၆. ဆဋ္ဌော ကဏ္ဍော (တျာဒိ)
၁. ဝတ္တမာနေ တိ အန္တိ သိ ထ မိ မ တေ အန္တေ သေ ဝှေ ဧ မှေ.
ဝတ္တမာနေ အာရဒ္ဓါပရိသမတ္တေ အတ္ထေ ဝတ္တမာနတော ကြိယတ္ထာ တျာဒယော ဟောန္တိ. ဂစ္ဆတိ၊ ဂစ္ဆန္တိ၊ ဂစ္ဆသိ ဂစ္ဆထ၊ ဂစ္ဆာမိ ဂစ္ဆာမ၊ ဂစ္ဆတေ ဂစ္ဆန္တေ၊ ဂစ္ဆသေ ဂစ္ဆဝှေ၊ ဂစ္ဆေ ဂစ္ဆာမှေ. ကထံ ‘ပုရေ အဓမ္မော ဒိပ္ပတိ၊ ပုရာ မရာမီ’တိ? ဝတ္တမာနဿေဝဝတ္တုမိဋ္ဌတ္တာ တံသမီပဿ တဂ္ဂဟဏေန ဂဟဏာ၊ ပုရေပုရာသဒ္ဒေဟိ ဝါ အနာဂတတ္တာဝဂမေ တဒါ တဿ ဝတ္တမာနတ္တာ၊ ကာလဗျတ္တယော ဝါ ဧသော၊ ဘဝန္တေဝ ဟိ ကာလန္တရေပိ တျာဒယော ဗာဟုလကာ ‘သန္တေသု ပရိဂူဟာမိ၊ မာ စ ကိဉ္စ ဣတော အဒံ’ ‘ကာယဿ ဘေဒါ အဘိသမ္ပရာယံ၊ သဟဗျတံ ဂစ္ဆတိ ဝါသဝဿ၊ ‘အနေကဇာတိသံသာရံ သန္ဓာဝိဿံ’ အတိဝေလံ န မဿိဿ’န္တိ.
၂. ဘဝိဿတိ ဿတိ ဿန္တိ ဿသိ ဿထ ဿာမိ ဿာမ ဿတေ ဿန္တေ ဿသေ ဿဝှေ ဿံ ဿာမှေ.
ဘဝိဿတိ အနာရဒ္ဓေ အတ္ထေ ဝတ္တမာနတော ကြိယတ္ထာ ဿတျာဒယော ဟောန္တိ. ဂမိဿတိ ဂမိဿန္တိ၊ ဂမိဿသိ ဂမိဿထ၊ ဂမိဿာမိ ဂမိဿာမ၊ ဂမိဿတေ ဂမိဿန္တေ၊ ဂမိဿသေ ဂမိဿဝှေ၊ ဂမိဿံ ဂမိဿာမှေ.
၃. နာမေ ဂရဟာဝိမှယေသု.
နာမသဒ္ဒေ နိပါတေ သတိ ဂရဟာယံ ဝိမှယေ စ ဂမျမာနေ ဿတျာဒယော ဟောန္တိ. ဣမေ ဟိ နာမ ကလျာဏဓမ္မာ ပဋိဇာနိဿန္တိ၊ န ဟိ နာမ ဘိက္ခဝေ တဿ မောဃပုရိသဿ ပါဏေသု အနုဒ္ဒယာ ဘဝိဿတိ၊ ကထံ ဟိ နာမ သော ဘိက္ခဝေ မောဃပုရိသော သဗ္ဗမတ္တိကာမယံ ကုဋိကံ ကရိဿတိ? တတ္ထ နာမ တွံ မောဃပုရိသ မယာ ဝိရာဂါယ ဓမ္မေ ဒေသိတေ သရာဂါယ စေတေဿသိ? အတ္ထိ နာမ တာတ သုဒိန္န အာဘိဒေါသိကံ ကုမ္မာသံ ပရိဘုဉ္ဇိဿသိ၊ အတ္ထိယေဝိဟာပိ နိန္ဒာဝဂမော. ဝိမုယေ-အစ္ဆရိယံ ဝတ ဘော အဗ္ဘုတံ ဝတ ဘော သန္တေန ဝတ ဘော ပဗ္ဗဇိတာ ဝိဟာရေန ဝိဟရန္တိ၊ ယတြ ဟိ နာမ သညီ သမာနော ဇာဂရော ပဉ္စမတ္တာနိ သကဋသတာနိ နိဿာယ နိဿာယ အဘိက္ကန္တာနိ နေဝ ဒက္ခတိ န ပန သဒ္ဒံ သောဿတိ၊ အစ္ဆရိယံ အန္ဓော နာမ ပဗ္ဗတမာရောဟိဿတိ၊ ဗဓိရော နာမ သဒ္ဒံ သောဿတိ.
၄. ဘူတေ ဤဥံ ဩတ္ထ ဣံ မှာ အာ ဦ သေ ဝှံ အ မှေ.
