၁၀၅. ပဒါဒီဟိ

ပဒါဒီဟိ သ္မိနော သိ ဟောတိ ဝါ. ပဒသိ ပဒေ ပဒမှိ ပဒသ္မိံ၊ ပဒေသု. ဧဝံ ဗိလသဒ္ဒေါ.

ကမ္မသဒ္ဒတော နာဿ ‘‘နာဿေ+နော’’တိ ဧနော ဝါ၊ ကမ္မေန၊ ‘‘ပုမကမ္မထာမာ’’ဒိနာ ဥတ္တေ ကမ္မုနာ ကမ္မနာ. ဣမိနာဝ သသ္မာသု ဥတ္တံ၊ ဥဿ လသညာယံ သ+သ္မာနံ ယထာယောဂံ နော+နာ နိစ္စံ၊ ဝဝတ္ထိတဝိဘာသတ္တာ ဝါဓိကာရဿ. ကမ္မုနော ကမ္မဿ. ကမ္မုနာ ကမ္မာ ကမ္မမှာ ကမ္မသ္မာ. ‘‘ကမ္မာဒိတော’’တိ သ္မိနော ဝါ နိမှိ ကမ္မနိ ကမ္မေ ကမ္မမှိ ကမ္မသ္မိံ၊ သေသံ နပုံသကသမံ. စမ္မ+ဝေသ္မ+ဘသ္မာဒယော ကမ္မသမာ ဥတ္တတော+ညတြ.

ဂစ္ဆန္တ၊ သိ. ‘‘န္တဿံ’’တိ ဝါ အံမှိ သိလောပေါ ဂစ္ဆံ. အညတြ သိဿ ဒံ၊ ဂစ္ဆန္တံ၊ ဂစ္ဆန္တာ ဂစ္ဆန္တာနိ. ဘော ဂစ္ဆ ဂစ္ဆာ ဂစ္ဆံ၊ ဂစ္ဆန္တာ ဂစ္ဆန္တာနိ. ဂစ္ဆံ ဂစ္ဆန္တံ၊ ဂစ္ဆန္တေ ဂစ္ဆန္တာနိ. ဂစ္ဆတာ ဂစ္ဆန္တေနေ+စ္စာဒိ ပုလ္လိင်္ဂသမံ. ဧဝံ ယဇန္တ+ဝဇန္တာဒယော.

အကာရန္တံ.

အဋ္ဌိ၊ သိလောပေါ.