နိဂ္ဂဟီတသန္ဓိဝိဓာန

အထ နိဂ္ဂဟီတသန္ဓိ ဝုစ္စတေ.

တဏှံ ကရော၊ ရဏံ ဇဟော၊ သံ ဌိတော၊ ဇုတိံ ဓရော၊ သံ မတော ဣတီဓ ‘‘နိဂ္ဂဟီတ’’န္တိ အဓိကာရော၊ ‘‘ဗျဉ္ဇနေ’’တိ ဝတ္တတေ.

၄၉. ဝဂ္ဂန္တံ ဝါ ဝဂ္ဂေ.

ဝဂ္ဂဘူတေ ဗျဉ္ဇနေ ပရေ နိဂ္ဂဟီတံ ခေါ ဝဂ္ဂန္တံ ဝါ ပပ္ပေါတီတိ နိမိတ္တာနုသွရာနံ ဌာနာသန္နဝသေန တဗ္ဗဂ္ဂပဉ္စမော ဟောတိ. ဝဝတ္ထိတဝိဘာသတ္ထောယံ ဝါသဒ္ဒေါ. တေန ‘‘တဏှင်္ကရော၊ ရဏဉ္ဇဟော၊ သဏ္ဌိတော၊ ဇုတိန္ဓရော၊ သမ္မတော’’တိအာဒီသု နိစ္စံ.

တင်္ကရောတိ တံ ကရောတိ၊ တင်္ခဏံ တံခဏံ၊ သင်္ဂဟော သံဂဟော၊ တင်္ဃတံ တံ ဃတံ. ဓမ္မဉ္စရေ ဓမ္မံ စရေ၊ တဉ္ဆန္နံ တံ ဆန္နံ၊ တဉ္ဇာတံ တံ ဇာတံ၊ တညာဏံ တံ ဉာဏံ. တဏ္ဌာနံ တံ ဌာနံ၊ တဏ္ဍဟတိ ဘံ ဍဟတိ. တန္တနောတိ တံ တနောတိ၊ တန္ထိရံ တံ ထိရံ၊ တန္ဒာနံ တံ ဒါနံ၊ တန္ဓနံ တံ ဓနံ၊ တန္နိစ္စုတံ တံ နိစ္စုတံ. တမ္ပတ္တော တံ ပတ္တော၊ တမ္ဖလံ တံ ဖလံ၊ တေသမ္ဗောဓော တေသံ ဗောဓော၊ သမ္ဘူတော သံဘူတော၊ တမ္မိတ္တံ တံ မိတ္တံ. ကိင်္ကတော ကိံ ကတော၊ ဒါတုင်္ဂတော ဒါတုံ ဂတောတိ ဧဝမာဒီသု ဝိကပ္ပေန.

ဣဓ န ဘဝတိ၊ န တံ ကမ္မံ ကတံ သာဓု၊ သရဏံ ဂစ္ဆာမိ.

သတိ စောပရိ ဝါဂ္ဂဟဏေ ဝိဇ္ဈန္တရေ ဝါ ဣဓ ဝါဂ္ဂဟဏကရဏမတ္ထန္တရဝိညာပနတ္ထံ၊ တေန နိဂ္ဂဟီတဿ သံဥပသဂ္ဂပုမန္တဿ လေ လကာရော. ယထာ – ပဋိသံလီနော ပဋိသလ္လီနော၊ ဧဝံ ပဋိသလ္လာဏော၊ သလ္လက္ခဏာ၊ သလ္လေခေါ၊ သလ္လာပေါ၊ ပုံလိင်္ဂံ ပုလ္လိင်္ဂံ.

ပစ္စတ္တံ ဧဝ၊ တံ ဧဝ၊ တဉှိ တဿ၊ ဧဝဉှိ ဝေါ ဣတီဓ ‘‘ဝါ’’တိ အဓိကာရော.

၅၀. ဧဟေ ဉံ.

ဧကာရဟကာရေ ပရေ နိဂ္ဂဟီတံ ခေါ ဉကာရံ ပပ္ပေါတိ ဝါ၊ ဧကာရေ ဉာဒေသဿ ဒွိဘာဝေါ.

ပစ္စတ္တညေဝပစ္စတ္တံ ဧဝ၊ တညေဝ တံ ဧဝ၊ တဉှိ တဿ တဉှိ တဿ၊ ဧဝဉှိ ဝေါ ဧဝဉှိ ဝေါ.

ဝဝတ္ထိတဝိဘာသတ္တာ ဝါသဒ္ဒဿ ဧဝဟိနိပါတတော အညတ္ထ န ဟောတိ၊ ယထာ – ဧဝမေတံ၊ ဧဝံ ဟောတိ.

