၁၁၇. သာသဿ သိသ ဝါ

သာသဿ သိသ ဝါ ဟောတိ ကာနုဗန္ဓေ. ပုဗ္ဗရူပံ၊ သာသီယတီတိ သိဿော.

သိဒ္ဓါ ဧဝေ+တေ တဗ္ဗာဒယော ပေသာ+တိသဂ္ဂ+ပ္ပတ္တကာလေသု ဂမျမာနေသုပိ၊ သာမညေန ဝိဓာနတော. ပေသနံ – ‘‘ကတ္တဗ္ဗ+မိဒံ ဘဝတာ’’တိ အာဏာပနံ အဇ္ဈေသနဉ္စ. အတိသဂ္ဂေါ နာမ ‘‘ကိ+မိဒံ မယာ ကတ္တဗ္ဗံ’’တိ ပုဋ္ဌဿ ‘‘ပါဏော န ဟန္တဗ္ဗော’’တိအာဒိနာ ပဋိပတ္တိဒဿနမုခေန ကတ္တဗ္ဗဿ အနုညာ. ပတ္တကာလော နာမ သမ္ပတ္တသမယော. ယော ကိစ္စကရဏသမယံ ဥပပရိက္ခိတွာ ကရောတိ၊ တဿ သမယာရောစနံ၊ န တတ္ထ အဇ္ဈေသန+မတ္ထိ. ဘောတာ ခလု ကဋော ကတ္တဗ္ဗော ကရဏီယော ကာရိယော ကိစ္စော’’ ဧဝံ တွယာ ကဋော ကတ္တဗ္ဗော၊ ဘောတော ဟိ ပတ္တော ကာလော ကဋကရဏေ.

ဧဝံ ဥဒ္ဓမုဟုတ္တေပိ ဝတ္တမာနတော ပေသာဒီသု သိဒ္ဓါ ဧဝ. တထာ အရဟေ ကတ္တရိ သတ္တိဝိသိဋ္ဌေ စ ပတီယမာနေ၊ အာဝဿကာ+ဓမီဏတာဝိသိဋ္ဌေ စ ဘာဝါဒေါ သိဒ္ဓါ. ဥဒ္ဓံ မုဟုတ္တတော-ဘောတာ ကဋော ကတ္တဗ္ဗော. ဘောတာ ရဇ္ဇံ ကာတဗ္ဗံ၊ ဘဝံ အရဟော. ဘောတာ ဘာရော ဝဟိတဗ္ဗော၊ ဘဝံ သက္ကော. ဘောတာ အဝဿံ ကဋော ကတ္တဗ္ဗော. ဘောတာ နိက္ခော ဒါတဗ္ဗော.