ဘူတေ ပရိသမတ္တေ အတ္ထေ ဝတ္တမာနတော ကြိယတ္ထာ ဤ အာဒယော ဟောန္တိ. အဂမီ အဂမုံ၊ အဂမော အဂမိတ္ထ၊ အဂမိံ အဂမိမှာ၊ အဂမာ အဂမူ၊ အဂမိသေ အဂမိဝှံ၊ အဂမ အဂမိမှေ. ဘူတသာမညဝစနိစ္ဆာယမနဇ္ဇတနေပိ ‘သုဝေါ အဟောသိ အာနန္ဒော’.
၅. အနဇ္ဇတနေ အာ ဦ ဩ တ္ထ အ မှာ တ္ထ တ္ထုံ သေ ဝှံ ဣံ မှသေ.
အဝိဇ္ဇမာနဇ္ဇတနေ ဘူတေ-တ္ထေ ဝတ္တမာနတော ကြိယတ္ထာ အာအာဒယော ဟောန္တိ.
အာဉာယျာ စ ဥဋ္ဌာနာ၊ အာဉာယျာ စ သံဝေသနာ၊
ဧသဇ္ဇတနော ကာလော၊ အဟရုဘတဍ္ဎရတ္တံ ဝါ.
အဂမာ အဂမူ၊ အဂမော၊ အဂမတ္ထ၊ အဂမ အဂမမှာ၊ အဂမတ္ထ အဂမတ္ထုံ၊ အဂမသေ အဂမဝှံ၊ အဂမိံ အဂမမှသေ. အညပဒတ္ထော ကိံ? အဇ္ဇ ဟိယျော ဝါ အဂမာသိ.
၆. ပရောက္ခေ အ ဥ ဧ တ္ထ အ မှ တ္ထ ရေ တ္ထော ဝှေါ ဣ မှေ.
အပစ္စက္ခေ ဘူတာနဇ္ဇတနေ-တ္ထေ ဝုတ္တမာနတော ကြိယာတ္ထာ အ အာဒယော ဟောန္တိ. ဇဂါမ ဇဂမု၊ ဇဂမေ ဇဂပိတ္ထ၊ ဇဂမ ဇဂမိမှ၊ ဇဂမိတ္ထ ဇဂမိရေ၊ ဇဂမိတ္ထော ဇဂမိဝှေါ၊ ဇဂမိ ဇဂမိမှေ. မူဠှဝိက္ခိတ္တဗျာသတ္တစိတ္တေန အတ္တနာပိ ကြိယာကတာဘိနိဗ္ဗတ္တိတကာလေ-နုပလဒ္ဓါ သမာနာ ဖလေနာ-နုမီယမာနာ ပရောက္ခာဝ ဝတ္ထုတော၊ တေနုတ္တမဝိသယေပိ ပယောဂသမဝေါ.
၇. ဧယျာဒေါ ဝါတိပတ္တိယံ ဿာ ဿံ သု ဿေ ဿထ ဿံ ဿာမှာ ဿထ ဿိံသု သဿေ ဿဝှေ ဿိံ ဿာမှသေ.
ဧယျာဒေါ ဝိသယေ ကြိယာတိပတ္တိယံ ဿာဒယော ဟောန္တိ ဝိဘာသာ. ဝိဓုရပ္ပစ္စယောပနိပါတတော ကာရဏဝေကလ္လတော ဝါ ကြိယာယာတိပတနမနိပ္ဖတ္တိ ကြိယာတိပတ္တိ၊ ဧတေ စ ဿာဒယော သာမတ္ထိယာတီတာနာဂတေသွေဝ ဟောန္တိ န ဝတ္တမာနေ တတြ။ ကြိယာတိပတျသမ္ဘဝါ၊ သစေ ပဌမဝယေ ပဗ္ဗဇ္ဇံ အလဘိဿာ အရဟာ အဘဝိဿာ၊ ဒက္ခိဏေန စေ အဂမိဿာ န သကဋံ ပရိယာ ဘဝိဿာ၊ ဒက္ခိဏေန စေ အဂမိဿံသု၊ အဂမိဿေ အဂမိဿထ၊ အဂမိဿံ အဂမိဿာမှာ၊ အဂမိဿထ အဂမိဿိံသု၊ အဂမိဿသေ အဂမိဿဝှေ၊ အဂမိဿိံ အဂမိဿာမှသေ၊ န သကဋံ ပရိယာဘဝိဿာ၊ ဝါတိကိံ? ဒက္ခိဏေ န စေ ဂမိဿတိ န သကဋံ ပရိယာ ဘဝိဿတိ.
၈. ဟေတုဖလေသွေယျ ဧယျုံ ဧယျာသိ ဧယျာထ ဧယျာမိ ဧယျာမ ဧထ ဧရံ ဧထော ဧယျဝှေါ ဧယျံ ဧယျာမှေ.
