၁. ရူပါဒိဝဂ္ဂ

ပုစ္ဆာ – ဧကကနိပါတေပိ အာဝုသော ရူပါဒိဝဂ္ဂေါ နီဝရဏပ္ပဟာနဝဂ္ဂေါ အကမ္မနိယဝဂ္ဂေါတိအာဒိနာ ဝဂ္ဂဘေဒဝသေန ဗဟုဝိဓာ. တတ္ထ ကတရံ ဝဂ္ဂံ ပဌမံ သံဂါယိံသု.

ဝိဿဇ္ဇနာ – ဧကကနိပါတေ ဘန္တေ ရူပါဒိဝဂ္ဂေါ နီဝရဏပ္ပဟာနဝဂ္ဂေါတိအာဒိနာ ဝီသတိယာ ဝဂ္ဂေသု ရူပါဒိဝဂ္ဂံ ပဌမံ သံဂါယိံသု.

ပုစ္ဆာ – သာဓု သာဓု အာဝုသော၊ မယမ္ပိ ဒါနိ အာဝုသော တတောယေဝ ပဋ္ဌာယ သံဂါဟနတ္ထာယ သံဂီတိပုဗ္ဗင်္ဂမာနိ ဓမ္မပုစ္ဆနဝိဿဇ္ဇနကိစ္စာနိ အာဝဟိတုံ သမာရဘာမ. တေနာဝုသော ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အင်္ဂုတ္တရနိကာယေ ဧကကနိပါတေ ရူပါဒိဝဂ္ဂေ ပုရိမာနိ ပဉ္စ သုတ္တာနိ ကတ္ထ ကံ အာရဗ္ဘ ကထဉ္စ ဘာသိတာနိ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ရူပါဒိဂရုကာနံ ပဉ္စန္နံ ပုရိသာနံ အဇ္ဈာသယဝသေန ‘‘နာဟံ ဘိက္ခဝေ အညံ ဧကရူပမ္ပိ သမနုပဿာမိ၊ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ၊ ယထယိဒံ ဘိက္ခဝေ ဣတ္ထိရူပံ၊ ဣတ္ထိရူပံ ဘိက္ခဝေ ပုရိသဿ စိတ္တံ ပရိယာဒါယ တိဋ္ဌတီ’’တိ ဧဝမာဒိနာ ဘဂဝတာ ဘာသိတာနိ.

နာဟံ ဘိက္ခဝေ အညံ ဧကရူပမ္ပိ သမနုပဿာမိ၊ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ၊ ယထယိဒံ ဘိက္ခဝေ ဣတ္ထိရူပံ၊ ဣတ္ထိရူပံ ဘိက္ခဝေ ပုရိသဿ စိတ္တံ ပရိယာဒါယ တိဋ္ဌတိ.

ပုစ္ဆာ – တတ္ထေဝ အာဝုသော ပစ္ဆိမာနိ ပဉ္စ သုတ္တာနိ ဘဂဝတာ ကတ္ထ ကံ အာရဗ္ဘ ကထဉ္စ ဘာသိတာနိ.

ဝိဿဇ္ဇနာ – တသ္မိံယေဝ ဘန္တေ သာဝတ္ထိယံ သမ္ဗဟုလေ ဘိက္ခူ အာရဗ္ဘ ရူပါဒိဂရုကာနံ ပဉ္စန္နံ ဣတ္ထီနံ အဇ္ဈာသယဝသေန ‘‘နာဟံ ဘိက္ခဝေ အညံ ဧကရူပမ္ပိ သမနုပဿာမိ၊ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ၊ ယထယိဒံ ဘိက္ခဝေ ပုရိသရူပံ၊ ပုရိသရူပံ ဘိက္ခဝေ ဣတ္ထိယာ စိတ္တံ ပရိယာဒါယ တိဋ္ဌတီ’’တိ ဧဝမာဒိနာ ဘဂဝတာ ဘာသိတာနိ.

နာဟံ ဘိက္ခဝေ အညံ ဧကရူပမ္ပိ သမနုပဿာမိ၊ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ၊ ယထယိဒံ ဘိက္ခဝေ ပုရိသရူပံ၊ ပုရိသရူပံ ဘိက္ခဝေ ဣတ္ထိယာ စိတ္တံ ပရိယာဒါယ တိဋ္ဌတိ.

နီတတ္ထဝသေန၊ နေယျတ္ထဝသေန

ပုစ္ဆာ – ဣမသ္မိံ အာဝုသော ရူပါဒိဝဂ္ဂေ ဘဂဝတာ နီတတ္ထဝသေန ကိံ ကထိတံ၊ နေယျတ္ထဝသေန ပန ကိံ ဉာပိတံ.

ဝိဿဇ္ဇနာ – ဣမသ္မိံ ဘန္တေ ရူပါဒိဝဂ္ဂေ ဘဂဝတာ နီတတ္ထဝသေန ဝဋ္ဋံ ကထိတံ. နေယျတ္ထဝသေန ပန ဝိဝဋ္ဋမ္ပိ ဉာပိတံ.