၁၅၃. ဟိမဝတော ဝါ ဩ

ဟိမဝတော သိမှိ န္တုဿ ဩ ဝါ ဟောတိ၊ ဟိမဝန္တော ဟိမဝါ. သေသံ ပုရိမသမံ.

အာယသ္မန္တုသဒ္ဒေါ ကမ္မဝါစာယ ကွစိ ဗဟုလာဓိကာရာ ဒွိဝစနေန အာယသ္မန္တာ၊ တိဏ္ဏံ ဝစနေန အာယသ္မန္တောတိ ဒိဿတိ.

ဧဝံ သတိမာ ဓိတိမာ ဂတိမာ မုတိမာ မတိမာ ဇုတိမာ သိရိမာ ဟိရိမာ ထုတိမာ ရတိမာ ယတိမာ သုစိမာ ကလိမာ ဗလိမာ ကသိမာ ရုစိမာ ဗုဒ္ဓိမာ စက္ခုမာ ဗန္ဓုမာ ဟေတုမာ သေတုမာ ကေတုမာ ရာဟုမာ ဘာဏုမာ ခါဏုမာ ဝိဇ္ဇုမာ ဣစ္စာဒယော.

ဥကာရန္တံ.

ဝေဿဘူ သိလောပေါ. တေ စ ရဿာဘာဝေါဝ ဝိသေသော. ‘‘ဧကဝစနယောသွ+ဃောနံ’’တိ ရဿေ ‘‘လာ ယောနံ ဝေါ ပုမေ’’တိ ဝေါ၊ ဝေဿဘုဝေါ၊ ‘‘ဝေဝေါသု လုဿာ’’တိ ဝုတ္တတ္တာ န ဋာဒေသော၊ ‘‘လောပေါတိ ယောလောပေ ဝေဿဘူ. ‘‘ဂေ ဝါ’’တိ ဝါ ရဿေ ဘော ဝေဿဘု ဝေဿဘူ၊ ဝေဿဘုဝေါ ဝေဿဘူ. ဝေဿဘုံ၊ ဝေဿဘုဝေါ ဝေဿဘူ. ဝေဿဘုနာ ဣစ္စာဒိ ဘိက္ခုသမံ. ဧဝံ သယမ္ဘူ ပရာဘိဘူ အဘိဘူအာဒယော. ဂေါတြဘူ+သဟဘူသဒ္ဒေဟိ ပန ယောနံ ‘‘ဇန္တွာဒိတော နော ဝါ’’တိ နော၊ ဝေါ ဝါ၊ ဂေါတြဘုနော ဂေါတြဘုဝေါ ဂေါတြဘူ. သဟဘုနော သဟဘုဝေါ သဟဘူ၊ သေသံ ဝေဿဘူသမံ.