ဟေတုဘူတာယံ ဧလဘူတာယဉ္စ ကြိယာယံ ဝတ္တမာနတော ကြိယတ္ထာ ဧယျာဒယော ဝါ ဟောန္တိ၊ သစေ သင်္ခါရာ နိစ္စာ ဘဝေယျုံ န နိရုဇ္ဈေယျုံ၊ ဒက္ခိဏေန စေ ဂစ္ဆေယျ န သကဋံ ပရိယာဘဝေယျ၊ ဒက္ခိဏေန စေ ဂစ္ဆေယျုံ၊ ဂစ္ဆေယျာသိ ဂစ္ဆေယျာထ၊ ဂစ္ဆေယျာမိ ဂစ္ဆေယျာမ၊ ဂစ္ဆေထ ဂစ္ဆေရံ၊ ဂစ္ဆေထော ဂစ္ဆေယျဝှေါ၊ ဂစ္ဆေယျံ ဂစ္ဆေယျာမှေ၊ န သကဋံ ပရိယျာဘဝေယျ၊ ဘဝနံ ဂမနံ စ ဟေတု၊ အနိရုဇ္ဈနံ အပရိယာဘဝနံ စ ဖလံ၊ ဣဟ ကသ္မာ န ဟောတိ ‘ဟန္တီဟိ ပလာယတိ၊ ဝဿတီတိ ဓာဝတိ၊ ဟနိဿတီတိ ပလာယိဿတီ’တိ? ဣတိ သဒ္ဒေနေဝ ဟေတုဟေတုမန္တတာယ ဇောတိတတ္တာ၊ ဝါတိ ကိံ? ဒက္ခိဏေန စေ ဂမိဿတိ န သကဋံ ပရိယာဘဝိဿတိ.
၉. ပဉှပတ္ထနာဝိဓီသု.
ပဉှော=သမ္ပုစ္ဆနံ သမ္ပဓာရဏံ နိရူပဏံ ကာရိယာနိစ္ဆယနံ ပတ္ထနာ=ယာစနံ ဣဋ္ဌာသိံ ဘနဉ္စ၊ ဝိဓိ=ဝိဓာနံ နိယောဇနံ ကြိယာသု ဗျာပါရဏာ၊ သာ စ ဒုဝိဓာဝ သာဒရာနာဒရဝသေန။ ဝိသယဘေဒေန ဘိန္နာယပိ တဒုဘယာနတိဝတ္တနတော၊ ဧတေသု ပဉှာဒီသု ကြိယတ္ထတော ဧယျောဒယော ဟောန္တိ၊ ပဉှေ - ကိမာယသ္မာ ဝိနယံ ပရိယာပုဏေယျ? ဥဒါဟု ဓမ္မံ၊ ဂစ္ဆေယျံ ဝါဟံ ဥပေါသထံ န ဝါ ဂစ္ဆေယျံ၊ ပတ္ထနာယံ-လဘေယျာ-ဟံ ဘန္တေ ဘဂဝတော သန္တိကေ ပဗ္ဗဇ္ဇံ လဘေယျံ ဥပသမ္ပဒံ၊ ပဿေယျံ တံ ဝဿသတံ အရောဂံ၊ ဝိဓိမှိ-ဘဝံ ပတ္တံ ပစေယျ၊ ဘဝံ ပုညံ ကရေယျ၊ ဣဟ ဘဝံ ဘုဉ္ဇေယျ၊ ဣဟ ဘဝံ နိသီဒေယျ၊ မာဏဝကံ ဘဝံ အဇ္ဈာပေယျ၊ အနုညာပတ္တကာလေသုပိ သိဒ္ဓါဝ။ တတ္ထာပိ ဝိဓိပ္ပတီတိတော၊ အနုညာယံ-ဧဝံ ကရေယျာသိ၊ ပတ္တကာလေ-ကဋံ ကရေယျာသိ၊ ပတ္တော တေ ကာလော ကဋကရဏေ၊ ယဒိ သံဃဿ ပတ္တကလ္လံ သံဃော ဥပေါသထံ ကရေယျ၊ ဧတဿ ဘဂဝါ ကာလော ဧတဿ သုဂတ ကာလော ယံ ဘဂဝါ သာဝကာနံ သိက္ခာပဒံ ပညပေယျ၊ ပေသနေပိစ္ဆန္တိ ‘ဂါမံ တွံ ဘဏေ ဂစ္ဆေယျာသိ’.
၁၀. တု အန္တု ဟိ ထ မိ မ တံ အန္တံ ဿု ဝှေါ ဧ အာမသေ.
ပဉှာဒီသွေတေ ဟောန္တိ ကြိယတ္ထတော. ဂစ္ဆတု ဂစ္ဆန္တု၊ ဂစ္ဆာဟိ ဂစ္ဆထ၊ ဂစ္ဆာမိ ဂစ္ဆာမ၊ ဂစ္ဆတံ ဂစ္ဆန္တံ၊ ဂစ္ဆဿု ဂစ္ဆဝှေါ၊ ဂစ္ဆေ၊ ဂစ္ဆာမသေ၊ ပဉှေ-ကိန္နု ခလု ဘော ဗျာကရဏမဓီယဿု၊ ပတ္ထနာယံ-ဒဒါဟိ မေ၊ ဇီဝတု ဘဝံ၊ ဝိဓိမှိ-ကဋံ ကရောတု ဘဝံ၊ ပုညံ ကရောတု ဘဝံ၊ ဣဟ ဘဝံ ဘုဉ္ဇတု၊ ဣဟ ဘဝံ နိသီဒတု၊ ဥဒ္ဒိသတု ဘန္တေ ဘဂဝါ ဘိက္ခူနံ ပါတိမောက္ခံ၊ ပေသနေ-ဂစ္ဆ ဘဏေ ဂါမံ၊ အနုမတိယံ - ဧဝံ ကရောဟိ၊ ပတ္တကာလေ-ကာလော-ယံ တေ မဟာဝီရ ဥပ္ပဇ္ဇ မာတုကုစ္ဆိယံ.
