၂. နီဝရဏပ္ပဟာနဝဂ္ဂ
ပုစ္ဆာ – ဒုတိယော ပန အာဝုသော နီဝရဏပ္ပဟာနဝဂ္ဂေါ ဘဂဝတာ ကတ္ထ ကထဉ္စ ဘာသိတော.
ဝိဿဇ္ဇနာ – သာဝတ္ထိယံ ဘန္တေ ‘‘နာဟံ ဘိက္ခဝေ အညံ ဧကဓမ္မမ္ပိ သမနုပဿာမိ၊ ယေန အနုပ္ပန္နော ဝါ ကာမစ္ဆန္ဒော ဥပ္ပဇ္ဇတိ၊ ဥပ္ပန္နော ဝါ ကာမစ္ဆန္ဒော ဘိယျောဘာဝါယ ဝေပုလ္လာယ သံဝတ္တတိ၊ ယထယိဒံ ဘိက္ခဝေ သုဘနိမိတ္တံ၊ သုဘနိမိတ္တံ ဘိက္ခဝေ အယောနိသော မနသိကရောတော အနုပ္ပန္နောစေဝ ကာမစ္ဆန္ဒော ဥပ္ပဇ္ဇတိ၊ ဥပ္ပန္နော စ ကာမစ္ဆန္ဒော ဘိယျောဘာဝါယ ဝေပုလ္လာယ သံဝတ္တတီ’’တိ ဧဝမာဒိနာ ဘဂဝတာ ဘာသိတော.
ပုစ္ဆာ – ဣမသ္မိံ ပန အာဝုသော ဒုတိယေ နီဝရဏပ္ပဟာနဝဂ္ဂေ ဘဂဝတာ ကိံ ကထိတံ.
ဝိဿဇ္ဇနာ – ဣမသ္မိံ ပန ဘန္တေ ဒုတိယေ နီဝရဏပ္ပဟာနဝဂ္ဂေ ဘဂဝတာ ဝဋ္ဋမ္ပိ ဝိဝဋ္ဋမ္ပိ ကထိတံ.