နမော တဿ ဘဂဝတော အရဟတော သမ္မာသမ္ဗုဒ္ဓဿ

ပဒရူပသိဒ္ဓိ

ဂန္ထာရမ္ဘ

[က]

ဝိသုဒ္ဓသဒ္ဓမ္မသဟဿဒီဓိတိံ၊

သုဗုဒ္ဓသမ္ဗောဓိယုဂန္ဓရောဒိတံ၊

တိဗုဒ္ဓခေတ္တေကဒိဝါကရံ ဇိနံ၊

သဓမ္မသံဃံ သိရသာ’ဘိဝန္ဒိယ.

[ခ]

ကစ္စာယနဉ္စာစရိယံ နမိတွာ၊

နိဿာယ ကစ္စာယနဝဏ္ဏနာဒိံ၊

ဗာလပ္ပဗောဓတ္ထမုဇုံ ကရိဿံ၊

ဗျတ္တံ သုကဏ္ဍံ ပဒရူပသိဒ္ဓိံ.

၁. သန္ဓိကဏ္ဍ

တတ္ထ ဇိနသာသနာဓိဂမဿ အက္ခရကောသလ္လမူလကတ္တာ တံ သမ္ပာဒေတဗ္ဗန္တိ ဒဿေတုံ အဘိဓေယျပ္ပယောဇနဝါကျမိဒမုစ္စတေ.

၁. အတ္ထော အက္ခရသညာတော.

ယော ကောစိ လောကိယလောကုတ္တရာဒိဘေဒေါ ဝစနတ္ထော၊ သော သဗ္ဗော အက္ခရေဟေဝ သညာယတေ. သိထိလဓနိတာဒိအက္ခရဝိပတ္တိယဉှိ အတ္ထဿ ဒုန္နယတာ ဟောတိ၊ တသ္မာ အက္ခရကောသလ္လံ ဗဟူပကာရံ ဗုဒ္ဓဝစနေသု၊ ဧတ္ထ ပဒါနိပိ အက္ခရသန္နိပါတရူပတ္တာ အက္ခရေသွေဝ သင်္ဂယှန္တိ.

တသ္မာ အက္ခရကောသလ္လံ၊ သမ္ပာဒေယျ ဟိတတ္ထိကော၊

ဥပဋ္ဌဟံ ဂရုံ သမ္မာ၊ ဥဋ္ဌာနာဒီဟိ ပဉ္စဟိ.

သညာဝိဓာန

တတ္ထာဒေါ တာဝ သဒ္ဒလက္ခဏေ ဝေါဟာရဝိညာပနတ္ထံ သညာဝိဓာနမာရဘီယတေ.

၂. အက္ခရာပါဒယော ဧကစတ္တာလီသံ.

အက္ခရာ အပိ အာဒယော ဧကစတ္တာလီသံ၊ တေ စ ခေါ ဇိနဝစနာနုရူပါ အကာရာဒယော နိဂ္ဂဟီတန္တာ ဧကစတ္တာလီသမတ္တာ ဝဏ္ဏာ ပစ္စေကံ အက္ခရာ နာမ ဟောန္တိ. တံ ယထာ – အာ ဣ ဤ ဥ ဦ ဧ ဩ၊ က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လဝ သ ဟ ဠ အံ-ဣတိ အက္ခရာ.

နက္ခရန္တီတိ အက္ခရာ၊ အ အာဒိ ယေသံ တေ အာဒယော. အကာရာဒီနမနုက္ကမော ပနေသ ဌာနာဒိက္ကမသန္နိဿိတော၊ တထာ ဟိ ဌာနကရဏပ္ပယတနေဟိ ဝဏ္ဏာ ဇာယန္တေ၊ တတ္ထ ဆ ဌာနာနိ ကဏ္ဌတာလုမုဒ္ဓဒန္တဩဋ္ဌနာသိကာဝသေန.

တတ္ထ – အဝဏ္ဏ ကဝဂ္ဂ ဟကာရာ ကဏ္ဌဇာ.

ဣဝဏ္ဏ စဝဂ္ဂ ယကာရာ တာလုဇာ. ဋဝဂ္ဂ ရကာရ ဠကာရာ မုဒ္ဓဇာ. တဝဂ္ဂ လကာရ သကာရာ ဒန္တဇာ. ဥဝဏ္ဏ ပဝဂ္ဂါ ဩဋ္ဌဇာ. ဧကာရော ကဏ္ဌတာလုဇော. ဩကာရော ကဏ္ဌောဋ္ဌဇော.

ဝကာရော ဒန္တောဋ္ဌဇော.

နိဂ္ဂဟီတံ နာသိကဋ္ဌာနဇံ.

င ဉ ဏ န မာ သကဋ္ဌာနဇာ၊ နာသိကဋ္ဌာနဇာ စာတိ.

ဟကာရံ ပဉ္စမေဟေဝ၊ အန္တဋ္ဌာဟိ စ သံယုတံ၊

ဩရသန္တိ ဝဒန္တေတ္ထ၊ ကဏ္ဌဇံ တဒသံယုတံ.

ကရဏံ ဇိဝှါမဇ္ဈံ တာလုဇာနံ၊ ဇိဝှေါပဂ္ဂံ မုဒ္ဓဇာနံ၊ ဇိဝှါဂ္ဂံ ဒန္တဇာနံ၊ သေသာ သကဋ္ဌာနကရဏာ.

