၅၊၁၆. ပယောဇကဗျာပါရေ ဏာပိ စ

ကတ္တာရံ ယော ပယောဇေတိ၊ တဿ ဗျာပါရေ ကြိယတ္ထာ ဏိ+ဏာပီ ဟောန္တိ ဗဟုလံ.

ဏိပစ္စယော ဥဝဏ္ဏန္တာ၊ အာတော ဏာပေဝ ဟောတိ+ဟ၊

ဒွေ ဒွေ+ကော ဟောတိ ဝါ သေသေ၊ ဗဟုလံတျနုဝုတ္တိယာ.

အကမ္မကာပိ ဟောန္တေဝ၊ ဏိ+ဏာပျန္တာ သကမ္မကာ၊

သကမ္မကာ ဒွိကမ္မာ+ဿု၊ ဒွိကမ္မာ စ တိကမ္မကာ.

တသ္မာ ကတ္တရိ ကမ္မေ စ၊ ဏိ+ဏာပီနံ တု သမ္ဘဝေါ၊

န ဘာဝေ သုဒ္ဓကတ္တာ တု၊ ကမ္မံ ဟောတိ ပယောဇကေ.

နယာဒီနံ ပဓာနဉ္စ၊ အပဓာနံ ဒုဟာဒိနံ၊

သုဒ္ဓကတ္တာ ဏိ+ဏာပီသု၊ ကမ္မ+မက္ချာတ ဂေါစရံ.

ဘဝိတုံ ပယောဇယတီတိ အတ္ထေ ဣမိနာ ဏိပ္ပစ္စယော. ဏကာရော ဏာနုဗန္ဓကာရိယတ္ထော. ‘‘ယုဝဏ္ဏာန+မေ+ဩ ပစ္စယေ’’တိ ဩကာရေ ‘‘အာယာ+ဝါ ဏာနုဗန္ဓေ’’တိ ဏာနုဗန္ဓေ အာဝါဒေသော. တျာဒိမှိ ‘‘ဏိ+ဏာပျာ+ပီဟိ ဝါ’’တိ လဝိကရဏေ ဧကာရေ ‘‘ဧဩန+မယဝါ သရေ’’တိ အယာဒေသော. သော သမာဓိံ ဘာဝယတိ ဘာဝေတိ၊ ဘာဝယန္တိ ဘာဝေန္တိ+စ္စာဒိ. ကမ္မေ-တေန သမာဓိ ဘာဝီယတိ+စ္စာဒိ. ဧတ္ထ ‘‘ဒီဃော သရဿာ’’တိ ကျေ ဣကာရဿ ဒီဃော. ဘာဝယိဿတိ ဘာဝေဿတိ၊ ဘာဝယိဿန္တိ ဘာဝေဿန္တိ+စ္စာဒိ. အဇ္ဇတနေ ဤဿ သိမှိ အဘာဝေသိ ဘာဝေသိ၊ အဘာဝယိ ဘာဝယိ၊ အဘာဝယိံသု ဘာဝယိံသု. ပရဿရလောပေ အဘာဝေသုံ ဘာဝေသုံ၊ အဘာဝယံသု ဘာဝယံသု၊ အဘာဝယုံ ဘာဝယုံ ဣစ္စာဒိ. ကမ္မေ-အဘာဝီယိ ဘာဝီယိ ဣစ္စာဒိ. အဘာဝိဿ အဘာဝယိဿ၊ အဘာဝိဿံသု အဘာဝယိဿံသု. ကမ္မေ-အဘာဝယိဿံ ဣစ္စာဒိ. ဘာဝေ ဘာဝေယျ ဣစ္စာဒိ. ကမ္မေ-ဘာဝီယေယျ ဣစ္စာဒိ. ဘာဝယတု ဘာဝေတု ဣစ္စာဒိ. ကမ္မေ-ဘာဝီယတု ဣစ္စာဒိ.

ပစိတုံ ပယောဇေတီတိ အတ္ထေ ဏိ+ဏာပီ ဟောန္တိ. သော ဒေဝဒတ္တေန ဩဒနံ ပါစယတိ ပါစေတိ ဣစ္စာဒိ၊ တထာ ပါစာပယတိ ပါစာပေတိ+စ္စာဒိ. ကမ္မေ-သော တေန ဒေဝဒတ္တေန ဩဒနော ပါစီယတိ ပါစာပီယတိ+စ္စာဒိ၊ ဘဝိဿတျာဒီသုပိ ယောဇေတဗ္ဗံ.