သံယောဂေါ၊ သံယောဇနံ၊ သံယတော၊ သံယာစိကာယ၊ ယံ ယဒေဝ၊ အာနန္တရိကံ ယမာဟု ဣတီဓ ‘‘ဉ’’မိတိ ဝတ္တတေ.

၅၁. သ ယေ စ.

နိဂ္ဂဟီတံ ခေါ ယကာရေ ပရေ သဟ ယကာရေန ဉကာရံ ပပ္ပေါတိ ဝါ၊ ဉာဒေသဿ ဒွိတ္တံ.

သညောဂေါ သံယောဂေါ၊ သညောဇနံ သံယောဇနံ၊ သညတော သံယတော၊ သညာစိကာယ သံယာစိကာယ၊ ယညဒေဝ ယံ ယဒေဝ၊ အာနန္တရိကညမာဟု အာနန္တရိကံ ယမာဟု.

ဝါသဒ္ဒဿ ဝဝတ္ထိတဝိဘာသတ္တာဝ သံပဒန္တတော စ သဗ္ဗနာမယကာရပရတော စ နိဂ္ဂဟီတာ အညတ္ထ န ဟောတိ. ယထာ – ဧတံ ယောဇနံ၊ တံ ယာနံ၊ သရဏံ ယန္တိ.

ဧတ္ထ စ ‘‘သဟ ယေ စာ’’တိ ဝတ္တဗ္ဗေ ‘‘သ ယေ စာ’’တိ ဝစနတော သုတ္တန္တေသု သုခုစ္စာရဏတ္ထမက္ခရလောပေါပီတိ ဒဋ္ဌဗ္ဗံ၊ တေန ပဋိသင်္ခါယ ယောနိသော ပဋိသင်္ခါ ယောနိသော၊ သယံ အဘိညာယ သစ္ဆိကတွာ သယံ အဘိညာ သစ္ဆိကတွာ၊ ပရိယေသနာယ ပရိယေသနာတိအာဒိ သိဇ္ဈတိ.

တံ အဟံ ဗြူမိ၊ ယံ အာဟု၊ ဓနံ ဧဝ၊ ကိံ ဧတံ၊ နိန္ဒိတုံ အရဟတိ၊ ယံ အနိစ္စံ၊ တံ အနတ္တာ၊ ဧတံ အဝေါစ၊ ဧတံ ဧဝ ဣစ္စတြ –

၅၂. မဒါ သရေ.

နိဂ္ဂဟီတဿ ခေါ သရေ ပရေ မကာရဒကာရာဒေသာ ဟောန္တိ ဝါ. ဧတ္ထ စ ဝါသဒ္ဒါဓိကာရဿ ဝဝတ္ထိတဝိဘာသတ္တာ ဒကာရော ယတေတသဒ္ဒတော ပရဿေဝ.

တမဟံ ဗြူမိ၊ ယမာဟု၊ ဓနမေဝ၊ ကိမေတံ၊ နိန္ဒိတုမရဟတိ၊ ယဒနိစ္စံ၊ တဒနတ္တာ၊ ဧတဒဝေါစ၊ ဧတဒေဝ.

ဝါတိ ကိံ? တံ အဟံ၊ ဧတံ ဧဝ၊ အက္ကောစ္ဆိ မံ အဝဓိ မံ.

ဧတ္ထ စ မဒါတိ ယောဂဝိဘာဂေန ဗျဉ္ဇနေပိ ဝါ မကာရော. တေန ‘‘ဗုဒ္ဓမ သရဏမ ဂစ္ဆာမီ’’တိအာဒိ သိဇ္ဈတိ.

တာသံ အဟံ သန္တိကေ၊ ဝိဒူနံ အဂ္ဂံ၊ တဿ အဒါသိံ အဟံ ဣတီဓ ‘‘သရေ’’တိ ဝတ္တတေ.

၅၃. ကွစိ လောပံ.

နိဂ္ဂဟီတံ ခေါ သရေ ပရေ လောပံ ပပ္ပေါတိ ကွစိ ဆန္ဒာနုရက္ခဏေ သုခုစ္စာရဏဋ္ဌာနေ. ပုဗ္ဗဿရလောပေါ၊ ပရဿ အသံယောဂန္တဿ ဒီဃော.

တာသာဟံ သန္တိကေ၊ ဝိဒူနဂ္ဂံ၊ တဿ အဒါသာဟံ၊ တထာဂတာဟံ၊ ဧဝါဟံ၊ ကျာဟံ.

ကွစီတိ ကိံ? ဧဝမဿ၊ ကိမဟံ.

