သင်္ချာကဏ္ဍ

အထ သင်္ချာသဒ္ဒါ ဝုစ္စန္တေ. ဧကာဒယော အဋ္ဌာရသန္တာ သင်္ချေယျဝစနာ. ဝီသတိအာဒယော ‘‘ဘိက္ခူနံ ဝီသတီ’’တိအာဒီသု သင်္ချာဝစနာ၊ ‘‘ဝီသတိ ဘိက္ခဝေါ’’တိအာဒီသု သင်္ချေယျဝစနာ. ဧကသဒ္ဒေါ သဗ္ဗာဒီသု ဝုတ္တောဝ. ဒွါဒယော အဋ္ဌာရသန္တာ ဗဟုဝစနန္ထာဝ.

၂၁၉. ယောမှိ ဒွိန္နံ ဒုဝေ+ဒွေ

ယောမှိ ဒွိဿ သဝိဘတ္တိဿ ဒုဝေ+ဒွေ ဟောန္တိ ပစ္စေကံ. ဒုဝေ ဒွေ၊ ဒုဝေ ဒွေ၊ ဒွီဟိ ဒွီဘိ.

၂၂၀. ဒုဝိန္နံ နံမှိ ဝါ

နံမှိ ဒွိဿ သဝိဘတ္တိဿ ဒုဝိန္နံ ဟောတိ ဝါ. ဒုဝိန္နံ၊ အညတြ –

၄၇. နံမှိ နုက ဒွါဒီနံ သတ္တရသန္နံ

ဒွါဒီနံ သတ္တရသန္နံ သင်္ချာနံ နုက ဟောတိ နံမှိ ဝိဘတ္တိမှိ. ဥကာရော ဥစ္စာရဏတ္ထော၊ ကကာရော အန္တာဝယဝတ္ထော. ဧတ္ထ နာဂမော ဝိဘတ္တိဿ အာဒျာဝယဝေါ စေ၊ ‘‘အာဂမာ တဂ္ဂုဏီဘူတာ တဂ္ဂဟဏေန ဂယှန္တေ’’တိ ဉာယာ နာဂမောပိ တံဂဟဏေန ဂယှတီတိ ‘‘သုနံဟိသူ’’တိ ဒီဃပ္ပသင်္ဂေ ပကတိယာ အန္တာဝယဝဘူတေ သရန္တတာ နတ္ထီတိ န ဒီဃော. ဒွိန္နံ၊ ဒွီသု.

၂၀၇. ပုမေ တယော+စတ္တာရော

ယောမှိ သဝိဘတ္တီနံ တိ+စတုန္နံ တယော+စတ္တာရော ဟောန္တိ ယထာက္ကမံ ပုလ္လိင်္ဂေ. တယော၊ တယော၊ တီဟိ တီဘိ.

၄၉. ဏ္ဏံ+ဏ္ဏန္နံ တိတော ဈာ

ဈသညိတော တိတော နံဝစနဿ ဏ္ဏံ+ဏ္ဏန္နံ ဟောန္တိ. တိဏ္ဏံ တိဏ္ဏန္နံ၊ တီသု.

ဣတ္ထိယံ –

၂၀၅. တိဿော စတဿော ယောမှိ သဝိဘတ္တီနံ

ဝိဘတ္တိသဟိတာနံ တိစတုန္နံ ယောမှိ တိဿော+စတဿော ဟောန္တိ ဣတ္ထိယံ ယထာက္ကမံ. တိဿော၊ တိဿော၊ တီဟိ တီဘိ.

၂၀၄. နံမှိ တိစတုန္န+မိတ္ထိယံ တိဿ+စတဿာ

နံမှိ တိစတုန္နံ တိဿ+စတဿာ ဟောန္တိ+တ္ထိယံ ယထာက္ကမံ. နံမှီတိ စတုတ္ထီဆဋ္ဌီနံ သာမညဝစနံ၊ နော စေ နံသူတိ ဝဒတိ၊ ယထာက္ကမံတိ သဒ္ဒဒွယာပေက္ခံ. ဧဝ+မီဒိသ+မညမ္ပိ. တိဿန္နံ တီသု.

၂၀၆. တီဏိ+စတ္တာရိ နပုံသကေ

ယောမှိ သဝိဘတ္တီနံ တိစတုန္နံ ယထာက္ကမံ တီဏိ+စတ္တာရိ ဟောန္တိ နပုံသကေ. တီဏိ၊ တီဏိ၊ တီဟိ ဣစ္စာဒိ ပုလ္လိင်္ဂေဝ.

စတု ယော၊

၂၀၈. စတုရော ဝါ စတုဿ

စတုဿ သဝိဘတ္တိဿ ယောမှိ စတုရော ဟောတိ ဝါ ပုလ္လိင်္ဂေ. စတုရော စတ္တာရော. ကထံ ‘‘စတုရော နိမိတ္တေ နာဒ္ဒသာသိ’’န္တိ၊ လိင်္ဂဝိပလ္လာသေန သိဒ္ဓံ၊ စတ္တာရိ နိမိတ္တာနီတိ အတ္ထော. ဝိပလ္လာသော တိဝိဓော လိင်္ဂဝိပလ္လာသော ဝစနဝိပလ္လာသော ဝိဘတ္တိဝိပလ္လာသောတိ. စတူဟိ စတူဘိ. စတုန္နံ၊ စတူသု.

ဣတ္ထိယံ စတဿော. စတဿော. စတူဟိ စတူဘိ. စတဿန္နံ. စတဿန္နံ. စတူသု.

နပုံသကေ စတ္တာရိ. စတ္တာရိ. စတူဟိ စတူဘိ. ဣစ္စာဒိ ပုမေဝ.

၁၆၉. ဋ ပဉ္စာဒီဟိ စုဒ္ဒသဟိ

‘‘သုတ္တေ လိင်္ဂဝစနမတ္တ’’န္တိ ဉာယာ ဋ-ဣတိ ဝုတ္တံ. ပဉ္စာဒီဟိ စုဒ္ဒသဟိ သင်္ချာဟိ ယောနံ ဋ ဟောတိ. ပဉ္စ. ပဉ္စ. ယောနံ ဋာ+ဋေနိဝတ္ထနတ္ထံ ဋ-ဝိဓာနံ.

၉၀. ပဉ္စာဒီနံ စုဒ္ဒသန္န+မ

ပဉ္စာဒီနံ စုဒ္ဒသန္နံ သုနံဟိသွ ဟောတိ. ဧတ္တ+ဒီဃာပဝါဒေါ+ယံ. အပဝါဒတိ ဗာဓေတီတိ အပဝါဒေါ. တသ္မာ ‘‘ပကပျာပဝါဒဝိသယမုဿဂ္ဂါ အဘိနိဝိသန္တေ’’တိ ဉာယာ ‘‘သုဟိသွ+ဿေ’’ ‘‘သုနံဟိသု’’တိ စ ဥဿဂ္ဂါ ‘‘ပဉ္စာဒီနံ စုဒ္ဒသန္န+မ’’ ဣတိ အပဝါဒဝိသယံ န ပဝိသန္တိ၊ သာမညတ္တာ. ဧဝ+မုပရိပိ ‘‘ပဉ္စမိယံ ပရဿ’’ ‘‘အာဒိဿာ’’တိ. ပဉ္စဟိ ပဉ္စဘိ ပဉ္စန္နံ. ပဉ္စန္နံ. ပဉ္စသု. ဧဝံ ဆာဒယော အဋ္ဌာရသန္တာ.