ပယတနံ သံဝုတာဒိကရဏဝိသေသော. သံဝုတတ္တမကာရဿ၊ ဝိဝဋတ္တံ သေသသရာနံ သကာရဟကာရာနဉ္စ၊ ဖုဋ္ဌံ ဝဂ္ဂါနံ၊ ဤသံဖုဋ္ဌံ ယရလဝါနန္တိ.

ဧဝံ ဌာနကရဏပ္ပယတနသုတိကာလဘိန္နေသု အက္ခရေသု သရာ နိဿယာ၊ ဣတရေ နိဿိတာ. တတ္ထ –

နိဿယာဒေါ သရာ ဝုတ္တာ၊ ဗျဉ္ဇနာ နိဿိတာ တတော၊

ဝဂ္ဂေကဇာ ဗဟုတ္တာဒေါ၊ တတော ဌာနလဟုက္ကမာ.

ဝုတ္တဉ္စ –

‘‘ပဉ္စန္နံ ပန ဌာနာနံ၊ ပဋိပါဋိဝသာပိ စ၊

နိဿယာဒိပ္ပဘေဒေဟိ၊ ဝုတ္တော တေသမနုက္ကမော’’တိ.

ဧကေနာဓိကာ စတ္တာလီသံ ဧကစတ္တာလီသံ၊ ဧတေန ဂဏနပရိစ္ဆေဒေန –

အဓိကက္ခရဝန္တာနိ၊ ဧကတာလီသတော ဣတော၊

န ဗုဒ္ဓဝစနာနီတိ၊ ဒီပေတာစရိယာသဘော.

အပိဂ္ဂဟဏံ ဟေဋ္ဌာ ဝုတ္တာနံ အပေက္ခာကရဏတ္ထံ.

၃. တတ္ထောဒန္တာ သရာ အဋ္ဌ.

တတ္ထ တေသု အက္ခရေသု အကာရာဒီသု ဩကာရန္တာ အဋ္ဌ အက္ခရာ သရာ နာမ ဟောန္တိ. တံ ယထာ – အ အာ ဣ ဤ ဥ ဦ ဧ ဩ-ဣတိ သရာ.

ဩ အန္တော ယေသံ တေ ဩဒန္တာ၊ ဒကာရော သန္ဓိဇော၊ သရန္တိ ဂစ္ဆန္တီတိ သရာ၊ ဗျဉ္ဇနေ သာရေန္တီတိပိ သရာ.

‘‘တတ္ထာ’’တိ ဝတ္တတေ.

၄. လဟုမတ္တာ တယော ရဿာ.

တတ္ထ အဋ္ဌသု သရေသု လဟုမတ္တာ တယော သရာ ရဿာ နာမ ဟောန္တိ. တံ ယထာ – အ ဣ ဥ-ဣတိ ရဿာ.

လဟုကာ မတ္တာ ပမာဏံ ယေသံ တေ လဟုမတ္တာ၊ မတ္တာသဒ္ဒေါ စေတ္ထ အစ္ဆရာသင်္ဃာတအက္ခိနိမီလနသင်္ခါတံ ကာလံ ဝဒတိ၊ တာယ မတ္တာယ ဧကမတ္တာ ရဿာ၊ ဒွိမတ္တာ ဒီဃာ၊ အဍ္ဎမတ္တာ ဗျဉ္ဇနာ. လဟုဂ္ဂဟဏဉ္စေတ္ထ ဆန္ဒသိ ဒိယဍ္ဎမတ္တဿာပိ ဂဟဏတ္ထံ. ရဿကာလယောဂတော ရဿာ၊ ရဿကာလဝန္တော ဝါ ရဿာ.

သရရဿဂ္ဂဟဏာနိ စ ဝတ္တန္တေ.

၅. အညေ ဒီဃာ.

တတ္ထ အဋ္ဌသု သရေသု ရဿေဟိ အညေ ဒွိမတ္တာ ပဉ္စ သရာ ဒီဃာ နာမ ဟောန္တိ. တံ ယထာ – အာ ဤ ဦ ဧ ဩ-ဣတိ ဒီဃာ.

အညဂ္ဂဟဏံ ဒိယဍ္ဎမတ္တိကာနမ္ပိ သင်္ဂဟဏတ္ထံ. ဒီဃကာလေ နိယုတ္တာ၊ တဗ္ဗန္တော ဝါ ဒီဃာ. ကွစိ သံယောဂပုဗ္ဗာ ဧကာရောကာရာ ရဿာ ဣဝ ဝုစ္စန္တေ. ယထာ – ဧတ္ထ၊ သေယျော၊ ဩဋ္ဌော၊ သောတ္ထိ. ကွစီတိ ကိံ? မံ စေ တွံ နိခဏံ ဝနေ. ပုတ္တော တျာဟံ မဟာရာဇ.

၆. ဒုမှိ ဂရု.

ဒွိန္နံ သမူဟော ဒု၊ တသ္မိံ ဒုမှိ. သံယောဂဘူတေ အက္ခရေ ပရေ ယော ပုဗ္ဗော ရဿက္ခရော၊ သော ဂရုသညော ဟောတိ. ယထာ – ဒတွာ၊ ဟိတွာ၊ ဘုတွာ.

