နမော တဿ ဘဂဝတော အရဟတော သမ္မာသမ္ဗုဒ္ဓဿ.
ရသဝါဟိနီ
ပဏာမာဒိကထာ
၁. သတ္ထုပ္ပသတ္ထစရဏံ သရဏံ ဇနာနံ၊
ဗြဟ္မာဒိမောဠိ မဏိရံသိ သမာဝဟန္တံ၊
ပင်္ကေရုဟာဘမုဒုကောမလစာရုဝဏ္ဏံ၊
ဝန္ဒာမိ စက္ကဝရလက္ခဏမာဒဓာနံ.
၂. သိဒ္ဓံ ဇိနေန စိရကာလမတန္ဒိတေန၊
ယံ ဘာဝကော သမဓိဂစ္ဆတိ ခေမမဂ္ဂံ၊
ယံ ကပ္ပရုက္ခ ရုစိဒါန မဏိဝ ဘာတိ၊
တံ ဓမ္မမဂ္ဂ မသမံ ပဏမာမိ နိစ္စံ.
၃. သန္တိန္ဒြိယံ သုဂတသူနုဝရံ ဝိသုဒ္ဓံ၊
ယံ ဒက္ခိဏေယျမတဒံ သုစိပုညခေတ္တံ၊
တာဏေသိနံ သရဏမုဇ္ဈိတသဗ္ဗဒုက္ခံ၊
ဝန္ဒာမိ သံဃ မနဃံ သိရသာ မဟဂ္ဃံ.
၄. ယမ္ပတ္တမေတ္ထ ရတနတ္တယထောမနေန၊
ပုညေန တေန ဒုရိတံ သကလံ ပဏုဇ္ဇ၊
ဝက္ခာမဟံ သုမဓုရံ ရသဝါဟိနိန္တံ၊
ဘော ဘော သုဏန္တု သုဇနာ ဘိမုဒါဝဟာ သာ.
၅. တတ္ထတတ္ထူပပန္နာနိ၊ ဝတ္ထူနိ အရဟာ ပုရေ၊
အဘာသုံ ဒီပဘာသာယ၊ ဌပေသုံ တံ ပုရာတနာ.
၆. မဟာဝိဟာရေ တင်္ဂုတ္တ၊ ဝင်္ကပရိဝေဏဝါသိကော၊
ရဋ္ဌပါလောတိ နာမေန၊ သီလာစာရ ဂုဏာကရော.
၇. ဟိတာယ ပရိဝတ္တေသိ၊ ပဇာနံ ပါဠိဘာသတော၊
ပုနရုတ္တာဒိဒေါသေဟိ၊ တမာသိ သဗ္ဗမာကုလံ၊
အနာကုလံ ကရိဿာမိ၊ တံ သုဏာထ သမာဟိတာ.
၈. ဝိတရာဂါ ပုရေ ဝေါစုံ၊ ယသ္မာ တသ္မာ ဟိ ဘာသိတံ၊
ဧတမာဒရဏီယဉှိ၊ သာဓု သာဓူဟိ သဗ္ဗဒါတိ.
ဇမ္ဗုဒီပုပ္ပတ္တိ ဝတ္ထူနိ.