‘‘စတ္ထေ’’တိ ဧကော စ ဒသ စာတိ စတ္တသမာသေ ‘‘အမာဒီ’’တိ ဧကေန အဓိကာ ဒသာတိ တတိယာသမာသေ ဝါ ကတေ ‘‘ဧကတ္ထတာယ’’န္တိ ဝိဘတ္တိလောပေါ. ဧဝ+မုပရိ စ.

၃၊၁၀၂. ဧကဋ္ဌာန+မာ

ဧကအဋ္ဌာနံ အာ ဟောတိ ဒသေ ပရေ.

၃၊၁၀၃. ရ သံချာတော ဝါ

သံချာတော ပရဿ ဒသဿ ရ ဟောတိ ဝိဘာသာ. သ စ ‘‘ပဉ္စမိယံ ပရဿာ’’တိ ဝတ္တမာနေ ‘‘အာဒိဿာ’’တိ ဒကာရဿေဝ ဟောတိ. ဧကာရသ ဧကာဒသ. ဧကာရသဟိ ဧကာဒသဟိ. ဧကာရသန္နံ ဧကာဒသန္နံ. ဧကာရသသု ဧကာဒသသု. ဧဝ+မေကာဒသဣစ္စာဒိပိ.

၃၊၉၄. အာ သံချာယာ သတာဒေါ နာညတ္ထေ

သံချာယ+မုတ္တရပဒေ ဒွိဿာ ဟောတိ အသတာဒေါ နာညတ္ထေ.

အာဝိဋ္ဌလိင်္ဂတ္တာ သံချာယံ ဥတ္တရပဒေ သလိင်္ဂေနေဝ ဝိသေသနံ ဘဝတိ.

သုဒ္ဓံ မိဿဉ္စ သံကိဏ္ဏံ၊ ဥပသဇ္ဇနမေဝ စ၊

အာဝိဋ္ဌ+မထ ဝါ+ဗျတ္တံ၊ ဆဓာ လိင်္ဂံ ဝိဝံယတေ.

ဧတ္ထ ယထာက္ကမံ ရုက္ခော လတာ ပဏ္ဏံတိ သုဒ္ဓံ. ဃဋော ဃဋီ၊ ဝဇိရော ဝဇိရံ၊ ဝေဒနာ ဝေဒနံတိ မိဿံ. တဋော တဋီ တဋံတိ သံကိဏ္ဏံ. သုက္ကော ပဋော၊ သုက္ကာ ပဋိ၊ သုက္ကံ ဝတ္ထံတိ ဥပသဇ္ဇနံ. ရာဇာ သရဏံ၊ ဂုဏော ပမာဏံတိ အာဝိဋ္ဌံ. တုဝံ အဟံ ကတိ ပဉ္စာတိ အဗျတ္တံ. ဣတိ လိင်္ဂံ ဝေဒိတဗ္ဗံ. ဒွါဒသ.

၃၊၉၈. ဗာ စတ္တာလီသာ ဒေါ

ဒွိဿ ဗာ ဝါ ဟောတိ စတ္တာလီသာ ဒေါ နာညတ္ထေ. ရာဒေ သေ ဗာရသ.

၃၊၉၅. တိဿေ

သံချာယ+မုတ္တရပဒေ တိဿ ဧ ဟောတ+သတာဒေါ နာ+ညတ္ထေ.

၃၊၁၀၄. ဆတီဟိ ဠော စ

ဆတီဟိ ပရဿ ဒသဿ ဠော ဟောတိ ရော စ. တေဠသ တေရသ.

၃၊၁၀၀. စတုဿ စုစော ဒသေ

စတုဿ စု+စော ဟောန္တိ ဝါ ဒသေ ပရေ. ဒွိတ္တေ စုဒ္ဒသ စောဒ္ဒသ စတုဒ္ဒသ.

၃၊၉၉. ဝီသတိဒသေသု ပဉ္စဿ ပဏ္ဏ+ပန္နာ

ဝီသတိ သေသု ပရေသု ပဉ္စဿ ပဏ္ဏ+ပန္နာ ဟောန္တိ ယထာက္ကမံ. ပန္နရသ ပဉ္စဒသ.

၃၊၁၀၁. ဆဿ သော

ဆဿ သော-ဣစ္စ+ယ+မာဒေသော ဟောတိ သေ ပရေ. သောဠသ သောရသ. သတ္တရသ သတ္တဒသ. ‘‘ဧကဋ္ဌာန+မာ’’တိ အာ၊ အဋ္ဌာရသ အဋ္ဌာဒသ.

ဦနာ စ သာ ဝီသတိ စာတိ ‘‘ဝိသေသန+မေကတ္ထေနေ’’တိ ဝိသေသနသမာသေ ‘‘ဣတ္ထိယံ ဘာသိတပုမိ+တ္ထီ ပုမေ+ဝေကတ္ထေ’’တိ ပုမတ္တေ စ ကတေ ဧကေန ဦနာ ဝီသတီတိ တတိယာသမာသေ ဧကူနဝီသတိ.

ဝီသတိအာဒယော အာနဝုတိယာ ဣတ္ထိလိင်္ဂေ+ကဝစနာ. ဘော ဧကူနဝီသတိ. ဧကူနဝီသတိံ. ဧကူနဝီသတျာ ဧကူနဝီသတိယာ. ဧကူနဝီသတျံ ဧကူနဝီသတိယံ ဧကူနဝီသတျာ ဧကူနဝီသတိယာ. မတိသမံ.

ဧဝံ ဝီသတိ၊ ဧကဝီသတိ၊ ဒွါဝီသတိ ဗာဝီသတိ၊ တေဝီသတိ စတုဝီသတိပ္ပဘုတယော. ပဏ္ဏအာဒေသေ ပဏ္ဏဝီသတိ ပဉ္စဝီသတိ. ဧဝံ ဆဗ္ဗီသတိ၊ သတ္တဝီသတိ၊ အဋ္ဌဝီသတိ.

ဧကေန ဦနာ တိံသတိ တိံသာ ဝါတိ ဧကူနတိံသတိ ဧကူနတိံသာ ဝါ. ကရဏေ ဧကူနတိံသာယ. ဧကူနတိံသာယ၊ ဧကူနတိံသာယ၊ ဧကူနတိံသာယ၊ ဧကူနတိံသာယံ. ဧဝံ တိံသတိဏိံသာဝဘုတယော. တိံသာသဒ္ဒဿ ပန သိလောပေ ‘‘ဒီဃဿော’’တိ ယောဂဝိဘာဂါ ရဿော၊ တိံသ. နိဂ္ဂဟီတာဂမော၊ တိံသံ. ဘောတိံသေ+စ္စာဒိ ပုမေဝ.

