေါကာရဘဝေ စ ပဝတ္တိယန္တိ ရူပါဇနကကမ္မဇပဉ္စဝိညာဏပ္ပဝတ္တိကာလံ၊ သဟဇာတဝိညာဏပစ္စယဉ္စ သန္ဓာယာဟ. တဒါ ဟိ တတော နာမမေဝ ဟောတီတိ. ကမ္မဝိညာဏပစ္စယာ ပန တဒါပိ ဥဘယံ ဟောတီတိ သက္ကာ ဝတ္တုံ၊ ပစ္ဆာဇာတဝိညာဏပစ္စယာ စ ရူပံ ဥပတ္ထဒ္ဓံ ဟောတီတိ. အသညေသူတိအာဒိ ကမ္မဝိညာဏပစ္စယံ သန္ဓာယ ဝုတ္တံ. ပဉ္စဝေါကာရဘဝေ စ ပဝတ္တိယန္တိ ဘဝင်္ဂါဒိဇနကကမ္မတော အညေန ရူပုပ္ပတ္တိကာလံ၊ နိရောဓသမာပတ္တိကာလံ၊ ဘဝင်္ဂါဒိဥပ္ပတ္တိကာလတော အညကာလဉ္စ သန္ဓာယ ဝုတ္တန္တိ ယုတ္တံ. ဘဝင်္ဂါဒိဥပ္ပတ္တိကာလေ ဟိ တံဇနကေန ကမ္မုနာ ဥပ္ပဇ္ဇမာနံ ရူပံ၊ သော စ ဝိပါကော ကမ္မဝိညာဏပစ္စယော ဟောတီတိ သက္ကာ ဝတ္တုံ. သဟဇာတဝိညာဏပစ္စယာနပေက္ခမ္ပိ ဟိ ပဝတ္တိယံ ကမ္မေန ပဝတ္တမာနံ ရူပံ၊ နာမဉ္စ န ကမ္မဝိညာဏာနပေက္ခံ ဟောတီတိ. သဗ္ဗတ္ထာတိ ပဋိသန္ဓိယံ၊ ပဝတ္တေ စ. သဟဇာတဝိညာဏပစ္စယာ နာမရူပံ၊ ကမ္မဝိညာဏပစ္စယာ နာမရူပဉ္စ ယထာသမ္ဘဝံ ယောဇေတဗ္ဗံ. နာမဉ္စ ရူပဉ္စ နာမရူပဉ္စာတိ ဧတ္ထ နာမရူပသဒ္ဒေါ အတ္တနော ဧကဒေသေန နာမသဒ္ဒေန နာမသဒ္ဒဿ သရူပေါ၊ ရူပသဒ္ဒေန စ ရူပသဒ္ဒဿ၊ တသ္မာ သရူပါနံ ဧကသေသောတိ ဧကဒေသသရူပေကသေသော၊ နာမရူပသဒ္ဒဿ ဌာနံ ဣတရေသဉ္စ နာမရူပသဒ္ဒါနံ အဒဿနန္တိ အတ္ထော.

ဝိပါကတော အညံ အဝိပါကံ. ယတော ဒွိဓာ မတံ၊ တတော ယုတ္တမေဝ ဣဒန္တိ ယောဇေတဗ္ဗံ.

ကုသလာဒိစိတ္တက္ခဏေတိ အာဒိ-သဒ္ဒေန အကုသလကိရိယစိတ္တက္ခဏေ ဝိယ ဝိပါကစိတ္တက္ခဏေပိ ဝိပါကာဇနကကမ္မသမုဋ္ဌာနံ သင်္ဂဟိတန္တိ ဝေဒိတဗ္ဗံ. ဝိပါကစိတ္တက္ခဏေ ပန အဘိသင်္ခါရဝိညာဏပစ္စယာ ပုဗ္ဗေ ဝုတ္တနယေန ဥဘယဉ္စ လဗ္ဘတီတိ တာဒိသဝိပါကစိတ္တက္ခဏဝဇ္ဇနတ္ထံ ‘‘ကုသလာဒိစိတ္တက္ခဏေ’’တိ ဝုတ္တံ.

