၃. တိဏ္ဏံဇနာနံ ဝတ္ထုမှိ အယမာနုပုဗ္ဗီကထာ
ဇမ္ဗုဒီပသ္မိံ ကိရ ပုဗ္ဗေ မဟာနိဒါဃော အဟောသိ၊ တဒါ နိဒါဃသုရိယေန သကိရဏကရာ ဝါပိ ပေါက္ခရဏိ နဒီ ဂိရိကန္ဒရနိဇ္ဈရာဒီသု ဥဒကံ နိဿေသံ ကတွာ ပီတမိဝ ဥဒကေ ပရိက္ခီဏေ မစ္ဆကစ္ဆပါဒယော ယေဘုယျေန ဝိနာသံ ပတ္တာ. အထ မဟာရညဘူမိယံ ရုက္ခတိဏလဘာဒယော အတီဝ မိလာတာ အဟေသုံ. မိဂပက္ခိနောပိဃမ္မာဘိတတ္တာ ပိပါသိတော မရီစိံ တောယန္တိမညမာနာ ဣတောစိတောစ ဓာဝန္တာ မဟာဒုက္ခပ္ပတ္တာ အဟေသုံ. တဒါ ဧကော သုဝပေါတကော ပိပါသိတော တတ္ထ တတ္ထ ပါနီယံ ပရိယေသန္တော မဟာရညေ ဧကသ္မိံ ပူတိပါဒပေ သဋ္ဌိရတနေ နရကာဝါဋေ ပါနီယဂန္ဓံ ဃာယိတွာ လောဘေန ပါတုံ ဩတိဏ္ဏော အတိပါနေန ဘာရော တတ္ထေဝ ပတိတွာ ဥဂ္ဂန္တုံ နာသက္ခိ. အထာပရောပိ သပ္ပေါစ မနုဿောစာတိ ဒွေ ဇနာ တတ္ထေဝ ပတိံသု၊ သပ္ပါနာမ ဝိဝေကံ လဒ္ဓါဝ အတ္တံ ဝိဇဟန္တိ. တသ္မာယံ အလဒ္ဓါ ဝိဝေကတ္တံ ဥဂ္ဂန္တုံ နာသက္ခိ. အနာလမ္ဗတ္တာ မနုဿောပိ. တေ ဥဂ္ဂန္တုံ အသက္ကောန္တာ မရဏဘယဘီတာ အညမည မဝိဟေဌေန္တာ တတ္ထေဝ ဝသိံသု. အထေကော ဗရာဏသီဝါသိကော မနုဿော ဝနံ ပဝိဋ္ဌော တထေဝ ပါနီယံ ပရိယေသမာနော တံ ဌာနံ ပတွာ တေ တယောပိ ဒိသွာ ကမ္ပမာနဟဒယော ဝလ္လိယာ ပိဋကံ ဗန္ဓိတွာ သိက္ကာယ ပက္ခိပိတွာ ဩတာရေတွာ တေ တယောပိ ဥဒ္ဓရိ၊ အထာနေန တေ အမှာကံ ဇီဝိတံ ဒိန္နန္တိ သောမနဿာ တဿေဝမာဟံသု၊ သာမိ မယံ တုမှေ နိဿာယ ဇီဝိတံ လဘိမှ၊ တုမှေ ဣတော ပဋ္ဌာယ အမှာကံ သဟာယော၊ မယမ္ပိ တေ သဟာယာ၊ အမှာကံ ဝသနဋ္ဌာနာနိ အာဂန္တုကာမာတိ ဝတွာ တေသု တာဝ သုဝပေါတကော အာဟ၊ သာမိ ဗာရာဏသိယံ ဒက္ခိဏဒွါရေ မဟာနိဂြောဓော အတ္ထိ၊ တတ္ထာဟံ ဝသာမိ၊ တဝ တထာရူပေ ကိစ္စေ သတိ မမ သန္တိကမာဂမ္မ သုဝါတိ သဒ္ဒံကရောဟီတိ ဝတွာ မေတ္တိထိရံ ကတွာ ပက္ကာမိ၊ သပ္ပေါပိ သမ္မာဟံ တဿေဝ နိဂြောဓဿာ ဝိဒူရေ မဟန္တံ ဝမ္မိကံ အတ္ထိ၊ တတ္ထ ဝသာမိ၊ တဝတ္ထေ သတိ တတ္ထာဂန္တွာ ဒီဃာတိသဒ္ဒံ ကရောဟီတိ ဝတွာ တထေဝပက္ကာမိ၊ မနုဿောပိ ဗာရာဏသိယံ အသုကာယနာမ ဝီထိယာ အသုကဂေဟေ ဝသာမိ၊ တဝတ္ထေ သတိ မမ သန္တိကံ အာဂစ္ဆာတိ ဝတွာ ပက္ကာမိ၊ အထာ ပရဘာဂေ သော ဥပကာရကော ပုရိသော အတ္တနော ကိစ္စေ သဉ္ဇာတေ မမ သဟာယာနံ သန္တိကံ ဂမိဿာမီတိ သင်္ကေတာနုသာရေန ဂန္တွာ နိဂြောဓမူလေ ဌိတော သုဝဿ သဒ္ဒမကာသိ၊ တံ သုတွာ သုဝပေါတကော ဝေဂေနာဂန္တွာ တေန သဒ္ဓိံ ပဋိသမ္မောဒိတွာသမ္မ စိရေနာ ဂတောသိ၊ အာဂတကာရဏံ မေ အာစိက္ခာတိ အာဟ. သောပါဟ သမ္မာဟံ ဇီဝိတု မသက္ကောန္တော ပုတ္တဒါရကေ ဉာတီနံ ပဋိပါဒေတွာ တဝ သန္တိကမာဂတောမှိတိ၊ သုဝပေါတကောပိ သာဓု သမ္မ တယာ ကတံ မမ သန္တိကမာဂစ္ဆန္တေန၊ တယာ မမ ဇီဝိတံ ဒိန္နံ၊ မယာပိ တဝ ဇီဝနုပါယံ ကာတုံ ဝဋ္ဋတိ၊ ယာဝါဟံ အာဂစ္ဆာမိ၊ တာဝေတ္ထ ထောကံ ဝိဿမာတိ ဝတွာ ပက္ကာမိ ဇီဝနုပါယံ ပရိယေသမာနော၊ တသ္မိံ ကိရ သမယေ ဗာရာဏသီရာဇာ နဂရတော နိက္ခမ္မ သုသဇ္ဇိတုယျာနံ ပဝိသိတွာ သပရိသော ကီဠိတွာ မဇ္ဈန္တိကသမယေ သုဖုလ္လိတံ ပဉ္စပဒုမသဉ္ဆနွံ မင်္ဂလပေါက္ခရဏိံ ဒိသွာ နဟာယိတုကာမော သဗ္ဗာဘရဏာနိ ဩမုဉ္စိတွာ ရာဇပုရိသေ ပဋိပါဒေတွာ နဟာယိတုံ ဩတရိ၊ တဒါ သုဝပေါတကော တံ ဌာနံ ပတ္တော သာခန္တရေ နိလီနော ရာဇပုရိသာနံ ပမာဒံ ဒိသွာ ရညော မုတ္တာဟာရံ ဍသိတွာ အာကာသံ ပက္ခန္ဒိတွာ ဝေဂေနာဂန္တွာ အတ္တနော သဟာယဿ ဒတွာ အပ္ပမတ္တော ဣမံ ဝလဉ္ဇေဟိ သမ္မာတိ ဝတွာ အဒါသိ၊ တတော သော နံ ဂဟေတွာ ဣမံ ကုဟိံ ပဋိသာမေဿာမီတိ စိန္တောန္တော မမေကော သဟာယကော အန္တောနဂရေ ဝသတိ၊ တသ္မိံ ဌပေဿာမီတိ စိန္တေတွာ ယထာသင်္ကေတမုပဂမ္မ တံ ဒိသွာ ပဋိသန္ထာရံ ကတွာ သုဝပေါတကေန ကတော ပကာရံ ပကာသေတွာ ဣမံ မုတ္တာဟာရံ သာဓုကံ ဌပေဟီတိ ဝတွာ အဒါသိ၊ တံခဏေ ရာဇာ နဟာတွာနုလိတ္တော အာဘရဏာနိ ပိလန္ဓေန္တော မုတ္တာဟာရံ နာဒ္ဒသ. တတော ရာဇပုရိသာ အန္တောစ ဗဟိစ ပရိဇနေ ဥပပရိက္ခိတွာ မုတ္တာဟာရံ အပဿန္တာ နဂရေ ဘေရိံ စရာပေသုံ၊ ယော မုတ္တာဟာရံ ပဿတိ၊ တဿ ရာဇာ မဟန္တံ ယသံ ဒဿတီတိ. တံ သုတွာ သော မိတ္တဒူဘီ ဧဝံ စိန္တေသိ၊ အဟံစမှိ ဒုက္ခိတော၊ ယန္နူနာဟံ မုတ္တာဟာရံ ရညော ဒဿေတွာ သုခေန ဝသေယျံ၊ ကိမ္မေ ဧတေနာတိ တေန ကတံ တထာရူပံ ဥပကာရံ အသလ္လက္ခေန္တော မဟာမိတ္တဒူဘီ ပုရိသော ရာဇပုရိသေ ဥပသင်္ကမ္မ မုတ္တဟာရံ အတ္တနော သန္တိကေ ဌပိတဘာဝံ ကထေသိ၊ ဘော မမ သန္တိကေ ဧကော ပုရိသော မုတ္တဟာရံ ဌပေသီတိ. ဧဝံ အသပ္ပုရိသသံသဂ္ဂေါတိ၊ တထာဟိ.
