၁၁၃. ဈလာ ဝါ

ဈလတော ယောနံ နိ ဟောတိ ဝါ နပုံသကေ. အဋ္ဌီနိ. ‘‘လောပေါ’’တိ ယောလောပေ ဒီဃော၊ အဋ္ဌီ. ဘော အဋ္ဌိ အဋ္ဌီ၊ အဋ္ဌီနိ အဋ္ဌီ. အဋ္ဌိံ၊ အဋ္ဌီနိ အဋ္ဌီ. အဋ္ဌိနာ ဣစ္စာဒိ မုနိသဒ္ဒသမံ. ဧဝံ ပစ္ဆိ+အက္ခိ+ဒဓိ+သတ္ထိ+ဝါရိ+အစ္စိအာဒယော.

ဣကာရန္တံ.

ဒဏ္ဍိ၊ နပုံသကတ္တာ ‘‘ဧကဝစနေ’’စ္စာဒိနာ ရဿေ သိလောပေါ. ဒဏ္ဍီနိ ဒဏ္ဍီ. ‘‘ဂေ ဝါ’’တိ ရဿေ ဘော ဒဏ္ဍိ ဒဏ္ဍီ၊ ဒဏ္ဍီနိ ဒဏ္ဍီ. ‘‘နံ ဈီတော’’တိ နံ. ဒဏ္ဍိနံ ဒဏ္ဍိံ၊ ဒဏ္ဍီနိ ဒဏ္ဍီ. သေသံ ပုလ္လိင်္ဂေ ဒဏ္ဍီသမံ. ဧဝံ သုခကာရီ+သီဃယာယီအာဒယော.

ဤကာရန္တံ.

စက္ခု၊ စက္ခူနိ စက္ခူ. သေသံ အဋ္ဌိသမံ. ဧဝံ အာယု+ဝသု+ဓနု+ဒါရု+တိပု+မဓု+သိင်္ဂု+ဟိင်္ဂု+ဝတ္ထု+ဇတု+အမ္ဗု+ အဿုအာဒီနိ. အာယုသဒ္ဒတော နာဿ ကောဓာဒိတ္တာ သာဝ ဝိသေသော.

ဥကာရန္တံ.

ဂေါတြဘု၊ ရဿေ သိလောပေါ. ဂေါတြဘူနိ ဂေါတြဘူ. ဘော ဂေါတြဘု ဂေါတြဘူ၊ ဂေါတြဘူနိ ဂေါတြဘူ. ဂေါတြဘုံ၊ ဂေါတြဘူနိ ဂေါတြဘူ ဣစ္စာဒိ ပုလ္လိင်္ဂေ ဝေဿဘူသမံ. ဧဝံ သယမ္ဘူ+အဘိဘူ+ဓမ္မညူ အာဒယော.

ဦကာရန္တံ.

ဝိသဒါ+ဝိသဒါကာရ-ဝေါဟာရော+ဘယမုတ္တကော၊

ပုမာဒိဇာနနေ ဟေတု-ဘာဝတော လိင်္ဂ+မီရိတော.

ထန+ကေသာဝတီ နာရီ၊ မဿုဝါ ပုရိသော သိယာ၊

ဥဘိန္န+မန္တရံ ဧတံ၊ ဣတရော+ဘယမုတ္တကော.

ဧသေ+သာ ဧတ+မီတိ စ၊

ပသိဒ္ဓိအတ္ထေသု ယေသု လောကဿ၊

ထီ+ပုမ+နပုံသကာနီ+တိ၊

ဝုစ္စန္တေ တာနိ နာမာနိ.

နပုံသကလိင်္ဂံ.

အထ သဗ္ဗာဒီနံ ရူပနယော နိဒ္ဒိသိယတေ၊

သဗ္ဗ ကတရ ကတမ ဥဘယ ဣတရ အည အညတရ အညတမ၊ ပုဗ္ဗ+ပရာ+ပရ+ဒက္ခိဏု+တ္တရာ+ဓရာနိ ဝဝတ္ထာယ+မသညာယံ. ‘‘ဦနပူရတ္ထ+မဓိကပဒေါဒါဟရဏ+မဇ္ဈာဟာရော’’တိ ဉာယာ သဗ္ဗာဒီသု ပဌီယန္တေတိ ယောဇေတဗ္ဗံ. ယ တျ တ ဧတ ဣမ အမု ကိံ ဧက တုမှ အမှ ဣစ္စေတေ သဗ္ဗာဒယော. ကစ္စာယနေ အဒဿိတဿာပိ တျသဒ္ဒဿ –

ခိဍ္ဍာ ပဏိဟိတာ တျာသု၊ ရတိ တျာသု ပတိဋ္ဌိတာ၊

ဗီဇာနိ တျာသု ရုဟန္တိ၊ ယဒိဒံ သတ္တာ ပဇာယရေတိ –

ပါဠိယံ ဒိဿမာနတ္တာ ဣဓ သင်္ဂဟော.

တတ္ထ သဗ္ဗသဒ္ဒေါ နိရဝသေသတ္ထော. ကတရ+ကတမသဒ္ဒါ ပုစ္ဆနတ္ထာ. ဥဘယသဒ္ဒေါ ဒွိအဝယဝသမုဒါယဝစနော. ဣတရသဒ္ဒေါ ဝုတ္တပဋိယောဂီဝစနော. အညသဒ္ဒေါ အဓိကတာပရဝစနော. အည- တရ+အညတမသဒ္ဒါ အနိယမတ္ထာ. ပုဗ္ဗာဒယော ဒိသာဒိဝဝတ္ထာဝစနာ. ယသဒ္ဒေါ အနိယမတ္ထော. တျ+တသဒ္ဒါ ပရမ္မုခဝစနာ. ဧတ+ဣမ+အမု+ကိံ ဣစ္စေတေ သမီပ+အစ္စန္တသမီပ+ဒူရ+ပုစ္ဆနတ္ထဝစနာ. ဧကသဒ္ဒေါ သံချာဒိဝစနော. တုမှ+အမှသဒ္ဒါ ပရ+အတ္တ နိဒ္ဒေသဝစနာ.

သဗ္ဗော၊ သိဿ ဩ၊