‘‘ဂရူ’’တိ ဝတ္တတေ.

၇. ဒီဃော စ.

ဒီဃော စ သရော ဂရုသညော ဟောတိ. ယထာ – နာဝါ၊ နဒီ၊ ဝဓူ၊ ဒွေ၊ တယော. ဂရုကတော အညော ‘‘လဟုကော’’တိ ဝေဒိတဗ္ဗော.

၈. သေသာ ဗျဉ္ဇနာ.

ဌပေတွာ အဋ္ဌ သရေ သေသာ အဍ္ဎမတ္တာ အက္ခရာ ကကာရာဒယော နိဂ္ဂဟီတန္တာ တေတ္တိံသ ဗျဉ္ဇနာ နာမ ဟောန္တိ. ဝုတ္တေဟိ အညေ သေသာ. ဗျဉ္ဇီယတိ ဧတေဟိ အတ္ထောတိ ဗျဉ္ဇနာ. တံ ယထာ – က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လဝ သ ဟ ဠ အံ-ဣတိ ဗျဉ္ဇနာ. ကကာရာဒီသွကာရော ဥစ္စာရဏတ္ထော.

‘‘ဗျဉ္ဇနာ’’တိ ဝတ္တတေ.

၉. ဝဂ္ဂါ ပဉ္စပဉ္စသော မန္တာ.

တေသံ ခေါ ဗျဉ္ဇနာနံ ကကာရာဒယော မကာရန္တာ ပဉ္စဝီသတိ ဗျဉ္ဇနာ ပဉ္စပဉ္စဝိဘာဂေန ဝဂ္ဂါ နာမ ဟောန္တိ. တံ ယထာ – က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ-ဣတိ ဝဂ္ဂါ.

တေ ပန ပဌမက္ခရဝသေန ကဝဂ္ဂစဝဂ္ဂါဒိဝေါဟာရံ ဂတာ၊ ဝဂ္ဂေါတိ သမူဟော၊ တတ္ထ ပဉ္စပဉ္စဝိဘာဂေနာတိ ဝါ ပဉ္စ ပဉ္စ ဧတေသမတ္ထီတိ ဝါ ပဉ္စပဉ္စသော၊ မော အန္တော ယေသံ တေ မန္တာ.

၁၀. အံဣတိ နိဂ္ဂဟီတံ.

အကာရော ဥစ္စာရဏတ္ထော၊ ဣတိသဒ္ဒေါ ပနာနန္တရဝုတ္တနိဒဿနတ္ထော၊ အံဣတိ ယံ အကာရတော ပရံ ဝုတ္တံ ဗိန္ဒု၊ တံ နိဂ္ဂဟီတံ နာမ ဟောတိ. ရဿဿရံ နိဿာယ ဂယှတိ၊ ကရဏံ နိဂ္ဂဟေတွာ ဂယှတီတိ ဝါ နိဂ္ဂဟီတံ.

ကရဏံ နိဂ္ဂဟေတွာန၊ မုခေနာဝိဝဋေန ယံ၊

ဝုစ္စတေ နိဂ္ဂဟီတန္တိ၊ ဝုတ္တံ ဗိန္ဒု သရာနုဂံ.

ဣဓ အဝုတ္တာနံ ပရသမညာနမ္ပိ ပယောဇနေ သတိ ဂဟဏတ္ထံ ပရိဘာသမာဟ.

၁၁. ပရသမညာ ပယောဂေ.

ယာ စ ပန ပရသ္မိံ သက္ကတဂန္ထေ၊ ပရေသံ ဝါ ဝေယျာကရဏာနံ သမညာ ဃောသာဃောသလောပသဝဏ္ဏသံယောဂလိင်္ဂါဒိကာ၊ တာ ပယောဂေ သတိ ဧတ္ထာပိ ယုဇ္ဇန္တေ.

ပရသ္မိံ၊ ပရေသံ ဝါ သမညာ ပရသမညာ၊ ဝေယျာကရဏေ၊ ဝေယျာကရဏမဓီတာနံ ဝါ သမညာတျတ္ထော. ပယုဇ္ဇနံ ပယောဂေါ၊ ဝိနိယောဂေါ.

တတ္ထ ဝဂ္ဂါနံ ပဌမဒုတိယာ၊ သကာရော စ အဃောသာ. ဝဂ္ဂါနံ တတိယစတုတ္ထပဉ္စမာ၊ ယ ရ လဝ ဟ ဠာ စာတိ ဧကဝီသတိ ဃောသာ နာမ.

ဧတ္ထ စ ဝဂ္ဂါနံ ဒုတိယစတုတ္ထာ ဓနိတာတိပိ ဝုစ္စန္တိ၊ ဣတရေ သိထိလာတိ. ဝိနာသော လောပေါ. ရဿဿရာ သကဒီဃေဟိ အညမညံ သဝဏ္ဏာ နာမ၊ ယေ သရူပါတိပိ ဝုစ္စန္တိ. သရာနန္တရိတာနိ ဗျဉ္ဇနာနိ သံယောဂေါ. ဓာတုပ္ပစ္စယဝိဘတ္တိဝဇ္ဇိတမတ္ထဝံ လိင်္ဂံ. ဝိဘတျန္တံ ပဒံ. ဣစ္စေဝမာဒိ.

