၂. နာမကဏ္ဍ

အထ နာမိကဝိဘတျာဝတာရော ဝုစ္စတေ.

အတ္ထာဘိမုခံ နမနတော၊ အတ္တနိ စတ္ထဿ နာမနတော နာမံ၊ ဒဗ္ဗာဘိဓာနံ.

တံ ပန ဒုဝိဓံ အနွတ္ထရုဠှီဝသေန၊ တိဝိဓံ ပုမိတ္ထိနပုံသကလိင်္ဂဝသေန. ယထာ – ရုက္ခော၊ မာလာ၊ ဓနံ.

စတုဗ္ဗိဓံ သာမညဂုဏကြိယာယဒိစ္ဆာဝသေန၊ ယထာ – ရုက္ခော၊ နီလော၊ ပါစကော၊ သိရိဝဍ္ဎောတိအာဒိ.

အဋ္ဌဝိဓံ အဝဏ္ဏိဝဏ္ဏုဝဏ္ဏောကာရနိဂ္ဂဟီတန္တပကတိဘေဒေန.

ပုလ္လိင်္ဂ

တတ္ထ ပဌမံ အကာရန္တမှာ ပုလ္လိင်္ဂါ ဇာတိနိမိတ္တာ ပုရိသသဒ္ဒါ သျာဒိဝိဘတ္တိယော ပရာ ယောဇီယန္တေ.

၆၀. ဇိနဝစနယုတ္တဉှိ.

အဓိကာရောယံ. တတ္ထ ပဉ္စ မာရေ ဇိတဝါတိ ဇိနော၊ ဗုဒ္ဓေါ. ဇိနဿ ဝစနံ ဇိနဝစနံ၊ တဿ ဇိနဝစနဿ ယုတ္တံ ဇိနဝစနယုတ္တံ၊ တေပိဋကဿ ဗုဒ္ဓဝစနဿ မာဂဓိကာယ သဘာဝနိရုတ္တိယာ ယုတ္တံ အနုရူပမေဝါတိ ဣဒံ အဓိကာရတ္ထံ ဝေဒိတဗ္ဗံ.

သာ မာဂဓီ မူလဘာသာ၊ နရာ ယာယာဒိကပ္ပိကာ၊

ဗြဟ္မာနော စ’ဿုတာလာပါ၊ သမ္ဗုဒ္ဓါ စာပိ ဘာသရေ.

အဓိကာရော ပန တိဝိဓော သီဟဂတိကမဏ္ဍူကဂတိကယထာနုပုဗ္ဗိကဝသေန၊ အယံ ပန သီဟဂတိကော ပုဗ္ဗာပရဝိလောကနတော၊ ယထာနုပုဗ္ဗိကောယေဝ ဝါ.

သက္ကတဝိသဒိသံ ကတွာ ဇိနဝစနာနုရူပဝသေန ပကတိဋ္ဌပနတ္ထံ ပရိဘာသမာဟ.

၆၁. လိင်္ဂဉ္စ နိပစ္စတေ.

လိင်္ဂံပါဋိပဒိကံ၊ ယထာ ယထာ ဇိနဝစနယုတ္တဉှိ လိင်္ဂံ၊ တထာ တထာ ဣဓ လိင်္ဂံ နိပစ္စတေ ဌပီယတိ. စသဒ္ဒေန ဓာတဝေါ စာတိ ဇိနဝစနာနုရူပတော ‘‘ပုရိသ’’ဣတိ လိင်္ဂေ ဌပိတေ တတော တဿ ဓာတုပ္ပစ္စယဝိဘတ္တိဝဇ္ဇိတဿ အတ္ထဝတော သဒ္ဒဿ ‘‘ပရသမညာ ပယောဂေ’’တိ ပရိဘာသတော လိင်္ဂသညာယံ –

ဣတော ပရံ ဝိဘတ္တိပ္ပစ္စယာဒိဝိဓာနေ သဗ္ဗတ္ထ လိင်္ဂဂ္ဂဟဏမနုဝတ္တတေ.