၁၁. သတျရဟေသွေယျာဒီ.
သတ္တိယံ အရ ဟတ္ထေ စ ကြိယတ္ထာ ဧယျာဒယော ဟောန္တိ. ဘဝံ ခလု ရဇ္ဇံ ကရေယျ၊ ဘဝံ သတ္တော အရဟော.
၁၂. သမ္ဘာဝနေ ဝါ.
သမ္ဘာဝနေ ဂမျမာနေ ဓာတုနာ ဝုစ္စမာနေ စ ဧယျာဒယော ဟောန္တိ ဝိဘာသာ. အပိ ပဗ္ဗတံ သိရသာ ဘိန္ဒေယျ၊ ကြိယာတိပတ္တိယန္တု ဿာဒီ-အသနိယာပိ ဟတော နာပတိဿာ၊ သမ္ဘာဝေမိ သဒ္ဒဟာမိ အဝကပ္ပေမိ ဘုဉ္ဇေယျ ဘဝံ ဘုဉ္ဇိဿတိ ဘဝံ အဘုဉ္ဇိ ဘဝံ၊ ကြိယာတိပတ္တိယန္တု ဿာဒီ-သမ္ဘာဝေမိ နာဘုဉ္ဇိဿာ ဘဝံ.
၁၃. မာယောဂေ ဤအာအာဒီ.
မာ ယောဂေ သတိ ဤအာဒယော အာအာဒယော စ ဝါ ဟောန္တိ. မာ သု ပုနပိ ဧဝရူပမကာသိ၊ မာ ဘဝံ အဂမာ ဝနံ၊ ဝါတွေဝ? မာ တေ ကာမဂုဏေ ဘမဿု စိတ္တံ၊ မာ တွံ ကရိဿသိ၊ မာ တွံ ကရေယျာသိ၊ အသကကာလတ္ထောယမာရမ္ဘော၊ ဗုဒ္ဓေါ ဘဝိဿတီတိ ပဒန္တရသမ္ဗန္ဓေနာနာဂတကာလတာ ပတီယတေ၊ ဧဝံ ကတော ကဋော သွေ ဘဝိဿတိ၊ ဘာဝိ ကိစ္စမာသီတိ.
လုနာဟိ လုနာဟိတွေဝါယံ လုနာတိ၊ လုနဿု လုနဿုတွေဝါယံ လုနာ-တီတိ တွာဒီနမေဝေတံ မဇ္ဈိမပုရိသေကဝစနာနမာဘိက္ခညေ ဒွိဗ္ဗဝစနံ၊ ဣဒံ ဝုတ္တံ ဟောတိ ‘ဧဝ မေသ တုရိတော အညေပိ နိယောဇေန္တောဝိယ ကိရိယံ ကရောတီ’တိ၊ ဧဝံ လုနာထ လုနာထတွေဝါယံ လုနာတိ၊ လုနဝှေါ လုနဝှေါတွေဝါယံ လုနာတိ၊ တထာ ကာလန္တရေသုပိ လုနာဟိ လုနာဟိတွေဝါယံ အလုနိ၊ အလုနာ၊ လုလာဝ၊ လုနိဿတီတိ၊ ဧဝံ ဿုမှိ စ ယောဇနီယံ၊ တထာ သမုစ္စယေပိ မဌမဋ၊ ဝိဟာရမဋေတွေဝါယမဋတိ၊ မဌမဋဿု၊ ဝိဟာရမဋဿုတွေဝါယမဋတိ၊ ဗျာပါရဘေဒေ တုသာမညဝစနဿေဝ ဗျာပကတ္တာ အနုပ္ပယောဂေါ ဘဝတိ၊ ဩဒနံ ဘုဉ္ဇ၊ ယာဂုံ ပိဝ၊ ဓာနာ ခါဒေတွေဝါယ-မဇ္ဈောဟရတိ.
၁၄. ပုဗ္ဗပရစ္ဆက္ကာနမေကာနေကေသု တုမှာမှသေသေသု ဒွေ ဒွေ မဇ္ဈိမုတ္တမပဌမာ.