ဂန္တုံ ပယောဇေတီတိ အတ္ထေ သော တံ ပုရိသံ ဂါမံ ဂမယတိ ဂမေတိ ဂစ္ဆာပယတိ ဂစ္ဆာပေတိ+စ္စာဒိ. ကမ္မေ-တေန သော ဂါမံ ဂမီယတိ ဂစ္ဆာပီယတိ+စ္စာဒိ.

ဂုဟ=သံဝရဏေ၊ ဂုဟိတုံ ပယောဇေတီတိ ဏိမှိ ‘‘ဂုဟိဿ သရေ’’တိ ဒီဃော. ဂူဟယတိ၊ ဂူဟယန္တိ ဣစ္စာဒိ.

ဒိသ+ဒုသ=အပ္ပီတိယံ၊ ဒုသိတုံ ပယောဇေတီတိ ဏိမှိ ‘‘ဏိမှိ ဒီဃော ဒုသဿာ’’တိ ဒီဃေ ဒူသယတိ+စ္စာဒိ.

တထာ ဣစ္ဆန္တံ ပယောဇယတိ ဣစ္ဆာပယတိ ဣစ္ဆာပေတိ၊ ဧသယတိ ဧသေတိ. နိယစ္ဆန္တံ ပယောဇယတိ နိယမယတိ နိယမေတိ. တထာ အာသယတိ အာသေတိ၊ အစ္ဆာပယတိ အစ္ဆာပေတိ. လာဘယတိ လာဘေတိ၊ ဧဝံ ဝါသယတိ ဝါသေတိ၊ ဝါသာပယတိ ဝါသာပေတိ. ဝါဟယတိ ဝါဟေတိ၊ ဝါဟာပယတိ ဝါဟာပေတိ+စ္စာဒိ. ဧဝံ ဇီရယတိ၊ မာရယတိ၊ ဒဿယတိ ဣစ္စာဒိ. ဟူ=သတ္တာယံ၊ ပဟောန္တံ ပယောဇယတိ ပဟာဝယတိ ပဟာဝေတိ ဣစ္စာဒိ. သာယယတိ သာယာပယတိ သာယာပေတိ. နာယာပယတိ နာယာပေတိ. ပတိဋ္ဌာပယတိ ပတိဋ္ဌာပေတိ. ရဿေ ပတိဋ္ဌပေတိ. ဟန္တုံ ပယောဇယတီတိ ဏိ+ဏာပီ၊ ‘‘ဟနဿ ဃာတော ဏာနုဗန္ဓေ’’တိ ဃာတာဒေသေ ဃာတယတိ ဃာတေတိ. တထာ ဇုဟာဝယတိ ဇုဟာဝေတိ၊ ဇဟာပယတိ ဇဟာပေတိ. ဟာပယတိ ဟာပေတိ. ဒါပယတိ ဒါပေတိ. ဝိဓာပယတိ ဝိဓာပေတိ၊ ပိဒဟာပယတိ ပိဒဟာပေတိ. (ဘူဝါဒိနယော).

ဣဒါနိ ရုဓာဒိအဋ္ဌဂဏာ ဒဿီယန္တေ-ရောဓယတိ ရောဓေတိ. ဒေဝယတိ ဒေဝေတိ. တောဒယတိ တောဒေတိ. ဇယာပယတိ ဇယာပေတိ. ဝိက္ကယတိ ဝိက္ကယာပေတိ. သာဝယတိ သာဝေတိ. ဝိတာနယတိ ဝိတာနေတိ. စောရာပယတိ စောရာပေတိ ဣစ္စာဒိ.

ခါဒီဟိ ပစ္စယန္တေဟိ၊ အပိ ဟောန္တိ ဏိ+ဏာပယော၊

ဏိ+ဏာပိနာ+နကာနာနံ၊ ဒဿနဉ္စေတ္ထ သာဓနံ.

တိတိက္ခန္တံ ပယောဇယတိ တိတိက္ခေတိ တိတိက္ခာပေတိ၊ တိကိစ္ဆယတိ တိကိစ္ဆေတိ တိကိစ္ဆာပယတိ တိကိစ္ဆာပေတိ. ဧဝံ ဗုဘုက္ခေတိ ဗုဘုက္ခာပေတိ. ပဗ္ဗတာယယတိ. ပုတ္တီယယတိ ဣစ္စာဒိ. (ခါဒိပစ္စယနယော).

ဣတိ ပယောဂသိဒ္ဓိယံ တျာဒိကဏ္ဍော ဆဋ္ဌော.