အရိယသစ္စာနံ ဒဿနံ၊ ဧတံ ဗုဒ္ဓါနံ သာသနံ၊ သံရတ္တော၊ သံရာဂေါ၊ သံရမ္ဘော၊ အဝိသံဟာရော၊ စိရံ ပဝါသိံ၊ ဂန္တုံ ကာမော၊ ဂန္တုံ မနော ဣတီဓ ‘‘ကွစိ လောပ’’န္တိ ဝတ္တတေ.

၅၄. ဗျဉ္ဇနေ စ.

နိဂ္ဂဟီတံ ခေါ ဗျဉ္ဇနေ စ ပရေ လောပံ ပပ္ပေါတိ ကွစိ ဆန္ဒာနုရက္ခဏာဒိမှိ. ရကာရဟကာရေသု ဥပသဂ္ဂန္တဿ ဒီဃော.

အရိယသစ္စာန ဒဿနံ၊ ဧတံ ဗုဒ္ဓါန သာသနံ၊ သာရတ္တော၊ သာရာဂေါ၊ သာရမ္ဘော၊ အဝိသာဟာရော၊ စိရပ္ပဝါသိံ၊ ဒွိတ္တံ၊ ဂန္တုကာမော၊ ဂန္တုမနော.

ကွစီတိ ကိံ? ဧတံ မင်္ဂလမုတ္တမံ.

ကတံ ဣတိ၊ ကိံ ဣတိ၊ အဘိနန္ဒုံ ဣတိ၊ ဥတ္တတ္တံ ဣဝ၊ စက္ကံ ဣဝ၊ ကလိံ ဣဒါနိ၊ ကိံ ဣဒါနိ၊ တွံ အသိ၊ ဣဒံ အပိ၊ ဥတ္တရိံ အပိ၊ ဒါတုံ အပိ၊ သဒိသံ ဧဝ ဣတီဓ ‘‘နိဂ္ဂဟီတမှာ၊ လောပ’’န္တိ စ ဝတ္တတေ.

၅၅. ပရော ဝါ သရော.

နိဂ္ဂဟီတမှာ ပရော သရော လောပံ ပပ္ပေါတိ ဝါ. နိဂ္ဂဟီတဿ ဝဂ္ဂန္တတ္တံ.

ကတန္တိ၊ ကိန္တိ၊ အဘိနန္ဒုန္တိ၊ ဥတ္တတ္တံဝ၊ စက္ကံဝ၊ ကလိန္ဒာနိ၊ ကိန္ဒာနိ၊ တွံသိ၊ ဣဒမ္ပိ၊ ဥတ္တရိမ္ပိ၊ ဒါတုမ္ပိ၊ သဒိသံဝ.

ဝါတိ ကိံ? ကတံ ဣတိ၊ ကိမိတိ၊ ဒါတုမပိ၊ သာမံ ဧဝ.

အယမ္ပိ ဝါသဒ္ဒဿ ဝဝတ္ထိတဝိဘာသတ္တာ ဣတီဝီဒါနိသီပေဝါဒိတော အညတ္ထ န ဟောတိ. ယထာ – အဟံ ဧတ္ထ၊ ဧတံ အဟောသိ.

ဧဝံ အဿ တေ အာသဝါ၊ ပုပ္ဖံ အဿာ ဥပ္ပဇ္ဇတိ ဣတီဓ သရေ ပရေ လုတ္တေ ဝိပရိဏာမေန ‘‘ပရသ္မိံ၊ သရေ၊ လုတ္တေ’’တိ စ ဝတ္တတေ.

၅၆. ဗျဉ္ဇနော စ ဝိသညောဂေါ.

နိဂ္ဂဟီတမှာ ပရသ္မိံ သရေ လုတ္တေ ဗျဉ္ဇနော သညောဂေါ စေ၊ ဝိသညောဂေါဝ ဟောတီတိ သံယောဂေကဒေသဿ ပုရိမဗျဉ္ဇနဿ လောပေါ.

ဒွိန္နံ ဗျဉ္ဇနာနမေကတြ ဌိတိ သညောဂေါ၊ ဣဓ ပန သံယုဇ္ဇတီတိ သညောဂေါ၊ ပုရိမော ဝဏ္ဏော၊ ဝိဂတော သညောဂေါ အဿာတိ ဝိသညောဂေါ၊ ပရော.

ဧဝံ သ တေ အာသဝါ၊ ပုပ္ဖံသာ ဥပ္ပဇ္ဇတိ.

လုတ္တေတိ ကိံ? ဧဝမဿ.