ဧကာနေကေသု တုမှာမှသဒ္ဒဝစနီယေသု တဒညသဒ္ဒဝစနီယေသု စ ကာရကေသု ပုဗ္ဗစ္ဆက္ကာနံ ပရစ္ဆက္ကာနံ မဇ္ဈိမုတ္တမပဌမာ ဒွေ ဒွေ ဟောန္တိ ယထာက္ကမံ ကြိယတ္ထာ၊ ဥတ္တမသဒ္ဒေါ-ယံ သဘာဝတော တတိယဒုကေ ရုဠှော၊ တွံ ဂစ္ဆသိ၊ တုမှေ ဂစ္ဆထ၊ တွံ ဂစ္ဆသေ၊ တုမှေ ဂစ္ဆဝှေ၊ အဟံ ဂစ္ဆာမိ၊ မယံ ဂစ္ဆာမ၊ အဟံ ဂစ္ဆေ၊ မယံ ဂစ္ဆာမှေ၊ သော ဂစ္ဆတိ၊ တေ ဂစ္ဆန္တိ၊ သော ဂစ္ဆတေ၊ တေ ဂစ္ဆန္တေ၊ သာမတ္ထိယာ လဒ္ဓတ္တာ အပ္ပယုဇ္ဇမာနေသုပိ တုမှာမှသေသေသု ဘဝန္တိ. ဂစ္ဆသိ၊ ဂစ္ဆထ၊ ဂစ္ဆသေ၊ ဂစ္ဆဝှေ၊ ဂစ္ဆာမိ၊ ဂစ္ဆာမ၊ ဂစ္ဆေ၊ ဂစ္ဆာမှေ၊ ဂစ္ဆတိ၊ ဂစ္ဆန္တိ၊ ဂစ္ဆတေ၊ ဂစ္ဆန္တေ.
၁၅. အာဤဿာဒီသွဉ ဝါ.
အာအာဒေါ ဤအာဒေါ ဿာ အာဒေါ စ ကြိယတ္ထဿ ဝါ အဉ ဟောတိ. ဉကာရော-နုဗန္ဓော၊ အဂမာ၊ ဂမာ၊ အဂမီ၊ ဂမီ၊ အဂမိဿာ၊ ဂမိဿာ.
၁၆. အအာဒီသွာဟော ဗြူဿ.
ဗြူဿ အာဟော ဟောတိ အအာဒီသု. အာဟ၊ အာဟု.
၁၇. ဘူဿ ဝုက.
အအာဒီသု ဘူဿ ဝုက ဟောတိ. ကကာရော-နုဗန္ဓော၊ ဥကာရော ဥစ္စာရဏတ္ထော၊ ဗဘူဝ.
၁၈. ပုဗ္ဗဿ အ.
အအာဒီသု ဒွိတ္တေ ပုဗ္ဗဿ ဘူဿ အ ဟောတိ၊ ဗဘူဝ.
၁၉. ဥဿံသွာဟာ ဝါ.
အာဟာဒေသာ ပရဿ ဥဿ အံသုဝါ ဟောတိ. အဟံသု၊ အာဟု.
၂၀. တျန္တီနံ ဋဋူ.
အာဟာ ပရေသံ တိအန္တီနံ ဋဋူ ဟောန္တိ. ဋကာရာ သဗ္ဗာဒေသတ္ထာ၊ အာဟ၊ အာဟု၊ အတောယေဝ စ ဉာပကာ တိအန္တီသု စ ဗြူဿာ-ဟော.
၂၁. ဤအာဒေါ ဝစဿောမ.
ဤအာဒီသု ဝစဿ ဩမ ဟောတိ. မကာရော-နုဗန္ဓော၊ အဝေါစ၊ ဤအာဒေါတိ ကိံ? အဝစာ.
၂၂. ဒါဿ ဒံ ဝါ မိမေသွဒွိတ္တေ.
အဒွိတေ ဝတ္တမာနဿ ဒါဿ ဒံ ဝါ ဟောတိ မိမေသု. ဒမ္မိ ဒေမိ၊ ဒမ္မ ဒေမ၊ အဒွိတ္တေတိ ကိံ? ဒဒါဓိ ဒဒါမ.
၂၃. ကရဿ သောဿ ကုံ.
ကရဿ သဩကာရဿ ကုံ ဝါ ဟောတိ မိမေသု. ကုမ္မိ ကုမ္မ၊ ကရောမိ ကရောမ.
၂၄. ကာ ဤအာဒီသု.
ကရဿ သဩကာရဿ ကာ ဟောတိ ဝါ ဤအာဒီသု. အကာသိ အကရိ၊ အကံသု အကရိံသု၊ အကာ အကရာ.
၂၅. ဟာဿ၊ စာဟင ဿေန.
ကရဿ သောဿ ဟာဿ စ အာဟင ဝါ ဟောတိ ဿေန သဟ. ကာဟတိ ကရိဿတိ၊ အကာဟာ အကရိဿာ၊ ဟာဟတိ ဟာယိဿတိ၊ အဟာဟာ အဟာယိဿာ.
၂၆. လဘဝသစ္ဆိဒဘိဒရုဒါနံ စ္ဆင.