ဓမ္မသောဏ္ဍကဝဂ္ဂေါ
၁. ဓမ္မသောဏ္ဍကဿ ဝတ္ထုမှိ အယမာနုပုဗ္ဗီကထာ
တတ္ထ တေသံ ဝတ္ထူန မုပ္ပတ္တိယော ဒွိဓာ ဘဝန္တိ ဇမ္ဗုဒီပေ သီဟဠဒီပေစာတိ၊ တတ္ထ ဇမ္ဗုဒီပေ တာဠီသ၊ သီဟဠဒီပေ တေသဋ္ဌိ၊ တေသု တာဝ ဇမ္ဗုဒီပုပ္ပတ္တိဝတ္ထူနိ အာဝိ ဘဝိဿန္တိ၊ တတောပိ ဓမ္မသောဏ္ဍကဿ ဝတ္ထု အာဒိ၊ ကထံ၊ အမှာကံ ကိရ ဘဂဝတော ပုဗ္ဗေ ဣမသ္မိံယေဝ ဘဒ္ဒကပ္ပေ ကဿပေါနာမ သတ္ထာ လောကေ ဥဒပါဒိ၊ တဿ ခေါ ပန ဘဂဝတော သာသနန္တရဓာနတော န စိရေနေဝ ကာလေန အမှာကံ ဗောဓိသတ္တော ဗာရာဏသီရညော အဂ္ဂမဟေသိယာ ကုစ္ဆိသ္မိံ နိဗ္ဗတ္တိ၊ တဿု ပ္ပတ္တိ ကာလသမနန္တရမေဝ သဗ္ဗသတ္တာနံ မနသိ ဓမ္မသညာ ဥဒပါဒိ၊ တသ္မာဿ ဓမ္မသောဏ္ဍောတိနာမ မကံသု၊ သော ပနေသော ကုမာရော မဟန္တေန ပရိဝါရေန ဝဍ္ဎေန္တော သဗ္ဗသိပ္ပေသု နိပ္ဖတ္တိံ ပတွာ ပိတရာ ဥပရဇ္ဇေန ပူဇိတော ဟုတွာ ဒါနာဒယော ဒသကုသလကမ္မပထေ ပူရေန္တော ပိတုအစ္စယေနာမစ္စေဟိ ရဇ္ဇေနာဘိသိဉ္စိတော အဟောသိ၊ သော ပနေသ ဓမ္မသောဏ္ဍကမဟာရာဇာ ဒေဝနဂရသဒိသေ ဗာရာဏသီနဂရေ စက္ကဝတ္တိသဒိသံ ဗာရာဏသီရဇ္ဇံ ကာရေန္တော မာသဒ္ဓမာသစ္စယေန သိရိသယနဂတော ဧဝံ စိန္တေသိ၊ မမေဝံ ရဇ္ဇသိရိမနုဘဝနံ န သောဘတိ ဓမ္မဝိယောဂေန၊ ဒိဝါကရ ဝိရဟိတော နဘော ဝိယာတိအာဒိနာ နာနာကာရဏံ စိန္တေသိ၊ တေနေတ္ထ.
၁. ပုညေန သီလာဒိမယေန ပုဗ္ဗေ၊
ကတေန ပတ္တောသ္မိ အတန္ဒိတေန၊
မသက္ကသာရေ ဝိယ ဒေဝရာဇာ၊
ရာဇတ္တမိဒ္ဓေ ပုရမုတ္တမမှိ.
၂. ရူပေန ဟာရီနယနုဿဝေန၊
သဒ္ဒေန သမ္မာ သဝဏာမတေန၊
ဂန္ဓေန ဃာနုဿဝသောဘနေန၊
ရသညပုညေန ရသေနစာပိ.
၃. ဖဿေန ဂတ္တဿ သုဖဿဒေန၊
သမိဒ္ဓိပတ္တောသ္မိ မဟိဒ္ဓိကောဟံ၊
နေဝေတ္တကေနေဝ ပမာဒဘာဝ၊
မာ ပဇ္ဇိတုံ ယုတ္တရူပန္တိ ဉတွာ.
၄. ဒဿာမိ အင်္ဂအပိ ဇီဝိတဉ္စ၊
ဓညံ ဓနံ စာပိ ပသန္နစိတ္တော၊
သောဿာမိ ဓမ္မံ သိဝမာဒဓာနံ၊
ဇိနေရိတံ ဇာတိဇရာပဟာဏံ.
၅. န သောဘတိ ယထာကာသံ၊ ဇလံ ဓာမပတိံဝိနာ၊
ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ.
၆. န သောဘတိ ဟထာ ရတ္တိ၊ နိသာနာထံ ဝိနာ သဒါ၊
ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ.
၇. အလင်္ကတောပိ စေ ဟတ္ထီ၊ ဝိနာ ဒါဌာ န သောဘတိ၊
ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ.
