၉၁. ယွာဒေါ န္တုဿ

ယောအာဒီသု န္တုဿ အ ဟောတိ. ဂုဏဝန္တဣတိ အကာရန္တာ ဋာ+ဋေအာဒေသာ ဟောန္တိ၊ ဂုဏဝန္တာ. ‘‘ဋဋာအံ ဂေ’’တိ ဋာဒယော၊ ဘော ဂုဏဝ ဂုဏဝါ ဂုဏဝံ၊ ဂုဏဝန္တော ဂုဏဝန္တာ. ‘‘န္တဿ စ ဋ ဝံ+သေ’’တိ အံသေသု န္တဿ ဋော ဝါ၊ ဂုဏဝံ ဂုဏဝန္တံ၊ ဂုဏဝန္တေ. ‘‘တော+တာ+တိ+တာ သ+သ္မာ+သ္မိံ+နာသူ’’တိ တာအာဒယော ဟောန္တိ၊ ဂုဏဝတာ ဂုဏဝန္တေန၊ ဂုဏဝန္တေဟိ ဂုဏဝန္တေဘိ. ‘‘လက္ခဏိကပဋိပဒေါတ္တေသု ပဋိပဒေါတ္တဿေဝ ဂဟဏံ၊ န လက္ခဏိကဿာ’’တိ ဉာယာ ‘‘န လက္ခဏိကဿာ’’တိ ဝုတ္တဗျတ္တိပက္ခ+မနပေက္ခိတွာ ‘‘အတော’’တိ ရဿာကာရဇာတိယာ ပေက္ခိတတ္တာ ဂုဏဝန္တေနာတိ ‘‘အတေနာ’’ တျ+နေန သိဇ္ဈတိ. ဇာတိ=သာမညံ၊ ဗျတ္တိ=ဝိသေသော. ဂုဏဝတော ဂုဏဝဿ ဂုဏဝန္တဿ၊ ‘‘တံ နံမှိ’’တိ နံမှီ တံ ဝါ၊ ဂုဏဝတံ ဂုဏဝန္တာနံ. ဂုဏဝတာ ဂုဏဝန္တာ ဂုဏဝန္တမှာ ဂုဏဝန္တသ္မာ. ဂုဏဝတိ ဂုဏဝန္တေ ဂုဏဝန္တမှိ ဂုဏဝန္တသ္မိံ၊ ဂုဏဝန္တေသု. ‘‘န္တဿ စ ဋ ဝါ’’တိ ယောဂဝိဘာဂါ ယောသု စ န္တုဿ ဝါ ဋာဒေသေ ကတေ ယောဿ ဋာ၊ ‘‘စက္ခုမာ အန္ဓိတာ ဟောန္တိ’’၊ ‘‘ဝဂ္ဂုမုဒါတီရိယာ ဘိက္ခု ဝဏ္ဏဝါ’’ ဣစ္စာဒီ ဟောန္တိ.

ဧဝံ ဂဏဝါ ကုလဝါ ဖလဝါ ယသဝါ ဓနဝါ သုတဝါ ဘဂဝါ ဟိမဝါ ဗလဝါ သီလဝါ ပညဝါ ဣစ္စာဒီ.