ဠကာရန္တဓာတု

တဠ တာဠနေ. တာဠေတိ၊ တာဠယတိ. ပတာဠေတိ၊ ပတာဠယတိ. တာဠံ. တာဠန္တိ ကံသတာဠာဒိ.

တဠ အာဃာတေ. ပုဗ္ဗေ ဝိယ ရူပါနိ.

ခဠ ဘေဒေ. ခဠေတိ၊ ခဠယတိ.

ဣဠ ထဝနေ. ဣဠေတိ၊ ဣဠယတိ.

ဇုဠ ပေရဏေ. ဇောဠေတိ၊ ဇောဠယတိ.

ပီဠ အဝဂါဟနေ. ပီဠေတိ၊ ပီဠယတိ. နိပ္ပီဠေတိ၊ နိပ္ပီဠယတိ. ပီဠနကော၊ ပီဠိတော၊ ပီဠာ၊ ပီဠနံ၊ နိပ္ပီဠနကော.

လဠ ဥပသေဝါယံ. လာဠေတိ၊ လာဠယတိ. ဥပလာဠေတိ၊ ဥပလာဠယတိ. ဘူဝါဒိဂဏဋ္ဌာယ ပန ဝိလာသနတ္ထေ ဝတ္တမာနာယ ဧတိဿာ ‘‘လဠတီ’’တိ ရူပံ.

သိဠ သေဠနေ. သေဠေတိ၊ သေဠယတိ. သေဠေန္တော. ဧတ္ထ သေဠေတီတိ သေဠိတသဒ္ဒံ ကရောတိ.

အဝဂ္ဂန္တဓာတုရူပါနိ.

စုရာဒီ ဧတ္တကာ ဒိဋ္ဌာ၊ ဓာတဝေါ မေ ယထာဗလံ၊

သုတ္တေသွညေပိ ပေက္ခိတွာ၊ ဂဏှဝှေါ အတ္ထယုတ္တိတော.

စုရပမုခဂဏော မေ သာသနတ္ထံ ပဝုတ္တော၊

သုပစုရဟိတကာမော တမ္ပိ သိက္ခေယျ ဓီရော၊

သုပစုရနယပါဌေ သတ္ထုနော တဉှိ သိက္ခံ၊

ပိယုသမိဝ မနုညံ အတ္ထသာရံ လဘေထ.

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု ဝိညူနံ

ကောသလ္လတ္ထာယ ကတေ သဒ္ဒနီတိပ္ပကရဏေ

စုရာဒိဂဏပရိဒီပနော အဋ္ဌာရသမော ပရိစ္ဆေဒေါ.