၈. ယထာ ကလ္လောလမာလီယံ၊
ဝိနာ ဝေလာ န သောဘတိ၊
ရဇ္ဇကရဏံ တထာ မယှံ၊
ဝိနာ ဓမ္မာ န သောဘတိ.
၉. ယထာ သုမဏ္ဍိတော ရာဇာ၊
ကုပဋော နေဝ သောဘတိ၊
ရဇ္ဇကရဏံ တထာ မယှံ၊
ဝိနာ ဓမ္မာ န သောဘတိ.
၁၀. ဓမ္မမေဝ သုဏိဿာမိ၊ ဓမ္မေ မေ ရမတီ မနော၊
န ဟိ ဓမ္မာ ပရံ အတ္ထိ၊ ဓမ္မမူလံ တိသမ္ပဒန္တိ.
ဧဝံ စိန္တေတွာ ပါတောဝ သိရိဂဗ္ဘာ နိက္ခမ္မ သုသဇ္ဇိတေ သမုဿိတသေတစ္ဆတ္တေ ရာဇပလ္လေင်္ကေ အမစ္စဂဏ ပရိဝုတော နိသီဒိ ဒေဝရာဇာဝိယ ဝိရောစမာနော၊ နိသိန္နော ပန ရာဇာ အမစ္စေ ဧဝမာဟ၊ ယော ပနေတ္ထ ဘောန္တော ဗုဒ္ဓဘာသိတေသု ဓမ္မေသု ကိဉ္စိဓမ္မံ ဇာနာတိ၊ သော ဘာသတု၊ သောတုမိစ္ဆာမိဓမ္မန္တိ၊ တေ သဗ္ဗေပိ မယံ ဒေဝ န ဇာနာမာတိ အာဟံသု၊ တံ သုတွာ အ န တ္တ မ နော ရာဇာ ဧဝံ စိန္တေသိ၊ ယန္နူနာဟံ ဟတ္ထိက္ခန္ဓေ သဟဿံ ဌပေတွာ နဂရေ ဘေရိံစရာပေယျံ၊ ယံ အပ္ပေဝနာမ ကောစိ ဓနလောဘေန စာတုပ္ပဒိကာယပိ ဂါထာယ ဓမ္မံ ဒေသေယျ. တံ မေ ဒီဃရတ္တံ ဟိတာယ သုခါယ ဘဝိဿတီတိ၊ တတော သော တထာ ကတွာပိ ဓမ္မဒေသကံ အလဘန္တော ပုန ဒွိသဟဿံ တိစတုပဉ္စသဟဿန္တိယာဝကောဋိပ္ပကောဋိံဒမ္မီတိ၊ တတော ဂါမ နိဂမ ဇနပဒေ၊ တတော သေဋ္ဌိဋ္ဌာနံ သေနာပတိ ဥပရာဇဋ္ဌာနာ ဒယောပိ၊ ပုန သေတစ္ဆတ္တံ ဒမ္မိ၊ ရာဇဝေသံ ပဟာယ အတ္တာနံ ဒါသံ သာဝေတွာ ဓမ္မဒေသေန္တဿ ဒမ္မိတိ ဝတွာ ဘေရိ စရာပေတွာပိ ဓမ္မ ဒေသကမလဘိတွာ သံဝိဂ္ဂေါ ကိမ္မေ ဓမ္မဝိယောဂေန ရဇ္ဇေနာတိ အမစ္စာနံ ရဇ္ဇံ နီယျာတေတွာ သဒ္ဓမ္မဂဝေသကော ဓမ္မသောဏ္ဍကမဟာရာဇာ မဟာဝနံ ပါဝိသိ ဂါမ နိဂမ ရာဇဓာနိ ပရမ္ပရာယ၊ တေနေတ္ထ.
၁၁. ပုရေ ဘေရိံ စရာပေတွာ၊
ဓမ္မသောဏ္ဍော နရာဓိပေါ၊
သဒ္ဓမ္မဇ္ဈေသကံ သတ္ထု၊
အလဒ္ဓါ ဓနကောဋိဟိ.