ဣတိ သညာဝိဓာနံ.

သရသန္ဓိဝိဓာန

အထ သရသန္ဓိ ဝုစ္စတေ.

လောက အဂ္ဂပုဂ္ဂလော၊ ပညာ ဣန္ဒြိယံ၊ တီဏိ ဣမာနိ၊ နော ဟိ ဧတံ၊ ဘိက္ခုနီ ဩဝါဒေါ၊ မာတု ဥပဋ္ဌာနံ၊ သမေတု အာယသ္မာ၊ အဘိဘူ အာယတနံ၊ ဓနာ မေ အတ္ထိ၊ သဗ္ဗေ ဧဝ၊ တယော အဿု ဓမ္မာ၊ အသန္တော ဧတ္ထ န ဒိဿန္တိ ဣတီဓ သရာဒိသညာယံ သဗ္ဗသန္ဓိကရဏဋ္ဌာနေ ဗျဉ္ဇနဝိယောဇနတ္ထံ ပရိဘာသမာဟ.

၁၂. ပုဗ္ဗမဓောဌိတမဿရံ သရေန ဝိယောဇယေ.

သရေနာတိ နိဿက္ကေ ကရဏဝစနံ၊ သဟယောဂေ ဝါ၊ သန္ဓိတဗ္ဗေ သရသဟိတံ ပုဗ္ဗဗျဉ္ဇနံ အနတိက္ကမန္တော အဓောဌိတမဿရဉ္စ ကတွာ သရတော ဝိယောဇယေတိ သရတော ဗျဉ္ဇနံ ဝိယောဇေတဗ္ဗံ. ဧတ္ထ စ အဿရဂ္ဂဟဏသာမတ္ထိယေန ‘‘ဗျဉ္ဇန’’န္တိ လဒ္ဓံ.

၁၃. သရာ သရေ လောပံ.

သရာ ခေါ သဗ္ဗေပိ သရေ ပရေ ဌိတေ လောပံ ပပ္ပေါန္တိ. လောပေါတိ အဒဿနံ အနုစ္စာရဏံ. ဧတ္ထ သရာတိ ကာရိယီနိဒ္ဒေသော. ဗဟုဝစနံ ပနေတ္ထ ဧကေကသ္မိံ သရေ ပရေ ဗဟူနံ လောပဉာပနတ္ထံ. သရေတိ နိမိတ္တနိဒ္ဒေသော၊ နိမိတ္တသတ္တမီ စာယံ၊ နိမိတ္တောပါဒါနသာမတ္ထိယတော ဝဏ္ဏကာလဗျဝဓာနေ သန္ဓိကာရိယံ န ဟောတိ. လောပန္တိ ကာရိယနိဒ္ဒေသော၊ ဣဒံ ပန သုတ္တံ ဥပရိ ပရလောပဝိဓာနတော ပုဗ္ဗလောပဝိဓာနန္တိ ဒဋ္ဌဗ္ဗံ၊ ဧဝံ သဗ္ဗတ္ထ သတ္တမီနိဒ္ဒေသေ ပုဗ္ဗဿေဝ ဝိဓိ၊ န ပရဿ ဝိဓာနန္တိ ဝေဒိတဗ္ဗံ.

‘‘အဿရံ၊ အဓောဌိတ’’န္တိ စ ဝတ္တတေ၊ သိလိဋ္ဌကထနေ ပရိဘာသမာဟ.

၁၄. နယေ ပရံ ယုတ္တေ.

သရရဟိတံ ခေါ ဗျဉ္ဇနံ အဓောဌိတံ ပရက္ခရံ နယေ ယုတ္တေ ဌာနေတိ ပရနယနံ ကာတဗ္ဗံ. ဧတ္ထ ယုတ္တဂ္ဂဟဏံ နိဂ္ဂဟီတနိသေဓနတ္ထံ၊ တေန ‘‘အက္ကောစ္ဆိ မံ အဝဓိ မ’’န္တိအာဒီသု ပရနယနသန္ဒေဟော န ဟောတိ.

လောကဂ္ဂပုဂ္ဂလော၊ ပညိန္ဒြိယံ၊ တီဏိမာနိ၊ နောဟေတံ၊ ဘိက္ခုနောဝါဒေါ၊ မာတုပဋ္ဌာနံ၊ သမေတာယသ္မာ၊ အဘိဘာယတနံ၊ ဓနာ မတ္ထိ၊ သဗ္ဗေဝ၊ တယဿု ဓမ္မာ၊ အသန္တေတ္ထ န ဒိဿန္တိ.

ယဿ ဣဒါနိ၊ သညာ ဣတိ၊ ဆာယာ ဣဝ၊ ကထာ ဧဝ ကာ၊ ဣတိ အပိ၊ အဿမဏီ အသိ၊ စက္ခု ဣန္ဒြိယံ၊ အကတညူ အသိ၊ အာကာသေ ဣဝ၊ တေ အပိ၊ ဝန္ဒေ အဟံ၊ သော အဟံ၊ စတ္တာရော ဣမေ၊ ဝသလော ဣတိ၊ မောဂ္ဂလ္လာနော အာသိ ဗီဇကော၊ ပါတော ဧဝါတီဓ ပုဗ္ဗလောပေ သမ္ပတ္တေ ‘‘သရေ’’တိ အဓိကာရော၊ ဣဓ ပန ‘‘အတ္ထဝသာ ဝိဘတ္တိဝိပရိဏာမော’’တိ ကတွာ ‘‘သရော၊ သရမှာ၊ လောပ’’န္တိ စ ဝတ္တမာနေ –

၁၅. ဝါ ပရော အသရူပါ.