၆၂. တတော စ ဝိဘတ္တိယော.

တတော ဇိနဝစနယုတ္တေဟိ လိင်္ဂေဟိ ပရာ ဝိဘတ္တိယော ဟောန္တိ. စသဒ္ဒဂ္ဂဟဏေန တဝေတုနာဒိပစ္စယန္တနိပါတတောပိ. ကမ္မာဒိဝသေန၊ ဧကတ္တာဒိဝသေန စ လိင်္ဂတ္ထံ ဝိဘဇန္တီတိ ဝိဘတ္တိယော.

ကာ စ ပန တာ ဝိဘတ္တိယော? ‘‘ဝိဘတ္တိယော’’တိ အဓိကာရော.

၆၃. သိယော၊ အံယော၊ နာဟိ၊ သနံ၊ သ္မာဟိ၊ သနံ၊ သ္မိံသု.

သျာဒယော ဒွိသတ္တ ဝိဘတ္တိယော နာမ ဟောန္တိ. တတ္ထ သိ၊ ယော ဣတိ ပဌမာ၊ အံ၊ ယော ဣတိ ဒုတိယာ၊ နာ၊ ဟိ ဣတိ တတိယာ၊ သ၊ နံ ဣတိ စတုတ္ထီ၊ သ္မာ၊ ဟိ ဣတိ ပဉ္စမီ၊ သ၊ နံ ဣတိ ဆဋ္ဌီ၊ သ္မိံ၊ သု ဣတိ သတ္တမီ.

ဣဒံ ပန သညာဓိကာရပရိဘာသာဝိဓိသုတ္တေသု သညာသုတ္တန္တိ ဒဋ္ဌဗ္ဗံ၊ ဝုတ္တဉှိ ဝုတ္တိယံ ‘‘ဝိဘတ္တိဣစ္စနေန ကွတ္ထော၊ အမှဿ မမံ သဝိဘတ္တိဿ သေ’’တိ၊ ဣတရထာ ပုရိမသုတ္တေန ဧကယောဂေါ ကတ္တဗ္ဗောတိ. ဧတ္ထ စ ပဌမာဒိဝေါဟာရော၊ ဧကဝစနာဒိဝေါဟာရော စ အနွတ္ထဝသေန၊ ပရသမညာဝသေန ဝါ သိဒ္ဓေါတိ ဝေဒိတဗ္ဗော.

ဧကဿ ဝစနံ ဧကဝစနံ၊ ဗဟူနံ ဝစနံ ဗဟုဝစနံ၊ ဒွိန္နံ ပူရဏီ ဒုတိယာတိအာဒိ၊ ဣတရထာ ပုရိမသုတ္တေ စသဒ္ဒေန သညာကရဏေ အပ္ပကတနိရတ္ထကဝိဓိပ္ပသင်္ဂေါ သိယာ.

‘‘ဇိနဝစနယုတ္တဉှိ၊ လိင်္ဂဉ္စ နိပစ္စတေ’’တိ စ ဝတ္တတေ. ဣဓ ပန ပဒနိပ္ဖါဒနမ္ပိ ဇိနဝစနဿာဝိရောဓေနာတိ ဉာပေတုံ ပရိဘာသန္တရမာဟ.

၆၄. တဒနုပရောဓေန.

ယထာ ယထာ တေသံ ဇိနဝစနာနံ ဥပရောဓော န ဟောတိ၊ တထာ တထာ ဣဓ လိင်္ဂံ၊ စသဒ္ဒေနာချာတဉ္စ နိပစ္စတေ၊ နိပ္ဖါဒီယတီတိ အတ္ထော. တေနေဝ ဣဓ စ အာချာတေ စ ဒွိဝစနာဂ္ဂဟဏံ၊ သက္ကတဝိသဒိသတော ဝိဘတ္တိပ္ပစ္စယာဒိဝိဓာနဉ္စ ကတန္တိ ဒဋ္ဌဗ္ဗံ.