စတ္တာလီသာဒီသုပိ ယထာသမ္ဘဝံ ဧဝမေဝ. ဒွိတ္တေ ဧကတ္တိံသတိ ဧကတ္တိံသာ. ရဿဒွိတ္တေ ဒွတ္တိံသတိ ဒွတ္တိံသ. ဧဝံ တေတ္တိံသတိ တေတ္တိံသာဒယော ယာဝ ဧကူနစတ္တာလီသတိ ဧကူနစတ္တာလီသာ. စတ္တာလီသာယ သိမှိ စတ္တာရီသာ စတ္တာလီသာ စတ္တာလီသံ၊ ဘော စတ္တာလီသေ+စ္စာဒိ ဟောတိ. ဧဝံ ဧကစတ္တာရီသာ.

၃၊၉၇. ဒွီဿာ စ

အသတာဒေါ နာညတ္ထေ စတ္တာလီသာဒေါ ဒွိဿ ဧ ဝါ ဟောတိ အာ စ. ဒွေစတ္တာလီသာ ဒွေစတ္တာလီသ ဒွေစတ္တာလီသံ၊ ဧဝံ ဒွါစတ္တာလီသ-ဣစ္စာဒိ. ဒွေစတ္တာရီသာ ဒွေစတ္တာရီသ ဒွေစတ္တာရီသံ၊ ဧဝံ ဒွါစတ္တာရီသာ ဒွါစတ္တာရီသ ဣစ္စာဒိ. စတ္တာလီသတိ ဧကစတ္တာလီသတိ ဒွေစတ္တာလီသတိ ဒွါစတ္တာလီသတိ ဣစ္စာဒိ ဧကူနဝီသတိသမံ.

၃၊၉၈. စတ္တာလီသာဒေါ ဝါ

အသတာဒေါ နာညတ္ထေ စတ္တာလီသာဒေါ တိဿေ ဟောတိ ဝါ. တေစတ္တာလီသာ တေစတ္တာလီသ တေစတ္တာလီသံ. ဘော တေစတ္တာလီသေ ဣစ္စာဒိ ဟောတိ. ဧဝံ တိစတ္တာလီသာ တေစတ္တာရီသာ တိစတ္တာရီသာ ဣစ္စာဒိ၊ တေစတ္တာလီသတိ တိစတ္တာလီသတိ ဣစ္စာဒိ ပုဗ္ဗေဝ.

ဧဝံ စတုစတ္တာလီသာ ပဉ္စစတ္တာလီသာ စတုစတ္တာလီသတိ ပဉ္စစတ္တာလီသတိ ဣစ္စာဒိ ယာဝ ဧကူနပညာသာ.

ပညာသာ ပညာသ ပညာသံ ဣစ္စာဒိ ဟောတိ. ဧဝံ ဒွေပညာသာ ဒွါပညာသာ ဒွိပညာသာ ဒွေပဏ္ဏာသာ ဒွါပဏ္ဏာသာ ဒွိပဏ္ဏာသာ. တေပညာသာ တိပညာသာ တိပညာသံ တေပဏ္ဏာသာ တိပဏ္ဏာသာ. စတုပဏ္ဏာသာ ပဉ္စပဏ္ဏာသာ ဣစ္စာဒိ ယာဝ ဧကူနသဋ္ဌိ.

ဧဝံ သဋ္ဌိ၊ ဧကသဋ္ဌိ၊ ဒွေသဋ္ဌိ ဒွါသဋ္ဌိ ဒွိသဋ္ဌိ၊ တေသဋ္ဌိ တိသဋ္ဌိ၊ စတုသဋ္ဌိ ပဉ္စသဋ္ဌိ ဣစ္စာဒိ ယာဝ ဧကူနသတ္တတိ.

သတ္တတိ၊ ဧကသတ္တတိ၊ ဒွေသတ္တတိ ဒွါသတ္တတိ ဒွိသတ္တတိ၊ တေသတ္တတိ တိသတ္တတိ. ဒွေသတ္တရိ ဒွါသတ္တရိ ဒွိသတ္တရိ၊ စတုသတ္တတိ၊ ပဉ္စသတ္တတိ၊ စတုသတ္တရိ၊ ပဉ္စသတ္တရီတိ ယာဝ ဧကူနာသီတိ.

အသီတိ၊ ဧကာသီတိ၊ ဒွါသီတိ၊ ယာဂမေ ဒွိယာသီတိ၊ တေအသီတိ တိယာသီတိ၊ စတုရာသီတိ၊ ပဉ္စာသီတိ ဣစ္စာဒိ ယာဝ ဧကူနနဝုတိ.

နဝုတိ၊ ဧကနဝုတိ၊ ဒွေနဝုတိ ဒွါနဝုတိ ဒွိနဝုတိ၊ တေနဝုတိ တိနဝုတိ၊ စတုနဝုတိ၊ ပဉ္စနဝုတိ ဣစ္စာဒိ ယာဝ ဧကူနသတံ၊ ဧတံ နပုံသကလိင်္ဂ+မေကဝစနန္တံ.

သတံ၊ ဘော သတ သတာ၊ သတံ၊ သတံ. သတေန၊ ကရဏေ သတေန. သတဿ၊ သတာ သတမှာ သတသ္မာ၊ သတဿ၊ သတေ သတမှိ သတသ္မိံ. ဧဝံ ဧကသတတော ပဘုတိ ယာဝ သဟဿံ.

ကောဋိ ပကောဋိ ကောဋိပ္ပကောဋိ အက္ခောဘိဏိယော ဣတ္ထိလိင်္ဂေ+ကဝစနန္တာ. ဝဂ္ဂဘေဒေ တု သဗ္ဗာသမ္ပိ သံချာနံ ဗဟုဝစနောပိ ဟောတေဝ ‘‘ဒွေဝီသတိယော ဇိနဒန္တာ’’ ‘‘တိဿော ဝီသတိယော ဒိနဃဋိကာ’’ ဣစ္စာဒိ.

ဒသဒသကံ သတံ နာမ၊ ဒသသတံ သဟဿံ နာမ၊ ဒသသဟဿံ နဟုတံ၊ ဒသနဟုတံ လက္ခံ၊ သတသဟဿန္တိပိ ဝုစ္စတိ.

လက္ခသတံ ကောဋိ၊ ကောဋိလက္ခသတံ ပကောဋိ၊ ပကောဋိလက္ခသတံ ကောဋိပ္ပကောဋိ၊ ဧဝံ နဟုတံ၊ နိန္နဟုတံ၊ အက္ခောဘိဏီ၊ ဗိန္ဒု၊ အဗ္ဗုဒံ၊ နိရဗ္ဗုဒံ၊ အဟဟံ၊ အဗဗံ၊ အဋဋံ၊ သောဂဏ္ဍိကံ၊ ဥပ္ပလံ၊ ကုမုဒံ၊ ပုဏ္ဍရီကံ၊ ပဒုမံ၊ ကထာနံ၊ မဟာကထာနံ၊ အသင်္ချေယျန္တိ ယထာက္ကမံ သတလက္ခဂုဏံ ဝေဒိတဗ္ဗံ.