အသမာနရူပမှာ သရမှာ ပရော သရော လောပံ ပပ္ပေါတိ ဝါ. သမာနံ ရူပံ အဿာတိ သရူပေါ၊ န သရူပေါ အသရူပေါ၊ အသဝဏ္ဏော. ယသ္မာ ပန မရိယာဒါယံ၊ အဘိဝိဓိမှိ စ ဝတ္တမာနော အာဥပသဂ္ဂေါ ဝိယ ဝါသဒ္ဒေါ ဒွိဓာ ဝတ္တတေ၊ ကတ္ထစိ ဝိကပ္ပေ၊ ကတ္ထစိ ယထာဝဝတ္ထိတရူပပရိဂ္ဂဟေ၊ ဣဓ ပန ပစ္ဆိမေ၊ တတော နိစ္စမနိစ္စမသန္တဉ္စ ဝိဓိမေတ္ထ ဝါသဒ္ဒေါ ဒီပေတိ. ‘‘နယေ ပရံ ယုတ္တေ’’တိ ပရံ နေတဗ္ဗံ.

ယဿဒါနိ ယဿ ဣဒါနိ၊ သညာတိ သညာ ဣတိ၊ ဆာယာဝ ဆာယာ ဣဝ၊ ကထာဝ ကာ ကထာ ဧဝ ကာ၊ ဣတီပိ ဣတိ အပိ၊ အဿမဏီသိ အဿမဏီ အသိ. စက္ခုန္ဒြိယ မိတိ နိစ္စံ. အကတညူသိ အကတညူ အသိ၊ အာကာသေဝ အာကာသေ ဣဝ၊ တေပိ တေ အပိ၊ ဝန္ဒေဟံ ဝန္ဒေ အဟံ၊ သောဟံ သော အဟံ၊ စတ္တာရောမေ စတ္တာရော ဣမေ၊ ဝသလောတိ ဝသလော ဣတိ၊ မောဂ္ဂလ္လာနောသိ ဗီဇကော မောဂ္ဂလ္လာနော အာသိ ဗီဇကော၊ ပါတောဝ ပါတော ဧဝ.

ဣဓ န ဘဝတိ – ပဉ္စိန္ဒြိယာနိ၊ သဒ္ဓိန္ဒြိယံ၊ သတ္တုတ္တမော၊ ဧကူနဝီသတိ၊ ယဿေတေ၊ သုဂတောဝါဒေါ၊ ဒိဋ္ဌာသဝေါ၊ ဒိဋ္ဌောဃော၊ စက္ခာယတနံ၊ တံ ကုတေတ္ထ လဗ္ဘာ ဣစ္စာဒိ.

ဘဝတိ စ ဝဝတ္ထိတဝိဘာသာယ.

အဝဏ္ဏတော သရောဒါနီ-တီဝေဝါဒိံ ဝိနာ ပရော၊

န လုပ္ပတညတော ဒီဃော၊ အာသေဝါဒိဝိဝဇ္ဇိတော.

ဗန္ဓုဿ ဣဝ၊ ဥပ ဣက္ခတိ၊ ဥပ ဣတော၊ အဝ ဣစ္စ၊ ဇိန ဤရိတံ၊ န ဥပေတိ၊ စန္ဒ ဥဒယော၊ ယထာ ဥဒကေ ဣတီဓ ပုဗ္ဗာဝဏ္ဏဿရာနံ လောပေ ကတေ ‘‘ပရော၊ အသရူပေ’’တိ စ ဝတ္တတေ၊ တထာ ‘‘ဣဝဏ္ဏော ယံ နဝါ’’တိ ဣတော ဣဝဏ္ဏဂ္ဂဟဏဉ္စ၊ ‘‘ဝမောဒုဒန္တာန’’န္တိ ဣတော ဥဂ္ဂဟဏဉ္စ သီဟဂတိယာ ဣဓာနုဝတ္တေတဗ္ဗံ.

၁၆. ကွစာသဝဏ္ဏံ လုတ္တေ.

ဣဝဏ္ဏဘူတော၊ ဥကာရဘူတော စ ပရော သရော အသရူပေ ပုဗ္ဗဿရေ လုတ္တေ ကွစိ အသဝဏ္ဏံ ပပ္ပေါတိ. နတ္ထိ သဝဏ္ဏာ ဧတေသန္တိ အသဝဏ္ဏာ၊ ဧကာရောကာရာ၊ တတ္ထ ဌာနာသန္နဝသေန ဣဝဏ္ဏုကာရာနမေကာရောကာရာ ဟောန္တိ.