၁၂. ဒါသော ဟောမိ ပဟာယာဟံ၊
ရာဇတ္တံ ဒေသကဿ မေ၊
ဣစ္စာဟ သော မဟီပါလော၊
အဟော ဓမ္မေသု လောလတာ.
၁၃. ရဇ္ဇံ နီယျာတယိတွာန၊ အမစ္စာနံ မနောရမံ၊
ဝနံ ပါဝိသိ သော ရာဇာ၊ ဂဝေသံ ဓမ္မမုတ္တမန္တိ.
မဟာဝနံ ပဝိဋ္ဌက္ခဏေ ပန မဟာသတ္တဿ ပုညတေဇေန သက္ကဿာသနံ ဥဏှာကာရံ ဒဿေသိ၊ အထ ဒေဝရာဇာ စိန္တေသိ အကာမံ မေ ပဏ္ဍုကမ္ဗလ သိလာသနံ ဥဏှမဟောသိ၊ ကိန္နုခေါ ကာရဏန္တိ လောကံ ဩလောကေန္တော သက္ကော ဒေဝရာဇာ ဓမ္မသောဏ္ဍက မဟာရာဇာနံ သကလဇမ္ဗုဒီပံ ဝိစိနိတွာ သဒ္ဓမ္မဇ္ဈေသကံ အလဘိတွာ ဝနံ ပဝိဋ္ဌဘာဝံ အဒ္ဒသ၊ ဓမ္မသောဏ္ဍကမဟာရာဇာ သဒ္ဓမ္မတ္ထာယ ရဇ္ဇ ဓန ဗန္ဓု ဇီဝိတမ္ပိ ပဟာယ အရညံ ပဝိဋ္ဌော၊ န သော ဝတာယံ ယောဝါ သောဝါ သတ္တော၊ ဣမသ္မိံယေဝ ကပ္ပေ ဗုဒ္ဓေါ ဘဝိဿတိ၊ ဗုဒ္ဓဗောဓိသတ္တော စာယံ အဇ္ဇေဝ မဟာရညံ ပဝိဋ္ဌော သဒ္ဓမ္မံ အလဒ္ဓါ မဟာဒုက္ခံ ပါပုဏေယျ၊ န စေတံ ယုတ္တံ၊ အဇ္ဇ မယာ တတ္ထ ဂန္ထဗ္ဗံ ဓမ္မာမတရသေန တမဘိသိဉ္စိတွာ ရဇ္ဇေ ပဟိဋ္ဌာပေတုန္တိ စိန္တေတွာ အတ္တဘာဝံ ဝိဇဟိတွာ ဘယာနကံ မဟန္တံ ရက္ခသဝေသံ နိမ္မိဏိတွာ မဟာသတ္တာဘိမုခေါ အဝိဒူရေ အတ္တာနံ ဒဿေသိ၊ တေနေတ္ထ.
၁၄. ဗျဂ္ဃစ္ဆသီဟမဟိသော ရဂဟတ္ထိဒီပိ၊
မိဂါကုလံ ကဏ္ဋကသေလရုက္ခံ၊
နရာနမိန္ဒော ပဝိသိတွကာနနံ၊
ဣတောစိတော ဝိဗ္ဘမိ ဓမ္မကာမော.
၁၅. တဿာနုဘာဝေန ပုရိန္ဒဒဿ၊
သိလာသနံ ဥဏှမဟောသိ ကာမံ၊
တေနေဝ သော လောကမုဒိက္ခမာနော၊
အဒ္ဒက္ခိ ဓီရံ ဝိပိနေ စရန္တံ.
၁၆. မယဇ္ဇ တံ ဓမ္မရသေန သမ္မာ၊
သန္တပ္ပယိတွာ ဂမနံ ဝရန္တိ၊
မန္တွာ သုဘီမဉ္ဇနကူဋဝဏ္ဏံ၊
မဟာမုခံ နိဂ္ဂတ ဘီမဒါဌံ.
