၂. မိဂလုဒ္ဒကဿ ဝတ္ထုမှိ အယမာနုပုဗ္ဗိကထာ
ဣတော ကိရ ဧက တိံသတိမေ ကပ္ပေ သိခီနာမ သမ္မာသမ္ဗုဒ္ဓေါ သမတိံသ ပါရမိယော ပူရေတွာ ပရမာတိသမ္ဗောဓိံ ပတွာ သဒေဝကံ လောကံ သံသာရကန္တာရာ ဥတ္တာရေန္တော ဓမ္မရတနဝဿံ ဝဿာပေန္တော ဓမ္မဘေရိံပဟရန္တော ဓမ္မကေတုံ ဥဿာပေန္တော ဧကသ္မိံ သမယေ ဝိဝေက မနုဗြူဟန္တော အရညာယတနံ ပါဝိသိ၊ ပဝိသိတွာ စပန သုပုပ္ဖိတနာဂပုန္နာဂါဒိနာနာတရုသဏ္ဍမဏ္ဍိတေ သုဖုလ္လသုမနမာလတိပ္ပဘုတိနာနာလတာကုလေ အနေကဝိဓဒိပဒစတုပ္ပဒသံဃနိသေဝိတေ ရမဏီယေ သီတလသိလာတလေ စတုဂ္ဂုဏံ သင်္ဃာဋိံပညပေတွာ နိသီဒိ ဆဗ္ဗဏ္ဏရံသီဟိ ဒိသံ ပူရယန္တော၊ တဒါ တတ္ထ ဒေဝဗြဟ္မနာဂသုပဏ္ဏာဒယော သန္နိပတိတွာ ဒိဗ္ဗမယေဟိ ဂန္ဓမာလာဒီဟိ ဘဂဝန္တံ ပူဇယမာနာ ထောမယမာနာ နမဿမာနာ အဋ္ဌံသု၊ တသ္မိံ ပနသမာဂမေ ဘဂဝါ မဓုရဿရံ နိစ္ဆာရေန္တော ဗြဟ္မဃောသေန စတုသစ္စပဋိသံယုတ္တံ ဓမ္မံ ဒေသေတိ အမတဝဿံ ဝဿာပေန္တောဝိယ. တဒါ ဧကော မိဂလုဒ္ဒကော ဝနံ ပဝိဋ္ဌော မိဂသူကရေ ဟန္တွာ မံသံ ခါဒန္တော တံ ဌာနံ ပတွာ အဒ္ဒသ ဘဂဝန္တံ ဓမ္မံ ဒေသေန္တံ. ဒိသွာ ဧကမန္တံ ဌိတော ဓမ္မံ သုတွာ စိတ္တံ ပသာဒေတွာ တတော စုတော ဒေဝလောကေ နိဗ္ဗတ္တိတွာ ဆသု ကာမသဂ္ဂေသု မနုဿေသုစ အပရာပရံ ဣဿရိယံ အနုဘဝန္တော ဣမသ္မိံ ဗုဒ္ဓုပ္ပါဒေ သာဝတ္ထိယံ ကုလဂေဟေ နိဗ္ဗတ္တိတွာ ဝိညုတံ ပတ္တော ဘဂဝတော သာသနေ ပဗ္ဗဇိတွာ ဧကဒိဝသံ ဓမ္မံ ဒေသေန္တဿ ဘဂဝတော စတုသစ္စပတိ သံယုတ္တံ ဓမ္မကထံ သုတွာ စတုပဋိသမ္ဘိဒါဟိ အရဟတ္တံ ပတွာ ဧကဒိဝသံ ဘိက္ခုသံဃမဇ္ဈဂတော အတ္တနော ကတကမ္မပ္ပကာသနေန ပီတိဝါစမုဒါဟရိ.
၁. ဧ က တိံ သေ ဣတော ကပ္ပေ၊
လောကေ ဥပ္ပဇ္ဇိ နာယကော၊
ပတ္တိံသ လက္ခဏာတိဏ္ဏော၊
သမ္ဗုဒ္ဓေါ သ သိခီဝှယော.
၂. ဇလန္တော ဒီပရုက္ခောဝ၊ သူရိယောဝ နဘ မုဂ္ဂတော၊
မေရုရာဇာဝ သမ္ဗုဒ္ဓေါ၊ ဇနေသဂ္ဂေါ ပတာပဝါ.
၃. ပူရေတွာ ဓမ္မနာဝါယံ၊ သ နာထော သကလံ ပဇံ၊
ပတိဋ္ဌပေန္တော သံသာရ၊ ကန္တာရာ သန္တိဘူမိယံ.
၄. ဓမ္မကေတုံ သမုဿေန္တော၊ ဟနန္တော ဓမ္မဒုန္ဒုဘိံ၊
သတ္တေ ဒုက္ခာ ပမောစေန္တော၊ ဝသီ တတ္ထ ဇိနော ဝသီ.
၅. ဧကသ္မိံ သမယေ နာထော၊
လောကပဇ္ဇောတကော ဇိနော၊
ဝိဝေကကာမော သမ္ဗုဒ္ဓေါ၊
သုရမ္မံ ကာနနံ ဂတော.
၆. ပုန္နာဂနာဂပူဂါဒိ၊ နာနာပါဒပသံကုလံ၊
လတာ လိင်္ဂိတသာခါဟိ၊ သာ မောဒကုသုမာယုတံ.