ဗန္ဓုဿေဝ၊ ဥပေက္ခတိ၊ ဥပေတော၊ အဝေစ္စ၊ ဇိနေရိတံ၊ နောပေတိ၊ စန္ဒောဒယော၊ ယထောဒကေ. ကွစီတိ ကိံ? တတြိမေ၊ ယဿိန္ဒြိယာနိ၊ မဟိဒ္ဓိကော၊ သဗ္ဗီတိယော၊ တေနုပသင်္ကမိ၊ လောကုတ္တရော. လုတ္တေတိ ကိံ? ဆ ဣမေ ဓမ္မာ၊ ယထာ ဣဒံ၊ ကုသလဿ ဥပသမ္ပဒါ. အသရူပေတိ ကိံ? စတ္တာရိမာနိ၊ မာတုပဋ္ဌာနံ.

ဧတ္ထ စ သတိပိ ဟေဋ္ဌာ ဝါဂ္ဂဟဏေ ကွစိကရဏတော အဝဏ္ဏေ ဧဝ လုတ္တေ ဣဓ ဝုတ္တဝိဓိ ဟောတီတိ ဒဋ္ဌဗ္ဗံ. တတော ဣဓ န ဘဝတိ – ဒိဋ္ဌုပါဒါနံ၊ ပဉ္စဟုပါလိ၊ မုဒိန္ဒြိယံ၊ ယော မိဿရောတိ.

တတြ အယံ၊ ဗုဒ္ဓ အနုဿတိ၊ သ အတ္ထိကာ၊ ပညဝါ အဿ၊ တဒါ အဟံ၊ ယာနိ ဣဓ ဘူတာနိ၊ ဂစ္ဆာမိ ဣတိ၊ အတိ ဣတော၊ ကိကီ ဣဝ၊ ဗဟု ဥပကာရံ၊ မဓု ဥဒကံ၊ သု ဥပဓာရိတံ၊ ယောပိ အယံ၊ ဣဒါနိ အဟံ၊ သစေ အယံ၊ အပ္ပဿုတော အယံ၊ ဣတရ ဣတရေန၊ သဒ္ဓါ ဣဓ ဝိတ္တံ၊ ကမ္မ ဥပနိဿယော၊ တထာ ဥပမံ၊ ရတ္တိ ဥပရတော၊ ဝိ ဥပသမော ဣစ္စတြ ပုဗ္ဗဿရာနံ လောပေ ကတေ –

‘‘ကွစီ’’တိ အဓိကာရော၊ ‘‘ပရော၊ လုတ္တေ’’တိ စ ဝတ္တတေ.

၁၇. ဒီဃံ.

သရော ခေါ ပရော ပုဗ္ဗဿရေ လုတ္တေ ကွစိ ဒီဃဘာဝံ ပပ္ပေါတီတိ ဌာနာသန္နဝသေန ရဿဿရာနံ သဝဏ္ဏဒီဃော.

တတြာယံ၊ ဗုဒ္ဓါနုဿတိ၊ သာတ္ထိကာ၊ ပညဝါဿ၊ တဒါဟံ၊ ယာနီဓ ဘူတာနိ၊ ဂစ္ဆာမီတိ၊ အတီတော၊ ကိကီဝ၊ ဗဟူပကာရံ၊ မဓူဒကံ၊ သူပဓာရိတံ၊ ယောပါယံ၊ ဣဒါနာဟံ၊ သစာယံ၊ အပ္ပဿုတာယံ၊ ဣတရီတရေန၊ သဒ္ဓီဓ ဝိတ္တံ၊ ကမ္မူပနိဿယော၊ တထူပမံ၊ ရတ္တူပရတော၊ ဝူပသမော.

ကွစီတိ ကိံ? အစိရံ ဝတ’ယံ ကာယော၊ ကိမ္ပိမာယ၊ တီဏိမာနိ၊ ပဉ္စသုပါဒါနက္ခန္ဓေသု၊ တဿတ္ထော၊ ပဉ္စင်္ဂိကော၊ မုနိန္ဒော၊ သတိန္ဒြိယံ၊ လဟုဋ္ဌာနံ၊ ဂစ္ဆာမဟံ၊ တတြိဒံ၊ ပဉ္စဟုပါလိ၊ နတ္ထညံ. လုတ္တေတိ ကိံ? ယထာ အယံ၊ နိမိ ဣဝ ရာဇာ၊ ကိကီ ဣဝ၊ သု ဥပဓာရိတံ.

လောကဿ ဣတိ၊ ဒေဝ ဣတိ၊ ဝိ အတိ ပတန္တိ၊ ဝိ အတိ နာမေန္တိ၊ သင်္ဃာဋိ အပိ၊ ဇီဝိတဟေတု အပိ၊ ဝိဇ္ဇု ဣဝ၊ ကိံသု ဣဓ ဝိတ္တံ၊ သာဓု ဣတိ ဣတီဓ ပရဿရာနံ လောပေ ကတေ –

‘‘လုတ္တေ၊ ဒီဃ’’န္တိ စ ဝတ္တတေ.

၁၈. ပုဗ္ဗော စ.

ပုဗ္ဗော သရော ပရဿရေ လုတ္တေ ကွစိဒီဃံ ပပ္ပေါတိ. စဂ္ဂဟဏံ လုတ္တဒီဃဂ္ဂဟဏာနုကဍ္ဎနတ္ထံ၊ တံ ‘‘စာနုကဍ္ဎိတမုတ္တရတြ နာနုဝတ္တတေ’’တိ ဉာပနတ္ထံ.

