ပဉ္စမကဏ္ဍ

၄၂. ၊ ၃၂. ဂေါသရေ ပုထဿာဂမော ကွစိ.

ပုထဣစ္စေတဿ အန္တေ သရေ ပရေ ကွစိ ဂကာရာဂမော ဟောတိ.

ပုထဂေ ဝ.

၄၃. ၊ ၃၃. ပါဿ စန္တော ရဿော.

ပါဣစ္စေတဿ အန္တေ သရေ ပရေ ကွစိ ဂကာရာဂမော ဟောတိ၊ အန္တော စ သရော ရဿော ဟောတိ.

ပဂေဝ ဝုတျဿ.

ကွစီတိ ကသ္မာ? ပါ ဧဝ ဝုတျဿ.

၄၄. ၊ ၂၄. အဗ္ဘော အဘိ.

အဘိဣစ္စေတဿ သရေ ပရေ အဗ္ဘာဒေသော ဟောတိ. အဗ္ဘုဒီရိတံ၊ အဗ္ဘုဂ္ဂစ္ဆတိ.

၄၅. ၊ ၂၅. အဇ္ဈော အဓိ.

အဓိဣစ္စေတဿ သရေ ပရေ အဇ္ဈာဒေသော ဟောတိ.

အဇ္ဈောကာသေ၊ အဇ္ဈာဂမာ.

၄၆. ၊ ၂၆. တေ န ဝါ ဣဝဏ္ဏေ.

တေ စ ခေါ အဘိအဓိဣစ္စေတေ ဣဝဏ္ဏေ ပရေ အဗ္ဘော အဇ္ဈောဣတိဝုတ္တရူပါ နံ ဟောန္တိ ဝါ.

အဘိစ္ဆိတံ၊ အဓီရိတံ.

ဝါတိ ကသ္မာ? အဗ္ဘီရိတံ၊ အဇ္ဈိဏမုတ္တော.

၄၇. ၊ ၂၃. အတိဿ စန္တဿ.

အတိဣစ္စေတဿ အန္တဘူတဿ တိသဒ္ဒဿ ဣဝဏ္ဏေ ပရေ ‘‘သဗ္ဗော စံ တီ’’တိ ဝုတ္တရူပံ န ဟောတိ.

အတီသိဂဏော၊ အတီရိတံ.

ဣဝဏ္ဏေတိ ကသ္မာ? အစ္စန္တံ.

၄၈. ၊ ၄၃. ကွစိ ပဋိ ပတိဿ.

ပတိဣစ္စေတဿ သရေ ဝါ ဗျဉ္ဇနေ ဝါ ပရေ ကွစိ ပဋိအာဒေသော ဟောတိ.

ပဋဂ္ဂိ ဒါတဗ္ဗော၊ ပဋိဟညတိ.

ကွစီတိ ကသ္မာ? ပစ္စန္တိမေသု ဇနပဒေသု၊ ပတိလီယတိ၊ ပတိရူပဒေသဝါသော စ.

၄၉. ၊ ၄၄. ပုထဿု ဗျဉ္ဇနေ.

ပုထဣစ္စေတဿ အန္တော သရော ဗျဉ္ဇနေ ပရေ ဥကာရော ဟောတိ.

ပုထုဇ္ဇနော၊ ပုထုဘူတံ.

အန္တဂ္ဂဟဏေန အပုထဿာပိ သရေ ပရေ အန္တဿ ဥကာရော ဟောတိ၊ မနုညံ.

၅၀. ၊ ၄၅. ဩ အဝဿ.

အဝဣစ္စေတဿ ဗျဉ္ဇနေ ပရေ ကွစိ ဩကာရော ဟောတိ.

အန္ဓကာရေန ဩနဒ္ဓါ.

ကွစီတိ ကသ္မာ? အဝသုဿတု မေ သရီရေ မံသလောဟိတံ.

၅၁. ၊ ၅၉. အနုပဒိဋ္ဌာနံ ဝုတ္တယောဂတော.

အနုပဒိဋ္ဌာနံ ဥပသဂ္ဂနိပါတာနံ သရသန္ဓီဟိ ဗျဉ္ဇနသန္ဓီဟိ ဝုတ္တသန္ဓီဟိ စ ယထာယောဂံ ယောဇေတဗ္ဗံ.

ပါပနံ၊ ပရာယဏံ၊ ဥပါယနံ၊ ဥပါဟနံ၊ နျာယောဂေါ၊ နိဂုပဓိ၊ အနုဗောဓော၊ ဒုဝူပသန္တံ၊ သုဝူပသန္တံ၊ ဒွါလယော၊ သွာလယော၊ ဒုရာချာတံ၊ သွာချာတော၊ ဥဒီရိတံ၊ သမုဒ္ဒိဋ္ဌံ၊ ဝိယဂ္ဂံ၊ ဝိဇ္ဈဂ္ဂံ၊ ဗျဂ္ဂံ၊ အဝယာဂမနံ၊ အနွေတိ၊ အနုပဃာတော၊ အနစ္ဆရိယံ၊ ပရိယေသနာ၊ ပရာမာသော၊ ဧဝံ သရေ စ ဟောန္တိ.

ပရိဂ္ဂဟော၊ ပဂ္ဂဟော၊ ပက္ကမော၊ ပရက္ကမော၊ နိက္ကမော၊ နိက္ကသာဝေါ၊ နိလ္လယနံ၊ ဒုလ္လယနံ၊ ဒုမ္ဘိက္ခံ၊ ဒုဗ္ဗုတ္တံ၊ သန္ဒိဋ္ဌံ၊ ဒုဂ္ဂဟော၊ ဝိဂ္ဂဟော၊ နိဂ္ဂတော၊ အဘိက္ကမော၊ ပဋိက္ကမော၊ ဧဝံ ဗျဉ္ဇနေ စ. သေသာ သဗ္ဗေ ယောဇေတဗ္ဗာ.

ဣတိ သန္ဓိကပ္ပေ ပဉ္စမော ကဏ္ဍော.

သန္ဓိကပ္ပေါ နိဋ္ဌိတော.