တတ္ထ အဝိသေသေန သဗ္ဗသျာဒိဝိဘတ္တိပ္ပသင်္ဂေ ‘‘ဝတ္တိစ္ဆာနုပုဗ္ဗိကာ သဒ္ဒပ္ပဝတ္တီ’’တိ ဝတ္တိစ္ဆာဝသာ –

၆၅. လိင်္ဂတ္ထေ ပဌမာ.

လိင်္ဂတ္ထာဘိဓာနမတ္တေ ပဌမာဝိဘတ္တိ ဟောတီတိ ပဌမာ. တတ္ထာပိ အနိယမေနေကဝစနဗဟုဝစနပ္ပသင်္ဂေ ‘‘ဧကမှီ ဝတ္တဗ္ဗေ ဧကဝစန’’န္တိ ပရိဘာသတော လိင်္ဂတ္ထဿေကတ္တဝစနိစ္ဆာယံ ပဌမေကဝစနံ သိ.

‘‘အတော နေနာ’’တိ ဣတော ‘‘အတော’’တိ ဝတ္တတေ၊ လိင်္ဂဂ္ဂဟဏဉ္စ.

၆၆. သော.

သိ၊ ဩဣတိ ဒွိပဒမိဒံ. လိင်္ဂဿ အကာရတော ပရဿ သိဝစနဿ ဩကာရော ဟောတိ.

သုတ္တေသု ဟိ ပဌမာနိဒ္ဒိဋ္ဌဿ ကာရိယိနော ဆဋ္ဌီဝိပရိဏာမေန ဝိဝရဏံ အာဒေသာပေက္ခန္တိ ဒဋ္ဌဗ္ဗံ.

ဧတ္ထ စ သီတိ ဝိဘတ္တိ ဂယှတေ ဝိဘတ္တိကာရိယဝိဓိပ္ပကရဏတော၊ ‘‘တတော စ ဝိဘတ္တိယော’’တိ ဣတော ဝိဘတ္တိဂ္ဂဟဏာနုဝတ္တနတော ဝါ၊ ဧဝံ သဗ္ဗတ္ထ သျာဒီနံ ကာရိယဝိဓာနေ ဝိဘတ္တိယေဝါတိ ဒဋ္ဌဗ္ဗံ.

‘‘ဝါ ပရော အသရူပါ’’တိ ပရလောပေ သမ္ပတ္တေ တဒပဝါဒေန ပုဗ္ဗလောပမာဟ.

၆၇. သရလောပေါ’မာဒေသပ္ပစ္စယာဒိမှိ သရလောပေ တု ပကတိ.

ပုဗ္ဗဿရဿ လောပေါ ဟောတိ အံဝစနေ၊ အာဒေသပ္ပစ္စယာဒိဘူတေ စ သရေ ပရေ၊ သရလောပေ ကတေ တု ပရသရဿ ပကတိဘာဝေါ ဟောတိ. ဧတ္ထ စ ‘‘သရလောပေ’’တိ ပုနဂ္ဂဟဏံ ဣမိနာဝ ကတသရလောပနိမိတ္တေယေဝ ပရဿ ဝိကာရေ သမ္ပတ္တေ ပကတိဘာဝတ္ထံ. ပရသရဿ ပကတိဘာဝဝိဓာနသာမတ္ထိယတော အမာဒေသပ္ပစ္စယာဒိဘူတေ သရေ ပရေတိပိ သိဒ္ဓံ.

တျာဒိဝိဘတ္တိယော စေတ္ထ၊ ပစ္စယတ္တေန ဂယှရေ၊

အာဒိဂ္ဂဟဏမာချာတ-ကိတကေသွာဂမတ္ထိဒံ.

ပစ္စယသာဟစရိယာ၊ စာဒေသော ပကတီပရော၊

ပဒန္တဿရလောပေါ န၊ တေန’ဗ္ဘာဟာဒိကေ ပရေ.

