၃၄. သရ

ဌာနသမ္ဗန္ဓေတိ ဌိတိ ဌာနံ ပသင်္ဂေါ၊ သမ္ဗန္ဓနံ-သမ္ဗန္ဓော၊ ဌာနျာဒေသဘာဝလက္ခဏော ဌာနေယောဂနိမိတ္တဘူတော သမ္ဗန္ဓော ဌာနသမ္ဗန္ဓော တသ္မိံ၊ ဒွေ ရူပါနိ ဟောန္တီတိ ဣမိနာ န သရူပပ္ပဓာနောတိ ဒဿိတံ ဟောတီတိ သမ္ဗန္ဓော၊ ဟေတုမာဟ-‘ဗဟုဝစနနိဒ္ဒေသာ’တိ၊ ဒွေ ရူပါနိဟောန္တီတျာဒိ ဝစနမိဒံ [ပဒမိဒံ (ပေါတ္ထကေ)] ဒဿေတိ ‘‘သရူပပ္ပဓာနေပိ ဒွိသဒ္ဒေ ဒွိသဒ္ဒသာမညေန သင်္ချာဒွိသဒ္ဒါနုသိဋ္ဌံ နပ္ပယုဇ္ဇတေ၊ တဿ (ပန) သင်္ချေယျဝစနသင်္ချာဘာဝါ ဧကဝစနမေဝ ( ) [(ပန) (ပေါတ္ထကေ)] ဟောတီ’’တိ၊ ဣမိနာ စ-တ္ထပ္ပဓာနော-ယံ နိဒ္ဒေသော န သရူပပ္ပဓာနောတိ ဒဿေတိ၊ အဓိပတိပစ္စယော အဓိပတိပ္ပစ္စယောတိ အနိစ္စံ၊ ဣဓ န ဟောတိ ဣဓ မောဒတီတိ၊ တံ ခဏန္တိ ဧတ္ထ ဧကင်္ဂဝိကလံ ပစ္စုဒါဟရဏန္တိ သရမှာ ပရတ္တာဘာဝါ န ဒွိတ္တံ.