လဘာဒီနံ စ္ဆင ဝါ ဟောတိ ဿေနသဟ. အလစ္ဆာ အလဘိဿာ၊ လစ္ဆတိ လဘိဿာတိ၊ အဝစ္ဆာ အဝသိဿာ၊ ဝစ္ဆတိ ဝသိဿတိ၊ အစ္ဆေစ္ဆာ အစ္ဆိန္ဒိဿာ၊ ဆေစ္ဆတိ ဆိန္ဒိဿတိ၊ အဘေစ္ဆာ အဘိန္ဒိဿာ၊ ဘေစ္ဆတိ ဘိန္ဒိဿတိ၊ အရုစ္ဆာ အရောဒိဿာ၊ ရုစ္ဆတိ ရောဒိဿတီ၊ အညသ္မိမ္ပိ ဆိဒဿ ဝါ စ္ဆင ယောဂဝိဘာဂါ၊ အစ္ဆေစ္ဆုံ အစ္ဆန္တိံသု၊ အညေသဉ္စ ဂစ္ဆံ ဂစ္ဆိဿံ.
၂၇. ဘုဇ မုစ ဝစ ဝိသာနံ က္ခင.
ဘုဇာဒီနံ က္ခင ဝါ ဟောတိ ဿေန သဟ. အဘောက္ခာ အဘုဉ္ဇိဿာ၊ ဘောက္ခတိ ဘုဉ္ဇိဿတိ၊ အမောက္ခာ အမုဉ္စိဿာ၊ မောက္ခတိမုဉ္စိဿတိ၊ အဝက္ခာ အဝစိဿာ၊ ဝက္ခတိ ဝစ္စိဿတိ၊ ပါဝေက္ခာ ပါဝိသိဿာ၊ ပဝေက္ခတိ ပဝိသိဿတိ၊ ဝိသဿာ-ညသ္မိမ္ပိ ဝါ က္ခင ယောဂဝိဘာဂါ ပါဝေက္ခိ၊ ပါဝိသိ.
၂၈. အာဤအာဒီသု ဟရဿာ.
အာအာဒေါ ဤအာဒေါ အ ဟရဿ အာ ဟောတိ ဝါ. အဟာ အဟရာ၊ အဟာသိ အဟရိ.
၂၉. ဂမိဿ.
အာအာဒေါ ဤအာဒေါ အ ဂမိဿ အာ ဟောတိ ဝါ. အဂါ အဂမာ၊ အဂါ အဂမီ.
၃၀. ဍံသဿ စ ဆင.
ဍံသဿ ဂမိဿ စ ဆင ဝါ ဟောတိ အာဤအာဒီသု. အဍဉ္ဆာ အဍံသာ၊ အဍဉ္ဆိ အဍံသီ၊ အဂဉ္ဆာ အဂစ္ဆာ၊ အဂဉ္ဆိ အဂစ္ဆီ.
၃၁. ဟူဿ ဟေဟေဟိဟောဟိ ဿတျာဒေါ.
ဟူဿ ဟေအာဒယော ဟောန္တိ ဿတျာဒေါ. ဟေဿတိ၊ ဟေဟိဿတိ၊ ဟောဟိဿတိ.
၃၂. ဏာနာသု ရဿော.
က္ဏာက္နာသု ကြိယတ္ထဿ ရဿော ဟောတိ. ကိဏာတိ၊ ဓုနာတိ.
၃၃. အာ ဤ ဉု မှာ ဿာ ဿမှာနံ ဝါ.
ဧသံ ဝါ ရဿော ဟောတိ. ဂမ ဂမာ၊ ဂမိ ဂမီ၊ ဂမု ဂမူ၊ ဂမိမှ ဂမိမှာ၊ ဂမိဿ ဂမိဿာ၊ ဂမိဿမှ ဂမိဿမှာ.
၃၄. ကုသရုဟေဟီဿ ဆိ.
ကုသာ ရုဟာ စ ပရဿ ဤဿ ဆိ ဝါ ဟောတိ. အက္ကောစ္ဆိ အက္ကောသိ၊ အဘိရုစ္ဆိ အဘိရုဟိ.
၃၅. အ ဤ ဿာအာဒီနံ ဗျဉ္ဇနဿိဉ.
ကြိယတ္ထာ ပရေသံ အအာဒီနံ ဤအာဒီနံ ဿအာဒီနဉ္စ-ဗျဉ္ဇနဿ ဣဉ ဟောတိ ဝိဘာသာ. ဗဘုဝိတ္ထ၊ အဘဝိတ္ထာ၊ အနုဘဝိဿာ၊ အနုဘဝိဿတိ အနုဘောဿတိ ဟရိသတိ ဟဿတိ၊ ဧတေသန္တိ ကိံ? ဘဝတိ၊ ဗျဉ္ဇနဿာတိ ကိံ? ဗဘူဝ.
၃၆. ဗြူတော တိဿီဉ.
ဗြူတော ပရဿ တိဿ ဤဉ ဝါ ဟောတိ. ဗြဝီတိ၊ ဗြူတိ.
၃၇. ကျဿ.
ကြိယတ္ထာ ပရဿ ကျဿ ဤဉ ဝါ ဟောတိ. ပစီယတိ၊ ပစ္စတိ.
