၄၄. ဘာဝကာရကေ သွ+ဃဏ ဃ ကာ

ဘာဝေ ကာရကေ စ ကြိယတ္ထာ အ ဃဏ ဃ ကာ ဟောန္တိ ဗဟုလံ.

အပစ္စယော-ပဂ္ဂဏှနံ ပဂ္ဂဟော၊ ဧဝံ နိဂ္ဂဟော၊ ဓမ္မံ ဓာရေတီတိ ဓမ္မဓရော၊ ဧဝံ ဝိနယဓရော. တထာ တံ ကရောတီတိ တက္ကရော၊ ဒွိတ္တံ. ဧဝံ ဟိတကရော၊ ဒိဝသကရော၊ ဒိနကရော၊ ဒိဝါကရော၊ နိသာကရော၊ ဓနုံ ဂဏှီတိ ဓနုဂ္ဂဟော. ဧဝံ ကဝစဂ္ဂဟော. ဒဒ=ဒါနေ၊ သဗ္ဗကာမံ ဒဒါတီတိ သဗ္ဗကာမဒဒေါ၊ သဗ္ဗဒဒေါ. အာတော ‘‘ပရောက္ခာယဉ္စာ’’တိ စဂ္ဂဟဏေန ဒွိတ္တေ ‘‘ရဿော ပုဗ္ဗဿာ’’တိ ရဿေ စ အန္နံ ဒဒါတီတိ အန္နဒဒေါ၊ ဧဝံ ဓနဒေါ. သံပုဗ္ဗော ဓာ=ဓာရဏေ၊ သဗ္ဗံ သန္ဓဟတီတိ သဗ္ဗသန္ဓော. နီ=ပါပနေ၊ ဝိပုဗ္ဗော၊ ဝိနေသိ ဝိနေတိ ဝိနေဿတိ ဧတေန ဧတ္ထာတိ ဝါ ဝိနယော၊ ဧ+အယာဒေသာ. နယနံ နယော. သိ=သေဝါယံ၊ နိပုဗ္ဗော၊ နိဿီယတီတိ နိဿယော. သိ=သယေ၊ အနုသယိ အနုသေတိ အနုသေဿတီတိ အနုသယော. ဣ=ဂတိမှိ၊ ပတိပုဗ္ဗော၊ ပဋိစ္စ ဧတသ္မာ ဖလ+မေတီတိ ပစ္စယော. သံ+ဥပုဗ္ဗော၊ ဒါဂမေ သမုဒယော. စိ=စယေ၊ ဝိနိစ္ဆယတေ+နေန ဝိနိစ္ဆယနံ ဝါ ဝိနိစ္ဆယော၊ ‘‘နိတော စိဿ ဆော’’တိ စိဿ ဆော. ဥစ္စယနံ ဥစ္စယော၊ သံစယော. ခိ=ခယေ၊ ခယနံ ခယော. ဇိ=ဇယေ၊ ဝိဇယနံ ဝိဇယော၊ ဇယော. ကီ=ဒဗ္ဗဝိနီမယေ၊ ဝိက္ကယနံ ဝိက္ကယော၊ ကယော. လီ=သိလေသနေ၊ အလ္လီယန္တိ ဧတ္ထာတိ အာလယော၊ လယော. (ဣဝဏ္ဏန္တာ).

အာသုဏန္တီတိ အဿဝါ၊ အာဿ ရဿော. ပဋိဿဝနံ ပဋိဿဝေါ. သု=ပဿဝနေ၊ အာဘဝဂ္ဂါ သဝန္တီတိ အာသဝါ. ရု=သဒ္ဒေါ ရဝတီတိ ရဝေါ. ဘဝတီတိ ဘဝေါ. ပဘဝတိ ဧတသ္မာတိ ပဘဝေါ. လူ=ဆေဒနေ၊ လဝနံ လဝေါ. (ဥဝဏ္ဏန္တာ).