တုဂ္ဂဟဏံ ဘိက္ခုနီအာဒီသု သရလောပနိဝတ္တနတ္ထံ၊ ‘‘နယေ ပရံ ယုတ္တေ’’တိ ပရံ နေတဗ္ဗံ. ပုရိသော တိဋ္ဌတိ.

ပုရိသော စ ပုရိသော စာတိ ပုရိသ ပုရိသဣတိ ဝတ္တဗ္ဗေ –

၆၈. သရူပါနမေကသေသွသကိံ.

သရူပါနံ သမာနရူပါနံ ပဒဗျဉ္ဇနာနံ မဇ္ဈေ ဧကောဝ သိဿတေ၊ အညေ လောပမာပဇ္ဇန္တေ အသကိန္တိ ဧကသေသော. ဧတ္ထ စ ‘‘သရူပါန’’န္တိ ဝုတ္တတ္တာဝ သိဒ္ဓေ အသကိမ္ပယောဂေ ပုနာသကိံဂဟဏံ ဧကဝိဘတ္တိဝိသယာနမေဝါသကိမ္ပယောဂေ ဧဝါယန္တိ ဒဿနတ္ထံ၊ န စ ဝိစ္ဆာပယောဂေ’တိပ္ပသင်္ဂေါ. ‘‘ဝဂ္ဂါ ပဉ္စပဉ္စသော မန္တာ’’တိ ဧတ္ထ ‘‘ပဉ္စပဉ္စသော’’တိ နိဒ္ဒေသေနေဝ ဝိစ္ဆာပယောဂသိဒ္ဓိယာ ဉာပိတတ္တာ၊ အထ ဝါ သဟဝစနိစ္ဆာယ’မယ’မေကသေသော.

ယောဂဝိဘာဂတော စေတ္ထ၊ ဧကသေသွသကိံ ဣတိ၊

ဝိရူပေကသေသော ဟောတိ၊ ဝါ ‘‘ပိတူန’’န္တိအာဒိသု.

တတ္ထေဝ လိင်္ဂတ္ထဿ ဗဟုတ္တဝစနိစ္ဆာယံ ‘‘ဗဟုမှိ ဝတ္တဗ္ဗေ ဗဟုဝစန’’န္တိ ပဌမာဗဟုဝစနံ ယော၊ ပုရိသ ယော ဣတီဓ ‘‘အတော၊ ဝါ’’တိ စ ဝတ္တတေ.

၆၉. သဗ္ဗယောနီနမာဧ.

အကာရန္တတော လိင်္ဂမှာ ပရေသံ သဗ္ဗေသံ ပဌမာယောနီနံ၊ ဒုတိယာယောနီနဉ္စ ယယာက္ကမံ အာကာရေကာရာဒေသာ ဟောန္တိ ဝါတိ အာကာရော၊ သဗ္ဗဂ္ဂဟဏံ သဗ္ဗာဒေသတ္ထံ၊ သရလောပါဒိ ပုရိမသဒိသမေဝ၊ ပုရိသာ တိဋ္ဌန္တိ.

ဝါ ဣစ္စေဝ ရူပါ ရူပါနိ၊ အဂ္ဂယော၊ မုနယော.

ဝါသဒ္ဒေါယံ ဝဝတ္ထိတပိဘာသတ္ထော၊ တေန စေတ္ထ –

နိစ္စမေဝ စ ပုလ္လိင်္ဂေ၊ အနိစ္စဉ္စ နပုံသကေ၊

အသန္တံ ဈေ ကတတ္တေ တု၊ ဝိဓိံ ဒီပေတိ ဝါသုတိ.

တတ္ထေဝါလပနဝစနိစ္ဆာယံ ‘‘လိင်္ဂတ္ထေ ပဌမာ’’တိ ဝတ္တတေ.

၇၀. အာလပနေ စ.