၁၇. ဒိတ္တဂ္ဂိသင်္ကာသ ဝိသာလနေတ္တံ၊
မဇ္ဈေန ဘဂ္ဂံ စိပိဋဂ္ဂနာသံ၊
ခရတမ္ဗဒါဌိံ ဃနမဿုဝန္တံ၊
နီလောဒရံ ဂဇ္ဇိတဘီမဃောသံ.
၁၈. ကရောရုဟံ တိက္ခသလောဟိတာယတံ၊
ဝိသာလဓောတာယတခဂ္ဂဟတ္ထံ၊
ဂဒါယုဓေနင်္ကိတမညဗာဟုံ၊
ဒဋ္ဌောဋ္ဌဘီမံ သဝလီလလာဋံ.
၁၉. မနုဿမံသာဒနရတ္တပါနံ၊
ဘယာနကံ ကက္ခလယက္ခဝဏ္ဏံ၊
သုမာပယိတွာန ဝနန္တရသ္မိံ၊
ဒဿေသိ အတ္တံ သ နရာဓိပဿာတိ.
အထ မဟာသတ္တော အတ္တနော အဝိဒူရေ ဌိတံ ရက္ခသံ အဒ္ဒက္ခိ၊ တံ ဒိသွာနာဿ ဘယံဝါ ဆမ္ဘိတတ္တံဝါ စိတ္ထုတြာသမတ္တံဝါ နာဟောသိ၊ ကိမတြ စိန္တေသိ၊ အပိနာမ ဧဝရူပေါ ပိရက္ခသော ဓမ္မံ ဇာနေယျ၊ ယန္နူနာဟံ တဿ သန္တိကေ ဓမ္မံ သုဏိဿာမိ၊ တမ္မေ ဒီဃရတ္တံ ဟိတာယ သုခါယ ဘဝိဿတီတိ စိန္တေသိ. စိန္တေတွာ စပန အဇ္ဇ မယာ တမုပသင်္ကမ္မ ပုစ္ဆိတံ ဝဋ္ဋတီတိ ဂန္တွာ ရက္ခသေန သဒ္ဓိံ သလ္လပန္တော အာဟ.
၂၀. အသ္မိံ ဝနသ္မိံ တရုသဏ္ဍ မဏ္ဍိတေ၊
သုဖုလ္လိတာနေကလတာကုလာကုလေ၊
အဓိဂ္ဂဟီတော သိ မဟာနုဘာဝ၊
ပုစ္ဆာမိ တံ ဒေဝ ဝဒေဟိ ကင်္ခံ.
၂၁. ဓမ္မံ ဂဝေသံ ဝနမာဂတောမှိ၊
ပဟာယ ရဇ္ဇံ အပိ ဉာတိသံဃံ၊
ဇာနာသိ စေ သမ္မ ဝဒေဟိ မယှံ၊
ဧကမ္ပိ ဂါထံ သုဂတေန ဒေသိတံ.
တတော ယက္ခော အာဟ.
၂၂. ဓမ္မံ ပဇာနာမဟမေကဒေသံ၊
ဇိနေရိတံ သာဓုတရံ ရသာနံ၊
ဒေသေမိ စေဟံ တဝ ဓမ္မ မဂ္ဂံ၊
တုဝဉှိ ကိံ ကာဟသိ ဒေသကဿာတိ.
အထ မဟာသတ္တော အာဟ.
၂၃. ရဇ္ဇေ ဌိတော အဿမဟံ သစေ ဘော၊
အနပ္ပရူပံ ပကရောမိ ပူဇံ၊
ဣဒါနိ ဧကော ဝနမဇ္ဈပတ္တော၊
ကရောမိ ကိံ ဒေဟမိမံ ဌပေတွာ.
၂၄. ယဒိစ္ဆသိ တွံ မမ မံသလောဟိတံ၊
ကရောမဟံ သင်္ဂဟမဇ္ဇ တေန၊
န စတ္ထိ အညံ တဝ အစ္စနီယံ၊
ဒေသေဟိ ဓမ္မံ သုဂတ ပ္ပသတ္ထန္တိ.