၆၄၀. သုတ္တန္တိကပရိယာယတောတိ ပဋ္ဌာနေ ရူပါနံ ဥပနိဿယပစ္စယဿ အဝုတ္တတ္တာ ဝုတ္တံ. သုတ္တန္တေ ပန ယသ္မိံ သတိ ယံ ဟောတိ၊ အသတိ စ န ဟောတိ၊ သော တဿ ဥပနိဿယော နိဒါနံ ဟေတု ပဘဝေါတိ ကတွာ ‘‘ဝိညာဏူပနိသံ နာမရူပ’’န္တိ ရူပဿ စ ဝိညာဏူပနိဿယတာ ဝုတ္တာ. ဝနပတ္ထပရိယာယေ စ ဝနပတ္ထဂါမနိဂမနဂရဇနပဒပုဂ္ဂလူပနိဿယော ဣရိယာပထဝိဟာရော၊ တတော စ စီဝရာဒီနံ ဇီဝိတပရိက္ခာရာနံ ကသိရေန၊ အပ္ပကသိရေန စ သမုဒါဂမနံ ဝုတ္တံ၊ န စ ဝနပတ္ထာဒယော အာရမ္မဏူပနိဿယာဒိဘာဝံ ဣရိယာပထာနံ၊ စီဝရာဒိသမုဒါဂမနဿ စ ဘဇန္တိ. တသ္မာ ဝိနာ အဘာဝေါ ဧဝ သုတ္တန္တိကပရိယာယတော ဥပနိဿယဘာဝေါ ဒဋ္ဌဗ္ဗော. နာမဿ အဘိသင်္ခါရဝိညာဏံ ကမ္မာရမ္မဏပဋိသန္ဓိအာဒိကာလေ အာရမ္မဏပစ္စယောဝ ဟောတီတိ ဝတ္တဗ္ဗမေဝ နတ္ထီတိ ရူပဿေဝ သုတ္တန္တိကပရိယာယတော ဧကဓာဝ ပစ္စယဘာဝေါ ဝုတ္တော. သသံသယဿ ဟိ ရူပဿေတံ ပစ္စယော ဟောတီတိ ဝုတ္တေ နာမဿ ဟောတီတိ ဝတ္တဗ္ဗမေဝ နတ္ထီတိ.

ပဝတ္တဿ ပါကဋတ္တာ အပါကဋံ ပဋိသန္ဓိံ ဂဟေတွာ ပုစ္ဆတိ ‘‘ကထံ ပနေတ’’န္တိအာဒိနာ. သုတ္တတော နာမံ၊ ယုတ္တိတော ရူပံ ဝိညာဏပစ္စယာ ဟောတီတိ ဇာနိတဗ္ဗံ.

ယုတ္တိတော သာဓေတွာ သုတ္တေန တံ ဒဠှံ ကရောန္တော ‘‘ကမ္မသမုဋ္ဌာနဿာပိ ဟီ’’တိအာဒိမာဟ. စိတ္တသမုဋ္ဌာနဿေဝါတိ စိတ္တသမုဋ္ဌာနဿ ဝိယ. ဧတ္ထ စ ‘‘ဝိညာဏပစ္စယာ နာမရူပ’’န္တိ (မ. နိ. ၃.၁၂၆၊ သံ. နိ. ၂.၁၊ ၃၉၊ မဟာဝ. ၁၊ ဥဒါ. ၁) ဘာသမာနေန ဘဂဝတာ ယသ္မာ ဥပပရိက္ခမာနာနံ ပဏ္ဍိတာနံ ပရမတ္ထတော နာမရူပမတ္တမေဝ ပဝတ္တမာနံ ဒိဿတိ၊ န သတ္တော၊ န ဇီဝေါ၊ တသ္မာ ကေနစိ အပ္ပဋိဝတ္တိယံ အနုတ္တရံ ဓမ္မစက္ကံ ပဝတ္တိတံ ဟောတိ. သုညတပ္ပကာသနဉှိ ဓမ္မစက္ကပ္ပဝတ္တနန္တိ. အထ ဝါ နာမရူပမတ္တတာဝစနေန ပဝတ္တိယာ ဒုက္ခသစ္စမတ္တတာ ဝုတ္တာ. ဒုက္ခသစ္စပ္ပကာသနေန စ တဿ သမုဒယော၊ တဿ စ နိရောဓော၊ နိရောဓဂါမိနိပဋိပဒါ စ ပကာသိတာ ဧဝ ဟောတိ. အဟေတုကဿ ဒုက္ခဿ၊ ဟေတုနိရောဓာ အနိရုဇ္ဈနကဿ စ အဘာဝါ၊ နိရောဓဿ စ ဥပါယေန ဝိနာ အနဓိဂန္တဗ္ဗတ္တာတိ စတုသစ္စပ္ပကာသနံ ဓမ္မစက္ကပ္ပဝတ္တနံ နိဒ္ဓါရေတဗ္ဗံ.