၁. ယထာ သံဝဍ္ဎိတော နိမ္ဗော၊ မဓုခီရော ဒသိဉ္စနာ၊
န ယာတိ မဓုရံ တံ ဝေါ၊ ပကာရ မသတံ ကတံ.
၂. သီသေနု ဒက မာဒါယ၊ ဝဍ္ဎိတောပိ နုဟီတရု၊
န ယာတိ မဓုရံ တံဝေါ၊ ပကာရမသတံ ကတံ.
၃. နိစ္စံ ခီရောဒပါနေန၊ ဝဍ္ဎိတော သိဝိသော ယထာ၊
ဝိသံဝ ပရိဝတ္တေတိ၊ တထာ နီစောပကာရကံ.
၄. ယထာတ္တနာ ကတော အဂ္ဂိ၊ သီတလံ န ဒဒေ ခလု၊
တထာ နီစေ ကတံ ကာရံ၊ အဂ္ဂီဝ ဒဟတေ တနုံ.
၅. တသ္မာ ဥပပရိက္ခိတွာ၊ ဟာဝဘာဝေန ဗုဒ္ဓိယာ၊
ကာတဗ္ဗာ မေတ္တိ ဇန္တူဟိ၊ နာမိတ္တော လဘတေသုခန္တိ.
အထဿ မိတ္တဒုဘိနော ဝစနေန ရာဇပုရိသာ မုတ္တာဟာရံစတံစ ဂဟေတွာ သဘဏ္ဍကံ ပုရိသံ ဒဿေသုံ. အထ ရာဇာ သဘဏ္ဍကံ စောရံ ဒိသွာ ကုဒ္ဓေါ ဣမံ နေတွာ ဒက္ခိဏဒွါရေ ဇီဝသူလေ ဥတ္တာသေထာတိ အာဏာပေသိ၊ ရာဇပုရိသာ တဿ ရာဇာဏံ ကရောန္တော အဂမံသု၊ တေဟိ နီယမာနော ပုရိသော ဒက္ခိဏဒွါရာ နိက္ခမ္မ သပ္ပသဟာယံ သရိတွာ အပ္ပေဝနာမေ တဿ သန္တိကာ ကိဉ္စိ သောတ္ထိ ဘဝေယျာတိ ပုဗ္ဗေ ဝုတ္တသင်္ကေတာ နုသာရေန ဝမ္မိကံ ဒိသွာ သမ္မ ဒီဃာတိ သဒ္ဒမကာသိ၊ သော ဝမ္မိကာ နိက္ခမ္မတံ တထာ နိယမာနံ ဒိသွာ သံဝိဂ္ဂေါ ဒုက္ခပ္ပတ္တော သဟာယဿမေ အဇ္ဇ အဝဿယေန ဥပတ္ထမ္ဘံ ဘဝိတုံ ဝဋ္ဋတီတိ တံ သမဿာသေတွာ အတ္တဘာဝံ ဝိဇဟိတွာ အညတရဝေသေန ရာဇပုရိသေ ဥပသင်္ကမ္မ ဣမံ ပုရိသံ မုဟုတ္တံမာ မာရေထာတိ ဒဠှံ ဝတွာ မုဟုတ္တေန ရညော အဂ္ဂမဟေသိယာ ဝသနဋ္ဌာနံ ဂန္တွာ သပ္ပဝဏ္ဏေန ဒေဝိံ ဍသိတွာ တာယ ဝိသေန မုစ္ဆိတကာလေ မနုဿဝဏ္ဏေန ဝဇ္ဈပ္ပတ္တော ဝိသောသဓံ ဇာနာတိတီ ဝတွာ တံခဏေဝ သဟာယဿ သန္တိကံ ဂန္တွာ ရညာ တဝ ပက္ကော သိတကာလေ ဂန္တွာ ဥဒကပ္ပသတေန ဒေဝိယာ သရီရေ ပဟရိတွာ နိဗ္ဗိသံ ကရာဟီတိ ဝတွာ ပက္ကာမိ၊ အထ ရာဇာ ဝိသဝေဇ္ဇ ပရိယေသန္တော တံ ပဝတ္တိံ သုတွာ ဝဇ္ဈပ္ပတ္တံ အာနေထာတိ အာဏာပေတွာ ဒေဝိယာ နိဗ္ဗိသံ ကရောထာတိ အာဟ၊ သော နာဂရာဇေန ဝုတ္တနယေန နိဗ္ဗိသမကာသိ၊ သာ သုခိတာ အရောဂါ အဟောသိ၊ ရာဇာ တံ ဒိသွာ တုဋ္ဌော တဿ ခေတ္တဝတ္ထုယာနဝါဟနာဒိဒါနေန မဟာသက္ကာရမကာသိ၊ အထ သော ရာဇာနံ ဥပသင်္ကမ္မ အတ္တနာ ကတံ သဗ္ဗံ ပကာသေသိ. တေန ဝုတ္တံ.