ဣစ္စေဝံ ဌာနတော ဌာနံ၊ သတလက္ခဂုဏံ မတံ၊

ကောဋိပ္ပဘုတီနံ ဝီသ-သင်္ချာနဉ္စ ယထာက္ကမန္တိ.

အထာ+သံချာ ဝုစ္စတေ၊ အဗျယန္တိ စ ဝုစ္စတေ. တံ ပါဒိ စာဒိ၊ ဥပသဂ္ဂနိပါတာတိ စ ဒုဝိဓံ.

ပ ပရာ အပ သံ အနု အဝ ဩ နိ ဒု ဝိ အဓိ အပိ အတိ သု ဥ အဘိ ပတိ ပရိ ဥပ အာ ဣမေ ဝီသတိ ပါဒယော. ပါဒယော ဟိ ဇောတကာ၊ န ဝါစကာ.

တတ္ထ ပ-သဒ္ဒေါ ပကာရာ+ဒိကမ္မ၊ ပဓာန+န္တောဘာဝ၊ ဝိယောဂ၊ တပ္ပရ၊ ဘုသတ္ထ၊ သမ္ဘဝ၊ တိတ္တိ၊ အနာဝိလ၊ ပတ္ထနာဒီသု. ယထာ ပကာရေ-ပညာ. အာဒိကမ္မေ-ဝိပ္ပကတံ၊ ပဓာနေ-ပဏီတံ၊ အန္တောဘာဝေ-ပက္ခိတ္တံ၊ ခိတ္တန္တိ ပေရဏံ၊ ပက္ခိတ္တန္တိ အန္တောကရဏံ၊ ဓာတွတ္ထဿ ဗာဓိတတ္တာ. ဝုတ္ထဉှိ –

ဓာတွတ္ထံ ဗာဓတေ ကောစိ၊ ကောစိ တံ အနုဝတ္တတေ၊

တမေဝ+ညော ဝိသေသေတိ၊ ဥပသဂ္ဂဂတီ တိဓာတိ.

ဧတ္ထ စ ‘‘အနုရုဒ္ဓကာ မေ သင်္ဂါမယုဒ္ဓေ’’တိ စ ဣမေ ဥပသဂ္ဂါ ဓာတွတ္ထံ ဝိသေသေန္တိ နာမ. ဝိယောဂေ-ပဝါသီ၊ တပ္ပရေ-ပါစရိယော၊ ဘုသတ္ထေ-ပဝုဒ္ဓကာယော၊ သမ္ဘဝေ-ဟိမဝန္တာ ဂင်္ဂါ ပဘဝတိ၊ တိတ္တိယံ-ပဟူတ+မန္နံ၊ အနာဝိလေ-ပသန္န+မုဒကံ၊ ပတ္ထနေ-ပဏိဟိတံ.

ပရာဣတိ ပရိဟာနိ၊ ပရာဇယ၊ ဂတိ၊ ဝိက္ကမာ+မသနာဒီသု. ယထာ ပရိဟာနိယံ-ပရာဘဝေါ. ပရာဇယေ-ပရာဇိတော၊ ဂတိယံ-ပရာယနံ၊ ဝိက္ကမေ-ပရက္ကမတိ၊ အာမသနေ-အင်္ဂဿ ပရာမသနံ.

အပဣတိ အပဂတ၊ ဂရဟ၊ ဝဇ္ဇန၊ ပူဇာ၊ ပဒုဿနာဒီသု. ယထာ အပဂတေ-အပမာနော အပေတော၊ ဂရဟေ-အပဂဗ္ဘော၊ ဝဇ္ဇနေ-အပသာလာယ အာယန္တိ ဝါဏိဇာ၊ ပူဇာယံ-ဝုဒ္ဓါပစာယီ၊ ပဒုဿနေ-အပရဇ္ဈန္တိ.

သံဣတိ သမောဓာန၊ သမ္မာသမ၊ သမန္တဘာဝ၊ သံဂတ၊ သံခေပ၊ ဘုသတ္ထ၊ သဟ+ပ္ပတ္ထ၊ ပဘဝါ+ဘိမုခဘာဝ၊ ဝိဓာန၊ ပုနပ္ပုန၊ ကရဏ၊ သမိဒ္ဓါဒီသု. ယထာ သမောဓာနေ-သန္ဓိ၊ သမ္မာသမေ-သမာဓိ၊ သမ္ပယုတ္တော၊ သမန္တဘာဝေ-သံကိဏ္ဏံ၊ သမုလ္လပနာ၊ သံဂတေ-သင်္ဂမော၊ သံခေပေ-သမာသော၊ ဘုသတ္ထေ-သာရတ္ထော၊ သဟတ္ထေ-သံဝါသော၊ အပ္ပတ္ထေ-သမဂ္ဃေါ၊ ပဘဝေ-သမ္ဘဝေါ၊ အဘိမုခဘာဝေ-သမ္မုခံ. သံဂတေ-သံဂဏှာတိ၊ ဝိဓာနေ-သံဝုတံ၊ ပုနပ္ပုနကရဏေ-သန္ဓာဝတိ၊ သမိဒ္ဓိယံ-သမ္ပန္နော.

အနုဣတိ အနုဂတာ+နုပစ္ဆိန္န၊ ပစ္ဆာတ္ထ၊ ဘုသတ္ထ၊ သာဒိဿ၊ ဟီန၊ တတိယတ္ထ၊ လက္ခဏိ+တ္ထမ္ဘူတက္ခာန၊ ဘာဂ၊ ဝိစ္ဆာဒီသု. အနုဂတေ-အနွေတိ၊ အနုပစ္ဆိန္နေ-အနုသယော၊ ပစ္ဆာတ္ထေ-အနုရထံ၊ ဘုသတ္ထေ-အနုရတ္တော၊ သာဒိဿေ-အနုရူပံ၊ ဟီနေ-အနုသာရိပုတ္တံ ပညဝန္တော၊ တတိယတ္ထေ-နဒိ+မနွဝသိတာ သေနာ၊ လက္ခဏေရုက္ခ+မနုဝိဇ္ဇောတတေ ဝိဇ္ဇု၊ ဣတ္ထမ္ဘူတချာနေ-သာဓု ဒေဝဒတ္တော မာတရ+မနု၊ ဘာဂေ-ယ+ဒေတ္ထ မံ အနု သိယာ၊ တံ ဒီယတု၊ ဝိစ္ဆာယံ-ရုက္ခံ ရုက္ခံ အနု ဝိဇ္ဇောတတေ စန္ဒော.

အဝဣတိ အဓောဘာဂ၊ ဝိယောဂ၊ ပရိဘဝ၊ ဇာနန၊ [သုဒ္ဓိ] နိစ္ဆယ၊ ဒေသ၊ ထေယျာဒီသု. အဓောဘာဂေ-အဝက္ခိတ္တစက္ခု၊ ဝိယောဂေ-အဝကောကိလံ ဝနံ၊ ပရိဘဝေ-အဝဇာနနံ၊ အဝမညတိ၊ ဇာနနေ-အဝဂစ္ဆတိ. [သုဒ္ဓိယံ–ဝေါဒါနံ (ရူပသိဒ္ဓိ)]၊ နိစ္ဆယေ-အဝဓာရဏံ၊ ဒေသေ-အဝကာသော၊ ထေယျေ-အဝဟာရော.