တတော ယက္ခော အာဟ.
၂၅. ဘုတွာန မံသံ သုဟိတောဝ သန္တော၊
ဟန္တွာ ပိပါသံ ရုဓိရံ ပိဝိတွာ၊
ဓမ္မံ ကထေတုံ ပဘဝါမိ တုယှံ၊
ဝတ္တုံ န သက္ကောမိ ခုဒါပရေတောတိ.
အထ မဟာသတ္တော အာဟ.
၂၆. ဘုတွာ တုဝံ မံ ပထမဉှိ ယက္ခ၊
ပစ္ဆာ တု ဒေသေဿသိ ကဿ ဓမ္မံ၊
ဓမ္မဿ မယှံ တဝ မံသလာဘံ၊
တွမေဝ ဇာနာဟိ ယထာ ဘဝေယျာတိ.
ဧဝံ ဝုတ္တေ သက္ကော ဒေဝါနမိန္ဒော သာဓု မဟာရာဇ အဟမေဝ ယုတ္တံ ဇာနာမီတိ ဝတွာ တဿာဝိဒူရေ တိဂါဝုတုဗ္ဗေဓံ အဉ္ဇနဝဏ္ဏံ မဟန္တံ ပဗ္ဗတံ မာပေတွာ မဟာရာဇ ဣမမာရုယှ ပဗ္ဗတမုဒ္ဓနိဋ္ဌိတော မမ မုခေ ပတတု၊ အဟံ ပတန္ထဿ တေ ဓမ္မံ ဒေသေဿာမိ၊ ဧဝံ သန္တေ တုယှံ ဓမ္မပဋိလာဘော၊ မယှံစ မံသပဋိလာဘော ဘဝိဿတီတိ. တံ သုတွာ မဟာသတ္တော အနမတဂ္ဂေ သံသာရေ သံသရတော မေ သီဟဗျဂ္ဃစ္ဆမစ္ဆကစ္ဆပဝိဟင်္ဂါဒီနံ ဘက္ခဘူတဿ ဇာတီသု ပမာဏံ နတ္တိ၊ အဇ္ဇ မယာ သမ္ဗုဒ္ဓဿ ဓမ္မတ္ထာယ ဇီဝိတံ ပရိစ္စဇိတုံ ဝဋ္ဋတီတိ စိန္တေတွာ ဧဝမာဟ.
၂၇. သံသာရဝဋ္ဋေသု ဝိဝဋ္ဋမာနာ၊
ပပ္ပေါန္တိ ဒုက္ခံ ဇနတာ အနေကာ၊
ဧတဉှိ ဘော အတ္တနော ဝါ ပရဿ၊
အတ္ထာယ နာဟောသိ အဟောသိ တုစ္ဆံ.
၂၈. တွမဒိန္နဟာရီ တိစ ပါရဒါရိကော၊
ပါဏာတိပါတီသိ မုသာ အဘာသိ၊
တွ မဇ္ဇပါယီတိ အကာသိ ဒေါသံ၊
ပဂ္ဂယှ ဒုက္ခံ ဗဟုသော ဒဒန္တိ.
၂၉. ဧတဉှိ ဘော အတ္တနော ဝါ ပရဿ၊
အတ္ထာယ နာဟောသိ အဟောသိ တုစ္ဆံ၊
ရုက္ခာ ပပါတာ ပပတိတွကေစိ၊
ဒုဗ္ဗန္ဓိယာ ဒုဂ္ဂဝိသာဒနေန.
၃၀. ဗျာဓီဟိ နာနာခရဝေဒနာဟိ၊
မရန္တိ သတ္တာ ဥတုဝေဒနာဟိ၊
ဧတဉှိ ဘော အတ္တနော ဝါ ပရဿ၊
အတ္ထာယ နာဟောသိ အဟောသိ တုစ္ဆံ.