စရ=စရဏေ၊ သံစရဏံ သံစရော. ဒရ=ဝိဒါရဏေ၊ အာဒရနံ အာဒရော. အာဂစ္ဆတိ အာဂမနံတိ ဝါ အာဂမော. သပ္ပ=ဂမနေ၊ သပ္ပတီတိ သပ္ပေါ. ဒိဗ္ဗတီတိ ဒေဝေါ. ပက္ကမနံ ပက္ကမတီတိ ဝါ ပက္ကမော၊ ဧဝံ ဝိက္ကမော. စရ=စရဏေ၊ ဝနံ စရတီတိ ဝနစရော. ကာမော အဝစရတိ ဧတ္ထာတိ ကာမာဝစရော လောကော၊ ကာမာဝစရာ ပညာ၊ ကာမာဝစရံ စိတ္တံ. ဂါဝေါ စရန္တိ ဧတ္ထာတိ ဂေါစရော. ပါဒေန ပိဝတီတိ ပါဒပေါ. ဧဝံ ကစ္ဆပေါ. သိရသ္မိံ ရုဟတီတိ သိရောရုဟော၊ မနာဒိတ္တာ ဩ. ဂုဟာယံ သယတီတိ ဂုဟာသယံ စိတ္တံ၊ ဧဝံ ကုစ္ဆိသယာ ဝါတာ. ပဗ္ဗတေ တိဋ္ဌတီတိ ပဗ္ဗတဋ္ဌော ပုရိသော၊ ပဗ္ဗတဋ္ဌာ နဒီ၊ ပဗ္ဗတဋ္ဌံ ဘသ္မံ. ဧဝံ ထလဋ္ဌံ ဇလဋ္ဌံ.

ကိစ္ဆတ္ထေ ဒုမှိ အကိစ္ဆတ္ထေ သု+ဤသံ+သုခ ဥပပဒေသု-ဒုက္ခေန ကရီယတိ ကရဏံ ဝါ ဒုက္ကရံ. ဧဝံ ဒုဿယော၊ ဒုက္ခေန ဘရီယတီတိ ဒုဗ္ဘရော မဟိစ္ဆော. ဧဝံ ဒုရက္ခံ စိတ္တံ၊ ဒုဒ္ဒသော ဓမ္မော၊ ဒုရနုဗောဓော ဓမ္မော. ဤသံ သယတီတိ ဤသံသယော၊ ဧဝံ သုခသယော. ဤသံ ကရီယတီတိ ဤသက္ကရံ ကမ္မံ. သုခေန ကရီယတီတိ သုကရံ ပါပံ ဗာလေန. ဧဝံ သုဘရော အပ္ပိစ္ဆော၊ သုဒဿံ ပရဝဇ္ဇံ၊ သုဗောဓ+မိစ္စာဒိ. သဗ္ဗတ္ထ ပါဒိအမာဒိသမာသာ.

ဃဏ-ဘဝတီတိ ဘာဝေါ၊ ဩ+အာဝါဒေသာ. အယ=ဣတိ ဒဏ္ဍကဓာတု၊ အယတိ ဣတောတိ အာယော၊ အာဟရတီတိ အာဟာရော. ဥပဟနတီတိ ဥပဃာတော၊ ‘‘ဟနဿ ဃာတော ဏာနုဗန္ဓေ’’တိ ဃာတာဒေသော. ရဉ္ဇတီတိ ရာဂေါ၊ ‘‘ကဂါ စဇာနံ ဃာနုဗန္ဓေ’’တိ ဇဿ ဂေါ. ရဉ္ဇန္တိ အနေနာတိ ရာဂေါ. ‘‘အဿာ ဏာနုဗန္ဓေ’’တိ အာ၊ ပဇ္ဇတေ+နေနာတိ ပါဒေါ. တုဒ=ဗျထနေ၊ ပတုဇ္ဇတေ+နေနာတိ ပတောဒေါ. ဇရီယတိ အနေနာတိ ဇာရော၊ ဧဝံ ဒါရော. ဘဇီယတီတိ ဘာဂေါ. ဧဝံ ဘာရော. လဗ္ဘတီတိ လာဘော. ဝိ+ဩပုဗ္ဗော၊ ဝေါဟရီယတီတိ ဝေါဟာရော. ဒိယျတီတိ ဒါယော၊ ယုက. ဝိဟညတိ ဧတသ္မာတိ ဝိဃာတော. ဝိဟရန္တိ ဧတ္ထာတိ ဝိဟာရော. အာရမန္တိ ဧတသ္မိန္တိ အာရာမော. ပစနံ ဝါ ပါကော၊ စဿ ကော. စဇနံ စာဂေါ. ယဇနံ ယာဂေါ. ရဇနံ ရာဂေါ.