ဩဣတိ ဩရောဟရဏ၊ နီဟရဏ၊ သုဒ္ဓိအာဒီသု ဒိဿတိ. ဩရောဟဏေ-ပါသာဒါ ဩရောဟတိ၊ နီဟရဏေ-ဩမုက္ကုပါဟနော၊ သုဒ္ဓိယံ-ဩဒါတံ.

နိဣတိ၊ နိဿေသ၊ နိဂ္ဂတ၊ နီဟရဏ၊+န္တောပဝေသနာ+ဘာဝ၊ နိသေဓန၊ နိက္ခန္တ၊ ပါတုဘာဝါ+ဝဓာရဏ၊ ဝိဘဇန၊ ဥပမု+ပဓာရဏာ+ဝသာန၊ ဆေက၊ နီဟရဏာ+ဝရဏာဒီသု. နိဿေသေ-နိရုတ္တိ၊ နိဂ္ဂတေ-နိက္ကိလေသော၊ နိယျာတိ၊ နီဟရဏေ-နိဒ္ဓါရဏံ၊ အန္တောပဝေသနေ-နိခါတော၊ အဘာဝေ-နိမ္မက္ခိကံ၊ နိသေဓေ-နိဝါရေတိ၊ နိက္ခန္တေ-နိဗ္ဗာနံ၊ ပါတုဘာဝေ-နိမ္မိတံ၊ အဝဓာရဏေ-နိစ္ဆယော၊ ဝိဘဇနေ-နိဒ္ဒေသော. ဥပမာယံ-နိဒဿနံ၊ ဥပဓာရဏေ-နိသာမနံ၊ အဝသာနေ-နိဋ္ဌိတံ၊ ဆေကေ-နိပုဏော၊ နီဟရဏေ-နီဟရတိ၊ ဣဿ ဒီဃော. အာဝရဏေ-နီဝရဏံ.

ဒုဣတိ အသောဘဏာ+ဘာဝ၊ ကုစ္ဆိတာ+သမိဒ္ဓိ၊ ကိစ္ဆ၊ ဝိရူပတာဒီသု. အသောဘဏေ-ဒုဂ္ဂန္ဓော၊ အဘာဝေ-ဒုဗ္ဘိက္ခံ၊ ကုစ္ဆိတေ – ဒုက္ကဋံ. အသမိဒ္ဓိယံ-ဒုဿဿံ၊ ကိစ္ဆေ-ဒုက္ကရံ၊ ဝိရူပတာယံ-ဒုဗ္ဗဏ္ဏော ဒုမ္မုခေါ.

ဝိဣတိ ဝိသေသ၊ ဝိဝိဓ၊ ဝိရုဒ္ဓ၊ ဝိဂတ၊ ဝိယောဂ၊ ဝိရူပတာဒီသု. ဝိသေသေ-ဝိမုတ္တိ၊ ဝိသိဋ္ဌော၊ ဝိဝိဓေ-ဝိမတိ၊ ဝိရုဒ္ဓေ-ဝိဝါဒေါ၊ ဝိဂတေ-ဝိမလံ၊ ဝိယောဂေ-ဝိပ္ပယုတ္တော၊ ဝိရူပတာယံ-ဝိရူပေါ.

အဓိဣတိ အဓိကိ+ဿရူ+ပရိဘာဝါ+ဓိဘဝန+ဇ္ဈာယာ+ဓိဋ္ဌာန၊ နိစ္ဆယ၊ ပါပုဏနာဒီသု. အဓိကေ-အဓိသီလံ၊ ဣဿရေ-အဓိပတိ၊ အဓိ ဗြဟ္မဒတ္တေ ပဉ္စာလာ၊ ဥပရိဘာဝေ-အဓိရောဟတိ၊ ပထဝိံ အဓိသေဿတိ၊ အဓိဘဝနေ-အဓိဘဝတိ၊ အဇ္ဈာယနေ-ဗျာကရဏ+မဓီတေ၊ အဓိဋ္ဌာနေ-ဘူမိကမ္ပာဒိံ အဓိဋ္ဌာတိ၊ နိစ္ဆယေ-အဓိမောက္ခော၊ ပါပုဏနေ-ဘောဂက္ခန္ဓံ အဓိဂစ္ဆတိ.

အပိဣတိ သမ္ဘာဝနာ+ပေက္ခာ၊ သမုစ္စယ၊ ဂရဟ၊ ပဉှာဒီသု. သမ္ဘာဝနာယံ-အပိ ဒိဗ္ဗေသု ကာမေသု၊ မေရုမ္ပိ ဝိနိဝိဇ္ဈိတွာ ဂစ္ဆေယျ၊ အပေက္ခာယံ-အယမ္ပိ ဓမ္မော အနိယတော၊ သမုစ္စယေ-ဣတိပိ အရဟံ၊ အန္တမ္ပိ အန္တဂုဏမ္ပိ အာဒါယ၊ ဂရဟေ-အပိ အမှာကံ ပဏ္ဍိတက၊ ပဉှေ-အပိ ဘန္တေ ဘိက္ခံ လဘိတ္ထ.

အတိဣတိ အတိက္ကမနာ+တိက္ကန္တာ+တိသယ၊ ဘုသတ္ထာဒီသု. အတိက္ကမေ-အတိရောစတိ အမှေဟိ၊ အတီတော၊ အတိက္ကန္တေ-အစ္စန္တံ၊ အတိသယေ-အတိကုသလော၊ ဘုသတ္ထေ-အတိကောဓော၊ အတိဝုဒ္ဓိ.

သုဣတိ သောဘဏ၊ သုဋ္ဌု၊ သမ္မာ၊ သမိဒ္ဓိ၊ သုခတ္ထာဒီသု. သောဘဏေ-သုဂန္ဓော၊ သုဋ္ဌု+သမ္မာဒတ္ထေသု-သုဋ္ဌု ဂတော သုဂတော၊ သမ္မာ ဂတောတိပိ သုဂတော၊ သမိဒ္ဓိယံ-သုဘိက္ခံ၊ သုခတ္ထေ-သုကရော.

ဥဣတိ ဥဂ္ဂတု+ဒ္ဓကမ္မ၊ ပဓာန၊ ဝိယောဂ၊ သမ္ဘဝ၊ အတ္တလာဘ၊ သတ္တိ၊ သရူပကထနာဒီသု. ဥဂ္ဂတေ-ဥဂ္ဂစ္ဆတိ၊ ဥဒ္ဓကမ္မေ-အာသနာ ဥဋ္ဌိတော၊ ဥက္ခေပေါ၊ ပဓာနေ-ဥတ္တမော၊ လောကုတ္တရော၊ ဝိယောဂေ-ဥဗ္ဘာသိတော၊ သမ္ဘဝေ-ဥဗ္ဘုတော၊ အတ္တလာဘေ-ဥပ္ပန္နံ ဉာဏံ၊ သတ္တိယံ-ဥဿဟတိ ဂန္တုံ၊ သရူပကထနေ-ဥဒ္ဒိသတိ သုတ္တံ.