၇. ကုသုမာ မောဒသမ္မတ္တ၊ ဆပ္ပဒါလိ နိသေဝိတံ၊
နာနာမိဂ ဂဏာကိဏ္ဏံ၊ မယူရဂဏ နစ္စိတံ.
၈. သီတလစ္ဆောဒိကာသာဓု၊ သုပတိတ္ထဇလာသယံ၊
အာသာရ သာရဓာရာဟိ၊ နိဇ္ဈရာသတ သံကုလံ.
၉. ဂန္တွာန သော မဟာရညံ၊
သီတလံ သိကတာတလံ၊
သိလာတလေ နိသိန္နောသိ၊
ဝိဿဇ္ဇေန္တော ဆရံသိယော.
၁၀. ဒေဝါ တတ္ထ သမာဂန္တွာ၊ ပူဇေသုံ ဒွိပဒုတ္တမံ၊
ဒိဗ္ဗေဟိ ဂန္ဓမာလာဟိ၊ နစ္စေဟိ တုရိယေဟိစ.
၁၁. ဒေဝဒေဝေါ တဒါ ဒေဝ၊ သံဃမဇ္ဈေ နိသီဒိယ၊
စတုသစ္စ မဒေသေသိ၊ နိစ္ဆရံ မဓုရံ ဂိရံ.
၁၂. တဒါဟံ လုဒ္ဒကော အာသိံ၊ မိဂသူကရမာရကော၊
မိဂမံသေန ဇိဝါမိ၊ တေန ပေါသေမိ ဒါရကေ [ပေါသေန္တောပုတ္တဒါရကေ ဣတိကတ္ထစိ].
၁၃. တဒါဟံ မိဂဝံ ယာတော၊
သဗာဏော သသရာသနော၊
အဒ္ဒသံ ဝိရဇံ ဗုဒ္ဓံ၊
ဒေဝသံဃပုရက္ခတံ.
၁၄. စန္ဒံဝ တာရကာကိဏ္ဏံ၊ မေရုံဝဏ္ဏဝမဇ္ဈဂံ၊
ဝိရောစမာန မာသီနံ၊ စတုသစ္စပ္ပကာသကံ.
၁၅. ဧကပဿေ ဌိတော တတ္ထ၊ အဿောသိံ ဓမ္မမုတ္တမံ၊
တတ္ထ စိတ္တံ ပသာဒေတွာ၊ သောမနဿံ ပဝေဒယိံ.
၁၆. ဧကတိံသေ ဣတော ကပ္ပေ၊
ယံ ပုညံ ပသုတံ မယာ၊
တေနာဟံ ပုညကမ္မေန၊
ဇာတောသိံ ဒေဝယောနိယံ.
၁၇. သမ္ပတ္တိမနုဘုတွာန၊ ဆကာမဂ္ဂေ ပရာပရံ၊
ဒေဝသံဃပရိဗ္ဗူဠှော၊ ဝိမာနေ ရတနာမယေ.
၁၈. မနုဿေသုစ ယံ အဂ္ဂံ၊ တဿ ဘာဂီ ဘဝါမဟံ၊
ဘောဂေ မေ ဦနတာ နတ္ထိ၊ သဒ္ဓမ္မသဝဏေ ဖလံ.
၁၉. ဣမသ္မိံ ဘဒ္ဒကေ ကပ္ပေ၊
သာဝတ္တိပုရမုတ္တမေ၊
အဍ္ဎေ မဟဒ္ဓနေ သာလေ၊
ဇာတောဟံ ဥဒိတေ ကုလေ.
၂၀. မဟတာ ပရိဝါရေန၊ ပတ္တော ဝုဒ္ဓိံစ ဝိညုတံ၊
စာရိကံ စရမာနောဟံ၊ ပတ္တော ဇေတဝနံ ဝရံ.
၂၁. အဒ္ဒသံ သဟ သိဿေဟိ၊ နိသိန္နံ သုဂတံ တဒါ၊
အဿောသိံ မဓုရံ ဓမ္မံ၊ စတုသစ္စပ္ပကာသကံ.
၂၂. သုတွာန မဓုရံ ဓမ္မံ၊ ပဗ္ဗဇိတွာန သာသနေ၊
အ ဇရာ မရံ သီတိဘူတံ၊ ပတ္တော နိဗ္ဗာဏမုတ္တမံ.
၂၃. သုတံ ဧကမုဟုတ္တံ မေ၊ တဒါ ဓမ္မံ သုဒေသိတံ၊
တေနမှိ စတုရာပါယေ၊ န ဇာတော န ကုတောဘယံ.
၂၄. ကရမုက္ခိပ္ပ ဝက္ခာမိ၊ ကရောထေ ကဂိရံ မမ၊
မမော ပမံ ကရိတွာန၊ ဓမ္မံ သုဏာထ သာဓုကန္တိ.
ဧဝဉ္စ ပန ဝတွာ သတ္တေ ဓမ္မသဝဏေ နိယောဇေသီတိ.
၂၅. ဣတိ တနုတရကာလံ သာဓု ဓမ္မံ သုဏိတွာ၊
အဓိဂတဝိဘဝါနံ အာနုဘာဝံ သုဏိတွာ၊
ဘဝဝိဘဝသုခံ ဘော ပတ္ထယန္တာ ကုသီတံ၊
ဇဟထ သုဏထ ဓမ္မံ ဒုလ္လဘံ ဒုလ္လဘဿာတိ.
မိဂလုဒ္ဒကဿ ဝတ္ထုံ ဒုတိယံ.