စသဒ္ဒေန တိဏ္ဏံ ဗျဉ္ဇနာနံ သရူပသံယောဂေါပိ ဝိသညောဂေါ ဟောတိ. ယထာ – အဂျာဂါရံ၊ ဝုတျဿ.

စက္ခု ဥဒပါဒိ၊ အဝ သိရော၊ ယာဝစိဓ ဘိက္ခဝေ၊ အဏုထူလာနိ၊ တ သမ္ပယုတ္တာ ဣဘီဓ ‘‘သရေ၊ အာဂမော၊ ကွစိ၊ ဗျဉ္ဇနေ’’တိ စ ဝတ္တတေ.

၅၇. နိဂ္ဂဟိတဉ္စ.

နိဂ္ဂဟီတဉ္စ အာဂမော ဟောတိ သရေ ဝါ ဗျဉ္ဇနေ ဝါ ကွစိ သုခုစ္စာရဏဋ္ဌာနေ. နိဂ္ဂဟီတဿ ရဿာနုဂတတ္တာ ရဿတောယေဝါယံ.

စက္ခုံ ဥဒပါဒိ၊ အဝံသိရော၊ ယာဝဉ္စိဓ ဘိက္ခဝေ၊ အဏုံထူလာနိ၊ တံသမ္ပယုတ္တာ၊ ဧဝံ တင်္ခဏေ၊ တံသဘာဝေါ.

ကွစီတိ ကိံ? န ဟိ ဧတေဟိ၊ ဣဓ စေဝ.

ဧဝံ ဝုတ္တေ၊ တံ သာဓု၊ ဧကံ သမယံ ဘဂဝါ၊ အဂ္ဂိံဝ သနမံ ဣတီဓ လောပါဒေသကာရိယေ သမ္ပတ္တေ ယေဘုယျေန တဒပဝါဒတ္ထမာဟ.

၅၈. အံ ဗျဉ္ဇနေ နိဂ္ဂဟီတံ.

နိဂ္ဂဟီတံ ခေါ ဗျဉ္ဇနေ ပရေ အံဣတိ ဟောတိ.

အကာရော ဥစ္စာရဏတ္ထော၊ ‘‘သရလောပေါ’’တိအာဒိနာ ပုဗ္ဗဿရလောပေါ ဝါ.

ဧဝံ ဝုတ္တေ၊ တံ သာဓု၊ ဧကံ သမယံ ဘဂဝါ၊ အဂ္ဂိံဝ သန္ဓမံ.

ဣဓ အဝုတ္တဝိသေသာနမ္ပိ ဝုတ္တနယာတိဒေသတ္ထမတိဒေသမာဟ.

၅၉. အနုပဒိဋ္ဌာနံ ဝုတ္တယောဂတော.

ယေ ဣဓ အမှေဟိ ဝိသေသတော န ဥပဒိဋ္ဌာ ဥပသဂ္ဂနိပါတာဒယော၊ တေသံ ဝုတ္တယောဂတော ဝုတ္တနယေန သရသန္ဓာဒီသု ဝုတ္တနယာနုသာရေန ရူပသိဒ္ဓိ ဝေဒိတဗ္ဗာ.

တေန ‘‘ဒေါ ဓဿ စာ’’တိ သုတ္တေ စသဒ္ဒေန ပရိယာဒီနံ ရဟနာဒိဝဏ္ဏဿ ဝိပရိယယော ယဝါဒီဟိ၊ ယထာ – ပရိယုဒါဟာသိ ပယိရုဒါဟာသိ၊ အရိယဿ အယိရဿ၊ ဗဟွာဗာဓော ဗဝှါဗာဓော၊ န အဘိနေယျ အနဘိနေယျ.

‘‘တံ ဣမိနာပိ ဇာနာထာ’’တိ ဧတ္ထ ‘‘ပရော ဝါ သရော’’တိ သရေ လုတ္တေ ‘‘တတြာကာရော’’တိ ယောဂဝိဘာဂေန အကာရော နိဂ္ဂဟီတဿ ဒကာရော၊ တဒမိနာပိ ဇာနာထ ဣစ္စာဒိ.

ဣတိ နိဂ္ဂဟီတသန္ဓိဝိဓာနံ နိဋ္ဌိတံ.

သညာဝိဓာနံ သရသန္ဓိ သန္ဓိ၊

နိသေဓနံ ဗျဉ္ဇနသန္ဓိ သန္ဓိ၊

ယော နိဂ္ဂဟီတဿ စ သန္ဓိကပ္ပေ၊

သုနိစ္ဆယော သောပိ မယေတ္ထ ဝုတ္တော.

ဣတိ ရူပသိဒ္ဓိယံ သန္ဓိကဏ္ဍော

ပဌမော.