အဘိမုခံ ကတွာ လပနံ အာလပနံ၊ သမ္ဗောဓနံ. တသ္မိံ အာလပနတ္ထာဓိကေ လိင်္ဂတ္ထာဘိဓာနမတ္တေ စ ပဌမာဝိဘတ္တိ ဟောတိ. ပုရေ ဝိယ ဧကဝစနာဒိ.

ပုရိသ သိ ဣစ္စတြ –

၇၁. အာလပနေ သိ ဂသညော.

အာလပနတ္ထေ ဝိဟိတော သိ ဂသညော ဟောတီတိ ဂသညာယံ ‘‘ဘော ဂေ တူ’’တိ ဣတော ‘‘ဂေ’’တိ ဝတ္တတေ.

၇၂. အကာရပိတာဒျန္တာနမာ.

လိင်္ဂဿ သမ္ဗန္ဓီ အကာရော စ ပိတုသတ္ထုဣစ္စေဝမာဒီနမန္တော စ အာကာရတ္တမာပဇ္ဇတေ ဂေ ပရေ.

‘‘ဂေ၊ ရဿ’’မိတိ စ ဝတ္တတေ.

၇၃. အာကာရော ဝါ.

လိင်္ဂဿ သမ္ဗန္ဓီ အာကာရော ရဿမာပဇ္ဇတေ ဂေ ပရေ ဝိကပ္ပေန၊ အဒူရဋ္ဌဿာလပနေဝါယံ.

၇၄. သေသတော လောပံ ဂသိပိ.

‘‘သိံ၊ သော၊ သျာ စ၊ သခတော ဂဿေ ဝါ၊ ဃတေ စာ’’တိ ဧဝမာဒီဟိ နိဒ္ဒိဋ္ဌေဟိ အညော သေသော နာမ၊ တတော သေသတော လိင်္ဂမှာ ဂသိဣစ္စေတေ လောပမာပဇ္ဇန္တေ. အပိဂ္ဂဟဏံ ဒုတိယတ္ထသမ္ပိဏ္ဍနတ္ထံ၊ ဧတ္ထ စ သတိပိ သိဂ္ဂဟဏေ ဝဣတိ ဝစနမေဝ ဉာပကမညတ္ထာပိ သိဂ္ဂဟဏေ အာလပနာဂ္ဂဟဏဿ. ကေစိ အာလပနာဘိဗျတ္တိယာ ဘဝန္တသဒ္ဒံ ဝါ ဟေသဒ္ဒံ ဝါ ပယုဇ္ဇန္တေ. ဘော ပုရိသ တိဋ္ဌ၊ ဟေ ပုရိသာ ဝါ.

ဗဟုဝစနေ န ဝိသေသော၊ ဘဝန္တော ပုရိသာ တိဋ္ဌထ.

တတ္ထေဝ ကမ္မတ္ထဝစနိစ္ဆာယံ ‘‘ဝ၊’’တိ ဝတ္တတေ.

၇၅. ယံ ကရောတိ တံ ကမ္မံ.

ယံ ဝါ ကရောတိ၊ ယံ ဝါ ဝိကရောတိ၊ ယံ ဝါ ပါပုဏာတိ၊ တံ ကာရကံ ကြိယာနိမိတ္တံ ကမ္မသညံ ဟောတိ.

၇၆. ကမ္မတ္ထေ ဒုတိယာ.

ကမ္မတ္ထေ ဒုတိယာဝိဘတ္တိ ဟောတိ. ပုရေ ဝိယ ဒုတိယေကဝစနံ အံ၊ ‘‘သရလောပေါ’’တိအာဒိနာ သရေ လုတ္တေ ‘‘ဒီဃ’’န္တိ ဒီဃေ သမ္ပတ္တေ ပကတိဘာဝေါ စ၊ ပုရိသံ ပဿ.

ဗဟုဝစနေ ‘‘သဗ္ဗယောနီနမာဧ’’တိ ယောဝစနဿေကာရော၊ ပုရိသေ ပဿ.

