၂၃၂. အပါဒါဒေါ ပဒတေ+ကဝါကျေတိ

အဓိကာရော. ဧတ္ထ ပါဒေါ နာမ ဂါထာယ စတုတ္ထံသော၊ တသ္မာ ‘‘တုမှေဟိ ပုညံ ပသုတံ အနပ္ပကံ’’တိ ဧတ္ထ ဝေါ န ဟောတိ. ဧတ္ထ ပဒန္တိ ဝုတ္တ သဒ္ဒေါ သဘာဝတော –

အာကာသဝါယုပ္ပဘဝေါ သရီရာ၊

သမုစ္စရံ ဝတ္တ+မုပေတိ နာဒေါ၊

ဌာနန္တရေ သုပ္ပဋိဟညမာနော၊

ဝဏ္ဏတ္တ+မာဂစ္ဆတိ သော တု သဒ္ဒေါတိ –

ဝုတ္တတ္တာ ဧကေကော ဝဏ္ဏော သဒ္ဒေါ နာမ၊ တဗ္ဗဏ္ဏသမူဟော ပဒံ၊ တပ္ပဒသမူဟော ဝါကျဉ္စ. တထာ ဟိ –

ဝိတတျန္တံ ပဒံ တဿ၊ စ ယော ဝါကျန္တိ မနွယံ၊

ဥပစာရာ ဝဏ္ဏသဒ္ဒ-ဝါစ္စံ တံ န ပရိစ္စဇေ.

တံ ပဒဉ္စ –

ပဒံ စတုဗ္ဗိဓံ ဝုတ္တံ၊ နာမာ+ချာတော+ပသဂ္ဂဇံ၊

နိပါတဇဉ္စ တညူ ဟိ၊ အဿော ခလွာ+ဘိဓာဝတီတိ.

တံ ဝါကျဉ္စ –

ဧကာချာတော ပဒစ္စယော၊ သိယာ ဝါကျံ သကာရကောတိ –

ဝုတ္တံ. တသ္မာ ‘‘ဝိဘတျန္တံ ပဒံ၊ ပဒသမူဟော ဝါကျ’’န္တိ စ ဝုစ္စတိ.