အဘိဣတိ အဘိမုခဘာဝ၊ ဝိသိဋ္ဌာ+ဓိကု+ဒ္ဓကမ္မ၊ ကုလ၊ သာရုပ္ပ၊ ဝန္ဒန၊ လက္ခဏိ+တ္ထမ္ဘူတက္ခာန၊ ဝိစ္ဆာဒီသု. အဘိမုခဘာဝေ-အဘိမုခေါ၊ အဘိက္ကမတိ၊ ဝိသိဋ္ဌေ-အဘိဓမ္မော၊ အဓိကေ-အဘိဝသတိ၊ ဥဒ္ဓကမ္မေ-အဘိရုဟတိ. ကုလေ-အဘိဇာတော၊ သာရုပ္ပေ-အဘိရူပေါ၊ ဝန္ဒနေ-အဘိဝါဒေတိ၊ လက္ခဏာဒီသု ပုရိမသမံ.

ပတိဣတိ ပဋိဂတ၊ ပဋိလောမ၊ ပဋိနိဓိ၊ ပဋိဒါန၊ နိသေဓ၊ နိဝတ္တန၊ သာဒိဿ၊ ပဋိကရဏာ+ဒါန၊ ပဋိဗောဓ၊ ပဋိစ္စ၊ လက္ခဏိတ္ထမ္ဘူတက္ခာန၊ ဘာဂ၊ ဝိစ္ဆာဒီသု. ပဋိဂတေ-ပစ္စက္ခံ၊ ပဋိလောမေ-ပဋိသောတံ၊ ပဋိနိဓိမှိ-အာစရိယတော ပတိ သိဿော၊ ပဋိဒါနေ-တေလတ္ထိကဿ ဃတံ ပဋိဒဒါတိ၊ နိသေဓေ-ပဋိသေဓေတိ၊ နိဝတ္တနေ-ပဋိက္ကမတိ၊ သာဒိဿေ-ပဋိရူပကံ၊ ပဋိကရဏေ-ပဋိကာရော၊ အာဒါနေ-ပဋိဂ္ဂဏှာတိ၊ ပဋိဗောဓေ-ပဋိဝေဓော၊ ပဋိစ္စေ-ပစ္စယော၊ လက္ခဏာဒီသု ပုရိမသမံ.

ပရိဣတိ သမန္တတောဘာဝ၊ ပရိစ္ဆေဒ၊ ဝဇ္ဇနာ+လိင်္ဂန၊ နိဝသန၊ ပူဇာ၊ ဘောဇနာ+ဝဇာနန၊ ဒေါသက္ခာန၊ လက္ခဏာဒီသု. သမန္ထ- တောဘာဝေ-ပရိဝုတော၊ ပရိစ္ဆေဒေ-ပရိညေယျံ၊ ဝဇ္ဇနေ-ပရိဟရတိ၊ အာလိင်္ဂနေ-ပရိဿဇတိ၊ နိဝသနေ-ယော ဝတ္ထံ ပရိဒဟေဿတိ၊ ပူဇာယံ-ပရိစရိယာ၊ ဘောဇနေ-ဘိက္ခုံ ပရိဝိသတိ၊ အဝဇာနနေ-ပရိဘဝတိ. ဒေါသက္ခာနေ-ပရိဘာသတိ၊ လက္ခဏာဒီသု-ရုက္ခံ ပရိ ဝိဇ္ဇောတတေ ဝိဇ္ဇု ဣစ္စာဒိ.

ဥပဣတိ ဥပဂမန၊ သမီပူ+ပပတ္တိ၊ သာဒိဿာ+ဓိကု+ပရိဘာဝါ+နသန၊ ဒေါသက္ခာန၊ သညာ၊ ပုဗ္ဗကမ္မ၊ ပူဇာ၊ ဂယှာကာရ၊ ဘုသတ္ထာဒီသု. ဥပဂမနေ-နိသိန္နံ ဝါ ဥပနိသီဒေယျ၊ သမီပေ-ဥပနဂရံ၊ ဥပပတ္တိယံ-သဂ္ဂံ လောကံ ဥပပဇ္ဇတိ၊ အထ ဝါ ဥပပတ္တိ=ယုတ္တိ၊ ယထာ ဥပပတ္တိတော ဣက္ခတီတိ ဥပေက္ခာ၊ သာဒိဿေ-ဥပမာနံ၊ ဥပမာ၊ အဓိကေ-ဥပခါရိယံ ဒေါဏော၊ ဥပရိဘာဝေ-ဥပသမ္ပန္နော၊ အနသနေ-ဥပဝါသော၊ ဒေါသက္ခာနေ-ပရံ ဥပဝဒတိ၊ သညာယံ-ဥပဓာ၊ ဥပသဂ္ဂေါ၊ ပုဗ္ဗကမ္မေ-ဥပက္ကမော၊ ဥပကာရော၊ ပူဇာယံ-ဗုဒ္ဓုပဋ္ဌာကော၊ မာတုပဋ္ဌာနံ၊ ဂယှာကာရေ-သောစေယျပစ္စုပဋ္ဌာနံ၊ ဘုသတ္ထေ-ဥပါဒါနံ၊ ဥပါယာသော၊ ဥပနိဿယောတိ.

အာဣတိ အဘိမုခဘာဝု+ဒ္ဓကမ္မ+မရိယာဒါ+ဘိဝိဓိ၊ ပတ္တိ+စ္ဆာ၊ ပရိဿဇန၊ အာဒိကမ္မ၊ ဂဟဏ၊ နိဝါသန၊ သမီပ၊ အာဝှါနာဒီသု. အဘိမုခဘာဝေ-အာဂစ္ဆန္တိ၊ ဥဒ္ဓကမ္မေ-အာရောဟတိ၊ မရိယာဒါယံ-အာပဗ္ဗတာ ခေတ္တံ၊ အဘိဝိဓိမှိ-အာကုမာရံ ယသော ကစ္စာယနဿ၊ ပတ္တိယံ-အာပတ္တိံ အာပန္နော၊ ဣစ္ဆာယံ-အာကင်္ခါ၊ ပရိဿဇနေ-အာလိင်္ဂနံ၊ အာဒိကမ္မေ-အာရမ္ဘော၊ ဂဟဏေ-အာဒီယတိ၊ အာလိင်္ဂတိ၊ (အာလိမ္ပတိ၊ ရူ)၊ နိဝါသေ-အာဝသထော၊ အာဝါသော၊ သမီပေ-အာသန္နံ၊ အာဝှါနေ-အာမန္တေတိ.

ပ ပရာ+ပ သ+မနွ+ဝ၊ ဩ နိ ဒု ရဘိ ဗျာ+ဓိသု၊

အတိ နိ ပ္ပတိ ပရိ အပယော၊ ဥပ အာ ဣတိ ဝီသတိ၊

ဧသ ဟိ ဘော ဥပသဂ္ဂ-ဝိဓိ+က္ကမတော ကထိတော.