တတ္ထေဝ ကတ္တုဝစနိစ္ဆာယံ –

၇၇. ယော ကရောတိ သ ကတ္တာ.

ယော အတ္တပ္ပဓာနော ကြိယံ ကရောတိ၊ သော ကတ္တုသညော ဟောတိ.

‘‘တတိယာ’’တိ ဝတ္တတေ.

၇၈. ကတ္တရိ စ.

ကတ္တရိ စ ကာရကေ တတိယာဝိဘတ္တိ ဟောတီတိ တတိယေကဝစနံ နာ.

၇၉. အတော နေန.

ဧနာတိ အဝိဘတ္တိကနိဒ္ဒေသော. အကာရန္တတော လိင်္ဂမှာ ပရဿ နာဝစနဿ ဧနာဒေသော ဟောတိ၊ သရလောပါဒိ၊ ပုရိသေန ကတံ.

ဗဟုဝစနမှိ –

၈၀. သုဟိသွကာရော ဧ.

သု၊ ဟိဣစ္စေတေသု ဝိဘတ္တိရူပေသု ပရေသု လိင်္ဂဿ သမ္ဗန္ဓီ အကာရော ဧတ္တမာပဇ္ဇတေ.

၈၁. သ္မာဟိသ္မိံနံ မှာဘိမှိ ဝါ.

သဗ္ဗတော လိင်္ဂမှာ သ္မာ ဟိ သ္မိံဣစ္စေတေသံ ယထာက္ကမံ မှာ၊ ဘိ၊ မှိဣစ္စေတေ အာဒေသာ ဟောန္တိ ဝါ၊ ပုရိသေဟိ၊ ပုရိသေဘိ ကတံ.

တတ္ထေဝ ကရဏဝစနိစ္ဆာယံ –

၈၂. ယေန ဝါ ကယိရတေ တံ ကရဏံ.

ယေန ဝါ ကယိရတေ၊ ယေန ဝါ ပဿတိ၊ ယေန ဝါ သုဏာတိ၊ တံ ကာရကံ ကရဏသညံ ဟောတိ.

၈၃. ကရဏေ တတိယာ.

ကရဏကာရကေ တတိယာဝိဘတ္တိ ဟောတိ၊ သေသံ ကတ္တုသမံ၊ အာဝိဋ္ဌေန ပုရိသေန သော ပုညံ ကရောတိ၊ ပုရိသေဟိ၊ ပုရိသေဘိ.

တတ္ထေဝ သမ္ပဒါနဝစနိစ္ဆာယံ –

၈၄. ယဿ ဒါတုကာမော ရောစတေ ဓာရယတေ ဝါ တံ သမ္ပဒါနံ.

ယဿ ဝါ ဒါတုကာမော၊ ယဿ ဝါ ရောစတေ၊ ယဿ ဝါ ဓာရယတေ၊ တံ ကာရကံ သမ္ပဒါနသညံ ဟောတိ.

၈၅. သမ္ပဒါနေ စတုတ္ထီ.

သမ္ပဒါနကာရကေ စတုတ္ထီဝိဘတ္တိ ဟောတီတိ စတုတ္ထိယာ ဧကဝစနံ သ.

၈၆. သာဂမော သေ.

သဗ္ဗတော လိင်္ဂမှာ သကာရာဂမော ဟောတိ သေ ဝိဘတ္တိမှိ ပရေ. ပုရိသဿ ဓနံ ဒဒါတိ.

ဗဟုဝစနမှိ ‘‘ဒီဃ’’န္တိ ဝတ္တတေ.

၈၇. သုနံဟိသု စ.

သု နံ ဟိဣစ္စေတေသု ပရေသု လိင်္ဂဿ အန္တဘူတာ သဗ္ဗေ ရဿသရာ ဒီဃမာပဇ္ဇန္တေ၊ စဂ္ဂဟဏမိကာရုကာရာနံ ကွစိ နိဝတ္တနတ္ထံ. ပုရိသာနံ.