၃၈. ဧယျာထ ဿေ အ အာ ဤထာနံ ဩ၊ အ၊ အံ၊ တ္ထ၊ တ္ထော၊ ဝှေါက.
ဧယျာထာဒီနံ ဩအာဒယော ဝါ ဟောန္တိ ယထာက္ကမံ. တုမှေ ဘဝေယျာထော ဘဝေယျာထ၊ တွံ အဘဝိဿ အဘဝိဿေ၊ အဟံ အဘဝံ အဘဝ၊ သော အဘဝိတ္ထ အဘဝါ၊ သော အဘဝိတ္ထော၊ အဘဝီ၊ တုမှေ ဘဝထဝှေါ ဘဝထ၊ အာသဟစရိတောဝ အကာရော ဂယှတေ၊ ထော ပန-န္တေ နိဒ္ဒေသာ တွာဒိသမ္ဗန္ဓီယေဝ၊ တဿေဝ ဝါ နိဿိတတ္တာ၊ နိဿယကရဏမ္ပိ ဟိ သုတ္တကာရာစိဏ္ဏံ.
၃၉. ဥံဿိံ သွံသု.
ဥမီစ္စဿ ဣံသု အံသု ဝါ ဟောန္တိ. အဂမိံသု၊ အဂမံသု၊ အဂမုံ.
၄၀. ဧဩတ္တာ သုံ.
ဧအာဒေသတော ဩအာဒေသတော စ ပရဿ ဥမိစ္စဿ သုံ ဝါ ဟောတိ. နေသုံ၊ နယိံသု၊ အဿောသုံ၊ အဿုံ၊ အာဒေသတ္တာချာပနတ္ထံတ္တဂ္ဂဟဏံ.
၄၁. ဟူတော ရေသုံ.
ဟူတော ပရဿ ဥမိစ္စဿ ရေသုံ ဝါ ဟောတိ. အဟေသုံ၊ အဟဝုံ.
၄၂. ဩဿ အ ဣ တ္ထ တ္ထော.
ဩဿ အအာဒယော ဝါ ဟောန္တိ. တွံ အဘဝ၊ အဘဝိ၊ အဘဝိတ္ထ၊ အဘဝိတ္ထော အဘဝေါ.
၄၃. သိ.
ဩဿ သိ ဝါ ဟောတိ. အဟောသိ တွံ အဟုဝေါ.
၄၄. ဒီဃာ ဤဿ.
ဒီဃတော ပရဿ ဤဿ သိ ဝါ ဟောတိ. အကာသိ အကာ၊ အဒါသိ အဒါ.
၄၅. မှာတ္ထာနမုဉ.
မှာတ္ထာနမှဉ ဝါ ဟောတိ. အဂမှမှာ အဂမိမှာ၊ အဂမုတ္ထ အဂမိတ္ထ.
၄၆. ဣံဿ စ သိဉ.
ဣမိစ္စဿ သိဉ ဝါ တောတိ မှာတ္ထာနဉ္စ ဗဟုလံ. အကာသိံ အကရိံ၊ အကာသိမှာ အကရိမှာ အကာသိတ္ထ အကရိတ္ထ.
၄၇. ဧယျုံဿုံ.
ဧယျုမိစ္စဿ ဉံ ဝါ ဟောတိ. ဂစ္ဆုံ ဂစ္ဆေယျုံ.
၄၈. ဟိဿ-တော လောပေါ.
အတော ပရဿ ဟိဿ လောပေါ ဝါ ဟောတိ. ဂစ္ဆ ဂစ္ဆာဟိ၊ အတောတိ ကိံ? ကရောဟိ.
၄၉. ကျဿ ဿေ.
ကျဿ ဝါ လောပေါ ဟောတိ ဿေ. အနွဘဝိဿာ အနွဘူယိဿာ၊ အနုဘဝိဿတိ အနုဆူယိဿတိ.
၅၀. အတ္ထိတေယျာဒိစ္ဆန္နံ သ သု သ သထ သံ သာမ.
အသ=ဘုဝိစ္စသ္မာ ပရေသံ ဧယျာဒိစ္ဆန္နံ သာဒယော ဟောန္တိ ယထာက္ကမံ. အဿ၊ အဿု၊ အဿ၊ အဿထ၊ အဿံ၊ အဿာမ.
၅၁. အာဒိဒွိန္နမိယာဣယုံ.
အတ္ထိတေယျာဒိစ္ဆန္နံ အာဒိဘူတာနံ ဒွိန္နံ ဣယာ ဣယုံ ဟောန္တိ ယထာက္ကမံ. သိယာ၊ သိယုံ.
၅၂. တဿ ထော.
အတ္ထိတော ပရဿ တကာရဿ ထော ဟောတိ. အတ္ထိ၊ အတ္ထု.
၅၃. သိဟိသွဋ.
အတ္ထိဿ အဋ ဟောတိ သိဟိသု၊ ဋော သဗ္ဗာဒေသတ္ထော. အသိ အဟိ.
၅၄. မိမာနံ ဝါ မှိမှာ စ.