၆. ဧကဒါဟံ မဟာရာဇ၊ ဝနံ ကမ္မေန ကေနစိ၊
ဂတောဒ္ဒသံ မဟာဝါဋေ၊ ပတိတံ သုဝပေါတကံ.
၇. အထော ရဂံ မနုဿံစ၊
ဒုက္ခပ္ပတ္တေ ခုဒါပရေ၊
ဥက္ခိပိံ ကရုဏာယာဟံ၊
တေ မေ ဝေါစုံ တဒါ တယော.
၈. အဒါသိ ဇီဝမမှာကံ၊ ဥပကာရောသိ နော တုဝံ၊
တဝ ကိစ္စေ သမုပ္ပန္နေ၊ အမှာကံ ဧဟိ သန္တိကံ.
၉. ဧဝံ တေဟိ ပဝုတ္တောဟံ၊ အဂဉ္ဆိံ သုဝသန္တိကံ၊
တေန ကတူပကာရောဟံ၊ မနုဿဿာပိ သန္တိကံ.
၁၀. တေနာဟံ မရဏပ္ပတ္တော၊ အဒ္ဒသံ ဥရဂါဓိပံ၊
သောဒါသိ ဇီဝိတံ မယှံ၊ အလတ္ထံ [အလဒ္ဓ ဣတိသဗ္ဗတ္ထ] ဝိပုလံ ဓနံ.
၁၁. သုဇနော နာဝမန္တဗ္ဗော၊ ခုဒ္ဒကောတိ နရာဓိပ၊
သုဝေါစ ဥရဂေါစေတေ၊ မိတ္တဓမ္မေ ပတိဋ္ဌိတာ.
၁၂. ကာရဏညူ မနုဿေသော၊
အမှေဟိ သမဇာတိကော၊
ကတူပကာရော ဧဝမ္ပိ၊
ဒိသော ဇာတော နရာဓမော.
၁၃. အကသ္မာ ဒေဝ ကုပ္ပန္တိ၊ ပသီဒန္တိနိမိတ္တတော၊
သီလံ ဟေတမသာဓူနံ၊ ဗာလာနမဝိဇာနတံ.
၁၄. မနုဿာပိ မဟာရာဇ၊ ကေစိ ဝိဿာသိယာ န ဝေ၊
တိရစ္ဆာနာပိ ဟောန္တေဝ၊ အဇိမှမနသာသဌာတိ.
ဧဝံ သော အတ္တနော ပဝတ္တိံ ကထေသိ၊ ရာဇာ တံ သုတွာ ပသန္နော ဣမဿ ပုရိသဿ မဟန္တံ ဂေဟံ ကတွာ မဟာပရိဟာရံ ကရောထာတိ အာဏာပေသိ၊ သော ပန မမ ဂေဟံ နိဂြောဓဿ စ ဝမ္မိကဿ စ အန္တရေ ကရောထာတိ ဝတွာ တထာ ကာရေတွာ တတ္ထ ဝသန္တော ရာဇူပဋ္ဌာနံ ကရောန္တော တေဟိ သဟာယေဟိ သဒ္ဓိံ သမ္မောဒမာနော ယာဝဇီဝံ ဝသိတွာ အာယု ပရိယောသာနေ တေဟိ သဒ္ဓိံ ယထာကမ္မံ ဂတောတိ.
၁၅. ဣတိ ပတိတသုခမှာ အင်္ဂတော ဝါ ဓနမှာ၊
ပရမတရပတိဋ္ဌာ ဟောန္တိ မိတ္တာ သခါနံ၊
ဝိရဟိတသခိနံ ဘော နတ္ထိ ယသ္မာဘိဝုဒ္ဓိ၊
စိဏုထ ကုသလဓမ္မံ မိတ္တဝန္တာ မဟန္တံ.
တိဏ္ဏံ ဇနာနံ ဝတ္ထုံ တတိယံ.