၂၀၈. စတုရော ဝါ စတုဿ

စတုဿ သဝိဘတ္တိဿ ယောမှိ စတုရော ဟောတိ ဝါ ပုလ္လိင်္ဂေ. စတုရော စတ္တာရော. ကထံ ‘‘စတုရော နိမိတ္တေ နာဒ္ဒသာသိ’’န္တိ၊ လိင်္ဂဝိပလ္လာသေန သိဒ္ဓံ၊ စတ္တာရိ နိမိတ္တာနီတိ အတ္ထော. ဝိပလ္လာသော တိဝိဓော လိင်္ဂဝိပလ္လာသော ဝစနဝိပလ္လာသော ဝိဘတ္တိဝိပလ္လာသောတိ. စတူဟိ စတူဘိ. စတုန္နံ၊ စတူသု.

ဣတ္ထိယံ စတဿော. စတဿော. စတူဟိ စတူဘိ. စတဿန္နံ. စတဿန္နံ. စတူသု.

နပုံသကေ စတ္တာရိ. စတ္တာရိ. စတူဟိ စတူဘိ. ဣစ္စာဒိ ပုမေဝ.