လောကဿာတိ၊ ဒေဝါတိ၊ ဝီတိပတန္တိ၊ ဝီတိနာမေန္တိ၊ သင်္ဃာဋီပိ၊ ဇီဝိတဟေတူပိ၊ ဝိဇ္ဇူဝ၊ ကိံသူဓ ဝိတ္တံ၊ သာဓူတိ.

ကွစီတိ ကိံ? ယဿဒါနိ၊ ဣတိဿ၊ ဣဒါနိပိ၊ တေသုပိ၊ စက္ခုန္ဒြိယံ၊ ကိန္နုမာဝ.

အဓိဂတော ခေါ မေ အယံ ဓမ္မော၊ ပုတ္တော တေ အဟံ၊ တေ အဿ ပဟီနာ၊ ပဗ္ဗတေ အဟံ၊ ယေ အဿ ဣတီဓ ပုဗ္ဗလောပေ သမ္ပတ္တေ –

၁၉. ယမေဒန္တဿာဒေသော.

ဧကာရဿ ပဒန္တဘူတဿ ဌာနေ သရေ ပရေ ကွစိ ယကာရာဒေသော ဟောတိ. အကာရေမေတေယေသဒ္ဒါဒိဿေဝါယံ ဝိဓိ၊ ယန္တိ ယံ ရူပံ၊ ဧ ဧဝ အန္တော ဧဒန္တော၊ အာဒေသိဋ္ဌာနေ အာဒိဿတီတိ အာဒေသော. ‘‘ဗျဉ္ဇနေ’’တိ အဓိကိစ္စ ‘‘ဒီဃ’’န္တိ ဒီဃော.

အဓိဂတော ခေါ မျာယံ ဓမ္မော၊ ပုတ္တော တျာဟံ၊ တျာဿ ပဟီနာ၊ ပဗ္ဗတျာဟံ၊ ယျာဿ.

ကွစီတိ ကိံ? တေ နာဂတာ၊ ပုတ္တာ မတ္ထိ. အန္တဂ္ဂဟဏံ ကိံ? ဓမ္မစက္ကံ ပဝတ္တေန္တော၊ ဒမေန္တော စိတ္တံ.

ယာဝတကော အဿ ကာယော၊ တာဝတကော အဿ ဗျာမော၊ ကော အတ္ထော၊ အထ ခေါ အဿ၊ အဟံ ခေါ အဇ္ဇ၊ ယော အယံ၊ သော အဿ၊ သော ဧဝ၊ ယတော အဓိကရဏံ၊ အနု အဒ္ဓမာသံ၊ အနု ဧတိ၊ သု အာဂတံ၊ သု အာကာရော၊ ဒု အာကာရော၊ စက္ခု အာပါထံ၊ ဗဟု အာဗာဓော၊ ပါတု အကာသိ၊ န တု ဧဝါတီဓ –

၂၀. ဝမောဒုဒန္တာနံ.

ဩကာရုကာရာနံ အန္တဘူတာနံ သရေ ပရေ ကွစိ ဝကာရာဒေသော ဟောတိ. က ခ ယ တသဒ္ဒါဒိဩကာရဿေဒံ ဂဟဏံ.

ယာဝတကွဿ ကာယော၊ တာဝတကွဿ ဗျာမော၊ ကွတ္ထော၊ အထ ခွဿ၊ အဟံ ခွဇ္ဇ၊ ယွာယံ၊ သွဿ၊ သွေဝ၊ ယတွာဓိကရဏံ၊ အနွဒ္ဓမာသံ၊ အနွေဘိ၊ သွာဂတံ၊ သွာကာရော၊ ဒွါကာရော၊ စက္ခွာပါထံ၊ ဗဟွာဗာဓော၊ ပါတွာကာသိ၊ န တွေဝ.

ကွစီတိ ကိံ? ကော အတ္ထော၊ အထ ခေါ အညတရာ၊ ယောဟံ၊ သောဟံ၊ စတ္တာရောမေ၊ သာဂတံ၊ သာဓာဝုသော၊ ဟောတူတိ. အန္တဂ္ဂဟဏံ ကိံ? သဝနီယံ၊ ဝိရဝန္တိ.

ပဋိသန္ထာရဝုတ္တိ အဿ၊ သဗ္ဗာ ဝိတ္တိ အနုဘုယျတေ၊ ဝိ အဉ္ဇနံ၊ ဝိ အာကတော၊ နဒီ အာသန္နော ဣတီဓ မဏ္ဍူကဂတိယာ ‘‘အသရူပေ’’တိ ဝတ္တတေ.

၂၁. ဣဝဏ္ဏော ယံ နဝါ.

ပုဗ္ဗော ဣဝဏ္ဏော အသရူပေ သရေ ပရေ ယကာရံ ပပ္ပေါတိ နဝါ. ဣ ဧဝ ဝဏ္ဏော ဣဝဏ္ဏော၊ နဝါသဒ္ဒေါ ကွစိသဒ္ဒပရိယာယော.

ပဋိသန္ထာရဝုတျဿ၊ သဗ္ဗာ ဝိတျာနုဘုယျတေ၊ ဗျဉ္ဇနံ၊ ဗျာကတော၊ နဒျာသန္နော.