ဧတ္ထ စ –

ဥပသဂ္ဂ+နိပါတာ စ၊ ပစ္စယာ စ ဣမေ တယော၊

နေကေ+နေကတ္ထဝါစကာ၊ ဣတိ နေရုတ္တိကာ+ဗြဝုံ.

၁၁၈. အသံချေဟိ သဗ္ဗာသံ

အဝိဇ္ဇမာနသံချေဟိ ပရာသံ သဗ္ဗာသံ ဝိဘတ္တီနံ လောပေါ ဟောတိ. န သန္တိ ဧကဝစနာဒိသံချာ ဧတေသန္တိ အသံချာ၊ တေသံ အသံချာနံ ဝိဘတ္တီနံ ဘေဒေ အသတိပိ သျာဒိဝိဓာနံ ‘‘မာ နော အဇ္ဇ ဝိကန္တိံသူ’’တိအာဒေါ ဝိဘတျန္တတ္တာ ပဒတ္တသိဒ္ဓီတိ ဝေါ+နောအာဒီနံ သိဒ္ဓိယာ စ တေသံ ပဌမာဒိအတ္ထေ ဒဿနတော စ ဟောတိ. ပဟာရော ပရာဘဝေါ အပဟာရော သံဟာရော အဝဟာရော ဩဟာရော ဣစ္စာဒိ ဟောတိ.

ဥပေစ္စ+တ္ထံ သဇန္တီတိ၊ ဥပသဂ္ဂါ ဟိ ပါဒယော၊

စာဒီ ပဒါဒိမဇ္ဈန္တေ၊ နိပါတာ နိပတန္တီတိ.

ဩပသဂ္ဂိကပဒံ.

သမုစ္စယ+ဝိကပ္ပန+ပဋိသေဓ+ပူရဏာဒိအတ္ထံ အသတ္တဝါစိကံ နေပါတိကံ.

စ-ဣတိ သမုစ္စယာ+နွာစယ+ဣတရေတရယောဂ+သမာဟာရာ+ဝဓာရဏာဒီသု. ဝါ-ဣတိ ဝိကပ္ပနု+ပမာန+သမုစ္စယ+ဝဝတ္ထိတဝိဘာသာဒီသု. န၊ နော၊ မာ၊ အ၊ အလံ၊ ဟလံ ဣစ္စေတေ ပဋိသေဓေ. ‘‘ဒွေ ပဋိသေဓာ ပကတိအတ္ထံ ဂမယန္တီ’’တိ ဉာယာ ‘‘န တေသံ ပန ရူပါနံ ပစ္စယာ န စ ဟောန္တီ’’တိ ဧတ္ထ န စ န ဟောန္တိ-ဟောန္တေဝါတိ ပကတိအတ္ထံ ဂမယတိ. အလံ ပရိယတ္တိ+ဘူသနေသု စ.

ပူရဏတ္ထံ ဒုဝိဓံ အတ္တပူရဏံ ပဒပူရဏဉ္စ၊ တတ္ထ အထ၊ ခလု၊ ဝတ၊ အထော၊ အဿု၊ ယဂ္ဃေ၊ ဟိ၊ စရဟိ၊ နံ၊ တံ၊ စ၊ တု၊ ဝါ၊ ဝေါ၊ ပန၊ ဟဝေ၊ ကီဝ၊ ဟ၊ တတော၊ ယထာ၊ သုဒံ၊ ခေါ၊ ဝေ၊ ဟံ၊ ဧနံ၊ (ဧဝံ၊ ရူ) သေယျထိဒံ ဣစ္စေဝမာဒိ ပဒပူရဏေ. တတ္ထ အထ-ဣတိ ပဉှာ+နန္တရိယာ+ဓိကာရာဒီသု စ. ခလု-ဣတိ ပဋိသေဓာ+ဝဓာရဏ၊ ပသိဒ္ဓီသု စ. ဝတ+ဣတိ ဧကံသ၊ ခေဒါ+နုကမ္ပ၊ သံကပ္ပေသု စ. အထော-ဣတိ အနွာဒေသေ စ. ဟိ-ဣတိ ဟေတု၊ အဝဓာရဏေသု စ. တု-ဣတိ ဝိသေသ၊ ဟေတု၊ နိဝတ္တနာဒီသု စ. ပန-ဣတိ ဝိသေသေပိ. ဟဝေ+ဝေ ဣစ္စေတေ ဧကံသတ္ထေပိ. ဟံ-ဝိသာဒ၊ ဝိမှေသုပိ. (ဝိသာဒ၊ သမ္ဘဝေသု၊ ရူ). သေယျထိဒံတိ တံ ကတမံတိ အတ္ထေပိ.

အတ္ထပူရဏံ ဒုဝိဓံ ဝိဘတ္တိယုတ္တံ အဝိဘတ္တိယုတ္တဉ္စ. အတ္ထိ၊ သက္ကာ၊ လဗ္ဘာ ဣစ္စေတေ ပဌမာယံ. အာဝုသော အမ္ဘော ဟမ္ဘော အရေ ဟရေ ရေ ဇေ ဣစ္စေတေ အာမန္တဏေ. ဒိဝါ ဘိယျော (နမော၊ ရူ) ဣစ္စေတေ ပဌမာဒုတိယာသု. သယံ သာမံ သံ သမ္မာ ကိန္တိ ဣစ္စေတေ တတိယတ္ထေ. သော+တော+ဓာပစ္စယန္တာ စ သုတ္တသော ပဒသော အနိစ္စတော ဒုက္ခတော ဧကဓာ ဒွိဓာ ဣစ္စာဒိ. တဝေ+တုံ ပစ္စယန္တာ စတုတ္ထိယာဝ၊ ကာတဝေ ဒါတဝေ၊ ကာတုံ ကာရေတုံ၊ (ဒါတုံ၊ ရူ) ဒါပေတုံ ဣစ္စာဒိ. သော+တောပစ္စယန္တာ ပဉ္စမိယတ္ထေ၊ ဒီဃသော ဩရသော ရာဇတော ဝါ စောရတော ဝါ ဣစ္စာဒိ. တော သတ္တ- မျတ္ထေပိ တြ+တ္ထာဒိပစ္စယန္တာ စ၊ ဧကတော ပုရတော ပစ္ဆတော ပဿတော ပိဋ္ဌိတော ပါဒတော သီသတော အဂ္ဂတော မူလတော၊ ယတြ ယတ္ထ ယဟိံ တတြ တတ္ထ တဟိံ ဣစ္စာဒိ. သမန္တာ သာမန္တာ ပရိတော အဘိတော သမန္တတော ဧကဇ္ဈံ ဧကမန္တံ ဟေဋ္ဌာ ဥပရိ ဥဒ္ဓံ အဓော တိရိယံ သမ္မုခါ ပရမုခါ အာဝိ ရဟော တိရော ဥစ္စံ နီစံ အန္တော အန္တရာ အန္တရံ အဇ္ဈတ္တံ ဗဟိဒ္ဓါ ဗာဟိရာ ဗာဟိရံ ဗဟိ ဩရံ ပါရံ အာရာ အာရကာ ပစ္ဆာ ပုရေ ဟုရံ ပေစ္စ ဣစ္စေတေ သတ္တမိယာ. သမ္ပတိ အာယတိ အဇ္ဇ အပရဇ္ဈ သုဝေ သွေ ဥတ္တရသုဝေ (ကိသု၊ ရူ) ဟိယျော ပရေ (ပရသုဝေ၊ ရူ) သဇ္ဇု သာယံ ပါတော ကာလံ ကလ္လံ ဒိဝါ ရတ္တံ နိစ္စံ သတတံ အဘိဏှံ အဘိက္ခဏံ မုဟုံ မုဟုတ္တံ ဘူတပုဗ္ဗံ ပုရာ ယဒါ တဒါ (ကဒါ၊ ရူ) ဣစ္စာဒယော ကာလသတ္တမိယံ. ဣတိ ဝိဘတ္တိယုတ္တာနိ.