တတ္ထေဝါပါဒါနဝစနိစ္ဆာယံ –

၈၈. ယသ္မာ ဒပေတိ ဘယမာဒတ္တေ ဝါ တဒပါဒါနံ.

ယသ္မာ ဝါ အဝဓိဘူတာ အပေတိ၊ ယသ္မာ ဝါ ဘယံ၊ ယသ္မာ ဝါ အာဒတ္တေ၊ တံ ကာရကံ အပါဒါနသညံ ဟောတိ.

၈၉. အပါဒါနေ ပဉ္စမီ.

အပါဒါနကာရကေ ပဉ္စမီဝိဘတ္တိ ဟောတီတိ ပဉ္စမိယာ ဧကဝစနံ သ္မာ.

‘‘အတော၊ သဗ္ဗေသံ၊ အာ ဧ’’တိ စ ဝတ္တတေ.

၉၀. သ္မာသ္မိံန ဝါ.

အကာရန္တတော လိင်္ဂမှာ သဗ္ဗေသံ သ္မာ သ္မိံဣစ္စေတေသံ ယထာက္ကမံ အာကာရေကာရာဒေသာ ဟောန္တိ ဝါ၊ အညတ္ထ မှာဒေသော. ပုရိသာ အပေတိ၊ ပုရိသမှာ၊ ပုရိသသ္မာ.

ဗဟုဝစနေ သဗ္ဗတ္ထ တတိယာသမံ၊ ဟိဿ ဘိအာဒေသော ဟောတိ. ပုရိသေဟိ၊ ပုရိသေဘိ အပေတိ.

တတ္ထေဝ သာမိဝစနိစ္ဆာယံ –

၉၁. ယဿ ဝါ ပရိဂ္ဂဟော တံ သာမိ.

ယဿ ဝါ ပရိဂ္ဂဟော၊ တံ သာမိသညံ ဟောတိ.

၉၂. သာမိသ္မိံ ဆဋ္ဌီ.

သာမိသ္မိံ ဆဋ္ဌီဝိဘတ္တိ ဟောတိ. ဌပေတွာ အာယာဒေသံ သဗ္ဗတ္ထ စတုတ္ထီဆဋ္ဌီနံ သမာနံ ရူပံ. ပုရိသဿ ဧတံ ဓနံ၊ ပုရိသာနံ.

တတ္ထေဝ ဩကာသဝစနိစ္ဆာယံ –

၉၃. ယောဓာရော တမောကာသံ.

ယော ကတ္တုကမ္မာနံ ကြိယာယ အာဓာရော၊ တံ ကာရကံ ဩကာသသညံ ဟောတိ.

၉၄. ဩကာသေ သတ္တမီ.

ဩကာသကာရကေ သတ္တမီဝိဘတ္တိ ဟောတီတိ သတ္တမိယာ ဧကဝစနံ သ္မိံ၊ တဿ ‘‘သ္မာသ္မိံနံ ဝါ’’တိ ဧကာရော၊ မှိအာဒေသော စ၊ ပုရိသေ ပတိဋ္ဌိတံ၊ ပုရိသမှိ၊ ပုရိသသ္မိံ.

ဗဟုဝစနေ ‘‘သုဟိသွကာရော ဧ’’တိ ဧကာရော၊ ပုရိသေသု.

ပုရိသော၊ ပုရိသာ၊ ဘော ပုရိသ ဘော ပုရိသာ ဝါ၊ ဘဝန္တော ပုရိသာ၊ ပုရိသံ၊ ပုရိသေ၊ ပုရိသေန၊ ပုရိသေဟိ ပုရိသေဘိ၊ ပုရိသဿ၊ ပုရိသာနံ၊ ပုရိသာ ပုရိသသ္မာ ပုရိသမှာ၊ ပုရိသေဟိ ပုရိသေဘိ၊ ပုရိသဿ၊ ပုရိသာနံ၊ ပုရိသေ ပုရိသသ္မိံ ပုရိသမှိ၊ ပုရိသေသု.