နဝါတိ ကိံ? ပဉ္စဟင်္ဂေဟိ၊ တာနိ အတ္တနိ၊ ဂစ္ဆာမဟံ၊ မုတ္တစာဂီ အနုဒ္ဓတော. အသရူပေတိ ကိံ? ဣတိဟိဒံ၊ အဂ္ဂီဝ၊ အတ္ထီတိ.

အတိ အန္တံ၊ အတိ ဩဒါတာ၊ ပတိ အယော၊ ပတိ အာဟရတိ၊ ပတိ ဧတိ၊ ဣတိ အဿ၊ ဣတိ ဧတံ၊ ဣတိအာဒိ ဣတီဓ ‘‘ဣဝဏ္ဏော ယံ နဝါ’’တိ ယကာရာဒေသေ သမ္ပတ္တေ –

၂၂. သဗ္ဗော စန္တိ.

အတိပတိဣတီနံ တိသဒ္ဒဿေဒံ ဂဟဏံ.

သဗ္ဗော တိဣစ္စေသော သဒ္ဒေါ သရေ ပရေ ကွစိ စကာရံ ပပ္ပေါတိ. တီတိ နိဒ္ဒေသတော အကတယကာရဿေဝါယံ ဝိဓိ၊ ဣတရထာ ကွစိဂ္ဂဟဏဿ စ ‘‘အတိဿ စန္တဿာ’’တိသုတ္တဿ စ နိရတ္ထကတာ သိယာ. ‘‘ပရဒွေဘာဝေါ ဌာနေ’’တိ ဒွိတ္တံ.

အစ္စန္တံ၊ အစ္စောဒါတာ၊ ပစ္စယော၊ ပစ္စာဟရတိ၊ ပစ္စေတိ၊ ဣစ္စဿ၊ ဣစ္စေတံ၊ ဣစ္စာဒိ.

ကွစီတိ ကိံ? ဣတိဿ၊ ဣတိ အာကင်္ခမာနေန.

‘‘တေ န ဝါဣဝဏ္ဏေ’’တိ ဣတော ‘‘န ဣဝဏ္ဏေ’’တိ စ ဝတ္တတေ.

၂၃. အတိဿ စန္တဿ.

အတိဣစ္စေတဿ အန္တဘူတဿ တိသဒ္ဒဿ ဣဝဏ္ဏေ ပရေ ‘‘သဗ္ဗော စံ တီ’’တိ ဝုတ္တရူပံ န ဟောတိ. အတိဿာတိ အတိဥပသဂ္ဂါနုကရဏမေတံ. တေနေဝေတ္ထ ဝိဘတ္တိလောပါဘာဝေါ. ဧတ္ထ စ အန္တသဒ္ဒေါ သဒ္ဒဝိဓိနိသေဓပ္ပကရဏတော အတိသဒ္ဒန္တဘူတံ တိသဒ္ဒမေဝ ဝဒတိ၊ န ဣဝဏ္ဏန္တိ ဒဋ္ဌဗ္ဗံ၊ ဣတရထာ ဣဒံ သုတ္တမေဝ နိရတ္ထကံ သိယာ.

‘‘ဣဝဏ္ဏော ယံ နဝါ’’တီဓ၊ အသရူပါဓိကာရတော၊

ဣဝဏ္ဏဿ သရူပသ္မိံ၊ ယာဒေသော စ န သမ္ဘဝေ.

စကာရော အနုတ္တသမုစ္စယတ္ထော၊ တေန ဣတိပတီနမန္တဿ စ န ဟောတိ. အတိ ဣသိဂဏော အတီသိဂဏော၊ ဧဝံ အတီတော၊ အတီရိတံ၊ ဣတီတိ၊ ဣတီဒံ၊ ပတီတော.

အဘိ အက္ခာနံ၊ အဘိ ဥဂ္ဂတော၊ အဘိ ဩကာသော ဣတီဓ ယကာရေ သမ္ပတ္တေ –

‘‘သရေ’’တိ ဝတ္တတေ.

၂၄. အဗ္ဘော အဘိ.

အဘိဣစ္စေတဿ သဗ္ဗဿ သရေ ပရေ အဗ္ဘာဒေသော ဟောတိ.

‘‘အဘီ’’တိ ပဌမန္တဿ၊ ဝုတ္တိယံ ဆဋ္ဌိယောဇနံ၊

အာဒေသာပေက္ခတော ဝုတ္တံ၊ ‘‘အံမော’’တိအာဒိကေ ဝိယ.

ပုဗ္ဗဿရလောပေါ၊ အဗ္ဘက္ခာနံ၊ အဗ္ဘုဂ္ဂတော၊ အဗ္ဘောကာသော.

အဓိ အဂမာ၊ အဓိ ဥပဂတော၊ အဓိ ဩဂါဟေတွာ ဣတီဓ

၂၅. အဇ္ဈော အဓိ.

အဓိဣစ္စေတဿ သဗ္ဗဿ သရေ ပရေ အဇ္ဈာဒေသော ဟောတိ. အဇ္ဈဂမာ၊ အဇ္ဈုပဂတော၊ အဇ္ဈောဂါဟေတွာ.

အဘိ ဣစ္ဆိတံ၊ အဓိ ဤရိတံ ဣတီဓ