အဝိဘတ္တိယုတ္တေသု အပ္ပေဝ အပ္ပေဝနာမ နု ဣစ္စေတေ သံသယတ္ထေ. အဒ္ဓါ အညဒတ္ထု တဂ္ဃ ဇာတု ကာမံ သသက္ကံ ဣစ္စေတေ ဧကံသတ္ထေ. ဧဝံ ဣတိ အဝဓာရဏေ. ကစ္စိ နု နနု ကထံ (ကိံသု၊ ရူ) ကိံ ဣစ္စေတေ ပုစ္ဆနတ္ထေ. ဧဝံ ဣတိ ဣတ္ထံ ဣစ္စေတေ နိဒဿနတ္ထေ. ဣတိ ဟေတု+ဝါကျပရိသမတ္တီသု စ. ယာဝ တာဝ ယာဝတာ တာဝတာ ကိတ္တာဝတာ ဧတ္တာဝတာ ကီဝ ဣစ္စေတေ ပရိစ္ဆေဒနတ္ထေ. ဧဝံ သာဟု လဟု ဩပါယိကံ ပဋိရူပံ အာမ သာဓု ဣစ္စေတေ သမ္ပဋိစ္ဆနတ္ထေ. တထာ ယထာ ယထေဝ တထေဝ ဧဝံ ဧဝမေဝ ဧဝမ္ပိ ယထာပိ သေယျထာပိ သေယျထာပိနာမ ဝိယ ဣဝ ယထရိဝ တထရိဝ ယထာနာမ တထာနာမ ယထာဟိ တထာဟိ ယထာစ တထာစ ဣစ္စေတေ ပဋိဘာဂတ္ထေ. ယထာဣတိ ယောဂ္ဂတာ+ဝိစ္ဆာ+ပဒတ္ထာနတိဝတ္တိ+နိဒဿနေသု စ. ဧဝံဣတိ ဥပဒေသ+ပဉှာဒီသု စ. ကိဉ္စာပိဣတိ အနုဂ္ဂဟတ္ထေ. ဓိဣတိ ဂရဟေ. အဟောဣတိ ဂရဟ+ပသံသန+ပတ္ထနေသု. နာမဣတိ ဂရဟ+ပသံသန+သညာ+ပဉှေသု. သာဓူတိ ပသံသန+ယာစနေသု. ဣင်္ဃ ဟန္ဒ ဣစ္စေတေ စောဒနတ္ထေ. သာဓု သုဋ္ဌု ဧဝမေတံတိ အနုမောဒနေ. ကိရဣတိ အနုဿဝန+အသဒ္ဓေယျေသု. နုနဣတိ အနုမာနာ+နုဿရဏ+ပရိဝိတက္ကေသု. ကသ္မာတိ ကာရဏပုစ္ဆနေ. ယသ္မာ တသ္မာ တထာ ဟိ တေန ဣစ္စေတေ ကာရဏစ္ဆေဒနတ္ထေ. သဟ သဒ္ဓိံ အမာ (သမံ၊ ရူ) ဣတိ သမကြိယာယံ. ဝိနာ ရိတေ ဝိပ္ပယောဂေ. နာနာ ပုထု ဗဟုပကာရေ. ပုထု ဝိသုံ အသင်္ဃာတေ စ. ဒုဋ္ဌု ကု ကုစ္ဆာယံ (ဇိဂုစ္ဆာယံ၊ ရူ). ပုန အပ္ပဌမေ. ကထံ စိကိစ္ဆတ္ထေ. ဓာ က္ခတ္တုံ သော ကိဉ္စဣတိ သံချာဝိဘာဂေ. ဤသကံ အပ္ပမာနေသု (အပ္ပမတ္တေ၊ ရူ). သဏိကံ မန္ဒတ္ထေ. ခိပ္ပံ အရံ လဟုံ အာသု တုဏှံ အစိရံ သီဃတ္ထေ. စိရံ စိရဿံ ဒီဃကာလေ. စေ ယဒိ သံကာ+ဝဋ္ဌာနေ. ဓုရံ ထိရာ+ဝဓာရဏေသု (ဓုဝံ ထိရာ+ဝဓာရဏေသု၊ ရူ). ဟာ ဝိသာဒေ. တုဏှီ အဘာသနေ. သစ္ဆိ ပစ္စက္ခေ. မုသာ မိစ္ဆာအလိကံ အသစ္စေ. သုဝတ္ထိ အာသိဋ္ဌေ ဣစ္စာဒိ.

တုန+က္တွာန+က္တွာပစ္စယန္တာ ဥဿုက္ကနတ္ထေ ဘဝန္တိ. ယထာ ပဿိတုန ပဿိယ ပဿိတွာန ပဿိတွာ၊ ဒိသွာ ဒိသွာန ဒဿေတွာ ဒါတုန ဒတွာန ဒတွာ ဥပါဒါယ ဒါပေတွာ ဝိညာယ ဝိစေယျ ဝိနေယျ သမေစ္စ နိဟစ္စ ဥပေစ္စ အာရဗ္ဘ အာဂမ္မ ဣစ္စာဒိ.

ဝိဘတ္တိယာ ကတော ဘေဒေါ၊ သလိင်္ဂါနံ ဘဝေ တထာ၊

တုမှာဒီနံ တွ+လိင်္ဂေသု၊ နေဝ+တ္ထိ ပါဒိ+စာဒိနံ.

ဧဝံ နာမာချာတောပသဂ္ဂေဟိ ဝိနိမုတ္တံ ဧတံ နိပါတပဒံ ဝေဒိတဗ္ဗံ.

နေပါတိကပဒံ.

ပုလ္လိင်္ဂံ ဣတ္ထိလိင်္ဂဉ္စ၊ နပုံသက+မထာ+ပရံ၊

တိလိင်္ဂဉ္စ အလိင်္ဂဉ္စ၊ နာမိကံ ပဉ္စဓာ ဌိတံ.

ဣတိ ပယောဂသိဒ္ဓိယံ နာမကဏ္ဍော ဒုတိယော.