အတ္ထိသ္မာ ပရေသံ မိမာနံ မှိမှာ ဝါ ဟောန္တိ၊ တံသန္နိယောဂေနအတ္ထိဿ အဋ စ. အမှိ အသ္မိ၊ အမှ အသ္မ.
၅၅. ဧသု သိ.
ဧသု မိမေသု အတ္ထိဿ သကာရော ဟောတိ. အသ္မိ အသ္မ၊ ပရရူပဗာဓနတ္ထံ.
၅၆. ဤအာဒေါ ဒီဃော.
အတ္ထိဿ ဒီဃော ဟောတိ ဤအာဒိမှိ. အာသိ၊ အာသုံ၊ အာသိ၊ အာသိတ္ထ၊ အာသိံ၊ အာသိံ မှာ.
၅၇. ဟိမိမေသွဿ.
အကာရဿ ဒီဃော ဟောတိ ဟိမိမေသု. ပစာဟိ၊ ပစာမိ၊ ပစာမ၊ မုယှာမိ.
၅၈. သကာ ဏာဿ ခ ဤအာဒေါ.
သကသ္မာ က္ဏာဿခေါဟောတိ ဤအာဒီသု. အသက္ခိ၊ အသက္ခိံသု.
၅၉. ဿေ ဝါ.
သကသ္မာ က္ဏဿခေါ ဝါ ဟောတိ ဿေ. သက္ခိဿာ သက္ကုဏိဿာ၊ သက္ခိဿတိ၊ သက္ကုဏိဿတိ.
၆၀. တေသု သုတော က္ဏောက္ဏာနံ ရောဋ.
တေသု ဤအာဒိဿေသု သုတော ပရေသံ က္ဏောက္ဏာနံ ရောဋ ဝါ ဟောတိ. အဿောသိ အသုဏိ၊ အဿောဿာ အသုဏိဿာ၊ သောဿတိ သုဏိဿတိ.
၆၁. ဉာဿ သနာဿ နာယော တိမှိ. သနာဿ ဉာဿ နာယော ဝါ ဟောတိ တိမှိ. နာယတိ၊ ဇာနာတိ.
၆၂. ဉာမှိ ဇံ.
ဉာဒေသေ သနာဿ ဉာဿ ဇံ (ဝါ) ဟောတိ. ဇညာ (ဇာနေယျ).
၆၃. ဧယျာဿိယာဉာ ဝါ.
ဉာတော ဧယျာဿ ဣယာဉာ ဟောန္တိ ဝါ. ဇာနိယာ၊ ဇညာ ဇာနေယျ.
၆၄. ဤဿတျာဒီသု က္နာလောပေါ.
ဤအာဒေါ ဿတျာဒေါ စ ဉာတော က္နာလောပေါ ဝါ ဟောတိ. အညာသိ အဇာနိ၊ ဉဿတိ ဇာနိဿတိ.
၆၅. ဿဿ ဟိ ကမ္မေ.
ဉာတော ပရဿ ဿဿ ဟိ ဝါ ဟောတိ ကမ္မေ. ပညာယိဟိတိ ပညာယိဿတိ.
၆၆. ဧတိသ္မာ.
ဧတိသ္မာ ပရဿ ဿဿ ဟိ ဟောတိ ဝါ. ဧဟိတိ ဧဿတိ.
၆၇. ဟနာ ဆခါ.
ဟနာ ဿဿ ဆခါ ဝါ ဟောန္တိ. ဟဉ္ဆာမိ ဟနိဿာမိ၊ ပဋိဟင်္ခါမိ ပဋိဟနိဿာမိ.
၆၈. ဟာတော ဟ.
ဟာတော ပရဿ ဿဿ ဟ ဟောတိ ဝါ. ဟာဟတိ ဇဟိဿတိ.
၆၉. ဒက္ခ ခ ဟေဟိ ဟောဟီဟိ လောပေါ.
ဒက္ခာဒီဟိ အာဒေသေဟိ ပရဿ ဿဿ လောပေါ ဝါ ဟောတိ. ဒက္ခတိ ဒက္ခိဿတိ၊ သက္ခတိ သက္ခိဿတိ၊ ဟေဟိတိ ဟေဟိဿတိဟောဟိတိ ဟောဟိဿတိ.
၇၀. ကယိရေယျဿေယျုမာဒီနံ.
ကယိရာ ပရဿ ဧယျုမာဒီနံ ဧယျဿ လောပေါ ဟောတိ. ကယိရုံ၊ ကယိရာသိ၊ ကယိရာထ၊ ကဟိရာမိ၊ ကယိရာမ.
၇၁. ဋာ.
ကယိရာ ပရဿ ဧယျဿ ဋာ ဟောတိ. သော ကယိရာ.
၇၂. ဧထဿာ.
ကယိရာ ပရဿ ဧထဿ အာ ဟောတိ. ကယိရာထ.
၇၃. လဘာ ဣံ ဤနံ ထံ ထာ ဝါ.
လဘသ္မာ ဣံဤဣစ္စေသံ ထံထာ ဟောန္တိ ဝါ. အလတ္ထံ အလဘိံ၊ အလတ္ထ အလဘိ.