တထာ သုဂတော၊ သုဂတာ၊ ဘော သုဂတ ဘော သုဂတာ ဝါ၊ ဘဝန္တော သုဂတာ၊ သုဂတံ၊ သုဂတေ၊ သုဂတေန၊ သုဂတေဟိ သုဂတေဘိ၊ သုဂတဿ၊ သုဂတာနံ၊ သုဂတာ သုဂတသ္မာ သုဂတမှာ၊ သုဂတေဟိ သုဂတေဘိ၊ သုဂတဿ၊ သုဂတာနံ၊ သုဂတေ သုဂတသ္မိံ သုဂတမှိ၊ သုဂတေသု.

ဧဝံ သုရာ’သုရ နရော’ရဂ နာဂ ယက္ခာ၊

ဂန္ဓဗ္ဗ ကိန္နရ မနုဿ ပိသာစ ပေတာ၊

မာတင်္ဂ ဇင်္ဂမ တုရင်္ဂ ဝရာဟ သီဟာ၊

ဗျဂ္ဃ’စ္ဆ ကစ္ဆပ တရစ္ဆ မိဂ’ဿ သောဏာ.

အာလောက လောက နိလယာ’နိလ စာဂ ယောဂါ၊ ဝါယာမ ဂါမ

နိဂမာ’ဂမ ဓမ္မ ကာမာ၊

သံဃော’ဃ ဃောသ ပဋိဃာ’သဝ ကောဓ လောဘာ၊

သာရမ္ဘ ထမ္ဘ မဒ မာန ပမာဒ မက္ခာ.

ပုန္နာဂ ပူဂ ပနသာ’သန စမ္ပက’မ္ဗာ၊

ဟိန္တာလ တာလ ဗကုလ’ဇ္ဇုန ကိံသုကာ စ၊

မန္ဒာရ ကုန္ဒ ပုစိမန္ဒ ကရဉ္ဇ ရုက္ခာ၊

ဉေယျာ မယူရ သကုနဏ္ဍဇ ကောဉ္စ ဟံသာ –

ဣစ္စာဒယောပိ.

မနောဂဏာဒိဿ တု နာသသ္မာသ္မိံသု ဝိသေသော. အညတ္ထ ပုရိသသမံ.

မနော၊ မနာ၊ ဟေ မန ဟေ မနာ ဝါ၊ ဘဝန္တော မနာ၊ မနံ၊ မနေ.

‘‘ဝါ’’တိ ဝတ္တတေ.

၉၅. မနောဂဏာဒိတော သ္မိံနာနမိအာ.

မနောပဘုတိ ဂဏော မနောဂဏော၊ မနောဂဏာဒိတော သ္မိံ၊ နာဣစ္စေတေသံ ယထာက္ကမံ ဣကာရာကာရာဒေသာ ဟောန္တိ ဝါ. အာဒိဂ္ဂဟဏေန ဗိလပဒါဒိတောပိ.

‘‘မနောဂဏာဒိတော’’တိ ဝတ္တတေ.

၉၆. သ သရေ ဝါဂမော.

ဧတေဟေဝ မနောဂဏာဒီဟိ သရေ ပရေ သာဂမော ဟောတိ ဝါ. မနသာ၊ မနေန.

ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ‘‘မနော မနာ မနံ မနေ မနအာယတန’’န္တိအာဒီသု န ဟောတိ. ‘‘မာနသိကံ၊ စေတသိက’’န္တိအာဒီသု နိစ္စံ. မနေဟိ၊ မနေဘိ.

‘‘မနောဂဏာဒိတော၊ ဝါ’’တိ စ ဝတ္တတေ.

၉၇. သဿ စော.

မနောဂဏာဒိတော ပရဿ သဿ ဝိဘတ္တိဿ ဩကာရော ဟောတိ ဝါ. သာဂမော.